1 Ut anajwan chirix naq li rey kirab’i li aatin a’in, kixye reheb’ laj tij chiru: Isihomaq li winq a’in, ut kamsihomaq; xb’aan naq k’a’ru re qik’in, xb’aan naq wax ru.

2 Ut ke’xxaqab’ rib’ chi uub’ej, ut ke’xyal xk’eeb’aleb’ li ruq’ sa’ xb’een; a’b’anan a’an kixxaqab’ rib’ chiruheb’, ut kixye reheb’:

3 Mineech’e’, xb’aan naq li Dios texxsak’ wi nekek’e lee ruq’ sa’ inb’een, xb’aan naq maji’ ninq’axtesi li esil kinixtaqla wi’ li Qaawa’ chixq’axtesinkil; chi moko kinye eere li k’a’ru xepatz’ naq tinye; jo’kan ut, li Dios ink’a’ tixkanab’ naq tinsache’q sa’ li hoonal a’in.

4 Tento b’an tintz’aqob’resi ru li taqlahom li kinixtaqla wi’ li Dios; ut rik’in naq kinye li yaal eere yoo eejosq’il wik’in. Ut jo’kan wi’chik, rik’in naq kinye li raatin li Dios, xineek’e jo’ wax wu.

5 Anajwan kik’ulman chirix naq laj Abinadi kixye li aatin a’in, naq eb’ lix winq li rey aj Noe maak’a’eb’ xch’ool chixk’eeb’al li ruq’ sa’ xb’een, xb’aan naq kiwan lix Musiq’ li Qaawa’ sa’ xb’een; ut kilemtz’un li rilob’aal chi q’axal lemtz’ ru, jo’ chanru rilob’aal chaq laj Moises sa’ li tzuul Sinai, naq ki’aatinak rik’in li Qaawa’.

6 Ut a’an ki’aatinak rik’in wankilal ut chi k’eeb’il xwankil xb’aan li Dios; ut kixtikib’ wi’chik li raatin, ut kixye:

7 Nekeril naq maak’a’ eewankil chinkamsinkil, jo’kan naq toj tinraq ru li esil tinye. Relik chi yaal, ut nink’e reetal naq nekexxyok’ toj sa’ lee ch’ool xb’aan naq ninye eere li yaal chirix lee maa’usilal.

8 Relik chi yaal, ut li waatin nekexxnujob’resi rik’in xsachik eech’ool ut xnumtajik eek’a’uxl, ut rik’in josq’il.

9 A’b’anan ninraq ru li aatin ninye; ut chirix a’an maak’a’ naxye b’ar tinxik, wi taa’uxq naq kolb’ilaqin.

10 A’b’anan a’in tinye eere, li k’a’ru nekeb’aanu we, chirix a’in, taawanq choq’ reetalil ut xmuhil li k’a’aq re ru toj taachalq.

11 Ut anajwan tinye eere li rela’eb’ lix taqlahom li Dios li tz’iib’anb’il; xb’aan naq nink’e reetal naq moko tz’iib’anb’ileb’ ta sa’ lee ch’ool; nink’e reetal naq xetzol ut xek’ut li maa’usilal chiru xnimal lee yu’am.

12 Ut anajwan, jultik eere naq xinye eere: Maayiib’ choq’ aawe junaq yiib’anb’il jalam-uuch, chi moko xjalam-uuch li k’a’aq re ru wan sa’ choxa taqe’q, chi moko li wan sa’ li ch’och’ taq’a, chi moko li wan sa’ li ha’ rub’el li ch’och’.

13 Ut jo’kan wi’chik: Maakub’si aawib’ chiruheb’, chi moko tatk’anjelaq chiruheb’; xb’aan naq laa’in, li Qaawa’ laa Dios, jun Dios aj sowen, ut nink’e lix maa’usilaleb’ li yuwa’b’ej sa’ xb’eeneb’ li alal k’ajolb’ej toj sa’ rox sa’ xkaa tasal xyu’ameb’ li xik’ neke’ilok we;

14 Ut nawuxtaanaheb’ ru chi milatqeb’ li neke’rahok we ut neke’xpaab’eb’ lin taqlahom.

15 Maapatz’ xk’ab’a’ li Qaawa’ laa Dios chi maak’a’ xyaalal; xb’aan naq li Qaawa’ moko taaril ta chi maak’a’ xmaak li ani tixpatz’ xk’ab’a’ chi maak’a’ xyaalal.

16 Chijultiko’q aawe li hilob’aal kutan, re xk’uulankil xsantilal.

17 Chiru waqib’ kutan tatk’anjelaq, ut taab’aanu chixjunil laa k’anjel;

18 A’ut sa’ xwuq li kutan, lix hilob’aal li Qaawa’ laa Dios, maajun k’anjel taab’aanu, laa’at, chi moko laa walal, chi moko laa rab’in, laa moos winq, chi moko laa moos ixq, chi moko eb’ laa ketomq, chi moko laj jalanil tenamit li okenaq sa’ laa wokeb’aal;

19 Xb’aan naq chiru waqib’ kutan li Qaawa’ kixyiib’ li choxa ut li ch’och’, ut li palaw, ut chixjunil li k’a’ru chixsaheb’ wan; jo’kan naq li Qaawa’ kirosob’tesi li hilob’aal kutan, ut kixsantob’resi.

