1 Ut anajwan laj Abinadi kixye reheb’: Tinwaj raj naq teetaw xyaalal naq li Dios ajwi’ taakub’eeq sa’ xyanqeb’ li ralal xk’ajoleb’ li winq, ut tixtojeb’ rix lix tenamit.

2 Ut rik’in naq nawan sa’ li tz’ejwalej, Ralal li Dios taayeemanq re; ut rik’in naq xkub’si li tz’ejwalej rub’el rajom li Yuwa’b’ej, xb’aan naq a’an li Yuwa’b’ej ut li K’ajolb’ej—

3 Li Yuwa’b’ej, rik’in naq xsihaak chaq rik’in xwankil li Dios; ut li K’ajolb’ej, sa’ xk’ab’a’ li tz’ejwalej; chi jo’kan na’ok choq’ Yuwa’b’ej ut K’ajolb’ej—

4 Ut a’aneb’ junaj chi Dios; relik chi yaal, tz’aqal lix Junelik Yuwa’il li choxa ut li ch’och’.

5 Ut chi jo’kan li tz’ejwalej li k’eeb’il rub’el xwankil li Musiq’ej, malaj li K’ajolb’ej rub’el xwankil li Yuwa’b’ej, rik’in naq a’an junaj chi Dios, naxnumsi li aaleek, ut moko naxq’axtesi ta rib’ chiru li aaleek, naxkanab’ b’an rib’ chi eetz’uuk, ut chi rapleek, ut chi isiik chaq, ut chi tz’eqtaanaak xb’aan lix tenamit.

6 Ut chirix chixjunil a’in, chirix xk’anjelankil k’iila xninqal ru sachb’a-ch’oolej sa’ xyanqeb’ li ralal xk’ajoleb’ li winq, taak’ame’q, relik chi yaal, jo’ chanru ajwi’ kixye laj Isaias, jo’ jun li karner mem chiruheb’ li neke’b’esok re, chi jo’kan moko kixte ta xtz’uumal re.

7 Relik chi yaal, chi jo’kan ajwi’ taak’ame’q a’an, taak’ehe’q chiru krus, ut taakamsiiq, chi k’eeb’il li tz’ejwalej rub’el xwankil ajwi’ li kamk, chi sub’b’il li rajom li K’ajolb’ej sa’ li rajom li Yuwa’b’ej.

8 Ut chi jo’kan li Dios naxtoq lix b’ak’leb’ li kamk, chirix xq’axb’al ru li kamk; ut xk’ehom re li K’ajolb’ej xwankil re xb’aanunkil ruuchileb’ li ralal xk’ajoleb’ li winq—

9 Chi ak taqenaq sa’ choxa, ut wan li uxtaan chixsa’ xch’ool, chi nujenaq rik’in xtoq’ob’ankileb’ ru li ralal xk’ajoleb’ li winq, chi xaqxo a’an chiruheb’ b’ar taachalq wi’ li raqb’a-aatin, chi ak xtoqom lix b’ak’leb’ li kamk, chi xk’ulum sa’ xb’een lix maa’usilaleb’ ut li q’etok aatin reheb’, chi ak xtojomeb’ rix, ut ak xk’ehom li elajinb’il xb’aan li tiik ruhil na’leb’.

10 Ut anajwan ninye eere, ani taach’olob’anq resil li ralal xk’ajol? K’ehomaq reetal, naq ak k’eeb’il li raam jo’ mayej choq’ re li maak a’an taarileb’ li riyajil. Ut anajwan k’a’ru nekeye? Anihaqeb’ ut li riyajil a’an?

11 K’ehomaq reetal ninye eere, naq yalaq ani li x’ab’ink re li raatineb’ li profeet, relik chi yaal, chixjunileb’ li santil profeet, li ke’yehok profeetil aatin chirix lix k’ulunik li Qaawa’—ninye eere, naq chixjunileb’ li xe’ab’ink re li raatineb’, ut xe’xpaab’ naq li Qaawa’ tixtoj rix lix tenamit, ut xe’ilok chi uub’ej toj sa’ li kutan a’an re te’isiiq lix maakeb’; ninye eere, naq a’aneb’ a’in li riyajil, malaj ut a’aneb’ aj eechanihom re li rawa’b’ejihom li Dios.

12 Xb’aan naq a’aneb’ a’in li iiqanb’ileb’ xmaak xb’aan a’an; a’aneb’ li ani aj-e kikam wi’, re xtojb’aleb’ rix chiru li q’etok aatin ke’xb’aanu. Anajwan ut, ma maawa’eb’ a’an li riyajil?

13 Relik chi yaal, ut ma maawa’eb’ b’i’ li profeet, li junjunq li xtehok re xtz’uumal re re aatinak jo’ profeet, li ink’a’ xt’ane’ sa’ li q’etok aatin, ninye ut chixjunileb’ li santil profeet chalen chaq naq kitikla li ruchich’och’? Ninye eere naq a’aneb’ li riyajil.

14 Ut a’aneb’ a’in li xe’puktesin resil li tuqtuukilal, li xe’k’amok chaq li chaab’il esilal chirix li chaab’il, li xe’puktesin resil li kolb’a-ib’, ut ke’xye re Sion, Laa Dios na’awa’b’ejin!

15 Ut aay, k’a’jo’ xch’ina-usileb’ chaq chiruheb’ li tzuul li roqeb’!

16 Ut jo’kan wi’chik, k’a’jo’ xch’ina-usil chaq chiruheb’ li tzuul li roqeb’ a’an li toj yookeb’ chixpuktesinkil resil li tuqtuukilal!

