1 Anajwan ut k’ehomaq reetal, tinwaj raj aatinak ka’ch’inaq reheb’ li rela’ li tenamit a’in li kolb’ileb’ xyu’am, wi taa’uxq naq li Dios tixk’e reheb’ li waatin, re te’xnaw chirix li k’a’aq re ru reheb’ lix yuwa’eb’; relik chi yaal, nekexwaatina laa’ex, ex rela’ lix junkab’al laj Israel; ut a’in li aatin ninye:

2 Chenawaq naq laa’ex xkomonex lix junkab’al laj Israel.

3 Chenawaq naq tento texchalq sa’ li jalb’a-k’a’uxlej, malaj ut moko texruuq ta chi kole’k.

4 Chenawaq naq tento teekanab’ lee k’anjeleb’aal re pleet, ut ink’a’ chik taasaho’q eech’ool rik’in xhoyb’al li kik’, ut ink’a’ chik teechap, ka’ajwi’ naq li Dios texxtaqla.

5 Chenawaq naq tento texk’ame’q chixnawb’al chirixeb’ lee yuwa’, ut teejal eek’a’uxl chirix chixjunil lee maak ut maa’usilal, ut teepaab’ li Jesukristo, naq a’an li Ralal li Dios, ut naq kikamsiik xb’aaneb’ laj Judio, ut xb’aan xwankil li Yuwa’b’ej kiwakli wi’chik, ut chi jo’kan kixtaw xq’axb’al ru li muqleb’aal kamenaq; ut jo’kan ajwi’ rik’in a’an sub’b’il rib’ lix may li kamk.

6 Ut a’an naxk’e chi uxmank lix waklijikeb’ li kamenaq chi yo’yo, li xb’aan ajwi’ tento taawaklesiiq li winq chi xaqliik chiru lix raqleb’aal aatin.

7 Ut a’an kixk’e chi uxmank lix tojb’al rix li ruchich’och’, xb’aan wi’ ani natawman chi maak’a’ xmaak chiru a’an sa’ xkutankil li raqb’a-aatin, k’eeb’il re wank chiru li Dios sa’ li rawa’b’ejihom, re naq tixb’icha li nimank-u chi ink’a’ naxkanab’, rochb’eeneb’ li teep chi aj b’ichanel taqe’q, chiru li Yuwa’b’ej, ut chiru li K’ajolb’ej, ut chiru li Santil Musiq’ej, a’aneb’ junaj chi Dios, sa’ jun wanjik re sahil ch’oolejil li maak’a’ roso’jik.

8 Jo’kan ut chejal eek’a’uxl, ut chikub’eeq eeha’ sa’ lix k’ab’a’ li Jesus, ut chechap eerib’ chiru lix evangelio li Kristo, li taak’ojob’amanq cheru, moko ka’aj ta wi’ sa’ li tz’iib’anb’il esil a’in, jo’kan aj b’an wi’ sa’ li tz’iib’anb’il esil li taawulaq rik’ineb’ laj Gentil chi chalenaq chaq rik’ineb’ laj Judio, ut a’ tz’iib’anb’il esil a’an, taachalq rik’ineb’ chaq laj Gentil choq’ eere laa’ex.

9 Xb’aan naq k’ehomaq reetal, tz’iib’anb’il a’in re naq texruuq chixpaab’ankil a’an; ut wi nekepaab’ a’an, teepaab’ ajwi’ a’in; ut wi nekepaab’ a’in, teenaw chirixeb’ lee yuwa’, ut jo’kan ajwi’ li sachb’a-ch’oolejil k’anjel li kik’anjelaman chaq rik’in lix wankil li Dios sa’ xyanqeb’.

10 Ut teenaw ajwi’ naq laa’ex jun rela’ li riyajil laj Jakob; jo’kan naq k’eeb’ilex sa’ ajl sa’ xyanqeb’ li tenamit re li xb’een sumwank; ut wi taa’uxq naq teepaab’ li Kristo, ut taakub’eeq eeha’, xb’een wa rik’in ha’, ut chirix a’an rik’in xam ut rik’in li Santil Musiq’ej, rik’in xb’aanunkil lix b’aanuhom li qaKolonel, jo’ chanru li k’a’ru kooxtaqla wi’, usaq choq’ eere sa’ xkutankil li raqb’a-aatin. Amen.