1 ’E i teienei, tē parau ato’a atu nei au nō ni’a i te feiā ’aita i ti’aturi i te Mesia.

2 Inaha, e ti’aturi ānei ’outou i te mahana e fa’autu’ahia ai ’outou—inaha, i te mahana e tae mai ai te Fatu, ’oia ïa, i taua mahana rahi ra e ’ōtarohia ai te fenua mai te parau ’ōtarohia ra, ’e e tahe ai te mau mea tumu i te ve’ave’a rahi ra ; ’oia ïa, i taua mahana rahi ra e arata’ihia mai ai ’outou i mua i te ’Ārenio a te Atua ra—’ei reira e parau ānei ’outou ē, ’aita e Atua ?

3 ’Ei reira, e huna noa ānei ’outou i te Mesia, ’e ’aore rā e ti’a ānei ia ’outou ’ia hi’o atu i te ’Ārenio a te Atua ? Tē mana’o ra ānei ’outou ē, e pārahi ’outou i pīha’i iho iāna ’a ’ite noa ai ’outou i tā ’outou ’ohipa hape ? Tē mana’o ra ānei ’outou ē, e ’oa’oa ’outou ’ia pārahi i pīha’i iho i taua ta’ata Mo’a ra, ’a ha’amāuiuihia ai tō ’outou vārua ’ia ha’amana’o i te hape ē ’ua ’ōfati noa ’outou i tāna ra mau ture ?

4 Inaha, tē parau atu nei au ia ’outou, e hau atu tō ’outou māuiui ’ia pārahi i pīha’i iho i te hō’ē Atua mo’a ’e te parauti’a, ’a ha’amana’o noa ai ’outou i tā ’outou mau ’ohipa vi’ivi’i i mua iāna, i te pārahi i pīha’i iho i te mau vārua fa’ahapahia i hade ra.

5 Inaha ho’i, ’ia ’ite ’outou i tō ’outou vai-taha’a-ra’a i mua i te Atua, ’e i te hanahana ato’a o te Atua, ’e te mo’ara’a o Iesu Mesia ra, e fa’aama te reira i te auahi ’ama ma te pohe ’ore i ni’a ia ’outou.

6 ’Auē ho’i ’outou e te feiā ti’aturi ’ore ē, ’a fāriu mai na i te Fatu ; ’a ti’aoro māite atu i te Metua nā roto i te i’oa o Iesu, penei a’e ’o te ’itehia ’outou i mua iāna i taua mahana rahi ’e te hope’a ma te pōra’o ’ore, ’e te mā, te nehenehe, ’e te teatea, ’e ma te tāmāhia nā roto i te toto o te ’Ārenio ra.

7 E parau fa’ahou atu vau ia ’outou, ’o tei huna i te mau heheura’a a te Atua ’e ’o tei parau ē, ’ua fa’a’orehia te reira, ’e ’aita e heheura’a fa’ahou, ’e ’aita e parau tohu, ’e ’aita e hōro’ara’a, ’e ’aita e fa’aorara’a ma’i, ’e ’aita e parau ’e’ē ’e te ’īritira’a i te parau ’e’ē.

8 Inaha, tē parau atu nei au ia ’outou na, ’o ’oia ’o tei huna i teie mau mea, ’aita ïa ’oia i ’ite i te ’evanelia a te Mesia ; ’oia ïa, ’aita ’oia i tai’o i te mau pāpa’ira’a mo’a ; ’e mai te mea i tai’o ra, ’aita ïa ’oia i māramarama i te reira.

9 ’Aita ānei ho’i tātou i tai’o ē, hō’ē ā tō te Atua huru i nanahi ra, i teie nei mahana, ē a muri noa atu ; ’e ’aita roa ’oia e taui, ’aita roa te tahi vāhi iti nō tōna huru e taui ?

10 ’E i teienei, mai te mea e feruri ’outou e atua taui noa tō ’outou, ’e e taui ho’i te tahi vāhi iti nō tōna huru, ’ei reira ’ua feruri ïa ’outou i tā ’outou iho atua, ’e e ’ere ho’i ’oia i te Atua nō te mau semeio.

