1 Ac inge, nga oacyacpac sramsram nuh selos suc tiac luhlahlfongi ke Kraist.

2 Liye, yac kowos ac luhlahlfongi ke lwen se ac fahsriyuck kowos—liye, ke pacl se Leum El ac tuhkuh, ahok, finne lwen na yohk srihpac se ke facluh ac fah lihmlihmuh oacna sie ma sihmlac lihmlihm, ac fohk uh muhlwesrlac ke fol upac, ahok, ke lwen yohk srihpac sac kowos fah utucklac in tu ye muhtuhn Lahm luhn God—na yac kowos ac fahk lah wacngihn God?

3 Na yac kowos ac srwackna lahfwekihn Kraist, kuh yac kowos kuh in liye Lahm luhn God? Yac kowos nuhnkuh tuh kowos ac fah weluhl muhta ye etuh luhn mwacta koluk lowos? Yac kowos nuhnkuh muh kowos kuh in engan in muhta yurun El suc muhtahl, ke nguhnuwos kweoklacna ke etuh luhn mwacta koluk tuh kowos ahkkolukye masap Lal?

4 Liye, nga fahk nuh suwos lah kowos ac kweok liki na in muhta yurun sie God muhtahl ac suwohs, ye etuh luhn fohkfohkiyowos ye muhtahl, liki na kowos muhta wi nguhn ma lihsyucklac nuh ke hell.

5 Tuh liye, ke kowos fah utuckuh in liye kohflohfohl lowos ye muhtuhn God, ac oacyacpac wolacna luhn God, ac muhtahliyacl Jisus Kraist, ma inge ac esuhkwack sie e ma tiac kuh in kunlac nuh fowos.

6 O na kowos mwet suhlahlahlfongi, kowos in forlah nuh sin Leum; kwacfe yohk nuh sin Pahpah ke inen Jisus, tuh sahp kowos in kuh in sukokyak wacngihn ma koluk la, nwacsnwacs, oaskuh, ac fasrfasr, ahknwacsnwacsyeyucklac ke srah luhn Lahm, ke lwen na yohk srihpac ac sahflah sac.

7 Ac nga sifilpac sramsram nuh suwos suc lahfwekihn fwackyuck luhn God, ac fahk lah ma inge tui tilac orek, lah wacngihn fwackyuck, kuh kahs in pahluh, kuh mwe sang, kuh unweyuck, kuh kahskahs ke lohuh, ac luhngasyacn lohuh;

8 Liye nga fahk nuh suwos, el suc lahfwekihn ma inge el tiac etuh wosasuc luhn Kraist; ahok, el tiacna riti ma suhmuhslah; fin ohinge, el tiacna kahlwem kac.

9 Tuh yac kuht tiac riti lah God El oacna sie ekweah, misenge, ac ne tok ma pahtpaht, ac Kacl wacngihn kuhtwena ma eklac kuh nguhnan eklac?

10 Ac inge, kowos fin motkweack nuh suwos sifacna sie god suc ekyek, ac suc oasr nguhnan eklac la, na yac kowos motkweack nuh suwos sifacna sie god suc tiac God luhn ma usrnguck?

11 Tuhsruhk liye, nga fah ahkkahlwemye nuh suwos sie God luhn ma usrnguck, finne God lal Abraham, ac God lal Isaac, ac God lal Jacob; ac God sepacna suc oraclah inkuhsrao ac facluh, ac ma nuhkwewa ma oan loac.

12 Liye, El oracllah Adam, ac kacl Adam tuhkuh puhtatlac luhn mwet uh. Ac ke srihpen puhtatlac luhn mwet uh Jisus Kraist El tuhkuh, finne Pahpah ac Wen; ac ke srihpen Jisus Kraist iwaclah luhn mwet uh tuhkuh.

13 Ac ke srihpen iwaclah luhn mwet, ma tuhkuh ke srihpen Jisus Kraist, elos fohlohkihnyucklac nuh ye muhtuhn Leum; ahok, pa inge ohiyac ma mwet nuhkwewa iweyucklac, ke srihpen misac luhn Kraist oruh in sikyak sifilpac moulyak, ma oruh in sikyak sie iwaclah liki mutul ma wacngihn sahflahiyac, liki mutul ma mwet nuhkwewa ac fah muhtwaclihk ke kuh luhn God ke mwe ukuk uh fah ukukyak; ac elos fah tuhkuh, kwewana mwet srihk wal la ac mwet yohk wal la, ac mwet nuhkwewa fah tu ye muhtuhn iwen nuhnuhnkuh Lal, iweyucklac ac tuhlweyucklac liki mwe kapihr luhn misac ma pahtpaht se inge, suc misac se inge pa misac luhn mahno.

