1 Ngkai ngai, ae Moronaai, I a korea teutana are I taku bwa e raoiroi; ao I koroboki nakoia tariu, aika Reimwanaite; ao I tangiria bwa a na ataia bwa ai abubua ao uabwi tabun te ririki ae e a tia n nako i mwin anganakira te kanikina ibukin rokon Kristo.

2 Ao I kaini rongorongo aikai, i mwin ae I a tia n taekin taeka nakoimi bwa au anga n anai nanomi.

3 Nooria, N na anai nanomi bwa ngkana kam wareki bwaai aikai, ngkana wanawanan te Atua bwa kam na wareki, ao bwa kam na uringnga bwa e a tia n nanoanga te Uea nakoia natiia aomata, man te tai are karikaki iai Atam nakon te tai are kam na karekei bwaai aikai, ao ma n iangoi i nanomi.

4 Ao ngkana a reke bwaai aikai iroumi, kaungai nanomi bwa kam na butiia te Atua, te Tama ae akea Tokina, n aran Kristo, ngkana arona bwa a koaua bwaai aikai; ao ngkana arona bwa kam bubuti ma te nano ae koaua ma nanomi raoi, ao te onimaki iroun Kristo, e na bon kaota te koaua nakoimi, ni mwaakan te Tamnei ae Raoiroi.

5 Ao ma ni mwaakan te Tamnei are e Raoiroi ao kam na kona n atai koauan bwaai ni kabane.

6 Ao te bwai are e raoiroi e eti ao e koaua; ngaia are, akea te bwai ae raoiroi ae kaakeaa Kristo ma e, kakoaua bwa bon iai.

7 Ao kam kona n ataia bwa bon ngaia, ni mwaakan te Tamnei are e Raoiroi; ngaia are I kaungai nanomi bwa kam n aki kaakea mwaakan te Atua; bwa e mwakuri n te mwaaka, n aron aia onimaki natiia aomata, ao titebo ngkai ao ningabong, ao n aki toki.

8 Ao riki, I kaungai nanomi, tariu, bwa kam na aki kaakeaa ana bwai n tituaraoi te Atua, bwa a bon mwaiti; ao a bon roko mai iroun te Atua ae ti temanna. Ao a bon mwaiti aron kamwakuraia bwai n tituaraoi aikai; ma bon te Atua ae ti temanna ae mwakuri irouia ni kabane; ao bon ana mwakuri Tamnein te Atua are e anga nakoia aomata, ibukin bwaai aika a raoiroi nakoia.

9 Bwa nooria, nakon temanna ao e anganaki Tamnein te Atua, bwa e aonga n reirei taeka ni wanawana.

10 Ao nakon temanna, bwa e na reirei taekan te ataibwai iroun naba te Tamnei anne.

11 Ao nakon temanna, te onimaki ae korakora; ao nakon temanna te katoki aoraki iroun te Tamnei naba anne.

12 Ao riki nakon temanna, bwa e na kona ni mwamwakuri kakai aika a korakora.

13 Ao riki, nakon temanna bwa e na kona n taetae ni burabeti ni kaineti ma bwaai ni kabane.

14 Ao riki, nakon temanna, noorakia anera ma tamnei ake a na karaoi mwakuri n ibuobuoki.

15 Ao riki, nakon temanna, aekakin nako neewe.

16 Ao riki, nakon temanna, kabwaranakoan nanon taian taetae ma aekan neewe nako.

17 Ao bwaai n tituaraoi aikai a bane n roko mai iroun Tamnein Kristo; ao a bane n roko nakoia aomata n tatabemania nako, n aron nanona.

18 Ao I kaungai nanomi, tariu aika kam tangiraki, bwa kam na uringnga bwa bwai n tituaraoi ni kabane aika a raraoi a bane n roko mai iroun Kristo.

19 Ao N na kaungai nanomi, tariu aika kam tangiraki, bwa kam na uringnga bwa bon titebo ngaia ngkoananoa, ngkai, ao n aki toki, ao bwa bwaintituaraoi aikai aika I a tia n taekin, aika bwaai n te tamnei, a na bon aki kona ni mauna, n aron teimatoan te aonaba ni iai, ma e bon nakon aron aia kakewekewe natia aomata.

20 Ngaia are, e na riai n iai te onimaki; ao ngkana iai te onimaki ao e na iai naba te kantaninga; ao ngkana iai te kantaninga e na riai naba n iai te tangira ae kororaoi.

