1 Ket napasamak a nagsubli da Limhi ken dagiti taona iti siudad ti Nephi, ket nangrugida a nagnaed a sitatalna iti daga.

2 Ket napasamak a kalpasan ti adu nga aldaw nangrugi manen a masugsugan ti pungtot dagiti Lamanita maibusor kadagiti Nephita, ket rinugianda manen ti umasideg iti aglawlaw ti beddeng ti daga.

3 Ita saanda naitured a papatayen ida, gapu iti sapata nga inaramid ti arida ken ni Limhi; ngem tungpaenda ida iti pingpingda, ken ipakatda ti turay kadakuada; ket rinugianda ti mangipan iti nadagsen nga aw-awit kadagiti likodda, ket maabogda a kas iti umel nga asno—

4 Wen, naaramid amin dagitoy tapno matungpal ti balikas ti Apo.

5 Ket ita nakaro dagiti rigat dagiti Nephita, ket awan ti pamuspusan a mawayawayaanda ti bagbagida manipud kadagiti imada, agsipud ta iti tunggal sikig napalawlawan ida dagiti Lamanita.

6 Ket napasamak a rinugian dagiti tattao nga agtanabutob iti ari gapu kadagiti panagrigatda; ket rinugianda a tarigagayan a makigubat kadakuada. Ket nakaro ti panangparigatda kadagiti reklamoda; ngarud pinalubosanna ida nga aramiden ti mayannurot kadagiti tarigagayda.

7 Ket naguummongda a sangsangkamaysa manen, ket inkawesda dagiti kalasagda, ket dinarupda dagiti Lamanita tapno papanawenda ida iti dagada.

8 Ket napasamak nga inabak ida dagiti Lamanita, ket pinagsanudda ida, ken pinapatayda ti adu kadakuada.

9 Ket ita addaan iti nakaro a panagladingit ken panagdung-aw kadagiti tattao ni Limhi, ti balo agladingit para iti asawana, ti lallaki ken babai nga annak agladingit para iti amada, ken dagiti lallaki a kabsat para kadagiti kabsatda.

10 Ita nakaad-adu ti balo iti daga, ket inaldawda a nagsangsangit, agsipud ta nariknada iti napalaus a buteng kadagiti Lamanita.

11 Ket napasamak a nasugsogan ti agtultuloy a panagsangitda dagiti nabati a tao ni Limhi ti pungtot a maibusor kadagiti Lamanita; ket napanda manen nakidangadang, ngem napasanudda manen, nagsagabada iti pannakapukaw ti adu a biag.

12 Wen, napanda manen iti maikatlo a gundaway, ket kasta met laeng ti sinagabada; ket nagsubli manen dagiti saan a napapatay iti siudad ti Nephi.

13 Ket nagpakumbabada uray pay iti katapokan, pinaiturayanda ti bagbagida iti sangol ti pannakaadipen, pinaiturayanda ti bagbagida a masaplitan, ken maabog nga agsublisubli, ken madagensenan, a maibatay iti tarigagay dagiti kabusorda.

14 Ket nagpakumbabada uray pay iti tukot ti kinapakumbaba; ket immawagda a sipapasnek iti Dios; wen, uray pay agmalmalem a napakaasida iti Diosda a maisalakanda kadagiti rigrigatda.

15 Ket ita nabuntog a denggen ti Apo iti panagpakaasida gapu iti kinadangkesda; nupay kasta dinengngeg ti Apo dagiti awagda, ket rinugianna a pinalukneng dagiti puso dagiti Lamanita ta rinugianda a pinalag-an dagiti dadagsenda; ngem saan pay nakita ti Apo a wayawayaanna ida manipud iti pannakaadipenda.

16 Ket napasamak nga in-inut a nangrugida a rimmang-ay iti daga, ket nangrugi a nagpataudda ti adu a bukbukel, ken dagiti arban, ken dagiti pangen, isu a saanda nagsagaba iti bisin.

17 Ita adda dakkel a bilang dagiti babbai, nga ad-adu ngem dagiti lallaki; ngarud imbilin ni ari Limhi a nasken a bingayan ti tunggal lalaki dagiti balo ken dagiti annakda para iti kasapulanda, tapno saanda matay iti bisin; ket inaramidda daytoy gapu iti kinaadu ti bilang dagiti napapatay.

18 Ita agingga a mabalin nagtitipon a sangsangkamaysa dagiti tattao ni Limhi, ket pinatalgedda dagiti bukbukel ken arbanda:

19 Ket ti ari a mismo ti saan nga agtalek iti bagina iti ruar dagiti pader ti siudad, malaksid no ikuyogna dagiti guardiana, ta maamak a mabalin a matiliw iti aniaman a wagas dagiti Lamanita.

