Mosiahj Libron

1 Jinataj Mosiah tatampa kamachisqanman jina ruwaytawan, tukuy jallp’anejpi uj willayta willarqa tukuy runas tantakunankupaj, temploman wicharinankupaj Rey Benjamimpa parlasqanta uyarej.

2 Ashkha runastaj karqanku. Ashkha kasqankuraykutaj mana yuparqankuchu. Imaraykuchus paykuna anchata miraykorqanku, jallp’api jatunchakorqankutaj.

3 Paykunataj ñawpaj nacesqa kajkunata tropasninkumanta jap’erqanku, sacrificiosta, ruphachisqa rikuchinastawan jaywanankupaj, Moisespa leyninman jina.

4 Jinallataj Señor Diosninkuman agradecenankupaj, pichus paykunata pusarqa Jerusalen jallp’amanta, pitajchus enemigosninkoj makisninkumanta kacharicherqa, pitajchus wajyarqa cheqa sonqoyoj runasta yachachejkuna kanankupaj, uj cheqa sonqoyoj runata reyninku kanampajtaj. Chay reytaj sumaj kawsayta jataricherqa Zarahemla sutiyoj jallp’api, yachacherqataj Diospa kamachisqasninta junt’anankuta, kusikunankupaj, Diospaj, tukuy runaspajtaj munakuywan junt’asqas kanankupajtaj.

5 Jinataj temploman jamuspa, paykuna sayaricherqanku carpasninkuta temploj muyuynimpi, sapa runa familianman jina, mayqempichus tiyan paypa warmin, wawasninwan, paykunaj wawasninku, kurajmanta sullk’akama, sapa familia waj familiasmanta t’aqasqa.

6 Temploj muyuynimpitaj carpasninkuta sayaricherqanku. Sapa runa carpampa punkunta churarqa temploman qhawanankupaj, carpasninkupi quedakunankupaj chaymantapacha uyarinankupaj Rey Benjamimpa parlananta.

7 May ashkha runas kasqankurayku Rey Benjamin mana q’alitunta yachachiyta aterqachu temploj perqasnin ukhupi. Chayrayku torreta ruwacherqa llajtan parlasqanta uyarinampaj.

8 Jinataj torremanta parlarerqa llajtanman. Paykunataj mana parlasqanta uyariyta aterqankuchu may ashkha runas kasqankurayku. Chayrayku parlasqanta escribicherqa, mana uyarej runasman parlasqanta apachinampaj paykunapis parlasqanta jap’inankupaj.

9 Kaykunatataj payqa parlarqa, escribicherqataj nispa: Hermanosníy, tukuy qankuna, mayqenkunachus kaypi tantakorqankichis, mayqenkunachus kunan p’unchaypi parlasqayta uyariyta atinkichis. Imaraykuchus mana kamacherqaykichischu, kaymana jamunaykichista ñoqaj parlasqayta asipayanaykichispaj, astawanqa uyarinawaykcihis tiyan, ninrisniykichista kicharinaykichistaj tiyan uyarinaykichispaj, sonqosniykichista kicharispa jap’eqanaykichispaj, yuyayniykichistapis Diospapakasqasninta rikunaykichispaj.

10 Mana kayman jamunaykichista kamacherqaykichischu ñoqata manchachikunawaykichispaj, jinapis yuyanaykichispaj ñoqa wañoj runamanta astawanraj kasqayta.

11 Astawanqa ñoqaqa, qankuna jinalla kani, tukuy cuerpopi, yuyaypipis onqoykunata jap’ini. Chaywampis kay llajtamanta ajllasqa kani, tataymanta jawisqallataj, Señorpa makimpa saqesqantaj kani kay llajtaj reyninman, kamachejninmampis tukunaypaj. Tukuymanta aswan sumaj atiyninwantaj waqaychasqa kani, qankunata sirvinaypaj tukuy atiywan, yuyaywan, kallpawan ima mayqenkunatachus Dios ñoqaman qowan.

12 Niykichistaj, p’unchayniykunapi qankunata sirvispa kani kunan p’unchaykama. Manataj qolqeta, mana qoritapis, mana ima qhapaj kayniykichistapis mask’arqanichu.

13 Manataj carcelpi presochasqas kajta saqerqaykichischu, manataj saqerqaykichischu llank’aj kamachisman tukojta. Manataj saqerqaykichischu wañuchejta, suwajta, qhenchachakojta ima. Manataj saqerqaykichischu ima sajratapis ruwajta. Ñoqataj yachacherqaykichis Señorpa kamachisqasninta junt’anaykichista tukuy kamachisqasnimpi.

14 Ñoqapis kikiy makisniywan llank’allarqanitaj, qankunata sirvinaypaj, mana ashkha impuestosta paganaykichispaj, mana ima ancha trabajo cosa qankunaman urmanampaj. Tukuy imatachus parlani, chaymanta tukuyniykichis testigos kunan p’unchay kankichis.

