1 Jinataj maypachachus Abinadi parlayta tukusqantawan, reyqa sacerdotesta kamacherqa payta jap’inankuta wañuchinankupaj.

2 Chaywampis ujnin kaj karqa Alma sutiyoj, paytaj Nefij mirayninmanta karqa. Jovenraj karqataj, tukuy Abinadij parlasqanta creerqataj, imaraykuchus pay yacharqaña tukuy juchallikusqankuta, mayqenmantachus Abinadi willarqa. Chayrayku reymanta mañakorqa mana Abinadiwan phiñakunanta, astawanqa Abinadita sonqo tiyaywan ripojta saqenampaj.

3 Chaywampis reyqa astawan phiñakorqa, Almata qharqorqataj paykunamanta. Kamachisnintataj kacharqa Almata wañuchejta.

4 Chaywampis paykunamanta ayqerqa, pakakorqataj, mana payta tarinankupaj. Ashkha p’unchaykunapaj pakasqa kaspataj payqa escriberqa tukuy Abinadij parlasqanta.

5 Jinataj reyqa kamacherqa soldadosta Abindadita muyuykunankuta payta jap’inankupaj. Paykunataj payta wataykorqanku, carcelman wisq’arqankutaj.

6 Kinsa p’unchayta reyqa sacerdotesninwan parlanakuspaña, watejmanta Abinadita pusacherqa paypa ñawpaqenman.

7 Paymantaj nerqa: Abinadi, juchayoj kasqaykita tariyku, qantaj wañunayki tiyan.

8 Imaraykuchus qan nerqanki Dios kikin runaspa wawasninkuman uraykumunanta, chayrayku kunan wañuchisqa kanki mana ñoqamanta, llajtaymantawan sajra parlasqaykita allinyachinki chayqa.

9 Chaypachataj Abinadi payman nerqa: Qanman niyki, ñoqaqa manapuni kay llajtamanta parlasqayta waj jinayachisajchu, imaraykuchus cheqata parlarqani. Cheqa kasqanta yachanaykichispajtaj ñoqaqa makisniykichisman urmajta seqekorqani.

10 Arí, ñoqataj ñak’arisaj wañunaykamapis, manataj parlasqayta waj jinayachisajchu. Parlasqaytaj sayarenqa qampa contraykita willanampaj. sichus ñoqata wañuchiswanki chayqa, mana juchayoj yawarta jich’anki. Chaytaj qampa contraykita willanqa qhepa p’unchaypi.

11 Chaypachataj rey Noe kacharichej jina karqa parlasqanta mancharikusqanrayku, imaraykuchus payqa manchachikorqa Diospa juiciosnin payman urmanankuta.

12 Chaywampis sacerdotesqa paypa contranta qhaparerqanku, payta tumpayta qallarerqankutaj nispa: Payqa reyta k’amin. Chayrayku reyqa paypaj phiñakorqa, kamacherqataj wañuchisqa kananta.

13 Jinataj payta jap’ispa wataykorqanku. Payta ñak’aricherqankutaj jatun nina ruphaywan, arí, wañunankamapis.

14 Chantaqa, nina ruphayta qallarejtin, paykunaman qhaparerqa nispa:

15 uyariychis, imaynamantachus ñoqata ruwawankichis, kikillantataj wawasniykichis ashkhasta ñak’arichenqanku nima ruphaywan wañuchisnankupaj, kaytaj Señor Diosninkoj salvacionninta creesqankurayku.

16 Jinataj qankuna tukuy imaymana onqoykunawan onqonkichis juchallikusqaykichisrayku.

17 Arí, qankuna jasut’isqa kankichis sapa cheqampi. Imaynamantachus k’ita, phiña animalea qhatinku k’ita p’isqosta, kikillantataj tukuynejman qankuna qhatisqas, ch’eqerachisqastaj kankichis.

18 Chay p’unchaypitaj animalta jina qankunata qhatisonqachis, enemigosniykichispa makisninkumantaj urmankichis. Chaypachataj imaynamantachus ñoqa ñak’arini, jinallatataj qankuna ñak’arinkichis nina ruphaywan wañunaykihiskama.

19 Ajinata Dios kutichin llajtanta tukuchejkunaman. O Dios, espirituyta jap’iy.

20 Kunantaj Abinadi chayta parlaytawan, payqa urmarqa, ninapi wañuyta ñak’arisqanrayku. Arí, payta wañucherqanku, imaraykuchus mana Diospa kamachisqasninta neganmanchu, parlasqan cheqa kasqanta sellaspa wañuyninwan.