Ti Libro ni Mosiah

1 Ket ita awanen ti panagsususik iti amin a daga ti Zarahemla, iti amin a tattao a naikameng ken ni ari Benjamin, isu a naaddaan iti agtultuloy a kappia ni ari Benjamin iti amin a nabati nga aldawna.

2 Ket napasamak a naaddaan iti tallo a lallaki nga annak; ket ninagananna ida iti Mosiah, ken Helorum, ken Helaman. Ket inkeddengna a nasken a masursuruanda iti amin a pagsasao dagiti ammada, tapno agbalindanto a mannakaawat a tattao; ken tapno maammuanda ti maipanggep kadagiti padto a naibaga dagiti pannakangiwat dagiti ammada, a naiyeg kadakuada babaen iti ima ti Apo.

3 Ken kasta met nga insurona kadakuada ti maipanggep kadagiti kasuratan a naikitikit kadagiti pinanid a gambang, a kunana: Annakko, kayatko a laglagipenyo a no saan a gapu kadagitoy a pinanid, a naglaon kadagiti kasuratan ken dagitoy a bilbilin, agtalinaedtayo koma iti kinakuneng, uray kadagitoy a panawen, nga awan ti ammotayo kadagiti palimed ti Dios.

4 Ta saan koma a mabalin a malagip amin ti amatayo, a ni Lehi, dagitoy a bambanag, a maisuroda kadagiti annakna, no saan a gapu iti tulong dagitoy a pinanid; agsipud ta nasuruan iti pagsasao dagiti taga-Egipto tapno mabasana dagitoy a kitikit, ken maisurona kadagiti annakna, tapno maisuroda met kadagiti annakda, ket maipatungpal dagiti bilin ti Dios, uray pay kadaytoy nga agdama a panawen.

5 Kunak kadakayo, lallaki nga annakko, no saan a gapu kadagitoy a bambanag, a nasalimetmetan ken nataginayon babaen iti ima ti Dios, tapno mabasa ken maawatantayo dagiti palimedna, ken maimatangantayo a kanayon dagiti bilinna, ta uray a kimmapuy iti pammati dagiti ammatayo, ket nagbalintayo koma a kas kadagiti kakabsattayo, dagiti Lamanita, nga awan ti ammoda maipanggep kadagitoy a bambanag, wenno saanda pay patien no maisuro kadakuada, gapu kadagiti nakaugalian dagiti ammada, a saan nga umisu.

6 O lallaki nga annakko, kayatko a laglagipenyo a pudno dagitoy a pagsasao, ken kasta met a dagitoy a kasuratan ket pudno. Ket kitaenyo, kasta met dagiti pinanid ni Nephi, a naglaon kadagiti kasuratan ken naisurat a sasao dagiti ammatayo manipud iti panawen nga ipapanawda iti Jerusalem agingga ita, ket pudnoda; ket mabalin a maammuantayo ti kinaagpaysoda gapu ta maimatangantayo ida.

7 Ket ita, lallaki nga annakko, kayatko a laglagipenyo nga sukisoken ida a sireregta, tapno pagimbaganyo; ket kayatko a tungpalenyo dagiti bilin ti Dios, tapno rumang-aykayo iti daga a mayannurot kadagiti kari ti Apo kadagiti ammatayo.

8 Ken adu pay a banag ti insuro ni ari Benjamin kadagiti lallaki nga annakna, a saan a naisurat iti daytoy a libro.

9 Ket napasamak a kalpasan ti panangigibus ni ari Benjamin iti pannursurona kadagiti lallaki nga annakna, ket limmakay, ket nakitana nga umas-asidegen ti ipapatayna; ngarud, napanunotna a rumbeng nga italekna ti pagarian iti maysa kadagiti lallaki nga annakna.

10 Ngarud, pinaayabanna ni Mosiah; ket dagitoy ti balikas nga imbagana kenkuana, a kinunana: Anakko, kayatko nga iwaragawagmo kadagitoy amin a tao iti isuamin daytoy a daga, wenno kadagiti tattao ti Zarahemla, ken kadagiti tattao ni Mosiah nga agnaed iti daga, tapno aguummongda sadiay; ta iwaragawagkonto inton bigat kadagitoy a taok a sika ti ari ken mangituray kadagitoy a tao, nga inted kadatayo ti Apo a Diostayo.

11 Ken kanayonanna, ikkak dagitoy a tao iti nagan, tapno iti kasta mailasindanto kadagiti amin a tao nga inruar ti Apo a Dios manipud iti Jerusalem; ket aramidek daytoy gapu ta napasnekda a tattao iti panagtungpal kadagiti bilin ti Apo.

12 Ket ikkak ida iti nagan a saanto a pulos a mapunas, malaksid no iti panaglabsing.

13 Wen, ket kanayonanna ibagak kadakayo, a no matnagto dagitoy naipangpangruna a tattao ti Apo iti panaglabsing, ket agbalinda a nadangkes ken mannakiabig a tattao, ibbatanto ida iti Apo, tapno iti kasta agbalindanto a nakapsut a kas kadagiti kakabsatda; ket saannanton ida a taginayonen babaen iti awan umartap ken nakaskasdaaw a bilegna, a kas iti panangtaginayonna ditoy kadagiti ammatayo.

14 Ta kunak kadakayo, a no saanna indiaya ti imana iti pannakataginayon dagiti ammatayo nalabit a natnagda koma kadagiti Lamanita, ket nagbalinda a nadangranan iti gurada.

15 Ket napasamak a kalpasan ti panangigibus ni ari Benjamin iti panagsaritana iti anakna, inikkanna iti annongen maipanggep iti amin a pakaseknan iti pagarian.

16 Ken kanayonanna, inikkanna pay iti annongen maipanggep kadagiti kasuratan a naikitikit kadagiti pinanid a gambang; kasta met dagiti pinanid ni Nephi; kasta met, ti espada ni Laban, ken ti bola wenno mangiturturong, a nangiturong kadagiti ammatayo iti langalang, a naisagana babaen iti ima ti Apo tapno iti kasta maiturong ti tunggal maysa a mayannurot iti kinatallugod ken kinaregta nga impakitada kenkuana.

17 Ngarud, gapu ta saanda a napudno saanda a nagballigi wenno nakapagtuloy iti panagdaliasatda, ngem napasublida, a nakaigapuan ti saan a pannakaay-ayo ti Dios kadakuada; ket ngarud nadusada iti bisin ken dagiti nakaro a panagsagaba, tapno maganaygayda a manglagip iti pagrebbenganda.

18 Ket ita, napasamak a napan ni Mosiah ket inaramidna ti imbilin ti amana kenkuana, ket inwaragawagna kadagiti amin a tattao nga adda iti daga a Zarahemla tapno iti kasta mabalinda nga aguummongda a sangsangkamaysa, a mapan iti templo tapno dumngneg kadagiti balikas nga ibaga ti amana kadakuada.