1 Jinataj maypachachus rey Benjamin yachachiyta tukucharqa, imatachus Señorpa angelnin willarqa, chaypacha ashkha runasta qhawarqa, tukuy runastaj qhawarqa pampaman urmakusqankuta, imaraykuchus Señorta mancharikuy paykunaman jamorqa.

2 Paykunataj aychalla kasqankuta, kay jallp’aj polvonmanta nisqaqa asqan pisi kasqankutataj qhawakorqanku. Tukuyninkutaj kuska qhaparerqanku nispa: Khuyariwayku, Cristoj allinyachina yawarninwan allinyarichiswayku juchasniyku pampachasqas kanankupaj, sonqosniyku llimphuchasqas kanankupajtaj. Imaraykuchus creeyku Jesucristopi, Diospa Wawan, pichus janaj pachata, kay pachatawan, tukuy imastawan ruwarqa, pichus runaspa wawasninkoj chawpinman uraykonqa.

3 Jinataj ajinata parlasqankutawan, Señorpa Espiritun paykunaman jamorqa. Paykunataj sonqo junt’asqa karqanku juchasninku pampachasqa kasqankurayku, samakuyniyoj yuyayninkupi kasqankuraykutaj. Imaraykuchus Jesucristopi may chhika feniyoj karqanku, pichus jamunanraj karqa, rey Benjamimpa parlasqanman jina.

4 Rey Benjamintaj ujtawan siminta kicharerqa, paykunaman parlarerqataj nispa: Kawsaqesníy, hermanosníy, familiasníy, llajtáy ujtawan uyarinawaykichista munayman parlanayta uyarinawaykichispaj, entiendenaykichispajtaj.

5 Imaraykuchus Diospa k’acha kasqanmanta yachaychus kunan rikuchisorqachis mana imapis kasqaykichista, mana imapaj allin kasqaykichista, urmasqa kasqaykichistawan chayqa —

6 Nillaykichistaj, qankunachus ñapis yachankichisña dios ancha k’acha kasqanta, tukuymanta aswan atiyniyoj kasqanta, yachayniyoj kasqanta, pacienciayoj kasqanta, runaspa wawasninkupaj pacienciakusqantataj; jinataj sichus ñapis yachankichisña Jesucristo juchata allinyachinanta, mayqenchus wakichisqa karqa mundoj qallariyninmantapacha salvacion runaman jamunampaj Señorpi confiajtin, kamachisqasninta allinta junt’ajtin, feniyoj kajtin kawsaynin tukukunankama, niyta munani wañoj cuerpoj kawsaynin, chaykunata yachankichis chayqa —

7 Ñoqaqa niykichis, chay runalla salvacionta jap’in, Jesus juchata allinyachisqannejta, mayqenchus wakichisqa karqa kay mundoj qallariyninmantapacha tukuy runaspaj, mayqenkunachus kawsarqanku Adampa urmasqanmantapacha, mayqenkunachus kunan kawasanku, mayqenkunachus kunanmantawan kawsanqanku kay pachaj tukukunankama.

8 Chay jinamantataj runas salvakuyta atinku. Kay willasqaña salvacion tiyan, manataj waj salvacion kanchu. Mana imatapis astawan uj runa ruwanmanchu salvakunampaj; imatachus nerqaykichisña, chayllata uj runa ruwanman salvakunampaj.

9 Diospi creeychis; creellaychistaj kawsasqanta, tukuy imata ruwasqantawan, janaj pachapi kajkunata, kay pachapi kajkunatawan. Creellaychistaj tukuy imapi yachayniyoj kasqanta, tukuy atiyniyoj kasqantawan, janaj pachapi, kay pachapipis. Creellaychistaj runa mana entiendeyta atinanta, tukuy imatachus Señor entiendeyta atin, chayta.

