1 Ao ngkai Ngai, ae Moronaai, I koroi ana taeka tabeua tamau are Moomon, ke e taekin ni kaineti ma te onimaki, te kantaninga ao te tangira ae kororaoi; bwa e taetae nakoia aomata n te aro aei, ngke e reireinia n te tinakaoke are a tia ni kateia bwa te tabo n nebonebo.

2 Ao ngkai Ngai, Moomon, I taetae nakoimi, tariu aika kam tangiraki: ao bon man ana akoi te Atua te Tama, ao ara Uea are Iesu Kristo, ao nanona ae mimitong, ibukin ana bwaintangira n te wewete nakoiu, are I a kariaiakaki bwa N na taetae nakoimi n te tai aei.

3 Ngaia are, N na taetae nakoimi ake kaain te ekaretia, ake taan irira Kristo i nanon te rau, ake a tia ni karekea te kantaninga ae tau are kam a kona iai n rin i nanon ana rau te Uea, man te tai aio ni karokoa ae kam motirawa mangaia i karawa.

4 Ao ngkai tariu, I motika taekan bwaai aikai nakoimi ibukina bwa kam nakonako ma te rau ma natia aomata.

5 Bwa I uringa ana taeka te Atua are e taku bwa ko na kinaaia man aia mwakuri; bwa ngkana a raoiroi aia mwakuri, ao ngkanne a bon raoiroi naba.

6 Bwa nooria, e a tia n taku te Atua bwa ngkana e buakaka te aomata ao e aki kona ni karaoa ae raoiroi; bwa ngkana e anga te bwaintangira ke e tataro nakon te Atua, ao ngkana e aki karaoia ma nanona ni koaua ao bon akea manenana nakoina.

7 Bwa nooria, e bon aki warekaki nakoina bwa te bwai ae raoiroi.

8 Bwa nooria, ngkana e buakaka te aomata ao e anga te bwai n tangira, e karaoia ma te ngurengure; ngaia are e bon taraaki bwa titebo ngke e taua te bwaintangira; ngaia are e warekaki bwa e buakaka imatan te Atua.

9 Ao ai arona naba bwa e warekaki bwa e buakaka nakon te aomata, ngkana e tataro tiaki n oin nanona; eng, ao bon akea manenana nakoina, bwa e bon aki butimwaea te Atua te aekaki aei.

10 Ngaia are, te aomata are e buakaka e bon aki kona ni karaoa ae raoiroi; ao e bon aki kona naba n anga te bwai n tangira ae raoiroi.

11 Bwa nooria, te koburake n ran ae mao e bon aki konaa ni karekea te ran ae tamaroa; ao e aki naba konaa te koburake n ran ae raoiroi ni karekea te ran ae mao; ngaia are, te aomata are ana toro te riaboro e bon aki konaa n irira Kristo; ao ngkana e ira Kristo ao bon aki tiaki ana toro te riaboro.

12 Ngaia are, bwaai ni kabane aika a raoiroi a bane n roko mai iroun te Atua; ao te bwai are e buakaka e roko mai iroun te riaboro; bwa te riaboro bon ana kairiribai te Atua, ao e aki toki n un mangaia, ao e anai nano nakon te bure, ao karaoan ae buakaka n aki toki.

13 Ma nooria, are mai iroun te Atua e kakao ma n anai nano nakon karaoan te raoiroi n aki toki; ngaia are bwaai ni kabane aika a kakao ma n anai nano nakon karaoan te raoiroi, ao nakon tangiran te Atua, ma te toro irouna, e bon roko mai iroun te Atua

14 Ngaia are, kakauongo, tariu aika kam tangiraki, bwa kam na aki motika taekan te bwai ae buakaka bwa e roko mai iroun te Atua, ke te bwai are raoiroi ao e roko mai iroun te Atua bwa mai iroun te riaboro.

15 Bwa nooria, tariu, kam a tia n anganaki bwa kam na motikitaeka, bwa kam aonga n ataa te raoiroi ma n te buakaka; ao e bon maataata raoi aron te motikitaeka, bwa kam aonga n atatai ma te ataibwai ae kororaoi, n ai aekan te ngaina ma n te bong.

16 Bwa nooria, a bane n anganaki aomata Tamnein Kristo, bwa aonga n ataa te raoiroi ma n te buakaka; ngaia are, N na kaota nakoimi kawain te motikitaeka; bwa bwaai ni kabane ake a kakao nakon karaoan te raoiroi ma n kairoro nakon kakoauan Kristo, e bon roko man mwaakan ao ana bwai n tangira Kristo; mangaia are kam na ataia ma te atatai ae kororaoi bwa bon mai iroun te Atua.

17 Ma te bwai are e kairoroia aomata bwa a na karaoa ae buakaka, ao bwa a na aki kakoaua Kristo, ao a na kaakea, ma n aki toro iroun te Atua, ao ngkanne kam na kona n ataia ma te ataibwai ae kororaoi bwa bon mai iroun te riaboro; bwa aio aron ana mwakuri te riaboro, bwa e aki kairoroa te aomata bwa e na karaoa ae raoiroi, e aki, tiaki naba temanna; ao aki naba ana anera; ao aki naba ake a tautaekanaki irouna.

