1 Karon ako, si Moroni, nagasulat sang pila ka mga bagay nga sa akon pagbanta daw maayo; kag nagasulat ako sa akon mga kauturan, ang mga Lamanhon; kag luyag ko nga mahibal-an nila nga kapin na sa apat ka gatos kag beynte ka tuig ang nagligad halin sang ginhatag ang tanda parte sa pagkari ni Cristo.

2 Kag ginaselyo ko ining mga kasulatan pagkatapos nga mahambal ko ang pila ka mga pulong paagi sa paglaygay sa inyo.

3 Tan-awa, ginalaygayan ko kamo nga kon mabasa ninyo ining mga butang, kon ini mangin kinaalam sa Dios nga mabasa ninyo ang mga ini, nga inyo dumdumon kon nangin daw ano kamaluluy-on ang Ginuo sa mga anak sang katawhan, halin pa sa pagtuga kay Adan bisan tubtob sa tion nga mabaton ninyo ining mga butang, kag binag-binagon ini sa inyo mga tagipusuon.

4 Kag kon mabaton ninyo ining mga butang, ginalaygayan ko kamo nga mamangkot kamo sa Dios, ang Wala’y Katapusan nga Amay, sa ngalan ni Cristo, kon ining mga butang indi matuod; kag kon mamangkot kamo sa sinsero nga tagipusuon, sa matuod-tuod nga tinutuyo, nga may pagtuo kay Cristo, ipakita niya ang kamatuoran sini sa inyo, paagi sa gahum sang Balaan nga Espiritu.

5 Kag paagi sa gahum sang Balaan nga Espiritu mahimo ninyo nga mahibal-an ang kamatuoran sang tanan nga butang.

6 Kag kon ano man nga butang ang maayo ini matarong kag matuod; gani, wala sing butang nga maayo nga nagapanghiwala sang Cristo, kundi nagakilala nga sia gid.

7 Kag mahibal-an ninyo nga sia gid, paagi sa gahum sang Balaan nga Espiritu; gani ginalaygayan ko kamo nga indi ninyo pag-ipanghiwala ang gahum sang Dios; kay nagahikot sia paagi sa gahum, suno sa pagtuo sang mga anak sang katawhan, amo man sa gihapon subong kag buwas, kag tubtob sa wala’y katapusan.

8 Kag sa liwat, ginalaygayan ko kamo, mga kauturan ko, nga indi ninyo pag-ipanghiwala ang mga dulot sang Dios kay madamo ang mga ini; kag nagahalin ang mga ini sa amo gihapon nga Dios. Kag may nagkalain-lain nga mga paagi nga ining mga dulot ginahatag; apang amo man ini ang Dios nga nagahikot sa tanan-tanan; kag ginahatag ang mga ini paagi sa mga pagpahayag sang Espiritu sang Dios sa mga tawo, agud magbenepisyo sa ila.

9 Kay tan-awa, sa isa ginahatag sang Espiritu sang Dios nga matudlo niya ang pulong sang kaalam;

10 Kag sa isa pa, nga matudlo niya ang pulong sang ihibalo paagi sa amo man nga Espiritu;

11 Kag sa isa pa, tuman kadako nga pagtuo; kag sa isa pa, ang mga dulot sang pagpang-ayo paagi sa amo man nga Espiritu;

12 Kag sa liwat, sa isa pa, nga makahikot sia sang dalagko nga mga milagro;

13 Kag sa liwat, sa isa pa, nga makapropesiya sia parte sa tanan nga butang;

14 Kag sa liwat, sa isa pa, ang makakita sang mga anghel kag nagaalagad nga mga espiritu;

15 Kag sa liwat, sa isa pa, ang tanan nga sahi sang mga lengguahe;

16 Kag sa liwat, sa isa pa, ang pagpatpat sang mga lengguahe kag sang nagkalain-lain nga mga sahi sang mga lengguahe.

17 Kag ining tanan nga dulot nagaabot paagi sa Espiritu ni Cristo; kag nagaabot ang mga ini sa tagsa ka tawo sing tinag-isaisa suno sa iya kabubut-on.

18 Kag luyag ko kamo nga laygayan, pinalangga kong mga kauturan, nga inyo dumdumon nga ang tagsa ka maayo nga dulot nagahalin kay Cristo.

19 Kag luyag ko kamo nga laygayan, pinalangga kong mga kauturan, nga inyo dumdumon nga sia amo man gihapon kahapon, subong, kag tubtob sa wala’y katapusan, kag ining tanan nga dulot nga akon ginhambal, nga mga espirituhanon, indi gid mauntat, bisan samtang nga ang kalibutan magapadayon, lamang suno sa pagkawala’y pagtuo sang mga anak sang katawhan.

