1 Ja’ o jech ti Almae, ti boch’o jato loq’uel yu’un yaj abteltac rey Noee, la sutes yo’nton ta smultac xchi’uc sboliltac, jech te bat ta mucul ta jteclumetic, xchi’uc te sjapo chanubtasvanej ta sventa c’u x elan ya’yejtac Abinadi.

2 Jech, ja’ ta sventa ti c’usi ta to xc’ot ta pasele, xchi’uc xtoc ti ta xcha’ cuxi animaetic ta sventa c’uxi ta xich’ coltael jteclume, ti ta xich’ pasel ta stsatsal svu’el xchi’uc ti vocoliletic ta xich’ xchi’uc ti ta xcham Cristoe, xchi’uc ti c’u x elan ta xcha’ cuxe, xchi’uc ti c’u x elan ta xbat ta vinajele.

3 Ja’ jech ta xchanubtas ti jayibic boch’otic tsc’an ta xa’yic ti ya’yejtaque, jech ta xal ta mucul ti c’uxi mu x och ta xchiquin reye, jech te ep la xch’unic ti ya’yejtaque.

4 Ja’ jech ti jayibic boch’otic la xch’unique, batic te ta bu sbiinoj Mormón, ti biil bu yac’ojbe o no’ox rey ti te ta sts’ac muc’ta jteclume, ta baq’uintic, o me ta yorail, oy colemal chonetic.

5 Ja’ jech, ti te ta Mormone, sloq’uem lequil vo’ ti tee, ti Almae ja’ te ta xbatilan, yu’un ti te ta nopol vo’e oy jun paraje noj ta vic’tal te’etic, ti te bu ta snac’ sba sbejel c’ac’al ti c’alal ja’ o ta sa’van ti reye.

6 Ja’ jech ti jayibic la xch’unique, ja’ te chbatic ti c’uxi chba ya’yic ti ya’yejtaque.

7 Ja’ o jech c’ot ta pasel, ti c’alal ep xa ox c’ac’al jeloe, te xa ox ep jutuc stsoboj sbaic ti te ta paraje Mormón ta sventa ti ta xa’ybeic ya’yejtac Almae, jech scotolic ti boch’otic ta xch’unic ti ya’yejtaque, te xa stsoboj sbaic ta xa’yic, te la xchanubtas ti ac’o sutes yo’ntonic yu’un smulic xchi’uc ti c’u x elan ta xich’ic coltael yu’un smulic xchi’uc ti ac’o oyuc xch’unolajel yo’ntonic ta sventa Cajvaltique.

8 Ja’ o jech la jyal: Ti li’ vo’etic Mormone, (yu’un ja’ jech sbiinoj) jech ti yu’un cha c’anic cha ochic ta scoral Riox xchi’uc ti jech cha c’anic cha vich’ic iq’uel ta steclumale, xchi’uc ti avalojbe avo’ntonic ti cha vich’be a baic avicatsic ta jujuntal ti c’uxi aniluc chc’ot ta pasele.

9 Jech me a valojbe a vo’ntonic cha o’c’ a xchi’uquic ti boch’otic ta x oq’uique, jech, xchi’uc cha patbe yo’ntonic ti boch’otic tsc’an patbel yo’ntonique, xchi’uc ti me cha c’otic ta xtextico Riox ta scotol c’ac’ale, xchi’uc ta scotol c’usitic oy ti buyuc no’ox banamilal oyoxuc ti ja’ to me c’alal la chamic ti c’uxi cha vich’ coltael yu’un Riox xchi’uc ti c’uxi cha vich’ic atael achiquinic boch’otic ba’yuc cha’ cuxiic ta sventa ti c’uxi oyuc a cuxlejalic ta sbatel osile.

10 Cha calboxuc li’ ta ora, ti me ja’ jech ti c’usi tsc’an avo’ntonique, ¿c’u yu’un muyuc cha vich’ic vo’ ta sbi Cajvaltic, jech chac c’u cha’al xu’ xa valic ta jamal xchi’uc cha valic ta stojolal ti ja’ cha pasbeic ti yabtel xchi’uc cha ch’unbeic smantaltac ti c’uxi xu’ xa yac’boxuc ep S espíritu ta atojolalique?