18 Ao ngkai, tariu, e nooraki bwa kam ataa te oota are kam a motikitaeka iai, are bon te oota are ootan Kristo, taraia bwa kam na aki motikitaeka n te aro ae kairua; bwa te motikitaeka are ko motikitaeka iai ao ko na manga bon motikaki naba taekami iai.

19 Ngaia are, I kairoroi ngkami, tariu, bwa kam na ukeuke ma te nanomwaka i nanon ootan Kristo bwa ko na ataa te raoiroi man te buakaka; ao ngkana kam tauii ni kabane bwaai aika a raoiroi, ma n aki kabuakakai, ao kam na bon riki bwa natin Kristo.

20 Ao ngkai, tariu, kam na kanga n tauii ni kabane bwaai aika a raoiroi?

21 Ao ngkai I a roko nakon te onimaki arei, are I taku bwa N na taekinna; ao N na tuangkami te kawai are kam kona iai n tauii bwaai ni kabane aika a raoiroi.

22 Bwa nooria, e atai bwaai ni kabane te Atua, ngkai ngaia ma n aki totoki nakon aki totoki, nooria, e kanakoia anera bwa a na buokiia natia aomata, bwa a na kaota rokon Kristo; ao i nanon Kristo ao a na bane n roko bwaai ni kabane aika a raoiroi.

23 Ao te Atua e taetae naba nakoia burabeti, n oin wiina bwa e na roko Kristo.

24 Ao nooria, bon iai anga aika a mwaiti are e a kaoti iai bwaai aika mwaiti nakoia natia aomata, ake a raoiroi, ao bwaai ni kabane ake a raraoi a roko mai iroun Kristo; ao ngke ngkai a bwaka aomata, ao akea te bwai ae raoiroi ae kona n roko irouia.

25 Ngaia are, man aia mwakuri n ibuobuoki anera, ao man taeka ni kabane ake a otinako ma ni wiin te Atua, ao aomata a moana ni kamwakura aia onimaki iroun Kristo; ao man te onimaki ao a bon tauii bwaai ni kabane ake a raoiroi; ao aio arona ni karokoa rokon Kristo.

26 Ao mwiin rokona a bon kamaiuaki aomata naba man onimakinan arana; ao man te onimaki are a riki bwa natin te Atua mwaane. Ao ngkai e bon maiu te Kristo e taekin taeka aikai nakoia ara bakatibu ni kangai: Ane e bubutia te Tama n arau, te bwai ae raoiroi, ma te onimaki ma ni kakoaua bwa e na bon reke, nooria e na bon karaoaki nakoina.

27 Ngaia are, tariu aika kam tangiraki, a tia n toki kakai ibukina bwa e a tia Kristo n nako karawa, ma n tia n tekateka i angatain te Atua, bwa e na anaa mai iroun te Tama te nanoanga are e riai n reke i rouna ibukiia natia aomata?

28 Bwa e a tia ni kakoroa bukin te tua, ao e anaia ni kabane ake a onimakinna; ao naake iai aia onimaki irouna, a na tauii bwaai ni kabane aika raoiroi; ngaia are e tei ibukin aia waaki natia aomata; ao e maeka n aki toki i karawa.

29 Ao ibukina bwa e a tia ni karaoa aio, tariu aika kam tangiraki irou, a tia n toki kakai? Nooria, I tuangkami, A tuai; ao aki toki naba anera ni karaoa te ibuobuoki nakoia natia aomata.

30 Bwa nooria, a bon tautaekanaki irouna, bwa a na mwakuri n aron ana taeka ni kairiri, bwa a na kaotia nakoia ake a matoatoa aia onimaki ao a matoatoa aia iango n aekan nako te aro n Atua.

31 Ao tabeia n aia mwakuri bwa a na weteia aomata ni kabane nakon te rairannano, ao ma ni kakoroi bukin ma ni karaoi ana mwakuri ni berita aika a tabu ni kabane te Tama, are e a tia ni karaoia nakoia natia aomata, bwa e na katauraoa te kawai i buakoia natiia aomata, ma n taekinan ana taeka Kristo nakoia aomata ake a rineaki iroun te Uea, bwa a na taetaekina koauana.

32 Ao ngkana a karaoa aio, ao te Uea ae te Atua e katauraoa te kawai are nikiraia aomata a na iai irouia te onimaki iroun Kristo, bwa te Tamnei are e Raoiroi e na iai nnena inanoia, n aron te mwaaka are iai; ao n te aro aei e na kakoroaki bukin ana berita aika a tabu te Tama, are e a tia ni karaoia ma natiia aomata.

33 Ao e a tia n taku Kristo: Ngkana iai onimakinau iroumi ao e na reke iroumi te mwaaka ni karaoa te bwai are kam tangiria iroou.

34 Ao e taku: Rairinanomi ngkami tokin aonaba, ao nakomai nakoiu, ma ni bwabetitoaki n arau, ma ni karekea te onimaki irou, bwa kam aonga ni kamaiuaki.