14 Ac na tuhkuh nuhnuhnkuh luhn El suc Muhtahl nuh faclos; ac na tuhkuh pacl se ma el suc fohkfohk ac fah srwackna fohkfohk; ac el suc suwohswohs ac fah srwackna suwohswohs; el suc engan ac fah srwackna engan; ac el suc tiacna engan ac srwackna tiacna engan.

15 Ac inge, O kowos nuhkwewa suc motkweack nuh suwos sifacna sie god suc kuh in tiac oruh ma usrnguck, nga siyuck suwos, yac ma nuhkwewa inge somlah, ma nga sramsramkihn uh? Yac pacl sahflah uh tuhkuh tari? Liye nga fahk nuh suwos, Moh; ac God El tiac tui in sie God luhn ma usrnguck.

16 Liye, yac ma God El oruh tiac ma wolacna nuh ke motowos? Ahok, ac suc kuh in kahlwem ke orekma wolacna luhn God?

17 Suc ac fah fahk lah tiacna ma usrnguck se tuh ke kahs Lal inkuhsrao ac facluh oreklac; ac ke kuh luhn kahs Lal sie mwet el oreklac ke infohk uh; ac ke kuh luhn kahs Lal ma usrnguck uh oreklac?

18 Ac suc ac fah fahk lah Jisus Kraist El tiacna oruh ma usrnguck yohk pucspucs? Ac oasr ma usrnguck yohk pucspucs ma tuh orek ke poun mwet sap.

19 Ac fin oasr ma usrnguck orek na, efuh God El tilac sie God luhn ma usrnguck ac tuhsruhk tuh sie God suc tiac ekyek? Ac liye, nga fahk nuh suwos lah El tiacna ekyek; fin ohinge El ac tilac God; ac El ac tui tilac God, ac sie God luhn ma usrnguck.

20 Ac srihpac se ma oruh El tui tilac oruh ma usrnguck inmahsrlon tuhlihk nuhtin mwet uh pa ke srihpen elos muhnahslah ke suhlahlahlfongi, ac fahsr liki inkacnek pwacye, ac tiac etuh God suc elos enenuh in luhlahlfongi.

21 Liye, nga fahk nuh suwos lah el suc luhlahlfongi Kraist, tiac ahlohloh, kuhtwena ma el ac fah siyuck sin Pahpah ke inen Kraist ac fah ituckyang nuh sel; ac olwelah se inge ma nuh sin mwet nuhkwewa, finne nuh sin mwet nuhkwewa fin facluh.

22 Tuh liye, Jisus Kraist, Wen nuhtin God, El fahk ohinge, nuh sin mwet tuhma lutlut Lal suc fah muhta na, ahok, ac oacyacpac nuh sin mwet tuhma lutlut Lal nuhkwewa, nuh ke un mwet pucspucs ma kuh in lohng: Kowos som nuh fin facluh nohfohn, ac luti wosasuc nuh sin mwet nuhkwewa;

23 Ac el suc luhlahlfongi ac pacptaislac ac fah moliyucklac, tuhsruhk el suc suhlahlahlfongi ac fah lihsyucklac;

24 Ac mwe akucl inge fah ukwaclos suc luhlahlfongi—ke Inek elos fah luhslah devil; elos fah kahskahs ke lohuh sasuc; elos fah sruhkwack serpent; ac elos fin nihm kuhtwena ma ac onweloslac ma inge ac fah tiacna onweloslac; elos fah fihliyac paholos fin mwet mas ac elos fah kwelac;

25 Ac el suc fah luhlahlfongi ke Inek, tiac ahlohloh, nuh sel Nga fah ahkkweye kahs luhk nuhkwewa, finne nuh facluh nohfohn.