11 Ja’ o jech, c’alal la jya’yic jech lo’iletic ti jteclume, la spac’ sc’obic yu’un xcuxetel yo’ntonic xchi’uc ja’ o jech avanic: Ti va’aye ja’ tsc’an ma ti co’ntoncutique.

12 Ja’o jech c’ot ta pasel, ti Almae la stsac Helam, ja’ ba’yuc och ta yut vo’; ja’ o jech lo’ilaj jech la yal: vo’ot Cajval ac’otal a Espíritu li’ ta sba avaj abtel ti c’uxi xu’ spas ta slequilal yo’nton ti li’ abtele.

13 Ti c’alal ja’o jech la jyal ti va’ay lo’iletique, ti S espíritu Cajvaltique, tal ta stojolal, jech la jyal: Helam, jech ti oy xa cu’un ti stsatsal Riox ti tsots xu’ yu’une, ta xcac’ot ta vo’ ta sventa ti c’uxi cha val ta jamal ti yu’un la val xa ta jamal ti cha pasbe yabtel, ti ja’ to me la cham ti jech oy to abec’tal sna’ xchame; jech ac’o yac’bot tal S espíritu Cajvaltic ta atojolal, jech oyuc a cuxlejal ta sbatel osil, yu’un ta stoj amul li’ Cristoe, ti boch’o ja’ la smeltsan o no’ox stuc ti c’alal meltsaj banamile.

14 Ti C’alal jech la jyal lo’iletic ti Almae, Alma xchi’uc Helam la smuc sbaic ta vo’ xchibalic, jech te liquic xchi’uc te loq’uic ta vo’ xcuxet no’ox yo’ntonic, yu’un jech yich’ic nojesel ta Espíritu.

15 Ja’ jech la stsac yantic xtoc ti Almae, och xchibal velta ta vo’, ja’ jech la jyac’ ta vo’ jech chac c’u cha’al ta ba’yuque, ja’ xa no’ox muyuc la smuc sba yan velta ta vo’ ti stuque.

16 Ja’ jech la jyac’ ta vo’ scotolic ti boch’otic te batic ta paraje Mormone, oy van jech yepalicuc chib ciento xchi’uc chanib (204) ch’ulelaletic, jech, la jyich’ic vo’ te ta vo’etic Mormón, jech te nojic ta slequilal Riox.

17 Ja’ jech la sbiinic xch’ulna Riox, o xch’ulna Cristo, jech ja’ o no’ox o te lictal ti c’ot ta pasel ti boch’o tsc’an ta xich’ vo’ ta svu’el stsatsal Rioxe, ta xich’ iq’uel ta sventa xch’ulna.

18 Jech ti Almae, yich’ojbe ti stsatsal Rioxe, la jyac’be yabtel banquilaletic, jech, jun banquilal ta jujutsopic ta lajlajuneb yoxvinic (50), ta sventa ti ja’uc albaticuc xchi’uc xchanubtasaticuc ta sventa ti c’usitic oy te bu tspas mantal Rioxe.

19 Xchi’uc la spas batel ta mantal ti mu c’usiuc yan xchanubtasvanic jech chac c’u cha al chanubtasvan stuc xchi’uc ti c’u x elan yich’oj alel ta yeic ch’ul lequil viniquetique.

20 Jech, xchi’uc la spas batel ta mantal, ti mu c’usiuc yan xchanubtasvanic jech chac c’u cha’al c’u x elan xu’ ta sutes yo’ntonic xchi’uc oyuc xch’unolajel yo’ntonic ta Cajvaltic ti boch’o la jyich’ o coltael steclumale.

21 Xchi’uc la spas ta mantal ti muyucuc c’op yu’nic ta jujuntale, ti ja’uc no’ox tuc’uc xac’ satic ta ba’yuc be ti bu sq’uelojic batele, ja’uc no’ox oyuc jun xch’unolajel yo’ntonic, xchi’uc jun ich’ vo’, ti jech junuc yo’ntonic ta coman xchi’uc ti sc’anojanuc sbaic ta jujuntale.

22 Ja’ jech la spas mantal ti ac’o bat xcholbeic sc’oplale, ja’ jech pasic ta xnich’nab Riox.

23 Xchi’uc la spas ta mantal ti ac’o sq’uelic ti sc’ac’alil cuxub o’ntonal ti jech ac’o yich’ic ta muq’ue; xchi’uc xtoc ti ac’o jech stojbeic ta vocol scotol c’ac’al ti Cajvaltic ti ja’ Srioxique.

