1 Ket ita napasamak nga intalek ni Zeniff ti pagarian ken ni Noe, maysa kadagiti lallaki nga annakna; ngarud nangrugi a simmublat ni Noe nga agturay; ket saanna a sinurot dagiti wagas ti amana.

2 Ta kitaen, saanna a tinungpal dagiti bilin ti Dios, ngem sinurotna dagiti tarigagay ti pusona. Ket naaddaan iti adu nga assawa ken kamalala. Ket pinalugodanna dagiti taona nga agaramid iti basol, ken agaramid iti makarimon iti imatang ti Apo. Wen, ken inaramidda ti kinabalangkantis ken amin a kita ti kinadakes.

3 Ket inkeddengna ti apagkalima a buis ti amin a sanikuada, ti apagkalima ti balitok ken pirakda, ken apagkalima ti napateg a sanikuada, ken ti kobreda, ken ti gambangda ken ti landokda; ken ti apagkalima dagiti urbonda; kasta met ti apagkalima ti amin a bukbukelda.

4 Ket innalana amin dagitoy tapno suportaranna ti bagina, ken dagiti assawa ken kamalalana; ken kadagiti saserdotena, ken dagiti assawa ken kamalalada; iti kasta binaliwanna dagiti aramid a pakaseknan ti pagarian.

5 Ta inikkatna amin dagiti saserdote a natudingan ti amana, ket nangtuding iti kabarbaro a sukatda, kas kadagiti naparammag iti kinapalangguad dagiti pusoda.

6 Wen, ket iti kasta nasuportaranda iti kinasadutda, ken iti panagrukbabda iti didiosen, ken iti kinabalangkantisda, babaen ti buis nga impaulog ni ari Noe kadagiti taona; isu a kasta unay ti panagbannog dagiti tattao tapno masuportaran ti kinadangkes.

7 Wen, ket nagbalinda pay a managrukbab iti didiosen, agsipud ta naallilawda iti ubbaw ken makapatiray-ok a balikas ti ari ken dagiti saserdote; ta nagibagada iti balikas a makapatiray-ok kadakuada.

8 Ket napasamak a nangbangon ni ari Noe iti nadaeg ken nalawa a pasdek; ket inarkosanna iti kayo a kapintasan ti pannakaaramidna, ken amin a kita ti napateg a bambanag, a balitok, ken pirak, ken landok, ken gambang, ken napateg a metal, ken kobre.

9 Ken nangbangon met iti nalawa a palasiona, ken trono iti tengnga daytoy, naaramid amin dagioty iti nangato ti kalidad a kayo ken naarkosan iti balitok ken pirak ken napateg a bambanag.

10 Ket imbilinna met a masapul nga agaramid dagiti trabahadorna iti amin a kita ti napintas nga aramid iti uneg ti pader ti templo, iti napintas a kayo, ken kobre, ken gambang.

11 Ket dagiti tugaw a naisagana para kadagiti nangato a saserdote, a naidaddaduma kadagiti sabali a tugaw, inarkosanna iti puro a balitok; ket imbilinna a mayaramidanda iti pagsadagan, tapno makainana dagiti bagi ken dagiti takiagda bayat ti panagsaoda iti inuulbod ken ubbaw a balikas kadagiti taona.

12 Ket napasamak a nangbangon iti torre iti asideg ti templo; wen, maysa a nakangatngato a torre, uray iti kasta a kangato tapno makatakder iti tuktokna ken matantannawaganna ti daga a Shilom, kasta met ti daga a Shemlon, a tinagikua dagiti Lamanita; ken matannawaganna pay ti amin a daga iti aglawlaw.

13 Ket napasamak nga imbilinna ti pannakabangon ti adu a pasdek iti daga a Shilom; ken imbilinna ti pannakabangon ti dakkel a torre iti turod iti amianan ti daga a Shilom, a nagbalin a pagkamangan dagiti annak ni Nephi idi panawen a nagtalawda iti daga; ket isu daytoy ti inaramidna kadagiti nagun-odna a kinabaknang babaen ti buis dagiti taona.

14 Ket napasamak a tinarigagayan unay ti pusona ti kinabaknangna, ket binusbosna ti panawenna iti managbasol a panagbiag kadua dagiti assawa ken dagiti kamalalana; ken kasta met a binusbos dagiti saserdotena ti panawenda kadagiti balangkantis.

15 Ket napasamak a nagmula isuna kadagiti kaubasan iti aglawlaw ti daga; ken nagbangon kadagiti pagpespesan, ket nagaramid iti adu nga arak; ket ngarud nagbalin a mammartek, ken kasta met dagiti taona.

