Isi 7
Mọmọn wee kpọọ ndị Leman nke ụbọchị ikpe-azụ oku ikwere na Kraịst, nabata ozi-ọma ya, ma ka azọpụta ha—Ndị nile kwere na Bible ga e kwere kwa na Akwụkwọ nke Mọmọn. Ihe dịka afọ 385 mgbe a mụsịrị Kraịst.
1 Ma ugbua, lee, a ga m ekwu ihe ole na ole nye ndị fọdụrụ na ndị a ahapụrụ, ọbụrụ na Chineke ga-enye ha okwu m nile, ka ha wee mata maka ihe nile nke ndị nna ha; e, a na m agwa unu, unu ndị fọdụrụ nke ụlọ nke Israel, ma ndị a bụ okwu ndị ahụ nke m na ekwu:
2 Mata nụ na unu bụ nke ụlọ nke Israel.
3 Mata nụ na unu ga-abịarịrị na nchegharị, ma ọdịghị otu a agaghị azọpụta unu.
4 Mata nụ na unu ga-atọgbọrịrị ngwa-ọgụ unu nile nke agha, ma kwusị inwe mmasị nʼịkwafu ọbara, ma ghara iwerekwa ha ọzọ, ma ọbụghị na Chineke ga-enye unu iwu.
5 Mata nụ na unu ga-abịarịrị na mmata nke ndị nna unu, ma chegharia site na mmehie unu nile na ajọọ-omume nile, ma kwere na Jisus Kraịst, na ọ bụ Ọkpara nke Chineke, ma na ndị Juu gburu ya, ma site nʼike nke Nna ahụ o biliwo ọzọ, nʼebe nke o ritaworo mmeri ahụ nʼebe ili dị; na kwa n’ime ya ka e lomiri ihe ọgbụgba nke ọnwụ.
6 Ma ọ na-eweta na mmezu mbilite nʼọnwụ nke ndị nwụrụ anwụ, site nʼebe a ga-esirịrị kulite mmadụ ka o guzoro nʼiru oche-ikpe ya.
7 Ma o wetawo na mmezu mgbapụta nke ụwa, ya mere onye nke a chọpụtara nʼikpe amaghị ya nʼiru ya nʼụbọchị ikpe ahụ a ga-enye ya ibi nʼebe Chineke nọ nʼala-eze ya, ịbụ abụ otuto akwụsịghị-akwụsị ya na otu-ndị-abụ nile nọ nʼelu, nye Nna ahụ, na nye Ọkpara ahụ, na nye mụọ Nsọ ahụ, ndị bụ otu Chineke, nʼọnọdụ an̄ụrị nke na-enweghị ngwụcha.
8 Ya mere chegharịa, ma ka e mee unu baptism nʼaha nke Jisus, ma jidesie ozi-ọma nke Kraịst ahụ ike, nke a ga-edozi nʼiru unu, ọbụghị nanị nʼakụkọ-ndekọta nke a mana kwa nʼakụkọ-ndekọta nke ga-abịaru ndị Jentaịlụ site nʼaka ndị Juu, bụ akụkọ-ndekọta nke ga-esite nʼaka ndị Jentaịlụ bịaruo unu.
9 N’ihi na lee, nke a ka e dere maka ebum-nʼobi na unu ga-ekwere nke ahụ; ma ọbụrụ na unu kwere nke ahụ unu ga-ekwere kwa nke a; ma ọ bụrụ na unu kwere nke a unu ga-amata gbasara ndị nna unu, na kwa ọrụ ịtụ-nʼanya nile nke e mere site nʼike nke Chineke nʼetiti ha.
10 Ma unu ga-amata kwa na unu bụ ndị fọdụrụ nke mkpụrụ-afọ nke Jekọb; ya mere a gụnyere unu nʼetiti ndị nke ọgbụgba-ndụ mbụ; ma ọ bụrụ na ọ dị otu a na unu kwere na Kraịst, ma e mee unu baptism, mbụ jiri mmiri, ọzọ jiri ọkụ na jiri Mụọ Nsọ, na-eso ụkpụrụ nke Onye-nzọpụta anyị, dịka ihe ahụ nke o nyeworo anyị nʼiwu, ọ ga-adịrị unu mma nʼụbọchị nke ikpe. Amen.