1 Ao e koro bukina bwa i mwin uoua te ririki ao e a kaoti Abinataai i buakoia ni karaba, ao a aki kinaa, ao e a wakina ana taetae ni burabeti i buakoia ni kangai: Bwa e a tia te Uea n tua nakoiu ni kangai—Abinataai, nako taetae ni burabeti nakoia au botanaomata aikai, bwa a kamatoai nanoia ni kaaitarai au taeka; a tuai n rairinanoia man aia mwakuri aika a buakaka; mangaia ae N na katuaeia n uniu, eng, N na katuaeia n uniu, N uniu ae moan te korakora n aia bure ma aia mwakuri aika a ribaki.

2 Eng, e na reke kain te roro aio! Ao e taku te Uea nakoiu: Arora nako baim ao taetae ni burabeti ni kangai: e taku te Uea, e na koro bukina bwa te roro aio, ibukin aia buakaka, ao a na reke i aan te tautoronaki, ao e na matoa oreakia; eng, ao a na kaeaki nako irouia aomata, ao a na tiringaki; ao a na kanaki irikoia irouia man ni kaakang mai eta, ma kamea, eng, ao ma man ni kaakang.

3 Ao e na koro bukina bwa e na kabotauaki maiun te uea ae Noa ma te kunnikai are karenakoaki nako nanon te ai; bwa e na riai n ataia ae ngai te Uea.

4 Ao e na koro bukina bwa N na karekei kaia au botanaomata n te rekenikai ae korakora, eng, n te rongo ao aoraki aika kamamate; ao N na taraia bwa a na tangiroaa n te bong ae bwanin.

5 Eng, N na taraia bwa a na katokaki rawawata iaon nukaia; ao a na kamwakuraki n ai aroia aati aika a burababa.

6 Ao e na koro bukina bwa N na kabwaka te karau te atibu iaoia, ao a na kammarakaki iai; ao a na namakina naba korakoran te ang mainiku; ao a na taonaki abaia ni maan aika uarereke, ao a na kang arokaia.

7 Ao a na taonaki n te aoraki ae moan te kamamate—ao N na karaoi bwaai aikai ni kabane ibukin aia buakaka ma aia mwakuri aika a ribaki.

8 Ao e na koro bukina bwa ngkana a aki rairinanoia ao N na bon tiringia ni kabane mai aon te aonaba; ma e na iai te rekooti are a na katikua imwiia, ao N na kawakinna ibukiia tautaeka tabeua ake a na manga bwaina te aba; eng, N na karaoa aio bwa I aonga ni kaongoia kaain tautaeka aika ana roko, taekan aia mwakuri te botanaomata aio aika a ribaki. Ao a mwaiti riki bwaai aika e taetae ni burabetin Abinataai nakoia te botanaomata aio.

9 Ao e koro bukina bwa a un irouna; ao a anaia ao a uotia nako ni kabaea imatan te uea, ao a kangai nakon te uea: Taraia, ti a uota mai te mwaane nako matam are e a tia n taetae ni burabetin bwaai aika a buakaka ni kaineti ma am botanaomata, ao n taku bwa e na tiringia te Atua.

10 Ao e taetae ni burabetin naba bwai aika a buakaka ni kaineti ma maium, ao e taku bwa e na kabootauaki maium ma te kunnikai are karenakoaki i nanon uran te nne ni kanai ai.

11 Ao riki, e taku bwa titebo ngkoe ma te uteute ae mwauu, ae uteuten te tawaana ae mwauu, are e toubekaki irouia maan ao e matiratira i aan waeia.

12 Ao riki, e taku bwa titebo ngkoe ma ueen te kateketeke, are ngkana e roko n taina ao e kare te ang, ao a na ubaranako mai aon te aba. Ao e bukinna bwa e taekin bwaai aikai te Uea. Ao e taku bwa a na bane ni koro bukin bwai aikai ma a na aki ngkana ko rairananom, ao aio ibukin am buakaka.

13 Ao ngkai O te uea, tera te bwai ae moan te buakaka ae ko a tia ni karaoia, ke bure raa aika moan te korakora ae a tia ni karaoia am botanaomata, are e na karekei iai kaira te Atua, ao ni motikaki taekara iroun te aomata aio?

14 Ao ngkai, O te uea, taraia, akea te bwai ae ti bure iai, ao ngkoe, O te uea, ko tuai ni bure; mangaia are e a tia te aomata aio ni kewe n taekam, ao akea nanon ana taetae ni burabeti.

15 Ao taraia, ti korakora, ao ti na aki reke i aan te tautoronaki, ke ni kairakinako bwa taenikai irouia ara kairiribai; eng, ao ko a tia ni kakabwaiaki iaon te aba, ao ko na kakabwaiaki naba.