11 Inaha rā, e fa’a’ite atu vau ia ’outou i te Atua nō te mau semeio, ’oia te Atua nō Aberahama, ’e te Atua nō Isaaka, ’e te Atua nō Iakoba ; ’e ’o teie iho ā ïa taua Atua ra ’o tei hāmani i te mau ra’i ’e te fenua, ’e te mau mea ato’a i roto i te reira.

12 Inaha, nāna i hāmani ia Adamu, ’e nā roto ia Adamu ’ua tae mai te hi’ara’a i ni’a i te ta’ata nei. ’E nō te hi’ara’a o te ta’ata nei i haere mai ai Iesu Mesia, ’o ’oia ho’i te Metua ’e te Tamaiti ; ’e nō Iesu Mesia i tae mai ai te fa’aorara’a o te ta’ata nei.

13 ’E nō te mea ’ua tae mai te fa’aorara’a i te ta’ata nei nā roto ia Iesu Mesia, ’ua fa’aho’ihia atu ïa rātou i mua i te aro o te Fatu ; ’oia ïa, nā roto ho’i i te reira te mau ta’ata ato’a i te fa’aorahia, nō te mea ’ua fa’atae mai te pohe o te Mesia i te ti’afa’ahoura’a, ’o tei fa’aora i te ta’ata nei i te ta’oto hope ’ore, ’e e fa’aarahia ho’i te mau ta’ata ato’a e te mana o te Atua i taua ta’oto ra i te taime e fa’a’otohia ai te pū ; ’e e ti’a mai rātou, te ta’ata ri’i ’e te feiā rarahi, ’e e ti’a mai rātou pā’āto’a i mua i tāna ra ha’avāra’a, ma te fa’aorahia ’e ma te fa’ata’a-’ē-hia i te tāpe’a mure ’ore nō te pohe, ’oia te pohe pae tino.

14 ’E i reira e tae mai ai te ha’avāra’a a Tei Mo’a i ni’a ia rātou ; ’e i reira ho’i e tae mai ai te tau e riro ai te ta’ata vi’ivi’i i te vai vi’ivi’i noa ; ’e te ta’ata parauti’a i te vai parauti’a noa ; ’e te ta’ata ’oa’oa i te vai ’oa’oa noa ; ’e te ta’ata ’oa’oa ’ore i te vai ’oa’oa ’ore noa.

15 ’E i teienei, ’o ’outou pā’āto’a ’o tei feruri nō ni’a i te atua semeio ’ore, tē ani atu nei au ia ’outou, ’ua ma’iri ānei taua mau mea tā’u i parau ra ? ’Ua tae mai ānei te hope’a ? Inaha, tē parau atu nei au ia ’outou, ’Aita ; ’aita roa te Atua i fa’aea i te riro ’ei Atua nō te mau semeio.

16 Inaha, ’aita ānei te mau mea tā te Atua i rave i fa’atupu i te mea māere i mua i tō tātou mata ? ’Oia ïa, ’o vai tei ’ite māite i te mau ’ohipa māere a te Atua ?

17 ’O vai tē parau ē, e ’ere te reira i te semeio, ’oia ho’i nā roto i tāna parau ’ua tupu mai te ra’i ’e te fenua ; ’e nā roto i te mana nō tāna parau ’ua hāmanihia te ta’ata nei i te repo fenua ra ; ’e nā roto i te mana o tāna parau ’ua fa’atupuhia te mau semeio ?

18 ’E ’o vai tē parau ē, ’aita Iesu Mesia i rave i te mau semeio rarahi e rave rahi ? ’E e rave rahi ho’i mau semeio rarahi i ravehia e te rima o te mau ’āpōsetolo ra.

19 ’E mai te mea ’ua ravehia te mau semeio i taua tau ra, nō te aha ïa ’aita te Atua i riro ’ei Atua nō te mau semeio, ’e ’a vai noa ai ’ei Atua taui ’ore ? ’E inaha, tē parau atu nei au ia ’outou na, ’aore roa ’oia e taui ; ’āhiri e taui ’oia, ’aita ïa ’oia e riro ’ei Atua ; ’aita roa ho’i ’oia e fa’aea ’ia riro ’ei Atua, ’e e Atua ho’i ’oia nō te mau semeio.

