Alma
Xnich’on Alma

1 Ja’ o jech, ti Almae sjapo xcholbel sc’op Riox ta jteclum, ba’yuc te ta sbanamil Zarahemla, te lic sjapo c’alalto ta scotol banamil.

2 Ja’ jech x-elan ti lo’iletic sna’oj stuc la jyalbe jteclum ta sventa ch’ulna ti te oy ta muc’ta jteclum Zarahemlae, jech la jyal:

3 Vu’un Almaun ti jech ts’uiltasbilun yu’un jtot Alma, ti vu’nucuc banquilalucun yu’un banquilaletic ta sventa xch’ulna Rioxe, ti yu’un ja’ yich’ojbe ti svu’el xchi’uc ti stsatsal Riox ta sventa ti c’uxi xu’ jech spase, ja’ jech ti li’e, ta xcal, ti ja’ sjapo sliquesel jun ch’ulna ti te oy te ta banamil sts’aquinoj Nefie, jech, ti banamil ja’ to’ox sbiinoj sbanamil Mormone, jech, xchi’uc la jyac’ ta vo’ yermanotac ta vo’etic Mormón.

4 Ja’ jech, ta xcal ti ja’ jech la jyich’ic pojel ta sc’ob steclumal Noe, ta slequilal xchi’uc ta stsatsal Rioxe.

5 Ta ts’acal ti va’aye, ja’ o jech, yich’ic tiq’uel ta chuquel ta sc’ob JLamanitaetic ta xocol banamil; jech ta xcal ti te to ox tiq’uilic ta chuquele xchi’uc ti jech yich’ic coltael yanvelta yu’un Cajvaltic ta tsatsal ya’yeje; xchi’uc ti jech la jyic’utic tal li’ ta banamile, xchi’uc ti li’ ta jliquesbetic spasel ti xch’ulna Rioxe xchi’uc ti ta scotol banamil xtoque.

6 Li’ ta nae, ta xcal, vu’un quermanotac ti vo’xuc ac’anojic xa ti li’ ch’ulnae, ¿me la comtsan ta ajolic lec ti c’u x-elan la jyich’ic tiq’uel ta chuquel ti atotique? jech, ¿xchi’uc me la comtsan ta ajolic ti c’u x-elan slequil xchi’uc smuc’ul ti Riox ta stojolalique? xchi’uc xtoc, ¿me la comtsan lec ta ajolic ti ja’ la sloq’uesbe xch’ulelic ta c’atinvaque?

7 Ja’ jech, ja’ la sjeltabe yo’ntonic; jech, xchi’uc la sjulubtasanan ti bu oyic ta epal vayele, jech juloic ta sventa Riox ja’ jech oyic ta o’lol ic’al osil, muc’ta jaluc, ti xojobal muyuc slajeb ya’yeje yich’ic sacubtasbel xch’ulelic, jech yu’un chuculic to’ox ta xch’ojonal chamel xchi’uc ta scarenail c’atinvac, ti ja’ ta xich’ic malael yu’un vuq’uesbel sventa sbatel osile.

8 Jech ta jac’ tana, quermanotac vu’un, ¿me la jyich’ic vuq’uesel? jech tana, ta xcal ti mo’oje; muyuc la jyich’ic.

9 Xchi’uc ta jac’ xtoc: ¿Me yich’ tuch’el ti xch’ajunal chamele, xchi’uc me yich’ jitunel ti scarenail c’atinvac bu chuculic oe? ta xcal ti jech la jyich’ic jitunele, ti xch’ulelique muq’uibic, xchi’uc la sq’uejintaic ta scotol yo’ntonic ti ac’o yich’ic coltaele. Xchi’uc ta xcal ti la jyich’ic coltaele.

10 Jech ta jac’boxuc tana: ¿C’u x-elan ti xu’ cha vich’ic coltaele? jech, ¿c’uxi la jyich’ liqueseltal ti jech ta jmalatic ti coltaele? ¿xchi’uc c’u x-elan smelolal ti jech la jyich’ic coltael ta xch’ojonal chamele, jech, xchi’uc ti ta scarenail c’atinvac xtoque?

11 Ja’ jech, xu’ ta xcal: ¿me mu yuc’ la xch’un jtot Alma ti ya’yej jech chac c’u cha’al la jyal ta ye Abinadie? ¿xchi’uc me mu ja’uc ch’ul lequil vinic? ¿me muyuc xc’opoj ta ya’yejtac Riox ti jech la xch’un jtot Almae?

