Mosiah

1 Ja’ o jech ta ts’acal ti c’alal la spas Mosíah ti c’usi la jyich’ pasel ta mantal yu’un stote, ti c’alal la jyal ta scotol banamile, ti jteclume la stsob sbaic scotolic ta buyuc no’ox liquemic talel ti c’uxi xu’ xbatic ta templo chbat ya’ybeic ya’yej ti rey Benjamin ta x albatique.

2 Jech tu j epic tajmec, jech, tu j epic ti jech muyuc la jyataique; yu’un ech’em to epajic ta bu no’ox c’alal, jech te muq’uibic ta muc’ta jteclum.

3 Xchi’uc la jyich’ic batel sba yol xchon bolomic, ti c’uxi xu’ xaq’uic ta matanal xchi’uc chchiq’uic jech chac c’u cha’al smantal Moisese.

4 Xchi’uc ti c’uxi xu’ stojbeic ta vocol Cajvaltic Riox ti ja’ Srioxic ti jech la jyich’ic loq’ueseltal ta steclumal Jerusalene, ti jech yich’ic pojel ta sc’ob yaj contraique, xchi’uc ti jech yich’ic ac’bel lequil vinic ti ja’uc jchanubtasvanej yu’nique, ti c’uxi ja’ la jyac’ lequilal ti te ta sbanamil Zarahemlae, xchi’uc la jyich’ic chanubtasel ta xch’unel ti smantaltac Riox ta sventa ti c’uxi oyuc xcuxetel yo’ntonique xchi’uc ti nojemicuc ta sc’anulajel yo’ntonic ta sventa Riox, xchi’uc ta scotol viniquetique.

5 Ja’ o jech ti c’alal c’otic ta temploe te la spas snaic ta poc’ ta xocontac, ta jujun vinic jech chac c’u cha’al snailalique, ja’ jech chac c’u cha’al yajnil, xchi’uc squeremutic, xchi’uc stsebetic, ti va’ay squeremutic xchi’uc stsebetique ta muc’, c’alal to ta biq’uit, ta jujun snailalic voc’ajtiquic ta jujuntal.

6 Ja’ jech la spasic snaic ta poc’ ta xocontac Templo, ti jujun viniquetique sq’uelojan batel Templo ti sti’ snaic ta poq’ue, ti c’uxi xu’ xcomic ta snaic ta poc’ ti c’uxi xu’ xa’ybeic ti ya’yej rey Benjamin ta xich’ic chi’nel ta lo’ile.

7 Yu’un tu j-ech’em yepalic ja’ yu’un jech mu xu’ xchanubtas ta yut spac’benal Templo ti rey Benjamine, ja’yo la spas jun muc’ta tec’ubal ti c’uxi xa’ay steclumal ti ya’yejtac ta xchi’in ta lo’ile.

8 Ja’ o jech sjapo sc’opanel steclumal ti te ta muc’ta tec’ubale, mu scotolicuc la jya’yic ti ya’yejtaque, ja’ ta sventa ti yu’un tu j-ech’em yepalique, ja’yo jech la jyal ti ac’o sts’ibaic ti c’usi chal ti c’uxi staquic batel ta stojolalic ti boch’otic muyuc xa’yic ti ya’yeje, ti c’uxi xu’ xa’yic ti ya’yejtaque.

9 Ti li’e ja’ ti lo’iletic ti bu la spas mantal la sts’ibaique: Quermanotac vu’un, acotolic ti boch’otic la tsob a vaique, vo’xuc xu’ xa va’yic ti ca’yejtac li’ ta xcal tanae; yu’un muyuc bu jpasoj mantal ti ac’o mu xtal avaybicun jc’op ti c’alal chi c’opoje, yu’un la jquic’oxuctal ta sventa tal a va’ybicun; xchi’uc ac’o xa jam lec achiquinic ti c’uxi xu’ xa va’ybicune, xchi’uc avo’ntonic ti c’uxi xu’ xa va’ybeic lec smelolale, xchi’uc ajolic ti c’uxi stac’ xa na’ic ti c’usitic ja’ no’ox yaloj stuc Riox ti ta xich’ aq’uel ta a satique.

10 Muyuc bu la jquic’oxuctal ti yu’nuc tal a xi’icune, xchi’uc me ja’uc xa nopic ti me vu’un no’ox jtuc vinicun ti li’ ta banamile.

