Kyerɛwsɛm
Moroni 1

Moroni Nwoma No

Tsir 1

Moroni kyerɛw wɔ Lamanfo hɔn yieyɛ ntsi—Nephifo a wɔammpen dɛ wɔbɔpow Christ no woku hɔn. Christ N’Awoo ekyir bɛyɛ mfe 401–421.

1 Afei emi, Moroni, aber a motwitwaa Jared no nkorɔfo hɔn abakɔsɛm no do ntsiatsia wiei no, mammpɛ dɛ nkyɛ mekyerɛw pii kã ho na mbom meda ho ara mennherae; na mannda moho edzi annkyerɛ Lamanfo no, osiandɛ bɛyɛ na wɔasɛɛ me.

2 Na hwɛ, akõ a woridzi no wɔ hɔn mu no yɛ dzen dodow; na osian hɔn tan ntsi wokum Nephinyi biara a ɔammpen dɛ ɔbɔpow Christ no.

3 Na emi, Moroni, morommpow Christ no; dɛm ntsi, mikyinkyin mbea a mubotum wɔ mo nkwa ho ntsi.

4 Dɛm ntsi, merekyerɛw nsɛm kakraabi bio a, otsia me nsusui nkyɛ mennsusu dɛ mebɛkyerɛw bio akã ho; naaso merekyerɛw kakra so bio akã ho, osiandɛ bɛyɛ na ɔayɛ mfaso ama m’enuanom, Lamanfo no daakye bi dɛ mbrɛ Ewuradze ne pɛ tse.