12 Jech chac c’u cha’al xch’unolajel yo’ntone, yu’un jech muc’no’ox jelbat li’ yo’ntone, ja’ jech, ta xcal scotol ti c’usitic va’aye ja’ ta bats’imelel.

13 Ja’ o jech, la xchol ti c’opetic ta jtotique, jech ti yo’ntonique muc’ no’ox ijel ec xtoc, xchi’uc la sbic’tajes sbaic, xchi’uc la jyac’ yo’ntonic ti ta Riox ta bats’imelel cuxule, xchi’uc xtoc lec tuc’ la spas sbaic c’alalto ta slajebal, ja’ jech la jyich’ic coltael.

14 Ja’ jech ta jac’ tana quermanotac vu’un ta sventa ch’ulna; ¿me voq’uemoxuc lec ta espíritu ta sventa Riox? ¿Me ja’ avich’ojic c’u x-elan stuc ta a satic? ¿me a na’ojic lec c’u x-elan smuc’ul ti jelbil avo’ntonique?

15 ¿Me cha bac’ ta ilel xch’unolajel a vo’ntonic ta sventa c’uxi cha sloq’uesoxuc ti boch’o la spasoxuque? ¿cha vilic ta ts’acal ta sat xch’unolajel a vo’ntonic ti li’ abec’talic sna’ xchame, ta xich’ liquesel yan velta jech mu xa sna’ xcham o, ti c’usi muyuc leque ta spas ta lec, ta sventa ti c’uxi xu’ xa vich’ic iq’uel batel ta stojolal Rioxe, jech chac c’u cha’al avabtelic la pasic ti c’alal oy to ox a sbec’talic sna’ xchame?

16 Ta xcalboxuc: ¿Me stac’ xa nop ta ajolic c’u x-elan cha va’ybeic ya’yej ti Cajvaltic ta baq’uin, ti jech ta xal: La’ic ta jtojolal, cha vich’ic benticion, yu’un ti avabtelique ja’ lec tuq’uil abtelal ta sba banamil?

17 ¿Me tavan xa bal ti xu’ cha nopic ti c’usi cha valic ta stojolal Cajvaltic ta baq’uine, ti me jech cha valbe: Cajval, ti cabtelcutique lec la jpascutic ti ta sba banamile; me ja’ xa jech cha scoltaoxuc o ti stuque?

18 Ja’ jech xtoc ¿me xu’ xa vules ta ajolic c’u x-elan ti c’alal cha vich’ic iq’uel batel c’alal ta sq’uelboxuc a talelic ti Riox ti me a ch’ulelic nojem ta mulil xchi’uc ta at o’ntonale, xchi’uc ti te sna’oj o scotol ti c’u x-elan amulique, jech, xchi’uc sna’oj o lec ti c’u x-elan abolilique, jech, xch i’uc sna’oj o lec ti c’u x-elan mu la ch’unic ti smantaltac Rioxe?

19 Ta xcal: ¿Stac’ xa q’uelic Riox ta baq’uin me lec sac a vo’ntonic xchi’uc me lec sac ac’obique? ¿stac’ xa toy a satic ti me te tsacal ta a satic sat Rioxe?

20 Jech chacalboxuc ¿Me stac’ xa nopic ti ta xa colic ti c’alal me te oyoxuc ta stojolal pucuje?

21 Ta xcal, ti ta baq’uine stac’ xa na’ic ti mu stac’ xa colique, yu’un muyuc boch’o xu’ xich’ coltael ti me muyuc chuc’bil sc’u’ ja’ to ti c’uxi lec sac oe; jech, yu’un ti ac’u’ique tsc’an lec sacubtasbil ja’ to ti c’uxi lec sac o ta scotol yic’ubale, ti ja’uc ta sventa xch’ich’al ti boch’o yalojic o no’ox jtotic ti ta xtal sloq’ues steclumal ta smultaque.

22 Ja’yo jech ta jac’ tana quermanotac vu’un; ¿C’uvan x-elan cha’ay boch’ouc junucal avu’nic, ti c’alal me te oy ta xq’uelbat stalelic yu’un Riox, ti me yatinoj ch’ich’ sc’u’ic xchi’uc ta scotol ta chop muliletique? jech tana, c’usivan ta xal ta jamal ta scotol c’usitic va’ay ta a contraic vo’xuc?

