1 Pinalangga kong anak, nagasulat ako liwat sa imo agud mahibal-an mo nga buhi pa ako; apang nagasulat ako sang pila ka bagay parte sinang makatulublag.

2 Kay tan-awa, nangin grabe ang akon pagpakig-away sa mga Lamanhon nga sa diin wala kami nakadaug; kag si Arquianto napatay paagi sa espada, kag amo man sanday Luram kag Emron; huo, kag nadulaan kita sang madamo kaayo sang aton pinili nga mga tinawo.

3 Kag karon tan-awa, anak ko, nagaduhaduha ako nga basi laglagon sang mga Lamanhon ining katawhan; kay wala sila nagahinulsol, kag dalayon sila nga ginasugyot ni Satanas nga maakig sa isa kag isa.

4 Tan-awa, nagapangabudlay ako sing dalayon upod sa ila; kag kon maghambal ako sang pulong sang Dios sing may katalom nagakurog sila kag nagakaakig batok sa akon; kag kon indi ako maggamit sang katalom ginapatig-a nila ang ila mga tagipusuon batok sa sini; gani, nagaduhaduha ako nga basi ang Espiritu sang Ginuo nag-untat na sa pag-impluwensya sa ila.

5 Kay tuman gid ang ila pagkaakig nga sa banta ko daw wala na sila nahadlok sa kamatayon; kag nadulaan na sila sang ila gugma, sa isa kag isa; kag dalayon sila nga nagakauhaw sa dugo kag pagtimalus.

6 Kag karon, pinalangga kong anak, sa pihak sang ila katig-a, magtutum kita sa pagpangabudlay; kay kon mag-untat kita sa pagpangabudlay, pagadal-on kita sa idalom sang kondemnasyon; kay may buluhaton kita nga dapat hikoton samtang yari sa sining lawas nga dutan-on, agud mapierde naton ang kaaway sang tanan nga pagkamatarong, kag papahuwayon ang aton mga kalag sa ginharian sang Dios.

7 Kag karon nagasulat ako sang pila ka bagay parte sa mga pag-antos sining katawhan. Kay suno sa ihibalo nga akon nabaton halin kay Amoron, tan-awa, ang mga Lamanhon may madamo nga bihag nga ila gindala halin sa tore sang Seriza; kag may mga lalaki, mga babayi, kag mga kabataan.

8 Kag ang mga bana kag mga amay sadtong mga babayi kag mga kabataan napatay nila; kag ginapakaon nila ang mga babayi sang unod sang ila mga bana, kag ang mga kabataan sang unod sang ila mga amay; kag wala sing tubig, luwas sa diutay lamang, sila nga ginahatag sa ila.

9 Kag sa pihak sining dako nga kangil-aran sang mga Lamanhon, indi ini maglabaw pa sa sinang iya sang aton katawhan sa Moriantum. Kay tan-awa, madamo sang mga anak nga babayi sang mga Lamanhon ang ila gindala nga mga bihag; kag pagkatapos nga makuhaan nila sila sinang pinakamahal kag pinakaimportante nga labaw sa tanan nga butang, nga amo ang pagkaputli kag dungog—

10 Kag pagkatapos nga nahimo nila ini nga butang, ginpamatay nila sila sa labing mapintas nga paagi, nga ginapaantos ang ila mga lawas bisan tubtob sa kamatayon; kag pagkatapos nga nahimo nila ini, ginakaon nila ang ila unod pareho sang mabangis nga mga sapat, tungod sang katig-a sang ila mga tagipusuon; kag ginahimo nila ini bilang tanda sang kaisog.

11 O pinalangga kong anak, paano ang isa ka katawhan nga pareho sini, nga mga indi sibilisado—

12 (Kag pila lamang ka tuig ang nakaligad, kag sila sadto mahusay kag makaluluyag nga katawhan)

13 Apang O anak ko, paano ang isa ka katawhan nga pareho sini nga ang kaluyag yara sa tuman nga kangil-aran—

14 Paano naton mapaabot nga punggan sang Dios ang iya kamot sa paghukom batok sa aton?

15 Tan-awa, nagasinggit ang akon tagipusuon: Kalisud sa sining katawhan. Maggwa sa paghukom, O Dios, kag tagoa ang ila mga sala, kag kalainan, kag mga kangil-aran halin sa atubang sang imo nawong!

