1 Ao ngkai e kangai Abinataai nakoia: I tangiria bwa kam na ataia bwa e na ruo te Atua n oin rabwatana i buakoia natia aomata, ao e na kabooia ana botanaomata.

2 Ao bukina ngkai e maiu n te rabwata e na aranaki bwa Natin te Atua, ngkai e na anga rabwatana nakon ana babaire te Tama, ngkai ngaia te Tama ao te Nati—

3 Te Tama, ngkai e karikaki ni mwaakan te Atua; ao te Nati ibukina ngkai te rabwata; mangaia ae e a riki bwa te Tama ao te Nati—

4 Ao ngaia bon te Atua ae ti temanna, eng, ae te Tama ae Akea Tokina ibukin karawa ma aonaba.

5 Mangaia ae e na kairaki te rabwata iroun te Tamnei, ke te Nati iroun te Tama, ngkai ngaia te Atua ae ti temanna, a na rinanon te kaririaki, ao a na aki bwaka n te kaririaki, ma e na kariaia ae e na kamamaeaki, kataereaki, ao n teweaki nako, ao ni kaakaki taekana mai irouia ana botanaomata.

6 Ao i mwin bwaai aikai ni kabane, i mwin karaoan taian kakai aika kamimi i buakoia natia aomata, ao e na kairaki, eng, n aron are taekinna Itaia, n aiaron te tiibu are kairaki nako mataia taan korea buraena ao e aki kakarongoa, ao e aki kauka wiina.

7 Eng, e na bon kairaki, tauraki, ao n tiringaki, ao e na rinanon te mate te rabwata, e na anaaki ana baire te Nati nakon nanon ana baire te Tama.

8 Ao te Atua e na motiki ana kabaebae te mate, ni karekea te tokanikai iaon te mate; n angan te Nati te mwaaka ni karekea te kabwara bure ibukiia natia aomata—

9 E na tia ni waerake nako karawa, ao e na onrake n te nanoanga; ao e na onrake n te tangira ibukiia natia aomata; are e na tei imarenaia ma te motikitaeka; ao e na tia ni motiki kabaebaen te mate, ao e na katoka iaona buakakaia ma riaoan tua irouia, ao ni kaboia, ao ni kakoroa bukin te moti.

10 Ao ngkai I kangai nakoimi, antai ae e ataia bwa tera ae na riki nakoina? Taraia, I kangai nakoimi, bwa ngkana e a tia ni karikaki rabwatana bwa te karea ibukin te bure ao e na nooriia kanoana. Ao ngkai, tera are e a tia n taekinna? Ao antai are riki bwa kanoana?

11 Taraia, I kangai nakoimi, bwa ane e ongo n aia taeka burabeti, eng, burabeti aika a tabu ni kabane ake a tia n taetae ni burabeti ibukin rokon te Uea—I kangai nakoimi, bwa ane a tia n ongeaba nakon aia taeka, ao ni kakoaua bwa e na kabooia ana botanaomata te Uea, ao ni kariaria te bong are a na kamaunakin aia bure, I kangai nakoimi, bon kanoana aomata akanne, ke ngaia taan bwaibwai n uean te Atua.

12 Bwa aomata aikai ake e a tia ni uota bureia; aomata aikai ake e a tia ni mate ibukiia, bwa e na kaboia man riaoan tua irouia. Ao ngkai, e koaua bwa tiaki kanoana ngaia?

13 Eng, ao tiaki taian burabeti, aomata ni kabane ake a tia ni kauki wiia n taetae ni burabeti, aika a tuai ni bwaka n riaoan te tua, I taekinia ikai burabeti aika tabu ni kabane man moan rikin te aonaba? I taekinna nakoimi bwa ngaia ni kabane bon kanoana.

14 Ao aikai ake a tia n tataekina te rau, ake a tia ni uouoti rongorongo aika raroi aika a tamaroa, aika a tia n tataekina te kamaiuaki; ao ni kangai nakon Tion: E tautaeka Atuami!

