1 Ita adda maysa a lugar iti Shemlon a naguummongan dagiti babbalasang dagiti Lamanita tapno agkanta, ken agsala, ken tapno pagragsaken dagiti bagida.

2 Ket napasamak nga iti maysa nga aldaw bassit a bilangda ti naguummong tapno agkanta ken agsala.

3 Ket ita dagiti saserdote ni ari Noe, iti bainda nga agsubli iti siudad ti Nephi, wen, ken nagamakda amangan no papatayen ida dagiti tattao, ngarud saanda naitured nga agsubli kadagiti assawa ken annakda.

4 Ket gapu ta nagbatida iti langalang, ken gapu ta naduktalanda ti babbalasang dagiti Lamanita, naglemmengda ket binuybuyada ida;

5 Ket idi bassit laeng kadakuada ti naguummong tapno agsala, rimmuarda kadagiti naglemlemmenganda ket innala ket intalawda ida iti langalang; wen, duapulo ket uppat kadagiti babbalasang dagiti Lamanita ti inatalawda iti langalang.

6 Ket napasamak nga idi naduktalan dagiti Lamanita ti panagpukaw dagiti babbalasangda, kinapungtotda dagiti tattao ni Limhi, agsipud ta impagarupda nga isuda dagiti tattao ni Limhi.

7 Ngarud imbaonda dagiti buyotda; wen, uray a mismo ti ari ti nakikuyog kadagiti taona; ket nagturongda iti daga a Nephi tapno dadaelen dagiti tattao ni Limhi.

8 Ket ita natakkuatan ni Limhi ida manipud iti torre, uray pay a natakkuatanna amin a panagsagsaganada para iti gubat; ngarud inummongna a sangsangkamaysa dagiti taona, ket inurayda ida kadagiti kataltalonan ken kadagiti kabakiran.

9 Ket napasamak idi a dumteng dagiti Lamanita, a rinugian dagiti tattao ni Limhi a rauten ida kadagiti pagur-urayanda a lugar, ket rinugianda a papatayen ida.

10 Ket napasamak a nagbalin a nakaro unay ti dangadang, ta nakirupakda a kasla leon kadagiti an-anupenda.

11 Ket napasamak a rinugian dagiti tattao ni Limhi a pagsanuden dagiti Lamanita kadakuada; nupay saan a kagudua ti kaaduda a kas kadagiti Lamanita. Ngem nakirinnupakda para kadagiti biagda, ken para kadagiti assawada, ken para kadagiti annakda; ngarud impanda amin a kabaelanda ket nakirupakda a kasla kadagiti dragon.

12 Ket napasamak a nasarakanda ti ari dagiti Lamanita kadagiti napapatay; ngem saan pay a natay, nasugatan laeng ket nabaybay-an iti daga, ta nadaras ti panaglibas dagiti taona.

13 Ket innalada ken binedbedanda dagiti sugatna, ket indatagda ken ni Limhi, ket kinunada: Kitaen, daytoy ti ari dagiti Lamanita; gapu ta nasugatan ket nabati iti ayan dagiti natay, ket binay-anda; ket kitaen, indatagmi kenka; ket ita patayentayon.

14 Ngem kinuna ni Limhi kadakuada: Saanyo patpatayen, ngem iyegyo ditoy tapno makitak. Ket indatagda. Ket kinuna ni Limhi kenkuana: Ania ti rasonyo a makigubat maibusor kadagiti tattaok? Kitaen, saan a naglabsing dagiti tattaok ti sapata nga inaramidko kenka; ngarud, apay nga aglabsingka ti sapata nga inaramidmo kadagiti tattaok?

15 Ket kinuna ita ti ari: Linabsingko ti sapatak gapu ta inlibas dagiti tattaom dagiti babbai nga annak dagiti tattaok; ngarud, gapu iti pungtotko binilinko dagiti tattaok nga umay makigubat maibusor kadagiti tattaom.

16 Ket ita awan ti nangngeg ni Limhi maipanggep kadaytoy a banag; ngarud kinunana: Birokekto kadagiti tattaok ket maungawto ti asino man a nagaramid kadaytoy a banag. Ngarud imbilinna ti panagbirok kadagiti taona.

17 Ita idi nangngegan ni Gideon dagitoy a banag, gapu ta isu ti kapitan ti ari, napan ket kinunana iti ari: Kiddawek kenka a saanmo nga ituloy, ket saanmo a biroken kadagitoy a tao, ket saanmo ipabasol kadakuada daytoy a banag.

18 Ta saanmo kadi malagip dagiti saserdote ti amam, a pinanggep dagitoy a tao a patayen? Ken saan kadi nga addada iti langalang? Ken saan kadi nga isuda ti nangala kadagiti babbalasang dagiti Lamanita?

19 Ket ita, kitaen, ken ibagam iti ari dagitoy a banag, tapno ibagana kadagiti taona a talnaandatayo; agsipud ta kitaen agsagsaganadan a rumaut maibusor kadatayo; ken kitaen pay a bassittayo laeng.

20 Ken kitaen, umayda a nabuyogan ti nakaadadu a buyotda; ket malaksid no pagtalnaen ida ti ari nasken a maungawtayo.

21 Ta saan kadi a dagiti balikas ni Abinadi ket natungpal, nga impadtona maibusor kadatayo—ket amin dagitoy gapu ta saantayo dinengngeg dagiti balikas ti Apo, ket panawantayo ti kinadangkestayo?

22 Ket ita patalnaentayo ti ari, ket tungpalentayo ti inaramidtayo a sapata kenkuana; ta nasaysayaat a maadipentayo ngem iti mapukawtayo ti biagtayo; ngarud, lapdantayon ti nabuslon unay a panagayus ti dara.

23 Ket ita imbaga amin ni Limhi iti ari dagiti banag maipanggep iti amana, ken dagiti saserdote a naglibas iti langalang, ket impabasolda ti pannakaitalaw dagiti babbai nga annakda kadakuada.

24 Ket napasamak a nagtalna ti ari para kadagiti taona; ket kinunana kadakuada: Intayo sabaten dagiti tattaok, nga awanan iti armas; ket ikarik kadakayo babaen iti sapata a saan a papatayen dagiti tattaok dagiti tattaom.

25 Ket napasamak a sinurotda ti ari, ket napanda simmabat kadagiti Lamanita nga awan armasda. Ket napasamak a sinabatda dagiti Lamanita; ket nagrukob ti ari ti Lamanita iti sanguananda, ket nagpakaasi maipagapu kadagiti tattao ni Limhi.

26 Ket idi nakita dagiti Lamanita dagiti tattao ni Limhi, nga awanan iti armas, naasianda kadakuada ket napatalnada, ket inkuyogda a sitatalna ti arida a nagsubli iti budkoda a daga.