15 Chaywampis hermanosníy, mana kaykunata ruwarqanichu yupaychasqa kanaypaj. Manataj kaykunata willaykichisschu qankunata k’aminaypaj. Astawanqa kaykunata willaykichis yachanaykichispaj llimphu yuyayniyoj kutichiyta atisqayta Diospa ñawpaqempi.

16 Uyariychis, p’unchayniykuna qankunata sirvispa nisqayrayku, mana yupaychasqa kayta munanichu, imaraykuchus Diosllata sirverqani.

17 Uyariychis, imaraykuchus kaykunata niykichis yachayniyoj kanaykichispaj; amañanaykichispaj runa masiykichista sirvispa, Diosnillaykichista sirvishankichis.

18 Qankuna sutichawankichis reyniykichista. Sitajchus ñoqa, pitachus reyniykichis sutichankichis, llank’ani qankunata sirvinaypaj, ¿Manachu qankuna llank’anaykichis tiyan sirvinakunaykichispaj?

19 Jinataj, ñoqachus, pitachus reyniykichis sutichankichis, tukuy p’unchayniykunapi sirviykichis chayqa, jiná Diosllata ¡Qankuna astawanraj janaj pachapi kaj Reyniykichista agradecenaykichis tiyan!

20 Qankunaman niykichis, hermanosníy, qankunachus tukuy atisqaykichisman jina Diosniykichista agradecewajchis, yupaychawajchistaj, mayqen Dioschus qankunata ruwasorqachis, mayqen Dioschus qankunata waqaychasorqachis, mayqen Dioschus kusichisorqachis, mayqen Dioschus sonqo tiyay kawsayta qankunaman qosorqachis —

21 Niykichis, qankunachus payta sirvinkichis chayqa, pichus qallariymantapacha ruwasorqachis, pichus uj p’unchaymanta waj p’unchayman qankunata waqaychashan, qankunata samachispa, kawsanaykichispaj, kuyunaykichispajtaj, ruwanaykichispajtaj munayniykichisman jina, pichus uj ratumanta waj ratuman yanapasunkichis. Niykichis, qankunachus tukuy kallpaykichiswan payta sirvinkichis chayqa, mana walej kamachisraj kankichis.

22 Uyariychistaj, kamachisqasninta junt’anaykichisllata mañakun. Paytaj qankunata nerqa kamachisqasniyta junt’ankichis chayqa, tukuy imapi allin risonqachis kay jallp’api. Paytaj manapuni llullakunchu; chayrayku kamachisqasninta junt’ankichis chayqa, bendecisonqachis, tukuy imapi allin richisonqachistaj.

23 Ñawpajta qankunata ruwasorqachis, kawsayniykichista qospa. Chayrayku qankuna Diospa manun kankichis.

24 Iskay kajtaj ruwanaykichista mañakun, imaynamantachus pay kamachisorqachis, chay jinata. Chayta ruwajtiykichisqa, chay ratitupi bendecisonqachis, chayrayku pagasunkichisña. Qankunataj paypa manun kankichisraj, jinatataj kashankichis, wiñaypaj wiñayninkamataj chay jinalla kankichis, ¿Imajtintaj chantá, yupaychakuwajchisri?

25 Kunantaj tapuykichis, ¿Atiwajchischu imallatapis qankuna kikiykichismanta niyta? Kutichiykichis nispa, Mana. Manapuni kay jallp’a polvo jina kasqaykichistapis niyta atiwajchischu. Chaywampis kay jallp’a polvomanta ruwasqas karqankichis, chaywampis qankunata Ruwajpataqa kay jallp’a polvopis.

26 Ñoqatajpis, pitachus reyniykichis sutichawankichis, qankunamanta mana aswan allinchu kani, imaraykuchus ñoqapis kay jallp’a polvomanta ruwasqa kani. Yachanikichisña viejña kani, kay wañoj cuerpota pacha mamanman churaj jinataj kani.

27 Chayrayku nisqayman jina qankunata sirverqani, llimphu yuyayniyoj Diospa ñawpaqempi purispa. Chayrayku kunan ñoqaqa kaypi tantacherqaykichis, mana juchayoj kanaypaj, mana yawarniykichis ñoqaman jamunampaj maypachachus Diospa ñawpaqempi sayarisaj juzganawampaj, qankunamanta kamachiswasqasninman jina.

28 Niykichis, qankuna kaypi tantacherqaykichis p’achasniyta llimphuchanaypaj qankunaj yawarniykichismanta. Kay tiempopi sepulturayman ripuspa, sonqo samakuywan ripunaypaj, mana wañoj espirituytaj janaj pachapi takejkunawan cheqa Diosta yupaychay takiypi tantakunampajtaj.

29 Astawanraj niykichis, kaypi tantacherqaykichis qankunaman willanaypaj manaña yachachejniykichis, manañataj reyniykichis kayta atisqayta.

30 Imaraykuchus kunan qankunaman parlashajtiy, ñoqaj cuerpoy anchata kharkatitin. Chaywampis Señor Dios ñoqata yanapawan kaypi sayarinaypaj, qankunaman parlajta saqewantaj. Paytaj kamachiwan willasunaykichista waway Mosiha reyniykichis, kamachejniykichistaj kasqanta.