24 Xchi’uc xtoc, la spas ta mantal ti banquilaletic boch’o la jyac’be yabteltaque, ti ac’o abtejicuc ta sc’ob stuquic ti c’uxi xu’ staic ti c’usi chtunyu’nique.

25 Te la jyich’ic ac’bel jun c’ac’al ta jujun xemuna ti c’uxi stac’ stsob sbaic ta sventa c’uxi ta chanubtasic ti jteclume, xchi’uc c’u x elan ta xich’ic ta muc’ Cajvaltic ti ja’ Xrioxique, xchi’uc xtoc stac’ stsob sbaic ti jayib velta xu’ yu’nique.

26 Ti banquilaletique mu ja’uc chac’ jteclum ti c’usi chtunyu’nique, yu’un ta yabtelic stuquic xu’ ta xich’ic ti slequilal Rioxe, ti c’uxi xu’ ta stsatsubic ta Espíritue, ti jech yich’ojic c’usi sna’oj Riox ti c’uxi xu’ xchanublasvanic ta stsatsal xchi’uc ta svu’el Rioxe.

27 Xchi’uc xtoc, ti Almae, la spas ta mantal jteclum sventa ch’ulna ti ac’o yaq’uic c’usi oy yu’nique, jech chac c’u cha’al c’usi oy yu’nic ta jujuntale; jech ti me oy c’usi ep oy yu’une, jech ep ta xac’; xchi’uc ti boch’o muyuc ep c’usi oy yu’une, ja’ no’ox jutuc ta xc’anbat, ti boch’o muyuc c’usi oy yu’une ja’ ta xich’ ac’bel.

28 Ja’ jech xu’ xavaq’uic ti c’usitic oy avu’nique, ta avo’nton atuquic xchi’uc ta slequil a vo’nton a tuq’uic, xchi’uc ta slequilal a vo’ntonic a tuq’uic ta sventa Riox, jech chac c’u cha’al boch’o banquilaletic ti me yu’un chtun yu’nique, jech, xchi’uc ta scotol ch’ulelaletic boch’otic t’anajtic yu’un sme’onalique.

29 Ti va’aye ja’ jech la jyal stuc ta stojolalic, ti yu’un jech yich’ic pasel ta mantal yu’un Rioxe, ja’ jech tuc’ la spas sbaic ta sat Riox, ti la scoltaanan sbaic ta jujuntal ti li’ ta banamil xchi’uc ta ch’ulelal, jech chac c’u cha’al chtun yu’nic yu’un sme’onalique.

30 Jech ti va’aye, scotol la jyich’ pasel ti te ta Mormone, jech, ti te ta xocon vo’etic Mormone, ti te ta te’tic ta xocon vo’etic Mormone, jech, ti te ta paraje Mormone, ta vo’etic Mormone, ta te’tic Mormone, lec alac’ sba c’ot ta sat jpojvanej ti boch’otic te c’otique, jech, lec ts’uiltasbilic, yu’un ta sq’uejintabeic q’uejimoletic ta scotol c’ac’al.

31 Jech la jyich’ pasel ti te ta sts’ac muc’ta jteclum ti c’uxi mu xa’ay ti reye.

32 Ja’ jech, ja’ o jech ti reye, la jya’ay ti c’u x elan ta xbaq’uic ti jteclume, la stac batel yaj abteltac ac’o bat sq’uelic, ja’ o jech, ja’ sc’ac’alil stsobojsbaic ta xa’yic ti ya’yej Cajvaltique, la jyich’ic tic’bel smulic ta stojolal rey.

33 Ti reye la jyal ti ja’ Alma ta spas ta mantal jteclum ti c’uxi ilinicuc ta stojolale; ja’ o jech, la stac’ batel yaj soltarotac ti ac’o bat smilique.

34 Ja’ jech ti Alma xchi’uc ti steclumal Cajvaltique, la jya’yic ti ta xbat yaj soltarotac reye; ja’ jech la stsaquic snaic ta poc’ xchi’uc snailalic, batic ta xocol banamil.

35 Oy to’ox jech yepalic ta atael, chanib ciento xchi’uc lajuneb yoxvinic (450) ch’ulelaletic.