15 Ao O ai tararaoira iaon te maunga waeia!

16 Ao riki, ai tararaoira iaon te maunga waeia aomata ake a bon waaki naba n tataekina te rau!

17 Ao riki, ai tamaroara iaoni maunga waeia aomata ake a na tataekina te rau n taai aika a na roko, eng, man te tai aio ni karokoa ae aki totoki!

18 Ao taraia, I kangai nakoimi, tiaki ti ngaia aio. Bwa O ai tamaroara iaoni maunga waen teuare e na uouoti rongorongo aika a raraoi, are ngaia mwiin te rau, eng, ae te Uea, are e a tia ni kabooia ana botanaomata; eng, are e a tia n anga te kamaiuaki nakoia ana botanaomata;

19 Bwa ngke akea kaboakira are e a tia ni karaoia ibukiia ana botanaomata, are e a tia ni katauraoaki man moan te aonaba, I kangai nakoim, ngke akea aio, ao a na tia ni mauna nako aomata ni kabane.

20 Ma taraia, a na motikaki ana kabaebae te mate, ao e na tautaeka te Nati, ao iai mwaakana riki iaon te mate; mangaia ae e na karekea te mangauti man te mate.

21 Ao e na reke te mangauti, ae te moan mangauti eng, ae te mangauti nakoia ake ngkoa, ake ngkai, ao ake a na roko, nakon mangautin Kristo—bwa aio te ara are e na aranaki iai.

22 Ao ngkai, mangautiia burabeti, ao aomata ni kabane ake a kakoauai aia taeka, ao aomata ni kabane ake a kaawakin ana tua te Atua, e na reke nakoia te moan mangauti mangaia ae ngaia taan moan ni mangauti.

23 A na kautaki bwa a na maeka ma te Atua are e a tia ni kabooia; mangaia ae e na reke irouia te maiu ae akea tokina mai iroun Kristo, are e a tia ni motiki ana kabaebae te mate.

24 Ao aikai ake kain te moa ni mangauti; ao aikai ake a tia ni mate i mwaain rokon Kristo, n aki ataa taekana, n akea rongorongon te kamaiuaki are taekinaki nakoia. Mangaia te Uea e a karekea kaokakia aomata aikai; ao iai nneia n te moan ni mangauti ke te maiu are akea tokina, ngkai a kabooaki iroun te Uea.

25 Ao e na reke naba te maiu ae akea tokina irouia ataei aika a uarereke.

26 Ma taraia, kam na maaku, ao kam na ruru imatan te Atua, bwa kam riai n ruru; bwa te Uea e aki kamaiuia ake a kaitara ao a mate i nanon aia bure; eng, aomata naba ake a tia ni mate i nanon te bure man moan te aonaba, ao ni baireia bwa a na kaitaraa te Atua, ao atai ana tua te Atua, ao a aki kan kaawakin; aikai ake akea nneia n te moan mangauti.

27 Mangaia ae koaua bwa kam na aki ruru? Bwa e aki reke te kamaiua nakoia akanne; bwa e tuai te Uea ni kabooia aomata akanne; eng, ke ni kona te Uea ni kabooia aomata akanne; bwa e aki kona ni kaakea i bon irouna; bwa e aki kona ni kaakea te moti are e a tia ni baireaki.

28 Ao ngkai I taekinna nakoimi bwa ae e na roko te bong are e na taekinaki iai ana kamaiu te Uea nakoia aaba, reeti, neewe, ao aomata ni kabaneia.

29 Eng, te Uea, a na tabeki bwanaia am tia taratara; ma te bwanaa ae botaki a na anene; bwa a na noora te Uea n oin mataia ngkana e a manga kaoka Tion.

30 Kam na kimwareirei, botaki n anene mwiin Ierutarem; bwa e a tia te Uea ni kabebeteia ana botanaomata, e a tia ni kabomwi ibukin Ierutarem;

31 E a tia te Uea ni kaota baina ae tabu nako mataia aaba aika a mwaiti, ao e koaua bwa a na bane n noora ana kamaiu Atuara, te aonaba ae bwanin.