21 Ao ngkana akea iroumi te tangira ae kororaoi ao kam bon aki kona ni kamaiuaki n uean te Atua; ao kam aki kona naba ni kamaiuaki n uean te Atua ngkana akea ami onimaki; ao kam aki kona naba ngkana akea ami kantaninga.

22 Ao ngkana akea ami kantaninga ao kam na bon bwarannano; ao e roko te bwarannano ibukin te bure.

23 Ao e bon taetae ma te koaua Kristo nakoia ara bakatibu: Ngkana iai iroumi te onimaki ao kam kona ni karaoi bwaai ni kabane ake a riai nakoiu.

24 Ao ngkai N na taetae nakoia tokin aonaba—bwa ngkana e roko te bong are mwaakan ao ana bwaintituaraoi te Atua a na bua mai i buakomi, e na bon riki ibukin te kakewekewe iroumi.

25 Ao te maraia nakoia natiia aomata ngkana e na reke te aro aio; bwa e na bon akea ma i buakomi ae e na karaoa ae raoiroi, bon akea temanna. Bwa ngkana iai temanna mai buakomi ae karaoa ae raoiroi, ao e na bon mwakuri ni mwaakan ao ana bwai n tituaraoi te Atua.

26 Ao te maraia irouia ake a na kaakeai bwaai aikai ao a mate, bwa a na mate i nanon aia bure, ao a bon aki kona ni kamaiuaki n uean te Atua; ao I taekinna n aron ana taeka Kristo; ao I aki kewe.

27 Ao I kaungai nanomi bwa kam na ururing bwaai aikai; bwa e waekoa n roko te tai are kam na ataia bwa I aki kewe, bwa kam na noorai n ana kai ni motikitaeka te Atua; ao e na kangai te Uea ae te Atua nakoimi: Tiaki bwa I taekin au taeka nakoimi ake e koroi teuaei, n aron temanna ae tang man te mate, eng, n aron temanna ae taetae mai i nanon bubun te tano.

28 I taekin bwaai aikai ibukin kakoroan taeka ni burabeti. Ao nooria, a na otinako mai wiin te Atua are aki totoki; ao e na tinako au taeka man te roro teuana nakon te roro teuana.

29 Ao te Atua e na kaotia nakoimi, bwa te bwai are I a tia ni koroi e bon koaua.

30 Ao riki I kaungai nanomi bwa kam na nakon Kristo, ma n tauii bwaai n tituaraoi ni kabane aika a raraoi, ma n aki riingi bwai n tangira aika a buakaka, ke te bwai ae bareka.

31 Ao uti, ao teirake ma n te bubu, O Ierutarem; eng, ao katokai kunnikaim aika a titikiraoi, O natin Tion te aine; ao kamatoatoai am kai aike ko kamatoaki iai ao kabubura tiam n aki toki, bwa ko aonga n aki manga kamangaoaki, bwa ana berita aika a tabu te Tama ae Akea Tokina ake e a tia ni karaoia ma ngkami, O te bata are Iteraera, e na kakoroaki bukina.

32 Eng, nakomai nakon Kristo, ma ni kakororaoaki irouna, ao ma ni kaakeai ma iroumi bwaai ni kabane aika tiaki aron atua; ao ngkana kam kaakeai bwaai ni kabane aika tiaki aron atua; ma n tangira te Atua ma korakorami, ami iango ao marurungimi, ao ngkanne e na tau ana akoi ibukimi, ao man ana akoi ao kam kona ni kororaoi iroun Kristo; ao ngkana man ana akoi te Atua kam a kakororaoaki i nanon Kristo, kam bon aki kona ni kaakea mwaakan te Atua.

33 Ao riki, ngkana man ana akoi te Atua kam a kororaoi iroun Kristo, ao kam aki kaakea mwaakana, ao ngkanne kam a katabuaki rinanon Kristo man ana akoi te Atua, rinanon waanakon raraan Kristo, are e mena n ana berita are e tabu te Tama ibukin kamaunaan ami bure, bwa kam aonga n riki ni mimitong, n aki memea.

34 Ao ngkai I taekina tiabo nakoimi ni kabane. E aki maan te tai ao N nang nako ni motirawa n ana bwaretaiti te Atua, ni karokoa te tai are e na manga ikotaki tamneiu ma rabwatau, ao I a manga uotaki ma te tokanikai i karawa, ni kaitibo ma ngkami i matan ana kai ni motikitaeka ae kakukurei Iehova are e kakannato, te Tia Motika taekaia aika a maiu ao aika a mate ae Akea Tokina. Amen.