11 Ja’ no’ox jechun jech chac c’u cha’al vo’xuc, ti jech oyun ta scotol ta chop chameletic xchi’uc jbec’tal xchi’uc jole; jech tana, quich’oj t’ujel ta sventa li’ jteclum, xchi’uc quich’ojbe svu’el sc’ob jtot xchi’uc ta sc’ob Cajvaltic la jyac’ ti yu’nuc vu’nucun jpasvanejucun ta mantal xchi’uc sreyic ti li’ jteclume; jech ja’ ta smuc’ta tsatsal xchi’uc svu’el la snac’un xchi’uc la sq’uelun ti c’uxi xu’ xi abtej ta atojolalic ta scotol tsatsalile, xchi’uc ta scotol c’usi sna’ xchi’uc ta scotol spersa ti Cajvaltic yac’ojbune.

12 Ta xcalboxuc ti yu’un ja’ jech albilun ti chi abtej ta atojolalic ta scotol c’ac’ale, ja’ jech chac c’u cha’al ta ora, ti muyuc bu cac’ojboxuc c’anal taq’uin xchi’uc saquil taq’uin xchi’uc me ja’uc c’usi jchopucal c’ulejalil.

13 Xchi’uc muyuc bu c’ac’oj ac’o xa tic’atic ta chuquel, xchi’uc xa vilbajin a vaic ta abtel ta jujuntal, xchi’uc xa mil a vaic, xchi’uc xa vac’be a vaic ton, xchi’uc xa elc’ajic, xchi’uc me ja’uc xa mulivajic, xchi’uc me c’usiuc no’ox junucal mulil xa pasic, yu’un ta jchanubtasoxuc ti ja’uc ac’o xa pasic ti smantaltac Cajvaltic ta scotol c’usitic ja’ la spasoxuc ta mantale.

14 Ti vu’une jtuc chi abtej xchi’uc jc’obtac ta sventa ti c’uxi cha jcoltaoxuc ta sventa ti mu xa tojic apatanique, xchi’uc ti c’uxi mu xvul ta atojolalic ti c’usitic tu jtsots ta pasele, yu’un scotol ti c’usi calojane vo’xuc texticooxuc ti li’ ta c’ac’al li’e.

15 Ta scotol, quermanotac vu’un, muyu’nuc ta jtoy jba ti jech la jpase, me ja’uc yu’un ta jtic’ amulic xtoc ti jeche, yu’un ta xcal ti c’usitic va’aye ja’ ta sventa ti c’uxi xu’ xa na’ic ti xu’ ta jtac’be ta ora Riox ta sventa ti c’usi lec ta jnope.

16 Ti li’e, ta xcal ti yu’un jech abtejemun ta atojolalique, mu yu’nuc ta jc’an ta jtoy jba, ja’ no’ox yu’un ti jech oyun ta yabtel Rioxe.

17 Xchi’uc ja’ jech, ta xcal ti jech va’aye ja’ ta sventa ti c’uxi xa chanic ti c’usitic na’bile; xchi’uc ti c’uxi xu’ xa na’ic ti c’alal me oyoxuc ta scoltael a vuts’ avalalique, ja’ oyoxuc ta scoltael a Rioxic.

18 Ja’ jech, avalojbicun ti vu’un a reyicune, ti me vu’un ti boch’o cha cuyic ta a reyic ta x abtej ta a ventaique, ¿jech me mu xu’ xa colta abaic vo’xuc ta jujuntal avabtelic ec xtoc?

19 Xchi’uc ja’ jech xtoc, ti me vu’un ti boch’o cha cuyic ta a reyic ti boch’o sjelubtasoj c’ac’al avu’nique, jech, ja’ te oy ta yabtel Cajvaltic Riox, ja’ jech xu’ xa tojbicun ta vocol ti vo’xuque, ¡c’uxi xu’ cha tojbeic ta vocol ti a reyic ta vinajele!

20 Ta xcal quermanotac vu’un, ti me cha tojbeic ta vocol scotol xchi’uc ta xq’uejinic ta scotol yo’nton ti ach’ulelique, stac’ x och ti jtotic ti boch’o la spase, xchi’uc la snac’ xchi’uc la sq’uel lec, xchi’uc la spas ti c’uxi oyuc xcuxetel avo’ntonique, xchi’uc la jyac’ ti oyuc lequilal ta jujuntale.

21 Ta xcal ti ja’ te cha tun yu’un ti boch’o la spasot o no’ox ta sliquebale, xchi’uc te cha sq’uelic ta jujun c’ac’al, ta xa’c a bich’ic ti c’uxi xu’ cha cuxiique cha baq’uic xchi’uc cha abtejic jech chac c’u cha’al cha c’an a tuquique, xchi’uc ja’ cha sq’ueloxuc ta jujuliquel, ta xcal ti me la abtejic ta sbenta ta scotol a bo’ntonique, mu to yu’unuc jlequil abteloxuc.

22 Ja’ jech, scotol ti c’usi tsc’ane ja’ ti ac’o xa xch’unbeic ti smantaltaque, yu’un stuc yaloj ti me la ch’unbeic ti smantaltaque, li’ cha ta alequilalic ta banamil, yu’un ti stuque mu stac’ jelel ti c’usi chale; ja’ jech, ti me la ch’unbeic ti smantaltaque, ja’ stuc ta xac’ sbenticion xchi’uc ja’ ta xac’ alequilalic.

