1 Ket napasamak a kalpasan nga inleppas ni ari Limhi ti pannakisaona kadagiti taona, ta adu a banag ti insaona kadakuada ken sumagmamano laeng kadagitoy ti insuratko kadaytoy a libro, imbagana kadagiti taona ti amin a banag maipanggep kadagiti kakabsatda nga adda iti daga ti Zarahemla.

2 Ket imbilinna ni Ammon nga agtakder iti sanguanan ti ummong, ket ulitenna kadakuada amin a napasamak kadagiti kakabsatda manipud iti panawen a pimmanaw ni Zeniff iti daga agpapan pay iti panawen a pimmanaw isuna iti daga.

3 Ken inulitna nga insalaysay kadakuada dagiti naudi a balikas nga insuro kadakuada ni ari Benjamin, ket inlawlawagna dagitoy kadagiti tattao ni ari Limhi, tapno bareng maawatanda amin a balikas nga insaona.

4 Ket napasamak a kalpasan a naaramidna amin dagitoy, pinagawid ni ari Limhi ti ummong, ket imbilinna nga agsubli ti tunggal maysa kadakuada iti balayna.

5 Ket napasamak nga pinaipanna iti sanguanan ni Ammon dagiti pinanid a naglaon iti kasuratan dagiti taona manipud iti panawen nga ipapanawda iti Zarahemla, tapno mabasana ida.

6 Ita, apaman a nabasa ni Ammon ti kasuratan, dinamag ti ari kenkuana tapno maammuanna no mabalinna nga ipatarus dagiti pagsasao, ket imbaga kenkuana ni Ammon a saan.

7 Ket imbaga ti ari kenkuana: Iti leddaangko gapu iti panagsagaba dagiti tattaok, pinagdaliasatko dagiti uppat a pulo ket tallo kadagiti tattaok iti langalang, tapno iti kasta bareng no masarakanda ti daga a Zarahemla, tapno maidawatmi kadagiti kakabsatmi nga isalakannakami iti pannakaadipen.

8 Ket nayaw-awanda iti langalang iti las-ud ti adu nga aldaw, ngem naregtada latta, ket saanda a nasarakan ti daga a Zarahemla ngem nagsublida iti daytoy a daga, ta nagdaliasatda iti maysa a daga nga adu ti kadandanuman, a nakaduktalanda iti daga a naaplagan iti tultulang ti tattao, ken ay-ayup, ken naaplagan pay iti rebba ti paspasdek ti nadumaduma a kita, a naduktalanda ti daga a nagbiagan ti tattao a kas iti kaadu ti pangen ti Israel.

9 Ket para iti pammaneknek a pudno dagiti banag a nasaoda nangyawidda iti duapulo ket uppat a pinanid a napno kadagiti kitikit, ket puroda a balitok.

10 Ket kitaen, met, nangitugotda kadagiti kabal, a dadakkel, ket naaramidda iti gambang ken kobre, ket naan-anay ti kinalagdada.

11 Ket manen, nangitugotda kadagiti espada, nga awanen ti putanda, ken narukopen iti lati dagiti tademda; ket awan ti asino man iti daga a makaipatarus iti pagsasao wenno dagiti kitikit nga adda kadagiti pinanid. Ngarud kunak kadakayo: Kabaelam kadi a mangipatarus?

12 Ket kunak manen kadakayo: Adda kadi asino man nga ammoyo a makaipatarus? Ta tarigagayak a nasken a maipatarus dagitoy a kasuratan iti pagsasaotayo; ta, nalabit, makaited dagitoy kadatayo iti pannakaammo kadagiti natda a tattao a nadadael, a nagtaudan dagitoy a kasuratan; wenno, nalabit, makaited dagitoy kadatayo iti pannakaammo kadagitoy mismo a tattao a nadadael; ket tarigagayak a maammuan ti gapu ti pannakadadaelda.

13 Ita kinuna ni Ammon kenkuana: Masiguradok nga ibaga kenka, O ari, ti maysa a tao a makaipatarus kadagitoy a kasuratan; ta adda kenkuana daytoy pagkitaanna, ken maipatarusna amin a kasuratan iti nagkauna a panawen; ket sagut daytoy a naggapu iti Dios. Ket maawagan dagitoy a banag a dagiti barubasa, ket awan ti tao a mabalin a kumita kadagitoy malaksid no nabilin, amangan ta no kitaenna dayta a saanna a karbengan ket nasken a maungaw. Ket asino man a nabilin a kumita kadakuada, isu met ti maawagan a mammadto.

14 Ket kitaen, ti ari dagiti tattao nga adda iti Zarahemla ti tao a mabilin a mangaramid kadagitoy a banag, ken addaan iti naindaklan a sagut a naggapu iti Dios.

15 Ket kinuna ti ari a nabilbileg ti mammadto ngem ti propeta.

16 Ket kinuna ni Ammon a maysa a mammaltiing ti mammadto ket kasta met a maysa a propeta; ket awan ti nabilbileg a sagut a magun-od ti tao, malaksid no adda kenkuana ti bileg ti Dios, a saan a kabaelan ti asino man a tao; ngem maaddaan met ti maysa a tao iti naindaklan a bileg a maited kenkuana manipud iti Dios.

17 Ngem maammuan ti mammadto dagiti banag a napalabas, ken dagiti banag a sumangbay, ket maipalgakto kadakuada amin a banag babaen kadagitoy, wenno, iti apag-isu, maiparangto dagiti nalimed a banag, ket maipakitanto dagiti nailimed a banag, ket maipakaammonto dagiti banag a saan a pagaammo, ket maipakitadanto met amin a banag a saan a naipakaammo.

18 Iti kasta nangipaay ti Dios iti wagas a ti tao, babaen ti pammati, mabalinna ti agaramid kadagiti nakaskasdaaw a milagro; ngarud agbalin a dakkel a gunggona para kadagiti padana a tattao.

19 Ket ita, nalaus ti rag-o ti ari kalpasan a naibaga ni Ammon amin dagitoy a balikas, ket nagyaman iti Dios, a kinunana: Awan duadua a linaon dagitoy a pinanid ti naindaklan a palimed, ket awan duadua a naisagana dagitoy a barubasa para iti panggep a mailatak amin dagitoy a palimed kadagiti annak ti tattao.

20 Wen anian a kinadatdatlag dagiti aramid ti Apo, ken anian a nagpaut ti panagsagabana kadagiti taona; wen, ken anian a kinabulsek ken ti kinarigat a makaaw-awat dagiti annak ti tattao; ta saanda a tuntonen ti sirib, wenno tarigagayanda man la koma nga isu ti agturay kadakuada!

21 Wen, kasda la iti atap a pangen a timmaray manipud iti pastor, ket nagwarawara, ket nabugtak, ken linamut ida dagiti atap nga ayup iti kabakiran.