1 Ket ita napasamak a rinugian da Ammon ken ari Limhi a kainnuman dagiti tattao no kasano a wayawayaanda ti bagbagida iti pannakaadipen; ken uray imbilinda pay a nasken nga aguummong a sangsangkamaysa dagiti tattao; ket inaramidda daytoy tapno maammuanda ti timek dagiti tattao maipanggep daytoy a banag.

2 Ket napasamak nga awan ti makitada a pamuspusan tapno wayawayaanda ti bagbagida iti pannakaadipen, malaksid iti panangalada kadagiti babbai ken annakda, ken dagiti arbanda, ken dagiti pangenda, ken dagiti toldada, ken pumanaw iti langalang; gapu ta nakaad-adu dagiti Lamanita, saan a mabalin para kadagiti tattao ni Limhi ti makisusik kadakuada, iti pampanunotenda a wayawayaanda ti bagbagida manipud iti pannakaadipen babaen ti espada.

3 Ita napasamak a napan ni Gideon ket sinangona ti ari, ket kinunana kenkuana: Ita O ari, namin-adu a dinengngegmo dagiti balikasko iti pannakisusik kadagiti kabsattayo, dagiti Lamanita.

4 Ket ita O ari, no iti panagkitam ket saanak a mapangnamnamaan a katulongan, wenno no agingga ita dinengngegmo dagiti balikasko iti ania man a saad, ket nagserbida kenka, uray ad-adda pay ti tarigagayko a nasken a dumngegka kadagiti balikasko iti daytoy a kanito, ket agbalinak a katulongam ket mawayawayaan dagitoy a tao manipud iti pannakaadipen.

5 Ket pinalubosan ti ari nga agsao. Ket kinuna kenkuana ni Gideon:

6 Ibilangtayo ti akinlikud a pagdalanan, babaen iti akinlikud a pader, iti likudan ti siudad. Nabartek no rabii dagiti Lamanita, wenno dagiti guardia dagiti Lamanita; ngarud mangipantayo iti waragawag ti amin dagiti tattao nga ummongenda a sangsangkamaysa dagiti arban ken pangenda, tapno maiturongda ida iti langalang iti rabii.

7 Ket mapannak maitutop iti bilinmo ken bayadak iti maudi a buis nga arak kadagiti Lamanita, ket mabartekda; ket lasatentayo ti nalimed a pagnaan iti makanigid ti kampoda inton nabartek ken nakaturogdan.

8 Kasta ti ipapanawtayo a kaduatayo dagiti babbai ken annaktayo, dagiti arbantayo, ken dagiti pangentayo iti langalang; ket agdaliasattayo iti lawlaw ti daga a Shilom.

9 Ket napasamak a dinengngeg ti ari dagiti balikas ni Gideon.

10 Ket imbilin ni ari Limhi a nasken nga ummongen a sangsangkamaysa dagiti taona dagiti arbanda; ket impatulodna ti buis nga arak kadagiti Lamanita; ken nangipatulod pay iti ad-adu nga arak, a kas sagut kadakuada; ket nagrenrennekda nga imminum iti arak nga impatulod kadakuada ni ari Limhi.

11 Ket napasamak a napan dagiti tattao ni ari Limhi iti langalang iti rabii nga inkuyogda dagiti arban ken pangenda, ket napanda iti aglawlaw ti daga a Shilom iti langalang, ken sinurotda ti agturong iti daga a Zarahemla, nga impanguluan ni Ammon ken dagiti kabsatna.

12 Ket naitugotda amin a balitok, ken pirakda, dagiti napateg nga bambanagda, a maawitda, kasta met dagiti abastoda, iti langalang; ket intuloyda ti panagdaliasatda.

13 Ket kalpasan ti adu nga aldawda iti langalang nakadanonda iti daga a Zarahemla, ket timmiponda kadagiti tattao ni Mosiah, ket nagbalinda nga iturayanna.

14 Ket napasamak a siraragsak ni Mosiah a nangawat kadakuada; ken inawatna met dagiti kasuratanda, kasta met dagiti kasuratan a nasarakan dagiti tattao ni Limhi.

15 Ket ita napasamak idi naduktalan dagiti Lamanita a naglibas dagiti tattao ni Limhi iti daga iti rabii, a nangibaonda iti buyot iti langalang tapno kamakamenda ida;

16 Ket kalpasan ti dua nga aldaw a panangkamakamda kadakuada, saandan a nasurotan ti nagturonganda; ngarud nayaw-awanda iti langalang.