20 Gani, kinahanglan gid nga may pagtuo; kag kon kinahanglan gid nga may pagtuo kinahanglan gid nga may paglaum man; kag kon kinahanglan gid nga may paglaum kinahanglan gid nga may ara man sang putli nga paghigugma.

21 Kag luwas lang kon kamo may putli nga paghigugma indi gid kamo maluwas sa ginharian sang Dios; kag indi man kamo maluwas sa ginharian sang Dios kon wala kamo sing pagtuo; kag indi man kon wala kamo sing paglaum.

22 Kag kon wala kamo sing paglaum sigurado nga yara kamo sa kasubo; kag ang kasubo nagaabot tungod sang kalainan.

23 Kag si Cristo matuod gid nga nagsiling sa aton mga amay: Kon may pagtuo kamo makahimo kamo sang tanan nga butang nga nagakaigo sa akon.

24 Kag karon nagahambal ako sa tanan nga yara sa mga punta sang kalibutan—nga kon ang adlaw magaabot nga ang gahum kag mga dulot sang Dios magauntat sa inyo, ini mangin tungod sang pagkawala’y pagtuo.

25 Kag kalisud sa mga anak sang katawhan kon amo sini ang matabo; kay wala na bisan isa nga magahimo sang maayo sa inyo, wala, wala gid sing isa. Kay kon may isa sa inyo nga nagahimo sang maayo, magahikot sia paagi sa gahum kag mga dulot sang Dios.

26 Kag kalisud sa ila nga magapauntat sining mga butang kag mapatay, kay mapatay sila sa ila mga sala, kag indi sila maluwas sa ginharian sang Dios; kag ginahambal ko ini suno sa mga pulong ni Cristo; kag wala ako nagabinutig.

27 Kag ginalaygayan ko kamo nga dumdumon ining mga butang; kay ang tion madasig nga magaabot nga mahibal-an ninyo nga wala ako nagabinutig, kay makita ninyo ako sa hukmanan sang Dios; kag ang Ginuong Dios magasiling sa inyo: Wala ko bala pag-ipahayag ang akon mga pulong sa inyo, nga ginsulat sini nga tawo, pareho sing isa nga nagasinggit halin sa mga minatay, huo, bisan pareho sing isa nga nagahambal halin sa yab-ok?

28 Ginapahayag ko ining mga butang para sa pagtuman sang mga propesiya. Kag tan-awa, magagwa ang mga ini halin sa baba sang wala’y katubtuban nga Dios; kag ang iya pulong magalapos sa tanan nga henerasyon.

29 Kag ipakita sa inyo sang Dios nga inang akon ginsulat matuod.

30 Kag sa liwat luyag ko kamo nga laygayan nga magpalapit kamo kay Cristo, kag magkapyot sa tagsa ka maayo nga dulot, kag indi magtandog sang malain nga dulot, ukon sang mahigko nga butang.

31 Kag magbugtaw, kag magbangon halin sa yab-ok, O Jerusalem; huo, isul-ob ang imo matahum nga mga biste, O anak nga babayi sang Sion; kag palig-ona ang imo mga palpal kag palapara ang imo mga dulonan sa wala’y katapusan, agud indi ka na mahuy-an pa, agud ang mga kasugtanan sang Wala’y Katapusan nga Amay nga iya ginhimo sa imo, O panimalay ni Israel, matuman.

32 Huo, magpalapit kay Cristo, kag mangin perpekto sa iya, kag dumilian ang inyo mga kaugalingon sang tanan nga pagkadi-diosnon, kag kon inyo dumilian ang inyo mga kaugalingon sang tanan nga pagkadi-diosnon, kag palanggaon ang Dios sa inyo bug-os nga ikasarang, kaisipan kag kusog, gani ang iya grasya nagakaigo para sa inyo, agud paagi sa iya grasya maperpekto kamo kay Cristo; kag kon paagi sa grasya sang Dios perpekto kamo kay Cristo, indi gid ninyo mapanghiwala ang gahum sang Dios.

33 Kag sa liwat, kon kamo paagi sa grasya sang Dios perpekto kay Cristo, kag indi magpanghiwala sang iya gahum, gani ginpakabalaan kamo kay Cristo paagi sa grasya sang Dios, paagi sa pagpaagay sang dugo ni Cristo, nga yara sa kasugtanan sang Amay padulong sa kapatawaran sang inyo mga sala, agud kamo mangin balaan, nga wala’y mantsa.

34 Kag karon nagapamilin-bilin ako sa tanan, paalam. Magataliwan ako sa indi madugay agud magpahuway sa paraiso sang Dios, tubtob nga ang akon espiritu kag lawas magtingob liwat, kag pagadal-on ako nga madinalag-on sa kahanginan, agud magsugat sa inyo sa atubang sang makapahamuot nga hukmanan sang dakong Jehova, ang Wala’y Katapusan nga Hukom sang mga buhi kag mga patay. Amen.