23 Ja’ jech, ¿Me mu ja’uc ta xal ta jamal ti yu’un jmilvanejoxuque, jech, xchi’uc xtoc ti yu’un oy amulic ta scotol ta chop bolililetique?

24 Ja’ jech quermanotac vu’un, ¿me cha nopic ti yu’un bats’i quirisiano oyuc yabil xu’ xchoti ti bu tspas mantal Rioxe, xchi’uc Abraham, xchi’uc Isaac, xchi’uc Jacob, xchi’uc xtoc scotol ch’ul lequil viniquetic, ti jech lec sac sc’u’ique xchi’uc ti muyuc jlec’uc yic’ubalic, lequic xchi’uc saquique?

25 Ta xcal ti mu jechuque: Ja’ xa no’ox ti me la cuyic ta j-epal c’op ta sliquebal ti boch’o la spasoxuque, o me chavalic ti epal c’opojem ta sliquebal ono’oxe, mu stac’ xa nop ti yu’un oy yabil ti quirisiano te bu spasubil mantal ta vinajele, yu’un ta xich’ic taquel loq’uel, yu’un ja’ic nich’onil bu ta spas mantal pucuj.

26 Tana jech ta xcal: Quermanotac vu’un, ti me ava’yojic xa ti jelbil a vo’ntonique, xchi’uc ti me ava’yojic ti cha c’an cha q’uejinic ta q’uejimoletic ta xch’unolajel a vo’ntonic c’u x-elan cha scoltaoxuque, ta jc’an cha jac’boxuc: ¿me stac’ xa va’ay ti c’usi va’ay li’ ta orae?

27 ¿Ti jech cha xanoic, muyuc c’usi xa na’ic ta sat Rioxe? xchi’uc ti yu’nuc xa cha cham ti li’ ta orae, ¿Me stac’ xa val ta yut a vo’ntonic, ti yu’un tu j-ech’em lecoxuque? ¿Xchi’uc ti ac’u’ique yich’oj xa chuq’uel xchi’uc lec xa sacubtasbil ta sventa xch’ich’al Cristo, ti ta xtal scolta steclumal ta smultaque?

28 Jech tana, ¿me a loq’uesoj abaic ta toyubail? ti me mo’oje, vu’un ta xcal ti muyuc to lec a meltsanoj a baic ti c’uxi xu’ cha c’otic ta stojolal Rioxe; tsc’an me lec cha meltsan abaic ta oratic no’ox; yu’un ti c’u x-elan ta xich’ pasel mantal ta vinajele jutuc xa me sc’an xnopajtal: Yu’un ti boch’o muyuc lec smeltsanoj sbae muyuc me xcuxlejal sbatel osil.

29 Jech tana, ta xcal, ¿Me oyto boch’o avu’nic ti muyuc sloq’uesoj sba ta it’ix o’ntonale? ta xcal ti va’aye muyucto lec smeltsanoj sba; ta sc’an ti ac’o smeltsan sba ta oratic no’oxe, yu’un ti yoraile jutuc xa me sc’an, yu’un mu jnatic baq’uin chc’ot ti sc’ac’alile, ti c’uxi mu bat xchi’uc smul ti va’ay quirisianoe;

30 Xchi’uc xtoc ta xcalboxuc ¿Me oyto boch’o avu’nic ti ta to sna’le xchi’ile o me ta xac’be c’usi tsots ta stojolale.

31 Abul sba ti boch’o jech va’aye, yu’un muyuc to lec smeltsanoj sba; ti sc’ac’alil c’uxi xu’ ta sutes yo’ntone nopol xa me tal, me mo’oje mu stac’ xich’ coltael!

32 Jech, ¡abul abaic a cotolic ti boch’otic chapasic bolililetique! suteso me a vo’ntonic, yu’un Cajvaltic Riox yaloj!

33 Ja’ jech, ti stuque ta xalbe scotol viniquetic, ti scotolicuc ac’o xbech sc’obic ta lequilale, ti stuque jech ta xal: Suteso a vo’ntonic, ja’ jech ta xquic’oxuc.

34 Jech la jyal ti stuque; la’ic ta jtojolal, ja’ jech cha vich’ic ti li’ sat te’ sventa cuxlejale, jech cha ve’ic xchi’uc cha vuch’ic ta lequilal ti pan xchi’uc ti vo’ sventa lequilale.