10 Creellaychistaj juchasniykichista saqespa Diosman kutiripunaykichista, Diospa ñawpaqempi k’umuykunaykichistataj. Cheqa sonqoyoj kaspa paymanta mañakuychis juchasniykichista pampachanampaj. Kunantaj tukuy kaykunata creekichis chayqa, tukuy kaykunata ruwaychis.

11 Imaynatachus qankunaman nerqaykichisña, kikillantataj watejmanta niykichis Diospa k’anchayniyoj kasqanta amañankichis, mana chayqa, qankunachus yachankichisña k’acha kasqanta, munakususqaykichista chayqa, juchasniykichis pampachasqaña kajtinkutaj, imachus anchata kusichisunkichis. Jina kajtimpis yuyarikunaykichista munayman, wiñaypaj yuyarinaykcihista Dios may chhika allin kasqanta, qankuna kikiykichis mana imapis kasqaykichistataj, paypa k’acha kasqanta qankunapaj, pikunachus mana jinapaj kajkuna kankichis, pacienciakusqantawan. K’umuykuychistaj ancha llamp’u sonqoyoj kanaykichiskama, sapa p’unchaypi Señorpa sutinta wajyakuspa, imachus jamonqa, chaypi feniykichispi sinchita sayaspataj, mayqenkunamantachus angel parlarqa.

12 uyariychis, niykichistaj kaykunata ruwankichis chayqa, wiñaypaj kusikunkichis, Diospa munakuyninwan junt’asqa kankichis, wiñaypajtaj juchasniykichis pampachasqa kanqanku. Qankunataj, pichus pankunata ruwasorqachis, paypa k’anchayninmanta astawan amañankichis, chay ninayan, imachus cheqa, justotaj, chayta amañankichis.

13 Manataj nanachisnakuyta munankichischu, astawanqa sonqo tiyaywan kawsayta munankichispuni, sapa uj runaman qonkichis ruwasqanman jina.

14 Mana wawasniykichista saqenkichischu yarqhaypi purejta, mana p’achayoj purejta. Manataj saqenkichischu Diospa leyesninta p’akejta, paykuna ukhupi maqanakojta, churanakojtawan, supayta kasojtawan, pichus juchallikuyta yachachin, pichus sajra espiritu, pimantachus tatasninchis parlarqanku tukuy allin kajkunaj enemigon kasqanrayku.

15 Wawasniykichista yachachinkichis cheqa, llimphu ñampi puriyta. Paykunata yachachillankichistaj munanakunankuta, sirvinakunankutawan.

16 Jinataj pikunachus yanapanaykichista necesitanku, paykunata yanapankichis. Pikunatajchus kapuyniykichista necesitanku, paykunaman qonkichis kapuyniykichista. Manataj saqenkichischu mañakoj runa llanqhalla mañakusojta, payta jawaman wijch’unaykichispaj, wañunampaj.

17 Ichapis niwajchis: Kay runa kikinrayku nanachikuchan, chayrayku mana yanapasajchu, manataj payta mikhuchisajchu, manataj kapuyniyta paymana qosajchu, mana muchunampaj imaraykuchus justolla jasut’iynin.

18 O runas, niykichis: Pichus kaykunata ruwan, payqa Diosman kutirikunan tiyan. Manataj sajra ruwasqasninmanta Diosman kutirikunchu chayqa, wiñaypaj tukuchisqa kanqa, manataj lugarniyojchu kanqa Diospa reinompi.

19 ¿Manachu tukuyninchis mañakoj runas kanchis? ¿Manachu tukuyninchis mañakojkuna kanchis chay kikin kajmanta, Dios, tukuy kapuyninchista qonawanchispaj, mikhunanchistapis, p’achasninchistapis, qorinchistapis, qolqenchistapis, tukuy qhapaj kayninchistapis?

20 Kunan p’unchaypis, qankuna paypa sutinta wajyaspa kankichis mañakuspa juchasniykichista pampachananta. ¿Llanqhallachu mañakojta sawesorqachis? Mana; payqa qankunaman Espiritunta kachamun, sonqosniykichistataj kusiywan junt’achin. Ancha kusikuyniyoj kasqaykichisraykutaj payqa parlajta jark’asorqachis.

