1 Wen, di kadi met kinuna ni Isaias: Asino ti namati iti padamagtayo, ken siasino ti nakaipalgakan ti takiag ti Apo?

2 Ta dumakkelto iti imatangna a kas iti naganus a mula, ken kas iti ramut manipud iti namaga a daga; awan ti langana wenno makaay-ayo a buyana; ket no makitatayonto awan pintasna tapno tarigagayantayo isuna.

3 Nauy-uyaw ken saan nga inawat dagiti tattao; maysa a tao ti ladingit, ken nakaamammo iti liday; ket kas inlengedtayo ti rupatayo manipud kenkuana; inuy-uyaw, ket saantayo impatpateg.

4 Pudno nga inturedna dagiti lidaytayo, ken inawitna dagiti ladingittayo; nupay kasta impatotayo a nasaplit, sinaplitan ti Dios, ken naparigatan.

5 Ngem nasugsugat gapu kadagiti labsingtayo, napalitem gapu iti kinadangkestayo; ti dusa ti pakaikappiaantayo naipatay kenkuana; ken gapu kadagiti saplitna naagasantayo.

6 Datayo amin, kasla karnero, a nayaw-awan; tinurong ti tunggal maysa kadatayo ti bukodna a dalan; ken impataw ti Apo kenkuana dagiti kinadangkestayo amin.

7 Nairurumen, ken naparparigat, ngem saanna nginanga ti ngiwatna; naiturong a kas maysa a kordero iti pagpartian, ket kas maysa a karnero a nagumel iti sanguanan dagiti mangpukis isu a saanna innganga ti ngiwatna.

8 Nairuar iti pagbaludan ken iti pangukoman; ket asino ti mangipakdaar iti sangkaputotanna? Agsipud ta naisina manipud iti daga dagiti sibibiag; naparigatan gapu kadagiti panaglabsing dagiti tattaok.

9 Ket naitanem a naitipon kadagiti managdakdakes, ken iti denna ti baknang iti ipapatayna; agsipud ta awan ti inaramidna a dakes, wenno aniaman a panangallilaw iti ngiwatna.

10 Nupay kasta naay-ayo ti Apo iti pinangpalitemna kenkuana; pinalidayna; inton aramidenna ti kararuana a maysa a daton a para iti basol makitananto ti kaputotanna, paatiddugennanto dagiti aldawna, ket rumang-ayto ti pannakaay-ayo ti Apo iti imana.

11 Makitananto ti panagrigat ti kararuana, ket mapnekto; adunto ti maikalintegan ti nalinteg a katulongak babaen ti pannakammona; agsipud ta ibaklaynanto dagiti kinadangkesda.

12 Ngarud ibingayakto iti paset kadagiti nabileg, ket bingayennanto ti samsam kadagiti napigsa; gapu ta imbukbokna ti kararuana iti patay; ket naibilang kadagiti managlabsing; ken inawitna dagiti basol ti adu, ken nagaramid iti panangibabaet kadagiti managlabsing.