35 Jech, la’ic ta jtojolal xchi’uc aq’uic ta ilel ti alequil abtelic, ti c’uxi mu xa vich’ic aq’uel xchi’uc xa vich’ic jipel batel ta c’oq’ue.

36 Yu’un ti li’e, ti sc’ac’alile jutuc xa me sc’an, scotolic ti boch’otic mu xac’ lec satic o me boch’otic mu x-abtejic ta lequil abtelale, oyvan rason yu’un ti jech ta x-abane xchi’uc ti jech ta x-oq’ue.

37 ¡Abul sbaic ti boch’otic la spasic bolililetique, vo’xuc ti la toy abaic ta sventa c’usi mu xtun ta banamile, vo’xuc ti la valic xa votquinic ti be lec tuq’ue, ma’uc lec atojic, yu’un ja’ jechoxuc jech chac c’u cha’al chij muyuc xchabiel, ac’o me oy jun jchabi chij yic’ojoxuc, xchi’uc jech ta to xa yic’oxuc, ti vo’xuque mu xa c’an xa va’ybeic ti ya’yeje,

38 Ja’ jech ta xcal ti lequil jchabi chije ta xic’oxuc; jech ta xic’oxuc ta sbi stuc, jech chac c’u cha’al sbi Cristo, ti me mu xa c’an xa bac’ a chiquinic ti ta ya’yej lequil jchabi chije, ti ta biil c’u x-elan xu’ xa vich’ic iq’uele, ja’ jech mu xu’ xa c’otic ta xchij lequil jchabi chij.

39 Ti me mu ja’ucoxuc xchij lequil jchabi chije, ¿C’usi chijaloxuc un cha’e? ja’ jech, ta xcal ti ja’ pucuj ta xchabioxuque, ti vo’xuque ja’ xchijoxuc, ja’ jech tana, ¿boch’o xu’ ta smuculta? ja’ jech, ta xcal ti boch’o ta smucultae ja’ j-epal c’op xchi’uc ja’ xnich’on pucuj.

40 Yu’un ta xcalboxuc, scotol ti c’usitic leque ja’ te talem ta Riox, xchi’uc scotol ti c’usitic chopole ja’ ta pucuj talem.

41 Ja’ jech, ti me jun vinic ja’ ta spas lequil abtelale, ja’ ta xa’ybe ya’yej lequil jchabi chij ja’ te ta xbat ta stojolal, ti boch’o ja’ ta spas chopol abtelale, ja’ ta spas ta xnich’on pucuj, yu’un ja’ ta xa’ybe ya’yej xchi’uc ja’ ta xchi’in batel.

42 Ti boch’o jech ta pas va’aye, ja’ te ta xich’ stojol ta stojolal; ja’ jech, ti stojole ja’ ti chamele, scotol ti c’usitic ja’ ta sventa lequilale, ja’ jech chamen xa ta sventa lequil abtelal.

43 Ja’ jech tana, quermanotac vu’un, ta jc’an ti ac’o xa va’ybicun jc’ope, yu’un chi c’opoj ta scotol spersa jch’ulel, yu’un, ti li’e, lec stac’ ay’el, c’opojemun ta sventa ti c’uxi mu xa vovijique, ja’ jech c’opojemun jech chac c’u cha’al smantaltac Riox.

44 Yu’un vu’un albilun ti jech x-elan chi c’opoje, jech chac c’u cha’al ch’ul lequil q’uelbil yu’un Riox, ti te oy ta Cristo Jesuse, jech, ta xquich’ pasel ta mantal ti ac’o xi lic xchi’uc ti ac’o xcal ta jamal ta sventa li’ jteclum ti c’usitic la jyalic jtotic ta sventa ti c’usi jutuc xa sc’an xtale.

45 Ti li’e mu ja’uc scotoluc, ¿Mu xa valic ti me yu’un jech jna’ ta jtuc no’ox ti c’usitic va’aye? ja’ jech, ta xcal ta jamal ti vu’un jna’oj ti c’usitic caloje ti ja’ ta bats’imelele, xchi’uc ¿C’uxi xu’ cha na’ic ti me vu’un jna’oj ta sventa slequilale?

