1 Ita ni Alma, a binallaaganen ti Apo a rauten ida dagiti buyot ni ari Noe, ken gapu ta imapakaammona kadagiti taona, ngarud inummongda dagiti arbanda, ken innalada dagiti bukelda, ket napanda iti langalang sakbay dagiti buyot ni ari Noe.

2 Ket pinapigsa ida ti Apo, tapno saanda maabutan dagiti tattao ni ari Noe ta dadaelenda ida.

3 Ket walo nga aldaw ti panagdaliasatda nga agturong iti langalang.

4 Ket nakadanonda iti maysa a daga, wen, maysa a nakapimpintas ken makaay-ayo a daga, ti daga nga addaan iti natarnaw a danum.

5 Ket insimpada dagiti toldada, ket rinugianda a sukayen ti daga, ken rinugianda ti agpatakder kadagiti pasdek; wen, nagagetda, ket kasta unay ti panagtrabahoda.

6 Ket tinarigagayan dagiti tattao a ni Alma ti agbalin nga arida, gapu ta ipatpateg dagiti taona.

7 Ngem kinunana kadakuada: Kitaen, saan a rumbeng a maaddaantayo iti ari; agsipud ta kastoy ti kinuna ti Apo: Saanyo a raemen ti maysa a tao a nangatngato iti sabali, wenno saan a panunoten ti tao a nangatngato ti bagina ngem iti sabali; ngarud kunak kadakayo a saan a rumbeng a maaddaankayo iti ari.

8 Nupay kasta, no mabalin koma a kanayon nga adda kadakayo kadagiti nalinteg a lallaki nga agbalin nga ariyo nasayaat a maaddaankayo iti ari.

9 Ngem laglagipenyo ti kinadangkes ni ari Noe ken dagiti saserdotena; ket nasiloannak a mismo, ken nagaramidak iti adu a banag a makarimon iti imatang ti Apo, a nakaigapuan ti nakaro a panagbabawik;

10 Nupay kasta, kalpasan ti adu a panagtutuok, dinengngeg ti Apo dagiti ararawko, ken sinungbatanna dagiti kararagko, ket inaramatnak a maysa a ramit kadagiti ima ti Apo a mangidanon iti adu kadakayo iti pannakaammo iti kinapudno.

11 Nupay kasta, saanko a panangipadayaw daytoy, ta saanak a maikari a mangidaydayaw iti bagik.

12 Ket ita kunak kadakayo, inrurumennakayo ni ari Noe, ken inadipennakayo ken dagiti saserdotena, ken isuda ti nangiturong kadakayo iti kinadangkes; ngarud naibaudkayokadagiti bedbed ti kinadangkes.

13 Ket ita kas nawayawayaankayo kadagitoy a kawar babaen iti bileg ti Dios; wen, uray pay manipud iti ima ni ari Noe ken dagiti taona, ken kasta met manipud kadagiti kawar ti kinadangkes, isu a tarigagayak a nasken nga agtalinaedkayo a natibker iti daytoy a wayawaya a nakawayawayaanyo, ket saankayo nga agtalek iti asino man a tao nga agbalin nga ariyo.

14 Ken kasta met a saankayo nga agtalek iti asino man a mannursuroyo wenno ministroyo, malaksid no tao ti Dios, a magmagna kadagiti wagasna ken mangtungtungpal kadagiti bilinna.

15 Kasta ti panangisuro ni Alma kadagiti taona, a nasken nga ayaten ti tunggal tao ti kaarrubana a kas iti bagina, nga awan ti panagsususik kadakuada.

16 Ket ita, ni Alma ti nangato a saserdoteda, isu a nangbangon iti simbaanda.

17 Ket napasamak nga awan ti nakaawat iti turay a mangasaba wenno mangisuro malaksid a naggapu manipud iti Dios. Ngarud kinonsagrarna amin dagiti saserdoteda ken amin dagiti mannursuroda; ket awan ti nakonsagrar malaksid no nalintegda a lallaki.

18 Ngarud binantayanda dagiti tattaoda, ken tinarakenda ida kadagiti banag a maipanggep iti kinalinteg.

19 Ket napasamak a nangrugi ti nalaus a panagrang-ayda iti daga; ket ninagananda ti daga iti Helam.

20 Ket napasamak nga immaduda ken nalaus ti panagrang-ayda iti daga a Helam; ket nangbangonda iti siudad, a ninagananda iti siudad ti Helam.