16 Kag dugang pa sini, anak ko, may madamo nga mga balo kag ila mga anak nga babayi nga nabilin sa Seriza; kag inang bahin sang mga kalan-on nga wala paghakuta sang mga Lamanhon, tan-awa, ginhakot sang kasoldadohan ni Zenefi, kag ginpabay-an sila nga magdalang-dalang bisan diin agud makakita sing kalan-on; kag madamo nga tigulang na nga mga babayi ang nagkalalipong sa dalanon kag nagkalamatay.

17 Kag ang kasoldadohan nga yari sa akon maluya; kag ang mga kasoldadohan sang mga Lamanhon yara sa tunga ko kag sang Seriza; kag ang tanan nga nagpalalagyo padulong sa kasoldadohan ni Aaron nahulog nga mga biktima sa ila makahaladlok nga kapintas.

18 O ang kalainan sang akon katawhan! Wala sila sing kahusay kag wala sing kaluoy. Tan-awa, tawo lamang ako, kag ang kusog ko iya lamang sang tawo, kag indi ko na mapatuman ang akon mga sugo.

19 Kag nagbakod sila sa ila pagkabatinggilan; kag palareho sila nga mapintas, nga wala sing ginapatawad, bisan tigulang ukon lamharon; kag nagakalipay sila sa tanan nga butang luwas lang sa sinang maayo; kag ang pag-antos sang aton mga babayi kag sang aton mga kabataan sa bug-os nga ibabaw sini nga kadutaan nagalabaw sa tanan nga butang; huo, ang dila indi makasambit, kag indi man ini masulat.

20 Kag karon, anak ko, indi na ako mag-ukat pa sa sining makahaladlok nga talan-awon. Tan-awa, nahibal-an mo ang kalainan sining katawhan; nahibal-an mo nga wala sila sing prinsipyo, kag mga kabalan; kag ang ila kalainan nagalabaw sa sinang iya sang mga Lamanhon.

21 Tan-awa, anak ko, indi ko sila mapatigayon sa Dios kay basi sakiton niya ako.

22 Apang tan-awa, anak ko, ginapatigayon ko ikaw sa Dios, kag nagasalig ako kay Cristo nga maluwas ikaw; kag nagapangamuyo ako sa Dios nga luwason niya ang imo kabuhi, agud masaksihan mo ang pagbalik sang iya katawhan sa iya, ukon ang ila lubos nga kalaglagan; kay nakahibalo ako nga pat-od gid sila nga madula luwas lang kon maghinulsol sila kag magbalik sa iya.

23 Kag kon madula sila mangin pareho ini sa mga Jarednon, tungod sang pagkabatinggilan sang ila mga tagipusuon, nga nagapangita sang dugo kag pagtimalus.

24 Kag kon madula sila, nakahibalo kita nga madamo sang aton mga kauturan ang nagbuylog sa mga Lamanhon, kag madamo pa gid ang magabuylog man sa ila; gani, magsulat ka sang bisan pila ka mga butang, kon maluwas ka kag madula ako kag indi na ikaw makita; apang nagasalig ako nga makita ko ikaw sa indi madugay; kay may sagrado ako nga mga kasulatan nga luyag ko nga itugyan sa imo.

25 Anak ko, mangin tampad kay Cristo; kag kabay nga ang mga butang nga akon ginsulat indi magpasubo sa imo, nga magbutong sa imo paidalom sa kamatayon; kundi kabay nga ibayaw ka ni Cristo, kag kabay nga ang iya mga pag-antos kag kamatayon, kag ang pagpakita sang iya lawas sa aton mga amay, kag ang iya kaluoy kag pagkamainantuson, kag ang paglaum sang iya himaya kag sang kabuhi nga wala’y katapusan, magpabilin sa imo kaisipan tubtob sa wala’y katapusan.

26 Kag kabay nga ang grasya sang Dios nga Amay, nga ang trono yara sa kahitaasan sa mga langit, kag sang aton Ginuong Jesucristo, nga nagapungko sa tuo nayon nga kamot sang iya kagamhanan, tubtob nga ang tanan nga butang mapaidalom sa iya, mangin, kag magpabilin sa imo tubtob sa wala’y katapusan. Amen.