46 Ja’ jech, ta xcal ti xch’ul Espíritu Riox la jyac’bun jna’e. Ja’ jech, quictaoj quixim xchi’uc jpasoj oracion epal c’ac’al ta sventa ti c’uxi xu’ jna’ ta jtuc no’ox ti c’usitic li’e, ja’ jech tana, jna’oj ta jtuc no’ox ti ja’ ta bats’imelele; yu’un Riox la jyalbun ta xch’ul Espíritu; ti li’e ja’ ti Espíritu ta xalbun ca’ay ti oy ta jtojolale.

47 Xchi’uc xtoc, ta xcal ti ja’ jech x-elan la jquich’ ac’bel quil, ti ya’yejtac jtottactic c’opojemic ti ja’ ta bats’imelele, jech chac c’u cha’al espíritu yich’oj alel oy ta jtojolale, xchi’uc xtoc ti c’u x-elan ta xal xch’ul Espíritu Rioxe.

48 Vu’un ta xcal ti jna’oj ta jtuc vu’une, ti c’alal ta xcal ti c’usi ta xtale ja’ ta bats’imelel, xchi’uc ta xcal xtoc ti jna’oj ti Jesucristo ta xtale, jech, ti ja’ sba xnich’on stuc totile, nojem ta lequilal, c’uxul o’ntonal xchi’uc ta bats’imelel, xchi’uc ja’ ti boch’o ta xtal sloq’uesbe smul banamile, jech, ti smultac scotol viniquetic ti boch’o chch’un ta bats’imelel ta sbie.

49 Jech tana ta xcal ti ja’ jech x-elan ti mantaletic c’u x-elan albilune, jech, ti c’u x-elan ta jcholbe sc’oplal ta quermanotac lec jc’anoje, ta scotol ti boch’otic nacajtic ta sba banamile; jech, ta jcholbeic scotolic, ta moletic me ta queremutic, ta mosoiletic me ta colemic; jech, ta boch’o ep xa sjabilalic xchi’uc boch’otic o’lol sjabilalic xchi’uc ti boch’otic ja’ to xch’iictale; jech ta xcalbeic ti tsc’an ac’o sutes yo’ntonique xchi’uc ti chvoq’uic ta ach’e.

50 Jech, ti Espíritue jech ta xal: Suteso a vo’ntonic a cotolic vo’xuc, ta sti’iltac banamil, yu’un ti c’u x-elan ta spas mantal ti vinajele jutuc xa sc’an, jech, ti xnich’on Rioxe ta xtal ta xojobal xchi’uc slequilal, ta spersa, ta smuc’ul stsatsal, ta svu’el xchi’uc ta stsatsal stuc, jech, quermanotac ti vu’un lec jc’anojoxuque, ta xcal ti Espíritu jech ta xale: Jech tana ti xojobal xchi’uc slequilal ti rey ta scotol banamile; xchi’uc ti rey ta vinajel xtoque jutuc xa sc’an xac’ xojobal ta scotol xnich’nab viniquetic.

51 Xchi’uc ta xalbun xtoc ti Espíritue; jech tsots ta sc’opanun tajmec, jech ta xal: batan xchi’uc albo ti li’ jteclume: Suteso avo’ntonic, yu’un ti me muyuc cha sutes o avo’ntonique, muyuc c’uxi xu’ xa ochic ta spasubil mantal ta vinajel.

52 Xchi’uc xtoc, ta xcal ti Espíritue jech ta xal: Jech tana, ti eq’uele ac’bil ta yibel ti te’e; yu’un, scotol te’etic me mu xaq’uic lec satique, ta xich’ic sebel xchi’uc ta xich’ic aq’uel ta c’oc’; ja’ jun c’oc’ ti muyuc slajebe, jun c’oc’ ti mu stac’ tubele, ja’ jech, te me oyuc ta avo’ntonic ti c’usi la jyal ch’ul vinique.

53 Jech tana ta xcal; quermanotac ti vu’un lec jc’anojoxuque, ¿me stac’ xcuch avu’nic ti li’ lo’iletique? jech ¿me stac’ mu xa ch’un ti c’usitic li’i xchi’uc me stac’ cha pech’ ta teq’uel ta avacantac ti Ch’ul Riox ta Israele? jech, ¿me stac’ xa nojes aba ta stoyubbail a vo’ntonic? jech, ¿me cha c’an ja’ cha tunesic o ti c’uil toyolic stojole xchi’uc me ja’ te cha bac’ avo’ntonic o ti ta c’usi muyuc stu ta banamil, xchi’uc ti ta ac’ulejalique?