23 Jech lec tana; ja’ ba’yuc la spas xchi’uc la jyac’ ti acuxlejalique, ja’ yo jech oy avilic yu’un.

24 Ti ta xchibale, ja’ tsc’an ti ja’uc xa pasbeic ti c’usi tspasoxuc ta mantale; yu’un ti me la pasique, Ja’ stuc ta xac’boxuc sbenticion ta anil: yu’un ja’ stojojoxuc. Ja’ yo jech oy avilic yu’un; ja’ jechoxuc xchi’uc ja’ jech cha c’otic ta scotol c’ac’al; ja’ yo jech, ¿c’uxi xu’ cha valic ti lecoxuque?

25 Jech tana ta jac’, mu xu’ c’usi xa valic ta aventa atuquic, jech la jtac’; mu xu’ xa valic ti jechoxuc jech chac c’u cha’al spucucal banamile, ac’o me jech la vich’ic pasel ta spucucal banamil: ja’ yo jech ja’ yu’noxuc ti boch’o la spasoxuque.

26 Me ja’uc vu’un, jech vu’un ti boch’o cha cuyic ta areyique, me ja’uc lecun jech chac c’u cha’al vo’xuc, yu’un spucucal banamilun ec xtoc, me cha vilic ti malubenun xae, ti jutuc xa sc’an xcac’ jbec’tal ta xch’ul me’ banamile.

27 Ja’ jech, ti c’u x elan la jcal li abteje, li abtej, jech muyuc c’usi chopol la jnop ta sat Riox, ja’ jech ti li’ ta ora la jcac’ la tsob a vaique, ja’ ta sventa ti c’uxi muyucuc jmule, xchi’uc ti mu xcom ta jtotolal ti ach’ich’alic c’alal Riox ta sq’uelbun jtalel ti c’u x elan spasojun ta mantal ta aventaic vo’xuque.

28 Ta xcal, ti jech la jcac’ la tsob abaique, ja’ ta sventa ti c’uxi ta jsacubtas jc’u’tac ta ach’ich’alique, ti li’ ta ora xchi’uc ti li’ ta sc’ac’alil ti yu’un jutuc xa sc’an ta xcac’ jba ta jmuquinale, ja’ ta sventa ti c’uxi cuxetuc co’nton ta xcac’ jbae, xchi’uc ti jch’ulel mu sna’ xchame ac’o stsob sba xchi’uc ti boch’otic ta sq’uejintaic Riox ta vinajele, ti c’uxi sq’uejintaic q’uejimoletic ta lequil Rioxe.

29 Xchi’uc xtoc ta xcal ti jech la jcac’ la tsob abaic li’e, ja’ ta sventa ti c’uxi xu’ cha calboxuc ti yu’un mu xa xu’ cu’un ti vu’un jchanubtasvanejun avu’nique, xchi’uc ti reyun avu’nique.

30 Yu’un ti li’ ta orae, ti jbec’tale ta xt’elquinaj sjunlijil, ti jech ta to xcac’ persa ac’opanelique; ja’ xa no’ox Cajvaltic Riox ta xac’bun jtsatsal xchi’uc ti la jyac’ jech li c’opoje; xchi’uc la spasun ta mantal ti ac’o xcal li’ ta ora ti jnich’on Mosíahe ja’ rey xchi’uc ajvaliluc avu’nique.

31 Jech lec tana quermanotac vu’un, ta jc’an ti ac’o xa abtejic jech chac c’u cha’al abtejemoxuc li’ to ta ora a pasojique, jech chac c’u cha’al la pasbicun ti jmantaltaque xchi’uc ti smantaltac jtote, xchi’uc ti oy alequilalique xchi’uc ti jech muyuc la vich’ic aq’uel ta sc’ob a vaj contraique, ja’ no’ox jech xtoc ti me la ch’unbeic ti smantaltac ti jnich’on o me smantaltac ti Riox ti ja’ ta xaltalele, cha ta alequilalic ta banamil, ti avaj contraique muyuc stsatsalic ta atojolalic.

32 Cha’bio me a vaic jteclumaltac, mu me xa pasic c’op ta vo’xuc no’ox, xchi’uc mu me ja’uc xa ch’unic chopol espíritu ti bu la jyal jtot Mosíahe.

