1 Jinataj rey Benjamin kay jinata llajtaman parlayta tukuchaytawan, paywa kacharqa yachanampaj paykuna parlasqanta creesqankuta manachus.

2 Tukuyninkutaj ujllapi qhaparerqanku nispa: Arí, ñoqayku creeyku tukuy parlawasqaykuta. Jinataj cheqa kasqanta yachayku, imaraykuchus tukuy atiyniyoj Señorpa Espiritun anchata waj jinayachiswarqayku, mana chayqa, sonqosniykupi uj sumaj tijray karqa, chayrayku manaña juchallikuyta munaykuchu, astawanqa allinta ruwayta munayku.

3 Noqaykutaj Diospa mana tukukuyniyoj k’acha kasqanrayku, Espiritumpa rikuchikusqasninraykutaj ñoqayku rikuykuña imachus jamunanta, chayrayku Dios munajtenqa ñoqaykupis tukuy imamanta sut’inchayta atiykuman.

4 Reyniykoj parlaynimpi feniyoj kasqaykuraykutaj kaykunata yachaykuña, chayrayku ñoqayku anchata kusikuyku, may allin kusikuywan.

5 Ñoqaykutaj Diosqan tratochayta munayku Diospa munayninta ruwanaykupaj, paypa kamachisqasninta junt’anaykupaj, imapichus kamachiswaykuman chaypi, wañunaykukama. Mana tukukuyniyoj muchuy mana ñoqaykuman jamunampaj, mayqenmantchus angel willarqa, manataj Diospa phiñaynin vasomanta ujyanaykupaj.

6 Kunantaj ajinata munarqa rey Benjamin kutichisnankuta, chayrayku paykunaman nerqa: Qankuna nerqankichis imatachus uyariyta munarqani. Imatachus tratocharqankichis, chayqa allin trato.

7 Kunantaj tratochasqaykichisrayku qankuna Cristoj wawasnin sutichasqa kankichis; paypa wawasnin. Imaraykuchus kunan p’unchaypi espiritunejta nacechisorqachis. Imaraykuchus qankuna ninkichis sonqosniykichis tijrasqa kasqankuta paypa sutimpi feniyoj kasqaykichisrayku, chayrayku qankuna paymanta nacesqa kankichis wawasninman tukunaykichispaj.

8 Kay sutiraykutaj salvasqa kankichis, manataj waj suti kanchus, mayqempichus salvasqa kawajchis. Mana waj suti qosqachu, mayqennejtachus salvacion jamun. Chayrayku munayman Cristoj sutinwan sutichaykunaykichista, tukuyniykichis, mayqenkunachus Dioswan tratocharqankichis, payta kasunaykichispaj wañunaykichiskama.

9 Jinataj pichus kaykunata ruwan, payqa tarisqa kanqa Diospa paña makinnejpi, imaraykuchus ima sutiwan sutichasqa kananta rejsenqa, paytaj sutichasqa kanqa Cristoj sutinwan.

10 jinallataj pichus mana Cristoj sutinwan sutichakunmanchu, waj sutiwan sutichasqa kanqa. Paytaj Diospa lloq’e makinnejpi tarisqa kanqa.

11 Jinataj yuyarinaykichista munallaymantaj kay sutin kasqanta, mayqentachus nerqaykichis qosunaykihista, manataj jayk’ajpis chinkachisqachu kanqa jinapis juchallikuyraykulla. Chayrayku ama juchallikuychischu, mana chay suti sonqoykichismanta chinkachisqa kanampaj.

12 Niykichis, yuyarinaykichista munayman kay sutita sonqosniykichispi escribisqa apanaykichispaj, mana Diospa lloq’e makinnejpi tarisqa kanaykichispaj. Astawanqa uyarinaykcihista, yachaynaykichistataj munani mayqen parlayninwanchus qankunata wajyasunkichis, jinataj mayqen sutiwanchus wajyasunkichis.

13 Imaraykuchus, ¿Imaynamanta uj runa kamachuejninta rejsinman mana chay kamachejta sirvispa, jinataj mana rejsisqa runa kajtin, mayqenchus karupi kashan paypa yuyasqasninmanta, sonqompi munasqasninmantawan?

14 ¿Ujtawantaj, uj runa llajta masimpa burronta qhatinmanchu, chay burroman qaranampaj? Niykichis, manapuni. Payqa mana saqenmanchu tropanwan chajrukojta, mikhojtataj. Astawanqa burro qhatispa, qharqonqa. Niykichis, qankunawan kikillantaj kanqa sichus mana yachankichischu mayqen sutiwanchus wajyasqa kankichis.

15 Chayrayku ñoqaqa munayman sinchita sayarinaykichista mana kuyunaykchista, allinta ruwanaykichistataj. chaynejta Cristoqa, tukuy atiyniyoj Señor Dios, qankunata sellasonqachis paypata kanaykichispaj, janaj pachaman oqharisqa kanaykichispaj, wiñaypaj salvasqa kanaykichispaj, wiñay kawsayniyoj kanaykichispajtaj, pichus tukuy imata ruwarqa janaj pachapi, kay pachapitaj, pichus tukuypa Diosnin, paypa yachayninnejta, atiyninnejta, justiciannetja, khuyayninnejtataj salvakunaykichispaj. Amen.