54 Jech ¿me ja’ te cha c’an cha vac’ abaic o ti cha valic ti ja’ ech’em alequilalic jech chac c’u cha’al yantique? jech, ¿me ja’ te cha c’an cha vac’ a vaic o ti cha nutsic ti a vermanoic ti boch’o sbic’tajesoj sbaic xchi’uc ti ta xanoic jech chac c’u cha’al xch’ul mantal Rioxe, jech chac c’u cha’al ochemic li’ ta ch’ulnae, ti jech yich’ojic ts’uiltasel ta Ch’ul Espíritu xchi’uc ti ta spasic lequil abtelal ta sventa sutesub o’ntonale?

55 Jech ¿me ja’ te cha c’an cha vac’ a vaic ti ta xa vac’be ava’lupatic ti boch’o a’bul sbaic xchi’uc ti boch’o muyuc c’usi oy yu’nicuque, xchi’uc ti mu xa vac’beic ti c’usi oy avu’nique?

56 Ta slajeb xae, a cotolic vo’xuc ti cha c’an te oyoxuc o ti ta abolilique, ta xcal ti va’aye, ja’ ti boch’otic ta xich’ic aq’uel xchi’uc jipel batel ta c’oq’ue, ja’ xa no’ox ti me la sutes yo’ntonic ta aniltic no’oxe.

57 Acotolic vo’xuc ti cha c’anic cha ts’aclinic ya’yej ti lequil jchabi chije, jech tana ta xcal: Loq’ues abaic ta stojolalic ti boch’otic chopolique, xchi’uc voc’o abaic, xchi’uc mu xa piquic ti c’usi mu xtun ta banamile, yu’un jech tana ti sbitaquique ta xich’ic tupbel, ti c’uxi mu xich’ic ich’bel ta muc’ sbiic ti boch’otic chopolic xchi’uc sbiic boch’otic lequique, ti c’uxi chc’ot ta pasel ti c’usi yaloj ti Riox, ti jech ta xal: ti sbiic ti boch’otic chopolique muyuc ta xich’ capel ta sbiic boch’otic ja’ic jteclumal.

58 Yu’un ti sbiic boch’otic lequique ta xich’ic tsacbel ta vun te ta slibroal cuxlejal, ti va’yique ta xich’ic ac’bel yavilic ta jtojolal jech tana quermanotac vu’un ¿c’usi xu’ cha val ta scontrainel ta sventa ti va’aye? ta xcal ti me chopol la c’opojic ta stojolale, muyuc boch’o sventa; yu’un ti ya’yej Rioxe stac’ xc’ot ta pasel.

59 Jech ¿boch’o jech jchabi chij avu’nic ti me oy ep xchij ti mu xchabi c’uxi mu x-och oq’uil chonetic xtal ti’atuc xchijtaque? jech tana, ti me jun oq’uil chon och ta o’lol xchijtaque, ¿me muyuc ta snuts loq’uel? jech xchi’uc ti ta slajeb xae, stac’ ta smil, ja’ jech ta spas.

60 Xchi’uc tana, jech ta xcal, ti lequil jchabi chije ta x-ic’ban, ti me cha va’ybeic ti ya’yeje, ta xac’oxuc ta scoral xchi’uc ja’ xa xchijoxuc; xchi’uc ja’ ta spasoxuc ta mantal ti ac’o mu xa vaq’uic ochuc oq’uil chon ta atojolalic ti c’uxi mu xa vich’ic soquesele.

61 Ja’ jech lec tana, ti vu’un Almaune, ta jpasoxuc ta mantal, ta ya’yejtac ti boch’o la spasun ta mantal vu’une, ti ac’o xa baq’uic persa xch’unel ti a’yejetic c’u x-elan c’opojemune.

62 Ta xi c’opoj ta sventa mantaletic ta atojolalic ti vo’xuc oyoxuc xa ta sventa ch’ulnae; xchi’uc xtoc ta xquic’oxuctal ta ca’yej ti boch’otic mu ja’ucoxuc toe, ta xcal: la’ic xchi’uc ich’ic vo’ ta sventa sutesub o’ntonal, ta sventa ti c’uxi xu’ xa vich’ic ti sat te’ sventa cuxlejale.