17 Ut jo’kan wi’chik, k’a’jo’ xch’ina-usal chaq chiruheb’ li tzuul li roqeb’ li te’xpuktesi moqon resil li tuqtuukilal, relik chi yaal, chalen chaq sa’ li kutan a’in toj chi junelik!

18 Ut k’ehomaq reetal, ninye eere, moko chixjunil ta a’in. Xb’aan naq aay, k’a’jo’ xch’ina-usal chaq chiruheb’ li tzuul li roq a’an li nak’amok re li chaab’il esilal, a’an laj yiib’ahom re li tuqtuukilal, relik chi yaal, li Qaawa’, li xtojok rix lix tenamit; relik chi yaal, a’an li kik’ehok li kolb’a-ib’ re lix tenamit;

19 Xb’aan naq wi ta moko x’ux ta li tojb’al-ix li kixb’aanu choq’ re lix tenamit, li kikawresiman chalen chaq sa’ xk’ojlajik li ruchich’och’, ninye eere, wi ta ink’a’ x’ux a’in, tento raj naq ke’oso’ chixjunil li winq.

20 A’b’an k’ehomaq reetal, lix b’ak’leb’ li kamk taatoqmanq, ut li K’ajolb’ej na’awa’b’ejin, ut wan xwankil sa’ xb’eeneb’ li kamenaq; jo’kan ut, a’an naxk’e chi uxmank lix waklijikeb’ li kamenaq chi yo’yo.

21 Ut taachalq jun li wakliik chi yo’yo, a’an jun xb’een wakliik chi yo’yo, relik chi yaal, jun xwaklijikeb’ chi yo’yo chixjunileb’ li wanjenaqeb’, ut li wankeb’, ut li toj te’wanq, toj sa’ lix waklijik li Kristo chi yo’yo—xb’aan naq jo’kanaq taayehe’q re.

22 Ut anajwan, lix wakljikeb’ chi yo’yo chixjunileb’ li profeet, ut chixjunileb’ li ke’paab’ank re li raatineb’, malaj chixjunileb’ li ke’paab’ank reheb’ lix taqlahom li Dios, taachalq sa’ li xb’een wakliik chi yo’yo; jo’kan naq a’aneb’ li xb’een wakliik chi yo’yo.

23 Eb’ a’an neke’taqsiik chi wank rik’in li Dios li kitojok rixeb’; chi jo’kan neke’wan xyu’am chi junelik sa’ xk’ab’a’ li Kristo, li kitoqok re lix b’ak’leb’ li kamk.

24 Ut a’aneb’ a’in li neke’tz’aqon sa’ li xb’een wakliik chi yo’yo; ut a’aneb’ a’in li ke’kam chi maji’ nachal li Kristo, chi maak’a’ xnawomeb’, chi moko xjultikaman ta li kolb’a-ib’ chiruheb’. Ut chi jo’kan li Qaawa’ naxk’e chi uxmank lix k’ojlajikeb’ wi’chik a’in, ut neke’tz’aqon sa’ li xb’een wakliik chi yo’yo, malaj neke’wan xyu’am chi junelik, rik’in naq tojb’ileb’ rix xb’aan li Qaawa’.

25 Ut eb’ li kok’al li ka’ch’in xyu’ameb’ wankeb’ ajwi’ xyu’am chi junelik.

26 A’b’anan k’ehomaq reetal, ut xuwanqex, ut chexsiksotq chiru li Dios, xb’aan naq tento raj texxuwaq ut texsiksotq; xb’aan naq li Qaawa’ maajun naxtoj rix xkomoneb’ li neke’xpo’resi xch’ool rik’in, ut neke’kam sa’ lix maak; relik chi yaal, chixjunileb’ a’an li ke’oso’ sa’ lix maak chalen chaq naq kitikla li ruchich’och’, li ke’xpo’resi xch’ool rik’in li Dios chi k’oxlanb’il, li ke’xnaweb’ lix taqlahom li Dios, ut moko ke’raj ta xpaab’ankil; a’aneb’ a’in li moko neke’tz’aqon ta sa’ li xb’een wakliik chi yo’yo.

27 Jo’kan ut, ma ink’a’ raj tento texsiksotq? Xb’aan naq li kolb’a-ib’ maajun aj-e xkomon a’an nachal; xb’aan naq li Qaawa’ maajun xtoj rix xkomon a’an; relik chi yaal, chi moko naru ta li Qaawa’ chixtojb’al rix xkomon a’an; xb’aan naq ink’a’ naru chixsachb’al xyaalal li raatin; xb’aan naq ink’a’ naru chixsachb’al xwankil li k’a’ru tiik ru, naq wan k’a’ru patz’b’il xb’aan.

28 Ut anajwan ninye eere naq taachalq xq’ehil naq lix kolb’a-ib’ li Qaawa’ taach’olob’amanq chiru li junjunq chi tenamit, junkab’al, aatinob’aal ut teepal.

29 Relik chi yaal, at Qaawa’, eb’ laa k’aak’alenel tenamit te’xtaqsi xyaab’eb’ lix kux; chi junajinb’il xyaab’eb’ xkux te’b’ichanq; xb’aan naq te’ril rik’in ruheb’ naq li Qaawa’ tixk’am chaq wi’chik Sion.

30 Chinumtaq xsahil eech’ool, chexb’ichanq sa’ komonil ex sachenaqil na’ajej re Jerusalen; xb’aan naq li Qaawa’ kixk’ojob’ xch’ool lix tenamit, a’an kixtoj rix Jerusalen.

31 Li Qaawa’ xt’usub’ lix santil tel sa’ rilob’aaleb’ chixjunil li tenamit, ut chixjunileb’ lix maril li ruchich’och’ te’ril lix kolb’a-ib’ li qaDios.