20 ’E te tumu ’ua fa’aea ’oia i te rave i te mau semeio i rotopū i te mau tamari’i a te ta’ata nei, nō te mea ïa ’ua paruparu tō rātou fa’aro’o, ’e ’ua fa’aru’e i te ’ē’a ti’a, ’e ’aita rātou i ’ite i te Atua ’o tā rātou e ti’aturi ra.

21 Inaha, tē parau atu nei au ia ’outou na, ’o ’oia ’o tē ti’aturi i te Mesia, ma te fē’a’a ’ore, e hōro’ahia mai ïa iāna te mau mea ato’a ’o tāna e ani atu i te Metua nā roto i te i’oa o te Mesia ; ’e ’ua hōro’ahia mai teie fafaura’a i te mau ta’ata ato’a, ē tae noa atu i te mau hope’a o te ao nei.

22 Inaha ho’i, tē nā ’ō mai ra Iesu Mesia, te Tamaiti a te Atua, i tāna nā pipi ’o tē pārahi ra ; ’oia ïa, ’e i tāna ato’a mau pipi pā’āto’a i mua i te mau ta’ata : E haere ’outou ē ’ati noa a’e te mau fenua ato’a, e fa’a’ite haere i te ’evanelia i te ta’ata ato’a.

23 ’O ’oia ’o tei ti’aturi ’e ’ua bāpetizohia, e ora ïa ; ’āre’a rā iāna ’o tei ’ore i ti’aturi ra e fa’ahapahia ïa.

24 ’E e pe’e atu teie mau tāpa’o nā muri ia rātou ’o tei ti’aturi—nā roto i tō’u nei i’oa e ti’avaru atu rātou i te mau diabolo ; e parau ho’i rātou i te mau reo ’āpī ; e rave noa ho’i rātou i te mau ’ōphī ; ’e ’ia inu rātou i te mea ta’ero ’aita te reira e ha’afifi ia rātou ; e tu’u rātou i tō rātou rima i ni’a i te ta’ata ma’i ’e e fa’aorahia rātou.

25 ’E ’o ’oia ’o tē ti’aturi i tō’u nei i’oa, ma te fē’a’a ’ore, e fa’atupu ïa vau i tā’u mau parau ato’a nōna, ē tae noa atu i te mau hope’a o te ao nei.

26 ’E i teienei, inaha, ’o vai tē ti’a ’ia pāto’i atu i te mau ’ohipa a te Fatu ? ’O vai tē ti’a ’ia huna i tāna mau parau ? ’O vai tē pāto’i atu i te mana rahi o te Fatu ? ’O vai tē vahavaha atu i te mau ’ohipa a te Fatu ? ’O vai tē au ’ore atu i te mau tamari’i a te Mesia ? Inaha, ’o ’outou pā’āto’a ïa ’o tei fa’a’ino mai i te mau ’ohipa a te Fatu, e riro ho’i ’outou i te māere ’e i te pohe roa.

27 Nō reira, ’eiaha roa e fa’a’ino, ’eiaha ho’i e māere, ’a ha’apa’o rā i te mau parau a te Fatu, ’e ’a ani atu ho’i i te Metua nā roto i te i’oa o Iesu i te mau mea tā ’outou i hina’aro. ’Eiaha e fē’a’a, ’a ti’aturi rā, ’e ’a ha’amata mai te feiā tahito ra, ’e ’a haere mai i te Fatu ma tō ’outou ’ā’au ato’a, ’e ’a rave pāpū i te ’ohipa nō tō ’outou iho fa’aorara’a ma te mata’u ’e te rurutaina i mua iāna.

28 ’Ia ’aravihi ’outou i te mau mahana o te orara’a nei ; ’a fa’aru’e ’outou i te mea vi’ivi’i ato’a ; ’eiaha e ani i te hō’ē mea ’o tē fa’atupu i tō ’outou hina’aro vi’ivi’i, e ani rā ma te mana’o ’āueue ’ore ’ia ’ore ’outou ’ia topa i roto i te fa’ahemara’a, ’ia tāvini rā ’outou i te Atua ora mau.