26 Ac inge, liye, suc kuh in tu lain orekma luhn Leum? Suc kuh in lahfwekihn fahk Lal? Suc ac tuyak lain kuh wolacna luhn Leum? Suc ac fah koase orekma luhn Leum? Suc ac fah koase tuhlihk nuhtin Kraist? Liye, kowos nuhkwewa suc koase orekma luhn Leum, tuh kowos fah lut ac misac.

27 O na nimet koase, ac nimet nuhnkuh, tuhsruhk porongo kahs luhn Leum, ac siyuck sin Pahpah ke inen Jisus ke ma kowos enenuh. Nimet ahlohloh, tuhsruhk luhlahlfongi, ac muhtwacwacack oacna ke pacl mahtuh, ac tuhkuh nuh yurun Leum ke insiowos kwewa, ac orekma nuh ke molwelah lowos sifacna ke sahngweng ac rarrar ye muhtahl.

28 Lahlmwetmwet ke pacl in srihkeyuck lowos; sislah ma fohkfohk nuhkwewa liki kowos; nimet siyuck, tuh kowos in kuh in orekmakuhnlah nuh ke pwacr lowos, tuhsruhk siyuck ke kuh yohk, tuh kowos in fah tiac puhtatyang nuh ke mwe sruhf, tuhsruhk tuh kowos in fah kuhlwacnsapuh God pwacye ac moul.

29 Liye tuh kowos in tiac pacptaislac a tiac suwohs; liye tuh kowos in tiac ipeis ke kuhfa luhn Kraist a tiac suwohs; tuhsruhk liye tuh kowos in oruh ma nuhkwewa ke suwohs, ac oruh ke inen Jisus Kraist, Wen nuhtin God moul; ac kowos fin oruh ma se inge, ac muhtweng ne ke sahflah, kowos fah tiac lihsyucklac.

30 Liye, nga sramsram nuh suwos oacna in muh nga misac na sramsram; tuh nga etuh lah kowos fah eis kahs luhk uh.

31 Nimet sruhngwacyuc ke srihpen tahfonglac luhk, kuh luhn pahpah tuhmuhk, ke srihpen tahfonglac lal, kuh elos suc sihm met likiyuc; tuhsruhk sang kuloh nuh sin God lah El tuh oruh in kahlwem nuh suwos ma tahfonglac lasr, tuh kowos in kuh in lotwelah in lahlmwetmwet liki kuht.

32 Ac inge, liye, kuht suhmuhslah sie ma sihmlac in fal nuh ke etuh lasr uh, ke kain in akucl in sihm ma oreklac inmahsrlosr mwet Egypt ma eklac, ma tuhtahflah nuh ten ke fihlin fihl ac ikihlyucklac sesr, in fal nuh ke ohiyacn sramsram lasr.

33 Ac plwet lasr uh fin yohk fal luhkuhn kuht sihm ke kahs Hebrew; tuhsruhk kahs Hebrew uh tuh oacyacpac ikihlyucklac sesr; ac kuht fin kuh in sihm ke kahs Hebrew, liye, luhkuhn wacngihn ma tahfonglac ke ma sihmlac lasr uh.

34 Tuhsruhk Leum El etuh ma kuht suhmuhslah, ac oacyacpac lah wacngihn kuhtwena mwet sahyac etuh ke kahs lasr uh; ac ke srihpen wacngihn kuhtwena mwet sahyac etuh kahs lasr uh, ke ma inge El ahkolah ohiyac in luhngas ma inge.

35 Ac ma inge sihmlac tuh kuht in eislah liki nuknuk lasr uh ke srah luhn mwet wiyacsr, suc tuh muhnahslah ke suhlahlahlfongi.

36 Ac liye, ma inge suc kuht tuh kena ke mwet wiyacsr, ahok, finne sifilpac fohlohkyak lalos nuh ke etwacack ke Kraist, in fal nuh ke pruhe luhn mwet luhlahlfongi suc tuh muhta fin acn uh.

37 Ac lwelah tuh Leum Jisus Kraist Elan lwelah tuh pruhe lalos in topukyucklac fal nuh ke luhlahlfongi lalos; ac lwelah tuh God suc Pahpah Elan esam wuhlweacng ma El tuh oraclah nuh sin mwet Israel; ac lwelah tuh Elan ahkinsewowoyelos ne tok ma pahtpaht, ke luhlahlfongi ke inen Jisus Kraist. Amen.