20 Chawoxloq’i laa yuwa’ ut laa na’, re naq najtaq laa kutan sa’ xb’een li ch’och’ li naxk’e eere li Qaawa’ laa Dios.

21 Matkamsin.

22 Matmuxuk sumsu. Mat-elq’ak.

23 Maach’olob’ tik’ti’ aatin chirix laa was aawiitz’in.

24 Maara ru rochoch laa was aawiitz’in, maara ru rixaqil laa was aawiitz’in, chi moko lix moos winq, chi moko lix moos ixq, chi moko lix b’ooyx, chi moko lix b’uur, chi moko k’a’ruhaq chik re laa was aawiitz’in.

25 Ut kik’ulman naq chirix naq laj Abinadi kixk’e xraqik li yehom a’in, naq kixye reheb’: Ma xetzoleb’ li tenamit a’in naq te’xk’e xch’ool chixb’aanunkil chixjunil li k’a’aq re ru a’in, re xpaab’ankileb’ li taqlahom a’in?

26 Ninye eere, ink’a’, xb’aan naq wi ta keb’aanu, li Qaawa’ ink’a’ raj kinixtaqla chi elk ut chixch’olob’ankil jo’ profeet rahilal chirix li tenamit a’in.

27 Ut anajwan, xeye naq nachal li kolb’a-ib’ xb’aan lix chaq’rab’ laj Moises. Ninye eere naq aajel ru naq teepaab’ lix chaq’rab’ laj Moises toj anajwan; a’b’anan ninye eere, naq taachalq xq’ehil naq ink’a’ chik taa’ajmanq xpaab’ankil lix chaq’rab’ laj Moises.

28 Ut jo’kan ajwi’, ninye eere, naq li kolb’a-ib’ moko ka’aj ta wi’ xb’aan li chaq’rab’ nachal; ut wi ta moko wan ta xtojb’al rix li maak, li tixb’aanu li Dios xjunes choq’ re lix maakeb’ ut lix maa’usilaleb’ lix tenamit, te’oso’q raj chi maak’a’ xjalb’al, us ta wan lix chaq’rab’ laj Moises.

29 Ut anajwan ninye eere naq ki’ajman ru naq taawanq jun li chaq’rab’ k’eeb’il reheb’ li ralal xk’ajol laj Israel, relik chi yaal, jun li chaq’rab’ q’axal kaw, xb’aan naq a’aneb’ jun li tenamit jipeb’ xk’a’uxl, seeb’eb’ chixb’aanunkil li maa’usilal, ut timileb’ chixk’oxlankil li Qaawa’ lix Dios.

30 Jo’kan naq kiwan jun li chaq’rab’ k’eeb’il reheb’, relik chi yaal, jun li chaq’rab’ re b’aanunb’il na’leb’ ut re k’ojob’anb’il k’anjel, jun li chaq’rab’ li wulaj wulaj tento te’xpaab’ chi tz’aqal, re xk’uulankileb’ sa’ xjultikankil li Dios ut lix teneb’ankileb’ chiru.

31 A’ut k’ehomaq reetal, ninye eere, naq chixjunileb’ li k’a’aq re ru a’in, a’aneb’ reetalil li k’a’aq re ru chalel.

32 Ut anajwan, ma xe’xtaw ru li chaq’rab’? Ninye eere, ink’a’, moko chixjunileb’ ta ke’tawok xyaalal li chaq’rab’; ut a’in xb’aan xkawileb’ li raam; xb’aan naq ink’a’ ke’xtaw xyaalal naq moko taaruuq ta taakole’q junaq winq, ka’ajwi’ rik’in li tojb’al-ix xb’aan li Dios.

33 Xb’aan naq k’ehomaq reetal, ma ink’a’ kiraatinaheb’ laj Moises jo’ profeet chirix lix k’ulunik li Mesias, ut naq li Dios tixtoj rix lix tenamit? Relik chi yaal, ut chixjunileb’ ajwi’ li profeet li ke’yehok profeetil aatin chalen chaq naq kitikla li ruchich’och’—ma ink’a’ ke’aatinak chi naab’al malaj chi ka’ch’in chirix li k’a’aq re ru a’in?

34 Ma ink’a’ ke’xye naq li Dios ajwi’ taakub’eeq sa’ xyanqeb’ li ralal xk’ajoleb’ li winq, ut tixk’ul sa’ xb’een jo’ xxaqalil li winq, ut taaxik rik’in xnimal ru wankilal chiru lix b’een li ruchich’och’?

35 Relik chi yaal, ut ma ink’a’ ke’xye ajwi’ naq tixk’e chi uxmank lix waklijikeb’ li kamenaq chi yo’yo, ut naq a’an xjunes rib’ taarahob’tesiiq ut taatawasiiq?