1 Ia oqo, a sa yaco ni sa dro tani mai vei ira na tamata i Noa na tui, ko Alama, ka sa veivutunitaka na nona ivalavala ca kei na nona caka ca, ka sa lako duadua voli yani ena kedra maliwa na tamata, ka tekivu me vunautaka na vosa i Apinatai—

2 Io, me vaka na veika sa na vakarau yaco, ka vakatalega kina na veika sa baleta na nodra tucake tale na mate, kei na nodra vakabulai na tamata, ka sa qai yaco mai ena vuku ni kaukauwa, na vakararawataki, kei na mate i Karisito, kei na nona tucake tale ka lako cake ki lomalagi.

3 Ia ko ira kecega sa via rogoca na nona vosa, sa vakavulica vei ira ko koya. Ka sa vakavulici ira vakavunivuni voli ga, me kakua ni kila ko koya na tui. Ka sa lewevuqa era sa vakabauta na nona vosa.

4 Ka sa yaco ni sa lewe levu sara sa vakabauti koya, era sa lako yani ki na vanua sa vakatokai ko Momani, sa vakatokayacataki mai vua na tui, sa koto ena iyalayala ni vanua era sa dau tiko kina vakalevu e veigauna, se ena veitiki ni yabaki, na manumanu kila.

5 Oqo, sa tiko mai Momani e dua na mata ni wai makare sara, ka sa dau tiko voli e ke ya ko Alama, sa tubu volekata na wai na veikau lalai ka ra veidrigidrigiti sara, ka sa dau vunitaki koya voli kina ena veisiga mai na nona vakasaqaqara na tui.

6 Ka sa yaco ni sa lewe levu sara sa vakabauti koya era sa dau lako ki ke ya me rogoca na nona vosa.

7 Ka sa yaco ni sa oti e vica na siga, sa dua na iwiliwili vinaka era sa soqoni vata yani ki na vanua ko Momani, me ra rogoca na vosa i Alama. Io, ko ira kece sa soqoni vata yani era sa vakabauta na nona vosa, me ra rogoci koya. Ka sa vakavulici ira ko koya, ka vunautaka vei ira na veivutuni, kei na veisereki, kei na vakabauta na Turaga.

8 Ka sa yaco ni sa qai kaya vei ira: Raica, sa tu oqo na wai ko Momani (me vaka sa vakatokai kina) ia oqo, me vaka ni dou sa gadreva mo dou curu ki na lomanibai ni Kalou, ka vakatokai me nona tamata, ka dou sa lomasoli mo dou colata vata na nomudou icolacola, me mamada kina;

9 Io, ka dou sa lomasoli mo dou rarawa vata kei ira sa rarawa; io, ka vakacegui ira era sa gadreva na veivakacegui, ka mo dou tu ka vakadinadinataka na Kalou ena veigauna kecega, kei na veika kecega, kei na veivanua kecega dou sa tiko kina, ka me yacova na mate, io me rawa ni sereki kemudou na Kalou, ka mo dou okati vata kei ira ena imatai ni tucake tale, mo dou rawata kina na bula tawamudu—

10 Oqo au sa kaya vei kemudou, ke sa vakaoqo na gagadre ni lomamudou, ia na cava sa tarovi kemudou mo dou papitaisotaki ena yaca ni Turaga, mo dou nona ivakadinadina ni dou sa ia oqo na veiyalayalati kei koya, mo dou na qaravi Koya ka muria na nona ivunau, me na qai sovaraka mai kina vakalevu sara vei kemudou na Yalona?

11 Ia oqo ni ra sa rogoca na vosa oqo ko ira na tamata, era sa vakasausau ena marau, ka ra kailavaka: Sa vakaoqo na gagadre ni lomai keimami.

12 Ia oqo ka sa qai yaco ni sa kauti Ilami ko Alama, ka sa dua vei ira ko koya na kena imatai, ka sa lako yani ka laki tu e loma ni wai, ka tabalaka cake na domona, ka kaya: Oi kemuni na Turaga, mo ni sovaraka na Yalomuni vua na nomuni dauveiqaravi, me vakayacora kina na cakacaka oqo ena savasava ni yalona.

13 Ia ni sa cavuta oti na veivosa oqo, sa curumi koya na Yalo ni Turaga, ka sa kaya: Ilami, ena kaukauwa sa lesia vei au na Kalou Qaqa, au papitaisotaki iko, me ivakadinadina ni ko sa curu ki na dua na veiyalayalati mo na qaravi koya me yacova sara ni ko sa mate yani vakayago; ka me sovaraki mada vei iko na Yalo ni Turaga; ka me solia vei iko ko koya na bula tawamudu, ena vuku ni veisereki i Karisito, ko koya ka sa vakarautaka tu mai na tauyavutaki ni vuravura.

14 Ia ni sa cavuta oti na vosa oqo ko Alama, erau sa qai dromuci vata ko Alama kei Ilami ena wai; ka rau sa duri cake ka cabe yani mai wai ena marau, ni rau sa vakasinaiti ena Yalo.

15 Ia a sa kauta ko Alama e dua tale, ka lako yani ena ikarua ni gauna ki loma ni wai, ka papitaisotaki koya me vaka a vakayacora vua na imatai, ia sa sega ga ni dromuci tale ko koya ena wai.