16 Taraia, aio te aomata anne, ti kawenea i nanon baim; ko kona ni karaoa are ko taku bwa e kukurei iai nanom nakoina.

17 Ao e koro bukina bwa e tua te uea are Noa bwa e na karinaki Abinataai i nanon te umwa ni kaikain; ao e tua bwa ana bane ni botaki taian ibonga bwa e na tewea ana kauntira mangaia bwa a na bairea iai taekana.

18 Ao e koro bukina bwa a taku nakon te uea: Kairia mai bwa ti na titirakinna; ao e tua te uea bwa e na kairaki nako mataia.

19 Ao a moana titirakinana, bwa a na kataia ni kamangaoi ana taeka, bwa e aonga n reke aia anga ni karekea iai n te bure; ma e bane n eti ana kaeka, ao e kaekai aia titiraki ni kabane, eng, ao a rangi ni kubanako; bwa a bane ni boo aia titiraki ni kabane irouna, ao e kain wiia ni bwaai ake a titirakinna.

20 Ao e koro bukina bwa e titiraki temanna nakoina ni kangai: Teraa ae ko kananonaa ngke ko taekin taeka aika a tia ni koreaki, ake a tia n reiakinaki irouia ara bakatibu, ni kangai:

21 Ai tamaroara i aon maunga waen teuare e uouoti rongorongo aika raraoi; are e tataekina te rau; are e uouoti rongorongo aika raraoi; are e tataekina te kamaiuaki; are e kangai nakon Tion, E tautaeka Atuami;

22 A na tabeki bwanaia am tia taratara; ao ma te bwanaa ae e botaki a na anene; bwa a na noori ma oin mataia ngkana e a manga kaoka Tion te Uea;

23 Kam na kimwareirei; ni botaki n anene Ierutarem ae e aki bongana; bwa e a tia te Uea ni kabebeteia ana botanaomata, e a tia ni kabomwi ibukin Ierutarem;

24 E a tia te Uea ni kaota baina ae tabu nako mataia aaba aika a mwaiti, ao e koaua bwa a na bane n noora ana kamaiu Atuara.

25 Ao e taku Abinataai nakoia: Ngkami ibonga, aika a baka n reireinia te botanaomata aio, aongkoa kam ataa te taetae n tamnein te taetae ni burabeti, ma kam tangiria bwa N na kaoti nanon bwaai aikai?

26 I kangai nakoimi, a na reke kaimi ngkai kam bureburei kawain te Uea! Bwa ngkana kam oota n nanon bwaai aikai ao kam tuai n reiakin; mangaia are kam a tia ni bureburei kawain te Uea.

27 Kam tuai n anga nanomi bwa kam na kaotaaki; mangaia ae kam tuai ni wanawana. Mangaia ae teraa aika kam a tia n reireinia te botanaomata aio?

28 Ao a taku: Ti reiakina ana tua Mote.

29 Ao e manga taku riki nakoia: Ngkana kam reiakina ana tua Mote, bukin teraa ngkai kam aki kaawakin? Bukin teraa ngkai kam katikui ami iango i aon taian kaubwai? Bukin tera ngkai kam karaoi mwakuri ni kabekaau ao ni kabanea korakorami ma kabekaau, eng, ao ni kariaia te botanaomata aio bwa a na karaoa te bure, ao e a tia te Uea ni kanakoai bwa N na taetae ni burabeti ni kaitara ma te botanaomata aio, eng, te buakaka ae korakora ni kaitara te botanaomata aio?

30 Kam aki ataia ae I taekina te koaua? Eng, kam ataia ae I taekina te koaua; ao kam riai n ruru imatan te Atua.

31 Ao e na koro bukina bwa kam na tiringaki ibukin ami bure, bwa kam a tia n taku bwa kam kabongana ana tua Mote. Ao teraa kanoan ana tua Mote ae kam ataia? E koaua bwa e na reke te kamaiuaki man ana tua Mote? Tera ami kaeka?

32 Ao a kaeka n taekinna bwa e reke te kamaiuaki man ana tua Mote.

33 Ma e taku Abinataai nakoia: I ataia bwa ngkana kam kaawakin ana tua te Atua ao kam na kamaiuaki; eng, ngkana kam kaawakin taian tua ake e a tia te Uea n angan Mote n te maunga are Tinai, ni kangai:

34 Ngai te Uea ae Atuam, are I a tia ni kairingkami n otinako mai Aikubita, ni kitana te tabo are kam tautoronaki iai.

35 Ko na tai atuana te Atua temanna irarikiu.

36 Ko na tai karaoa am bwai te boua ae kaaraki, ae katotongan te bwai teuana i karawa i eta, ke bwaai ake iaon te aonaba inano.

37 Ngkai e taku Abinataai nakoia, Kam a tia ni karaoi bwaai aikai ni kabane? I kangai nakoimi, Tiaki, kam bon tuai. Ao kam a tia n reireinia te botanaomata aio bwa a na karaoi bwaai aikai ni kabane? I kangai nakoimi, tiaki, kam bon tuai.