33 Yu’un ti li’e, jech la jyich’ alel jun chopolil ta sventa ti boch’o ja’ ta sc’an ta xch’un ti va’ay espiritue; ti me ja’ la sc’an la xch’une, jech te oy o, xchi’uc ta xcham o xchi’uc smultac, ja’ ta xuch’ ch’ayebal ta sventa xch’ulel stuc; yu’un ja’ ta xc’ot ta stojol sc’ac’al ti vocolil ta sbatel osil, ta sventa ti yu’un muyuc la jyich’ ta muc’ ti smantaltac Riox ti c’usi sna’oj o lec stuque.

34 Ta xcal ti muyuc xa boch’o yantic cu’untic, jech chac c’u cha’al abic’tal nich’nabic ti muyuc chanubtasbilic ta c’usitic li’e, ti jech mu sna’ic ti yu’un jech oy a vilic ta sbatel osil yu’un a totic ta vinajel, ti cha vac’beic scotol c’usitic oy avu’nique, xchi’uc ti c’u xa elanique, xchi’uc muyu’nuc muyuc chanubtasbiloxuc jech chac c’u cha’al poco’ lo’iletic ta sventa c’u x elan la xcholbeic sc’oplal ch’ul lequil viniquetic, ti jech ja’ ono’ox ti c’alal loc’tal jtotic Lehi ta Jerusalene.

35 Xchi’uc scotol ti c’usi yaloj jtotic c’alal to li’ ta orae, xchi’uc xtoc la jyalic ti c’u x elan la spas mantal Cajvaltique, ja’ yo jech tana, lec tuc’ xchi’uc ja’ ta bats’imelel.

36 Ja’ yo jech ta xcal quermanotac vu’un, ta tsacal ti c’alal jech la na’ic xchi’uc ti jech la vich’ic albel scotol ti c’usitic va’aye, ti me muyuc la ch’unic xchi’uc ti me muyuc la pasic ti c’usitic la jyich’ alele, ja’ xa me cha loq’ues a baic ta stojolal S espíritu Cajvaltic, ti c’uxi muyucuc avavilic ta yantic ti c’uxi cha vich’ic iq’uel batel te ta sbelal ti bu lec na’bile, ta sventa ti c’uxi cha vich’ic benticion, acuxlejalic xchi’uc ti lec cha vich’ic q’uelele,

37 Xchi’uc ta xcal ti vinic me jech la spase, ja’ ta xac’ sva stuc ta scontrainel Riox; ja’ jech, yu’un ja’ lec cha’ay ti ja’ chch’un ti chopol espiritue, xchi’uc ja’ ta scontrain ti c’usi ja’ lec tuq’ue, ja’ jech, ti Cajvaltique muyuc yavil ta stojolal, yu’un ti stuque mu stac’ x och ta templo muyuc lec.

38 Ti vinic me muyuc ta sutes yo’ntone, ti me ja’ jech oy o xchi’uc ti me jech cham o ta scontra Rioxe, ti mantaletic ta sventa lequil cuxlejale, ta xjulo ta xch’ulel bu mu sna’ xcham jun cuxul slo’il yo’nton ta sventa smul stuc ti bu tsc’an ta sut batel ta stojolal Cajvaltique, xchi’uc ta snojesbat yo’nton ta smul, xc’uxul xchi’uc ta xat yo’nton ti yu’un ja’ jech, jech chac c’u cha’al c’oc’ mu stac’ tubele, ti yu’un te tsanal o ta scotol c’ac’al ti stilemale.

39 Ti li’e ta xcal, ti c’uxubinele mu stac’ xc’ot ta stojolal ti va’ay vinique; ja’ yu’un, ti slajeb sc’ac’alile ja’ xco’laj xchi’uc ti vocolil muyuc slajebe.

40 Acotolic vo’xuc moletic, xchi’uc ec xtoc vo’xuc queremutic, xchi’uc vo’xuc ololetic, stac’ xa va’ybicun ti ca’yejtaque yu’un lec c’opojemun ti c’uxi xu’ xa va’ybicun lec smelolale, ta jc’opan Riox ti c’uxi ac’o xa juloic xa na’ic ti c’u x elan boch’otic yalic ta mulile.

41 Xchi’uc xtoc, ta jc’an ti ac’o ts’uiltasbilicuc xchi’uc cuxetuc yo’ntonic scotolic ti boch’otic ja’ ta spasic ti smantaltac Rioxe, yu’un ti li’e, ja’ic ti boch’otic yich’ojic benticion ta scotol c’usitic oye, jech chac c’u cha’al ta banamil xchi’uc ta cuxlejal ta sbatel osil, ti me jech lec tspas sbaic o c’alalto ta slajebal c’ac’ale, ta xich’ic iq’uel ta vinajel ti c’uxi te ba naquiicuc xchi’uc Riox ti te bu muyuc slajeb xcuxetel o’ntonale, na’ic me na’ic me, ti ja’ ta bats’imelel ti c’usitic li’e! Yu’un Cajvaltic Riox yaloj stuc.