29 ’A ha’apa’o maita’i ’ia ’ore ’outou ’ia bāpetizohia ma te ti’amā ’ore ; ’a ha’apa’o maita’i ’ia ’ore ’outou ’ia rave noa atu i te ’ōro’a ma te ti’amā ’ore ; ’ia rave rā ’outou i te mau mea ato’a ma te ti’amā, ’e ’ia rave ho’i i te reira nā roto i te i’oa o Iesu Mesia, te Tamaiti a te Atua ora ; ’e mai te mea e nā reira ’outou ma te fa’aitoito noa ē tae noa atu i te hope’a ra, e ’ore roa ïa ’outou e hurihia i rāpae.

30 Inaha, tē parau atu nei au ia ’outou na mai te mea ra ē, tē parau atu nei au ia ’outou mai te pohe mai ; ’e ’ua ’ite ho’i au ē, e roa’a ia ’outou tā’u nei mau parau.

31 ’Eiaha e fa’ahapa mai iā’u nei nō tō’u nei mau hape ; ’eiaha ato’a i tō’u metua tāne nō tōna mau hape ; ’eiaha ato’a ho’i i te feiā i pāpa’i nā mua atu iāna ; a ha’amāuruuru rā i te Atua ’oia i fa’a’ite atu i tō mātou ra mau hape ia ’outou, ’ia ti’a ia ’outou ’ia ha’api’i ’ia riro ’ei mea pa’ari atu ā ia mātou nei.

32 ’E i teienei, inaha, ’ua pāpa’i mātou i teie nei pāpa’a parau mai te au i tō mātou ’ite i te mau pāpa’ira’a i parauhia e mātou, te pāpa’ira’a ’Aiphiti fa’a’āpīhia, ’o tei hōro’ahia mai i terā u’i ’e i terā u’i ē tae roa mai ia mātou nei, ’e ’o tei fa’ahuru-’ē-hia e mātou ’ia au maita’i i tō mātou reo.

33 ’E ’āhiri e mea rarahi maita’i tā mātou mau ’api, ’ua pāpa’i ïa mātou i te reira i te pāpa’ira’a Hebera ; ’e ’ua fa’ahuru ’ē ato’a ho’i ïa mātou i te pāpa’ira’a Hebera ; ’e ’āhiri ’ua ti’a ia mātou ’ia pāpa’i i te pāpa’ira’a Hebera ra, inaha, ’aita roa ïa e hapehape e ’itehia e ’outou i roto i tā mātou pāpa’a parau.

34 ’Ua ’ite rā te Fatu i te mau mea tā mātou i pāpa’i, ’e ’ua ’ite ato’a ho’i ’oia ē, ’aita roa e nūna’a ’ē atu i ’ite i tō mātou reo, ’e nō te mea ’aita roa e nūna’a ’ē atu i ’ite i tō mātou reo, nō reira, ’ua fa’aineine ’oia i te hō’ē rāve’a nō te ’īritira’a i te reira.

35 ’E ’ua pāpa’ihia teie nei mau mea ’ia ti’a ia mātou ’ia tāmā i tō mātou mau ’ahu i te toto o tō mātou mau taea’e, ’o tei paruparu tō rātou fa’aro’o.

36 ’E inaha, teie te mau mea tā mātou i hina’aro i tō mātou mau taea’e, ’oia ïa, ē tae noa atu i te fa’aho’ira’ahia te ’ite ia rātou nō ni’a i te Mesia, ’ia au i te mau pure a te feiā mo’a ato’a i pārahi na i te fenua nei.

37 ’E ’ia fa’ati’a mai te Fatu ra ’o Iesu Mesia i tā rātou mau pure mai te au i tō rātou ra fa’aro’o ; ’e ’ia ha’amana’o mai ho’i te Atua te Metua i te fafaura’a tāna i fafau atu i te ’utuāfare o ’Īserā’ela ; ’e ’ia ha’amaita’i mai ’oia ia rātou ē a muri noa atu, nā roto i te fa’aro’o i te i’oa o Iesu Mesia. ’Āmene.