1 Ug karon mamulong ako mahitungod sa bunyag. Tan-awa, ang mga anciano, mga pari, ug mga magtutudlo gibunyagan; ug wala sila bunyagi gawas kon sila makapakita og buhat nga sila takos niini.

2 Ni wala nila dawata si bisan kinsa ngadto sa bunyag gawas kon sila miduol uban sa masulub-on nga kasingkasing ug mahinulsolon nga espiritu, ug misaksi sa simbahan nga sila tinuod nga naghinulsol sa tanan nilang mga sala.

3 Ug walay bisan usa nga gidawat ngadto sa bunyag gawas kon sila midala diha kanila sa ngalan ni Kristo, nga adunay tinguha sa pagserbisyo kaniya hangtod sa kataposan.

4 Ug human sila madawat ngadto sa bunyag, ug giaghat ug gilimpyohan pinaagi sa gahom sa Espiritu Santo, giihap sila nga kauban sa katawhan sa simbahan ni Kristo; ug gikuha ang ilang mga ngalan, nga sila mahinumdoman ug maamumahan pinaagi sa maayo nga pulong sa Dios, aron magpadayon sila sa matarong nga dalan, aron magpadayon sila nga kanunayng magmabinantayon sa pag-ampo, mosalig lamang sa maayong mga buhat ni Kristo, kinsa mao ang tigpasiugda ug tighingpit sa ilang pagtuo.

5 Ug ang simbahan nagtigom kanunay, aron magpuasa ug mag-ampo, ug makigsulti sa usag usa mahitungod sa kaayohan sa ilang mga kalag.

6 Ug nagtigom sila sa kanunay aron moambit sa pan ug bino, agi og paghinumdom ni Ginoong Jesus.

7 Ug higpit sila nga nagbantay nga walay pagkadaotan taliwala kanila; ug bisan kinsa nga makit-an nga naghimo og pagkadaotan, ug tulo ka saksi sa simbahan mohukom kanila sa atubangan sa mga anciano, ug kon dili sila maghinulsol, ug dili mokumpisal, ang ilang mga ngalan pagapapason, ug dili sila iphon taliwala sa katawhan ni Kristo.

8 Apan kon kanunay sila nga maghinulsol ug mangayo og kapasayloan, uban sa tinuod nga katuyoan, sila pasayloon.

9 Ug ang ilang mga panagtigom gidumala sa simbahan subay sa paagi sa mga kalihokan sa Espiritu, ug pinaagi sa gahom sa Espiritu Santo; kay samtang ang gahom sa Espiritu Santo migiya kanila sa pagsangyaw man, o sa pag-awhag, o sa pag-ampo, o sa pagpangamuyo, o sa pag-awit, sa ingon niini kini gihimo.