1 Ang paagi sang ila mga elder kag mga pari sa pagpakamaayo sang unod kag dugo ni Cristo sa simbahan; kag ginpakamaayo nila ini suno sa mga kasugoan ni Cristo; gani nakahibalo kami nga husto ang paagi; kag ang mga elder ukon mga pari ang nagpakamaayo sini—

2 Kag nagluhod sila upod sang simbahan, kag nagpangamuyo sa Amay sa ngalan ni Cristo nga nagasiling:

3 O Dios, ang Wala’y Katapusan nga Amay, nagapangabay kami sa imo sa ngalan sang imo Anak nga si Jesucristo, sa pagpakamaayo kag pagpakabalaan sining tinapay sa mga kalag sang tanan sadtong magaambit sini; agud sila makakaon bilang pagpanumdum sang lawas sang imo Anak, kag magsaksi sa imo, O Dios, ang Wala’y Katapusan nga Amay, nga handa sila sa pagdala sa ila kaugalingon sang ngalan sang imo Anak, kag dalayon nga magdumdum sa iya, kag magtuman sang iya mga kasugoan nga iya ginhatag sa ila, agud ila dalayon nga maangkon ang iya Espiritu sa pag-upod sa ila. Amen.