21 Nupay kasta nakita ti Apo a rumbeng a dusaenna dagiti taona; wen, suotenna ti kinaanusda ken ti pammatida.

22 Nupay kasta—asino man ti agtalek kenkuana isunto met laeng ti maitag-ay iti maudi nga aldaw. Wen, kastoy idi kadagitoy a tattao.

23 Ta kitaen, ipakitak kadakayo a naadipenda, ket awan ti mangwaywaya kadakuada malaksid ti Apo a Diosda, wen, ti Dios ni Abraham ken ni Isaac ken ni Jacob.

24 Ket napasamak nga winawayaanna ida, ket impakitana kadakuada ti naindaklan a bilegna, ket napalalo ti ragrag-oda.

25 Ta kitaen, napasamak a bayat ti kaaddada iti daga a Helam, wen, iti siudad ti Helam, bayat ti panangsukayda iti daga iti aglawlaw, kitaen adda ti buyot dagiti Lamanita iti beddeng ti daga.

26 Ita napasamak a pimmanaw dagiti kabsat ni Alma manipud kadagiti talonda, ket naguummongda a sangsangkamaysa iti siudad ti Helam; ket kasta unay ti panagbutengda gapu iti panagparang dagiti Lamanita.

27 Ngem napan ni Alma ket nagtakder iti sangoda, ket ginutugotna ida a nasken a saanda nga agbuteng, ngem nasken a lagipenda ti Apo a Diosda ket wayawayaanna ida.

28 Ngarud inep-eppanda dagiti butengda, ket rinugianda nga umararaw iti Apo a paluknengenna ti puspuso dagiti Lamanita, tapno ispalenna ida, ken dagiti assawada, ken dagiti annakda.

29 Ket napasamak a pinalukneng ti Apo ti puspuso dagiti Lamanita. Ket napan da Alma ken dagiti kabsatna ket inyawatda ti bagbagida kadakuada; ket tinagikua dagiti Lamanita ti daga a Helam.

30 Ita nayaw-awan dagiti buyot dagiti Lamanita, a nangsurot kadagiti tattao ni ari Limhi, iti langalang iti adu nga aldaw.

31 Ket kitaen, nasarakanda dagidiay saserdote ni ari Noe iti lugar a ninagananda iti Amulon; ket rinugianda ti mangtagikua iti daga nga Amulon ken rinugianda a sukayen ti daga.

32 Ita Amulon ti nagan ti dadaulo dagidiay a saserdote.

33 Ket napasamak a nagpakpakaasi ni Amulon kadagiti Lamanita; ken kasta met nga imbaonna dagiti assawada, a babbai nga annak dagiti Lamanita, nga agpakpakaasi kadagiti kakabsatda, tapno saanda dadaelen dagiti assawada.

34 Ket adda panangngaasi dagiti Lamanita ken ni Amulon ken dagiti kabsatna, ket saanda a dinadael ida, gapu kadagiti assawada.

35 Ket nakitipon ni Amulon ken dagiti kabsatna kadagiti Lamanita, ket agdaldaliasatda iti langalang iti panangsapulda iti daga a Nephi idi nasarakanda ti daga a Helam, a tinagikua da Alma ken dagiti kabsatna.

36 Ket napasamak nga inkari dagiti Lamanita kada Alma ken dagiti kabsatna, nga isagutda dagiti biagda ken wayawayada no isuroda ti dana nga agturong iti daga a Nephi.

37 Ngem saan a tinungpal dagiti Lamanita ti karida kalpasan ti panangipakita ni Alma iti dana nga agturong iti daga a Nephi; ngem nangikabilda kadagiti guardia iti aglawlaw ti daga a Helam, kada Alma ken dagiti kabsatna.

38 Ket napan iti daga a Nephi dagiti nabati kadakuada; ket nagsubli iti daga a Helam dagiti dadduma, ken intugotda met dagiti assawa ken annak dagiti guardia a nabati iti daga.

39 Ket impalubos ti ari dagiti Lamanita a ni Amulon ti agbalin nga ari ken mangituray kadagiti taona, nga adda iti daga a Helam; nupay kasta awan ti bilegna a mangaramid iti ania man a maisuppiat iti pagayatan ti ari dagiti Lamanita.