20 Ket imbilinna kadagiti taona a nasken a sipsiputanda ti aglawlaw ti daga, ta iti aniaman a wagas matiliwda dagiti saserdote a naglibas iti langalang, a nangala kadagiti babbalasang dagiti Lamanita, ken nakaigapuan ti nakaro a pannakadadaelda a napasamak kadakuada.

21 Agsipud ta tarigagayanda nga alaen ida tapno dusaenda ida; agsipud ta umayda iti daga a Nephi iti rabii, ket binunagda dagiti bukbukelda ken adu kadagiti napateg a bambanagda; ngarud inurayda ida.

22 Ket napasamak nga awanen ti riribuk kadagiti Lamanita ken dagiti tattao ni Limhi, uray agingga iti panawen nga idadateng da Ammon ken dagiti kabsatna iti daga.

23 Ket gapu iti kaadda ti ari iti ruar ti ruangan ti siudad a kaduana ti guardiana, natakuatanna ni Ammon ken dagiti kabsatna; ket impagarupna a saserdote ida ni Noe ngarud imbilinna a matiliw ida, ken mapungo, ket maipan iti pagbaludan. Ket no saserdoteda koma ni Noe imbilinna koma ti pannakapapatayda.

24 Ngem idi naammuanna a saan, ngem isuda dagiti kabsatna, ken naggapuda iti daga a Zarahemla, napnuan ti kasta unay a rag-o.

25 Ita nangibaon ni Limhi, sakbay ti yaay ni Ammon, iti bassit a bilang dagiti lallaki a biroken ti daga a Zarahemla; ngem dida nasarakan, ket nayaw-awanda iti langalang.

26 Nupay kasta, nakasarakda iti daga a nagnaedan ti tattao; wen, ti daga a naaplagan kadagiti nagango a tultulang; wen, maysa a daga a nagnaedan ti tattao ken nadadaelda; ket isuda, gapu ta impagarupda a daytoy ti daga a Zarahemla, nagsublida iti daga a Nephi, nakadanonda iti nagbedngan ti daga sumagmamano nga aldaw sakbay ti yaay ni Ammon.

27 Ket intugotda ti maysa a kasuratan, a kasuratan dagiti tattao nga akintulang kadagiti nasarakanda, ken naikitikit kadagiti pinanid a minas.

28 Ket ita napnuan manen ti rag-o ni Limhi idi naammuanna ken ni Ammon nga addaan ni ari Mosiah iti sagut a naggapu iti Dios, a mabalinna nga ipatarus dagiti kitikit; wen, ket nagrag-o met ni Ammon.

29 Ngem napnuan pay laeng ti liday ni Ammon ken dagiti kabsatna gapu iti kaadu ti napapatay kadagiti kabsatda;

30 Kasta pay a pinalugodan ni ari Noe ken dagiti saserdotena dagiti tattao nga agaramid iti adu a basol ken kinadangkes a maibusor iti Dios; ken nagladingitda pay ti ipapatay ni Abinadi; kasta pay ti ipapanaw ni Alma ken dagiti tattao a simmurot kenkuana, a nangbukel iti simbaan ti Dios babaen ti pigsa ken bileg ti Dios, ken pammati kadagiti balikas nga insao ni Abinadi.

31 Wen, nagladingitda iti ipapanawda, ta saanda ammo ti napananda. Ita maragsakanda koma a makitipon kadakuada, agsipud ta nakitulagda a mismo iti Dios nga agserbida kenkuana ken tungpalenda dagiti bilinna.

32 Ket ita manipud iti yaay ni Ammon, nakitulag met ni ari Limhi iti Dios, kasta met ti adu kadagiti taona, nga agserbida kenkuana ken tungpalenda dagiti bilinna.

33 Ket napasamak a tinarigagayan ni ari Limhi ken adu kadagiti taona ti mabuniagan; ngem awan ti asino man iti daga ti addaan iti turay a naggapu iti Dios. Ket saan a kayat ni Ammon nga aramiden daytoy, ta ibilangna ti bagina a saan a maikari a katulongan.

34 Ngarud saanda binukel ti bagbagida a simbaan iti dayta a panawen, agur-urayda iti Espiritu ti Apo. Ita tarigagayanda ti agbalin a kas ken ni Alma ken dagiti kabsatna, a naglibas iti langalang.

35 Tinarigagayanda ti mabuniagan a kas saksi ken pammaneknek a situtulokda nga agserbi iti Dios iti amin a pusoda; nupay kasta naitantanda ti panawen; ket maitedto ti pakaammuan ti pannakabuniagda kalpasan daytoy.

36 Ket ita iti amin a panagregget ni Ammon ken dagiti taona, ken ni ari Limhi ken dagiti taona, isu iti wayawayaanda ti bagbagida manipud iti ima dagiti Lamanita ken iti pannakaadipen.