21 Kunantaj, sichus Dios, pichus qankunata ruwarqa, pimantachus tukuy mañakojkuna kankichis kawsanaykichispaj, kapuyniykichista qosunampaj kikin kawsayniykichispaj, paychus qon ima cheqa kajtachus paymanta mañakunkichis feniyoj kaspa jap’inaykchista creespa chayqa, qankunapis tukuy kapuyniykichista qonakunaykichis tiyan.

22 Pichus kapuyniykita mañakusunki mana wañunampaj, payta juzgajtiykeqa, payta juchachajtiykeqa, qampa juchachasqa kayniyki astawanraj justo kanqa kapuyniykita mana qosqaykirayku, mayqenkunachus manapuni qampatachu, astawanqa Diospata kanku. Kawsayniykipis Diospallataj. Jina kajtimpis mana paymanta mañakunkichu, manataj sajra ruwasqasniykimanta Diosman kutirikunkichu.

23 Niykichis, Ay chay runamanta, imaraykuchus kapuynin paywan tukuchisqa kanqa. Kunantaj kaykunata nini pimanchus qhapaj kashan kay pachapi kapuykunawan.

24 Watejmantataj pobresman nini: Qankuna, mayqenkunachus mana kapuyniyoj kankicis, chaywampis kapusunkichisraj uj p’unchaymanta waj p’unchaymana kawsanaykichispaj, niyta munani tukuy qankuna, mayqenchus mañakoj runaman mana qonkichischu mana kapuyniyoj kasqaykichisrayku, sonqosniykichispi ninaykichista munayman nispa: Mana qonichu mana kapuwasqanrayku, chaywampis kapuwanmanchus karqa chayqa, ñoqaqa qoyman.

25 Kunantaj kayta sonqosniykichispi ninkichis chayqa, mana juchachasqachu kankichis, mana chayqa, juchachasqa kankichis. Justotaj juchachasqa kayniykichis, imaraykuchus munapayankichis imatachus mana jap’inkichischu, chayta.

26 kunantaj parlasusqaykichisrayku, niyta munani sapa p’unchaypi juchasniykichis pampachasqa kanankupaj, Diospa ñawpaqempi mana juchachasqa purinaykichispaj, ñoqaqa munayman kapuyniykichista pobresman qonaykichista, sapa runa kapusqanman jina. Chayta ruwaspa pobresta mikhuchinkichis, p’achallichinkichis, onqosqasta visitaspa paykunata yanapankichis, espiritu kajkunapi, kay jallp’amanta kajkunapiwan necesitasqankuman jina.

27 Tukuy kaykunata ruwaychis yachayniyoj kaypi, allin kaypitaj, imaraykuchus mana kosachu runasqa usqhayta purinankupaj kallpankumanta astawanraj. Watejmantataj, payqa llimphu kanan tiyan, bendicionta jap’inampaj, chayrayku tukuy ima allin kaypi ruwasqa kanan tiyan.

28 Yuyarikunaykichistataj munayman, pichus llajta masinmanta uj cosata mañakun, chayta juchallikunki, jinataj ichapis llajta masiykita juchallichiwaj.

29 Parlayta tukuchanaypajtaj mana niyta atinichu tukuy imawanchus juchallikuyta atiwajchis, imaraykuchus ashkha imaymanapi juchallikuyta atiwajchis mana yupayta atinaypaj.

30 Chaywampis kaykunata niyta atiyman, sichus qankuna mana sumajtachus qhawakunkichis yuyayniykichispi, parlayniykichispi, ruwanasniykichispi Diospa kamachisqasninta junt’anasniykichispi, Señormanta uyarinasniykichispi feniyoj kanaykichispi, kawsayniykichis tukukunankama chayqa, qankuna tukuchisqa kankichis. Kunantaj o runa, yuyariy, mana tukuchisqa kanaykipaj.