16 Ka sa vakaoqo na nona papitaisotaki ira kecega sa lako yani ki na vanua ko Momani; ka sa kedra iwiliwili e rua na drau ka va na tamata; io, era sa papitaisotaki ena wai ko Momani, ka ra sa vakasinaiti ena loloma soli wale ni Kalou.

17 Era sa vakatokai me lotu ni Kalou, se na lotu i Karisito, me tekivu mai na gauna ko ya ka lako yani. Ka sa yaco ni ko koya yadua sa papitaisotaki ena kaukauwa kei na lewa ni Kalou, sa wili me lewe ni nona lotu.

18 Ka sa yaco ni sa tabaki ira na bete ko Alama ena kaukauwa sa mai vua na Kalou; a sa tabaki ira na bete me dua na bete ki na veiyalimasagavulu, me ra vunau vei ira ka vakavulici ira ena veika ni matanitu ni Kalou.

19 A sa vakaroti ira me ra kakua ni vakavuvulitaka e dua tale na ka tani, ia na veika ga e sa vakavulica vei ira ko koya, kei na veika era cavuta mai gusudra na parofita tabu.

20 Io, sa vakaroti ira me ra kakua ni vunautaka e dua tale na ka, na veivutuni ga kei na vakabauta na Turaga, o koya sa sereki ira na nona tamata.

21 Sa vakaroti ira talega me ra kakua ni veileti vakaira, ia me ra vakanamata ki liu ena mata e duabau, ka me duabau ga na vakabauta ka duabau ga na papitaiso, me semati na lomadra ena duavata kei na veilomani vakataki ira.

22 A sa vakaroti ira ko koya me ra vunau. Ia ena ka oqo era sa yaco kina me luve ni Kalou.

23 Sa vakaroti ira ko koya me ra nanuma na siga ni vakacecegu, ka vakatabuya, ia me ra dau vakavinavinaka talega ena veisiga vua na Turaga na nodra Kalou.

24 Ia sa vakaroti ira talega na bete a tabaka ko koya me ra liga kaukauwa, me ra qaravi ira ga vakataki ira.

25 A sa lokuci e dua na siga ena veimacawa me ra dausoqoni vata kina ka vakavulici ira na tamata, ka qarava na Turaga na nodra Kalou, ia me ra dausoqoni vata vakawasoma, kevaka e rawa.

26 Ia me ra kakua ni vakararavi ko ira na bete vei ira na tamata ena ka me ra bula kina; ia me ra vakararavitaka na nodra cakacaka ki na loloma soli wale ni Kalou, ka me ra vakaukauwataki ena Yalo, me ra kila na Kalou, ka me ra veivakavulici ena kaukauwa kei na lewa sa mai vua na Kalou.

27 Ka sa vakarota tale ko Alama me ra wasea na nodra iyau na lewe ni lotu, me vaka na ka sa dui tu vei ira; o koya sa tu vua e levu na ka me levu talega na ka e wasea; ia vei koya sa tu vakalailai ga vua, me lailai talega na ka e wasea; ia ko koya sa sega na ka e tu vua me na qai soli vua.

28 Ia me ra wasea na nodra iyau ena yalo galala kei na loma vinaka vua na Kalou, ki vei ira talega na bete era leqa tu, io, kei ira kecega na tamata sa dravudravua ka luvawale.

29 Ia sa tukuna vei ira na veika oqo ni sa vakaroti koya na Kalou; ia era sa lako vakadodonu ena mata ni Kalou, era sa veivukei ena veika vakayago kei na veika vakayalo, me vaka na nodra dui gagadre kei na ka era sa dui vinakata.

30 Ia oqo ka sa qai yaco ni sa vakayacori na ka kece oqo mai Momani, io, ena bati ni wai ko Momani kei na veikau volekata na wai ko Momani; io sa ka totoka dina na vanua ko Momani, na wai ko Momani kei na veikau mai Momani kivei ira era sa mai veikilai kina kei na nodra Dauveivueti; io, era sa kalougata ni ra na lagasere ni vakavinavinaka ki vua me sega ni mudu.

31 Ia sa vakayacori tiko na veika oqo ena iyalayala ni vanua, me kakua kina ni kila na tui.

32 Ia raica, sa yaco me raica na tui ni sa tiko e dua na nodra isoqosoqo vuni na tamata, ka sa talai ira yani na nona dauniveiqaravi me ra vakaraici ira tiko. Ia ena siga era soqoni tale kina me ra rogoca na vosa ni Turaga, me tukuni sara vua na tui.

33 A sa kaya na tui ni sa vakayavalati ira na tamata ko Alama me ra vorati koya; o koya sa talai ira kina na nona mataivalu me vakarusai ira.

34 Ka sa yaco ni sa vakatakilai vei Alama kei ira na tamata ni Turaga ni ra sa lako tiko mai na mataivalu ni tui; o koya era sa tokia sara na nodra vale laca kei na nodra vuvale ka dro ki na lekutu.

35 Ia na kedra iwiliwili sa va na drau ka limasagavulu na tamata.