1 Ia oqo au sa vosa mada me baleta na papitaiso. Raica era a papitaisotaki na i talatala qase, na bete kei na ivakavuvuli; ka ra a sega ni papitaisotaki ka vakavo ni ra sa vuataka na vua e kilikili me ganiti ira kina.

2 Era a sega tale ga ni papitaisotaka e dua ka vakavo ga kevaka era sa lako yani ena yalo raramusumusu kei na yalo e bibivoro, ka vakadinadinataka ki na lotu ni ra sa veivutunitaka vakaidina na nodra ivalavala ca kecega.

3 Ka sa sega ni dua e papitaisotaki ka vakavo ga ko ira sa lomadra vakaidina me ra taura na yaca i Karisito ka ra sa nakita me ra qaravi koya me yacova na ivakataotioti.

4 Ni ra sa papitaisotaki oti, ka sa soli vei ira na isolisoli ka ra muria ka vakasavasavataki ena kaukauwa ni Yalo Tabu; era sa wili me lewe ni lotu i Karisito; a sa volai na yacadra, me ra na daunanumi ka vakani ena vosa vinaka ni Kalou, me ra tiko ga kina ena sala dodonu, ka vakauqeti me ra daumasu tiko ga ka vakararavi tabakidua ki na loloma i Karisito, o koya sa vakatekivuna ka sauma tale ga na nodra vakabauta.

5 Era sa dausoqoni vata wasoma na lewe ni lotu, me ra lolo ka masu ka veivosakitaka baleta na tiko vinaka ni yalodra.

6 Era sa dausoqoni vata wasoma me ra kana madrai ka gunu waini, me ra vakananuma kina na Turaga ko Jisu.

7 Era sa dau qarauna matua sara me kakua ni dua na caka cala ena kedra maliwa; ia ko ira sa kunei ni ra caka cala, ka ratou sa vakadinadinataka e lewe tolu na lewe ni lotu e matadra na italatala qase, kevaka era sa sega ni veivutuni ka vakatusai ira, sa na bokoci tani na yacadra ka sega ni wiliki me lewe ni lotu i Karisito.

8 Ia era na vosoti ena veigauna kecega era sa veivutuni kina ena yalodina.

9 Ka sa dauliutaki na nodra soqoni mai vei ira na iliuliu ni lotu me vaka na ivakarau ni cakacaka ni Yalo ena kaukauwa ni Yalo Tabu; ia ni sa tuberi ira na kaukauwa ni Yalo Tabu me ra vunau, se me ra veivakasalataki, se me ra masumasu, se me ra vakatakekere se lagasere; a sa caka vakakina.