1 Raica oqo, au na vosa mada vei ira na ivovo ni tamata oqo era a vakabulai, kevaka ena solia vei ira na Kalou na noqu vosa me ra kila kina na kedra itukutuku na nodra qase, io, au sa vosa vei kemudou na ivovo ni mataqali i Isireli; ka sa vakaoqo na noqu vosa:

2 Mo dou kila ni dou sa mataqali i Isireli.

3 Ia mo dou kila tale ga, ni sa dodonu mo dou veivutuni, kevaka e sega dou na sega ni rawa ni vakabulai.

4 Mo dou kila ni sa dodonu mo dou biuta tani na nomudou iyaragi ni valu, ka kakua sara ni taleitaka na vakadavei ni dra, ka kakua tale ni tarai ira ka vakavo ga kevaka sa vakaroti kemudou kina na Kalou.

5 Sa dodonu mo dou kila na kedra itukutuku na nomudou qase, ka veivutunitaka na nomudou ivalavala ca kei na nomudou caka cala, ka vakabauti Jisu Karisito, ni sai koya na Luve ni Kalou, ka ra a vakamatei koya na Jiu, ka sa tucake tale ena kaukauwa i Tamada, ka sa qaqa kina ko koya mai na ibulubulu; mai vei koya tale ga sa takali kina na bati gaga nei mate.

6 A sa rawa ena vukuna na tucake tale mai na mate, ka ra na vakaturi cake kina na tamata kecega ka tu ena mata ni nona itikotiko ni veilewai.

7 Sa mai rawata na nodra sereki na kai vuravura, ia ko koya sa kunei ena siga ni lewa ni sa tawacala, ena tiko ena nona iserau na Kalou ena nona matanitu, ka na duavata kei ira na veimatasere mai cake me ra lagata tiko ga na nodra vakacaucau ki vua na Tamada, kei na Luvena, kei na Yalo Tabu, ka ratou sa Kalou e duabau ga, ena marau ka sega na kena iyalayala.

8 O koya mo dou veivutuni kina ka papitaisotaki ena yaca i Jisu, ka muria na kosipeli i Karisito, ka na soli yani vei kemudou, sega wale ga ena itukutuku oqo ia ena itukutuku tale ga ena lako yani vei ira na kai Matanitu Tani mai vei ira na Jiu, ka ra na kauta yani vei kemudou ko ira na Matanitu tani.

9 Raica, sa volai na itukutuku oqo ena inaki mo dou vakabauta kina na itukutuku ko ya; ia kevaka dou sa vakabauta na itukutuku ko ya, dou na vakabauta tale ga na itukutuku oqo; ia kevaka dou sa vakabauta na itukutuku oqo, dou na kila kina na veika baleti ira na nomudou qase kei na veicakacaka talei era a vakayacori ena kaukauwa ni Kalou ena kedra maliwa.

10 Ia dou na kila tale ga ni dou sa dua na ivovo ni kawa i Jekope; ka dou sa wili vata kina kei ira na tamata ni imatai ni veiyalayalati; ia kevaka dou sa vakabauti Karisito, ka papitaisotaki, taumada ena wai, qai tarava ena bukawaqa kei na Yalo Tabu, me muria na noda iVakabula me vaka sa vakarota vei keda ko koya, ena vinaka vei kemudou ena siga ni lewa. Emeni.