35 Ao ngkai, tariu aika kam tangiraki, ngkana aio arona bwa a koaua bwaai aika I a ti a n taekin nakoimi, ao te Atua e na kaotia nakoimi, ma te mwaaka ao te mimitong ae korakora n te kabanea ni bong bwa a bon koaua, ao ngkana a koaua, e a tia n toki bongin te kakai?

36 Ke a tia anera n toki kaotia nakoia natiia aomata? Ke e a tia n taua mwaakan te Tamnei are e Raoiroi mai irouia? Ke tao e na taua mwaakan te Tamnei are e Raoiroi ngkana iai te tai ke ngkana iai te aonaba, ke ngkana iai temanna te aomata ae tiku ni kamaiuaki i aon te aba?

37 Nooria, I taku nakoimi, Tiaki; bwa bon man te onimaki are a karaoaki iai kakai; ao man te onimaki are a kaoti iai anera ma ni mwakuri nakoia aomata; ngaia are, ngkana arona bwa a toki bwaai aikai ao te maraia nakoia natia aomata, bwa e riki ibukin aia kakewekewe, ao a matebuaka bwaai ni kabane.

38 Bwa akea te aomata ae kona ni kamaiuaki, n aron ana taeka Kristo, ti ngkana a onimakina arana; ngaia are, ngkana arona bwa a toki bwaai aikai, ao e a tia naba n toki te onimaki; ao ai kananoangara aron te aomata, bwa a riki n aron ae akea te kabomwi are e a ti a ni karaoaki.

39 Ma nooria, tariu aika kam tangiraki, I motika taekan bwaai aika a raraoi riki ibukimi, bwa I motikia bwa iai onimakinan Kristo iroumi ibukin ami nimamannei; bwa ngke arona bwa akea onimakinana ao ngkanne kam aki tau ni warekaki i buakoia aomatan ana ekaretia.

40 Ao riki, tariu aika kam tangiraki, N na taetae nakoimi ni kaineti ma te kantaninga. Kam kanga ni kona ni karekea te onimaki, ma ti ngkana iai te kantaninga iroumi?

41 Ao teraa are kam na kantaningaia? Nooria, I taku nakoimi bwa kam na karekea te kantaninga rinanon ana mwakuri ni kamaiu Kristo ao mwaakan mangautina, bwa kam na kateirakeaki nakon te maiu are akea tokina, ao aio ibukin ami onimaki irouna n aron te berita.

42 Ngaia are, ngkana iai ana onimaki te aomata e na riai n iai te kantaninga irouna; bwa ngkana akea te onimaki ao bon akea te kantaninga irouna.

43 Ao riki, nooria, I taku nakoim bwa e bon aki kona n reke te onimaki irouna ma te kantaninga, ma ti ngkana e nimamannei, ma n nanorinano i nanona.

44 Ao ngkana ngaia ao, ana onimaki ma ana kantaninga e bon matebuaka, bwa akea ma i buakoia ae butimwaeaki iroun te Atua, ma ti ngkana e nimamannei ma n nanorinano nanona, ao e taekinna ni mwaakan te Tamnei are e Raoiroi bwa Iesu bon te Kristo, ao e na riai n iai irouna te tangira ae kororaoi; bwa ngkana akea te tangira ae kororaoi irouna ao bon te akea ngaia; ngaia are e riai n iai te tangira ae kororaoi irouna.

45 Ao te tangira ae kororaoi e taotaonaki n nano, ao e akoi, ao e aki bakantang, ao e aki kainikatonga, ao e aki ukoukora oin nanona, e aki kakai un, e aki iangoa te buakaka, ao e aki kimwareirei n te buakaka ma e kimwareirei n te koaua, e keiakin bwaai ni kabane, e kakoauai bwaai ni kabane, e kantaningai bwaai ni kabane, ao e teimatoa n nanomwaka ni bwaai ni kabane.

46 Ngaia are, tariu aika kam tangiraki iroou, ngkana akea iroumi te tangira ae kororaoi, ao bon akea ngkami, bwa akea kabwakan te tangira. Ngaia are, niim ma te tangira ae kororaoi, are te kabanea ni korakora i aon bwaai nako, bwa bwaai ni kabane a na kona ni bwaka—

47 Ma te tangira ae kororaoi bon ana tangira Kristo ae itiaki, ao e teimatoa n uaa te toki; ao ane e kuneaki irouna n te kabane ni bong, ao e na bon nakoraoi ibukina.

48 Ngaia are, tariu aika kam tangiraki irou, tataro nakon te Tama ma korakoran nanomi ni kabane, bwa kam na kaonaki n te tangira aio, are e a tia ni katoka i aoia ni kabane ake taan irira Natina, are Iesu Kristo ni koaua; bwa kam aonga n riki bwa natin te Atua; bwa ngkana e kaoti ao ti na riki n arona, bwa ti na nooria n arona ngkai; bwa ti aonga ni karekea te kantaninga aio; bwa ti aonga ni kaitiakaki n arona ae e itiaki. Amen.