16 Ket napasamak a rinugian a rauten dagiti Lamanita dagiti taona, iti saggabassit a bilang, ken tapno papatayenda ida iti talonda, ken bayat nga ay-aywananda dagiti arbanda.

17 Ket nangibaon ni ari Noe kadagiti guardia iti aglawlaw ti daga tapno matubengda; ngem saan a nangibaon iti umdas a bilang, ket rinaut dagiti Lamanita ken pinapatayda ida, ken binugawda dagiti adu nga arbanda iti ruar ti daga; isu a rinugian dagiti Lamanita a dadaelen ida, ken tapno maipakatda ti gurada kadakuada.

18 Ket napasamak nga imbaon ni ari Noe dagiti buyotna a sumaranget kadakuada, ket napasanudda, wenno napagsanudda ida iti apagbiit; ngarud, nagsublida a sirarag-o iti sinamsamda.

19 Ket ita, gapu iti daytoy a dakkel a balligi nagbalin a napalangguad dagiti pusoda; impannakkelda ti pigsada, kunkunada a kabaelan ti limapuloda a sarangten maibusor iti rinibu a Lamanita; ket isu a nagpannakkelda, ket pagragsakanda ti panangpapatay, ken ti panagsayasay iti dara dagiti kabsatda, ket gapu daytoy iti kinadakes ti ari ken dagiti saserdoteda.

20 Ket napasamak nga adda kadakuada ti maysa a lalaki nga agnagan iti Abinadi; ket nakilaok kadakuada, ken rinugianna ti agipadto, a kinunana: Kitaen, isu daytoy ti kinuna ti Apo, ket isu daytoy ti imbilinna kaniak, a kinunana, Inka, ket ibagam kadagitoy a tattao, isu daytoy ti kinuna ti Apo—Ay-ayto dagitoy a tattao, agsipud ta nakitak dagiti kinarimonda, ken dagiti kinadakesda, ken dagiti kinamanangabigda; ket malaksid no agbabawida sarungkarakto ida iti pungtotko.

21 Ket malaksid no agbabawida ken agpannuray iti Apo a Diosda, kitaen, yawatkonto ida kadagiti kabusorda; wen, ket maadipendanto; ket maparigatandanto babaen iti ima dagiti kabusorda.

22 Ket mapasamakto a maammuandanto a siak ti Apo a Diosda, ken managimonak a Dios, ken sarsarungkarak dagiti kinadangkes dagiti tattaok.

23 Ket mapasamakto a malaksid no agbabawi dagitoy a tattao ken agpannuray iti Apo a Diosda, maadipendanto; ket awanto ti mangisalakan kadakuada, malaksid iti babaen ti Apo a Mannakabalin a Dios.

24 Wen, ket mapasamakto nga inton umararawdanto kaniak nabannayatkonto nga imdengan dagiti ararawda; wen, ket ipaluboskonto a parigaten ida dagiti kabusorda.

25 Ket malaksid no agbabawida babaen ti panagkawesda iti nakersang ken panangwarakiwakda iti dapu, ken umararaw a sipapasnek iti Apo a Diosda, saankonto nga imdengan dagiti kararagda, wenno isalakan ida iti rigrigatda; ket isu daytoy ti kinuna ti Apo, ken kasta a binilinnak.

26 Ita napasamak a kinapungtotda ni Abinadi idi naisaona kadakuada dagitoy a balikas, ket pinanggepda a papatayen; ngem insalakan ti Apo manipud kadagiti imada.

27 Ita idi nangngeg ni ari Noe dagiti balikas nga insao ni Abinadi kadagiti tattao, nagpungtot met; ket kinunana: Asino ni Abinadi, a mangukom kaniak ken dagiti tattaok, wenno asino ti Apo, a mangipaayto kadagiti tattaok iti kasta kakaro a panagrigat?

28 Ibilinko kadakayo a yegyo ditoy ni Abinadi, tapno papatayek, agsipud ta imbagana dagitoy a banag a mangaron iti pungtot dagiti tattaok iti tunggal maysa, ken mamataud iti panagsusupanget dagiti tattaok; ngarud papatayek isuna.

29 Ita dagiti mata ti tattao ket nabulsek; ngarud pinatangkenda dagiti pusoda a maisuppiat ken ni Abinadi, ket pinanggepda manipud iti dayta a kanito nga alaen isuna. Ket pinatangken ni ari Noe ti pusona a maisuppiat iti balikas ti Apo, ket saan a nagbabawi kadagiti dakes nga aramidna.