31 Kunantaj hermanosníy, ñoqa munayman ruwanaykichista, imaynamantachus kunankama ruwarqankichisña. Imaynamantachus kamachisqasniyta junt’arqankichisña, tataypa kamachisqasnintapis, tukuy imapi allin risunaykichispaj, mana enemigosniykichispa makisninkuman urmanaykichispajtaj, kikillanta wawaypa kamachisqasninta, mayqenkunatachus Dios qankunata kamachisonqachis paynejta, chaykunata junt’ankichis chayqa, jallp’api tukuy imapi allin risonqachis, enemigosniykichistaj mana atipasonqachischu.

32 Chaywampis o llajtáy, pajtá qankuna ukhupi churanakuwajchis, sajra espirituta kasuspa, mayqenmantachus tatay Mosiha parlarqaña.

33 Imaraykuchus, ¡Ay pimantachus chay sajra espirituta kasun! Imaraykuchus chay sajra espirituta kasun chayqa, juchasnimpi wañuntaj chayqa, payqa maldicionta ujyan. Imaraykuchus wiñay jasut’iyta jap’in ruwasqasinrayku, Diospa leyninta p’akisqanraykutaj, yuyaynimpa contranta ruwaspapis.

34 Niykichis, mana pipis qankuna ukhupi kashanchu, ichapis juch’uy wawasnillaykichis, mayqenkunamanchus kaykuna mana yachachisqachu karqa. Tukuyniykichistaj yachankichis janaj pachapi kaj Tataykichispa manun wiñaypaj kasqaykichista, payman tukuy kapuyniykichista, tukuy kasqaykichistapis qonaykichispaj. Tukuyniykichistaj yachachisqaña kankichis escribisqasmanta, mayqenkunapichus llimphuchasqa profetaspa sut’inchasqasninta tarinchis. Chay sut’ichasqasnintaj willasqas willasqas karqanku unay profetasmanta, tatanchis, Lehi Jerusalenmanta llojsimunankama.

35 Jinallataj tukuy tatasninchispa nisqasninku willasqas kanku kunankama. Paykunataj parlarqanku imatachus Señor paykunaman kamacherqa chayta, chayrayku parlasqasninkoqa cheqa kanku.

36 Kunantaj niykichis, hermanosníy, tukuy kaykunata yachasqaykichismantawan, kaykunamanta yachachisqas kasqaykichismantawantaj, sichus qankuna juchallikunkichis, parlasqaña imaspa contranta ruwankichistaj chayqa, Señorpa Espiritunmanta t’aqakunkichistaj chayqa, qankunapi mana lugarniyojchu kanampaj yachayniyoj ñanninnejta pusasunaykichispaj, bendecisqa kanaykichispaj, allin risunaykchispaj, waqaychasqataj kanaykichispaj —

37 Niykichis, pichus kaykunata ruwan, Diospa contrampi jatarikun. Chayrayku payqa sajra espirituta kasun, tukuy allin ruwajpa enemigonman tukuntaj. Chayrayku Señorqa mana paypi kakuyta atinmanchu, imaraykuchus mana tiyakunchu ch’ichi templospi.

38 Chayrayku chay runachus mana Diosman kutirikunchu, kikimpi quedakuspa, Diospa enemigontaj kaspa wañun chayqa, janaj pachaj justician mana wañoj espiritunta rijch’arichin kikin juchallikusqanmanta reparanampaj, chaytaj Diospa ñawpaqenmanta payta ithirichin, paypa sonqontataj junt’achin juchllikusqanmanta yachaywan, nanaywan, muchuywan ima. Chaykunataj mana thasnukoj nina jinaman rijch’anku, mayqempa lawrayninchus wiñaypaj wiñayninkama wicharin.

39 Kunantaj niykichis Diospa khuyaynin mana chay runapaj kasqanta. Chayrayku chay runa mana tukukoj jasut’iyta muchunan tiyan.

40 O, tukuy machu runas, qankunapis jovenes, qankuna juch’uy wawaspis mayqenkunachus parlasqayta entiendeyta atinkichis, imaraykuchus sut’inta parlani entiendenaykichispaj. Diosmanta mañakuni rijch’arinaykichista yuyarinaykichispaj imaynatachus juchaman urmajkunapaj millay kasqankuta.

41 Astfawanraj, ñoqaqa munayman yuyarinaykichista imaynachus bendecisqa, kusisqataj kanku Diospa kamachisqasninta junt’ajkuna. Paykunaqa tukuy imapi bendecisqas kanku, kay jallp’apipis, espiritupipis. Paykunachus feniyoj kanku tukukuykama chayqa, janaj pachaman oqharisqas kanku Dioswan tiyakunankupaj, wiñaypaj kusikunankupajtaj. O yuyariychis, yuyariychis kaykuna cheqa kasqankuta, imaraykuchus Señor Dios chayta parlarqaña.