1 Ja’ jech loq’uic batel xchi’uc sjapoic xcholel sc’op Riox ta jteclum, ochic ta snail tsobumbailetic xchi’uc ta naetic, jech, xchi’uc la xcholic c’op ta calletic.

2 Ja’ o jech ti c’alal ep xa ox abtejic ta stojolalique, te staic ep xcuxetel yo’ntonic ta sventa c’u x-elan sme’onalic; ja’ o jech, ti va’aye te la jyich’ic loq’uesel ta snail tsobumbailetic ta sventa sme’onal sc’u’ic.

3 Ja’ jech, mu xich’ic otesel ta snail stsobumbailic ti c’uxi xu’ xba yich’ic ta muc’ Rioxe, yu’un ta xich’ic cuyel ta c’usi muyuc stuic, ja’ jech, me’onic, jech ti xchi’iltaquique ta scuyic jech chac c’u cha’al ta c’usi muyuc xa stu; ta sventa ti yu’un sme’onalic ta sventa c’usitic oy ta banamile, xchi’uc xtoc ti me’onic ta yo’ntonique.

4 Jech ti c’alal ja’ o xchanubtasvan xchi’uc chlo’ilaj ti Alma ta jteclum te ta ba vits Onidae, te tal ta stojolal epal viniquetic ti ja’ic ti boch’otic calojtic xa o no’oxe, ja’ ti boch’otic me’onic ta yo’ntonic ta c’usitic oy ta banamile.

5 Te c’otic ta stojolal Alma; ti boch’o banquilal yu’nique jech la jal: ja’ jech, ¿c’usi tspasic, ti li’ quermanotac vu’une? yu’un yich’ojic bajel ta scotol viniquetic ta sventa sme’onalic; jech, xchi’uc xtoc c’alal ta boch’otic banquilal cu’uncutic, yu’un la stacuncutic loq’uel ta snail jtsobumbailcutic, ti bu tsots li abtejcutic ta spasel ta jc’ob jtuc-cutique, jech la snutsuncutic loq’uel ta sventa jme’onalcutic, jech muyuc bu xu’ ta xquich’cutic ta muc’ ti Jrioxcutique, ja’ jech ¿c’usi xu’ ta jpascutic?.

6 C’alal la jya’ay ti va’ay Almae, la sjoybin sat ta stuq’uil buoy, la sq’uel ta xcuxetel yo’nton; yu’un la jyil ti jech sbic’tajesoj sbaic ta sventa vocoliletique, xchi’uc ti yalojbe yo’ntonic ta xa’yic ti lo’iletique.

7 Ja’ o jech, muyuc xa c’usi la jyal ta yantic, ja’ no’ox la xbech sc’ob xchi’uc jech la jyalbe ti boch’otic te sq’uelojic ti boch’otic sutesoj yo’ntonic ta bats’imelele, jech la jyalbeic:

8 Chquil ti lec manchu a vo’ntonique, ti me ja’ jeche, cha vich’ic benticion.

9 ja’ jech, ti avermanoique ja’ jech yaloj: ¿c’usi xu’ ta jPascutic? yu’un quich’ojcutic nutsel loq’uel ta snail jtsobumbailcutic, ti c’uxi mu xu’ xquich’cutic ta muc’ Jrioxcutique,

10 Ja’ jech, vu’un jech ta xcal: ¿Me yu’un chavalic ti mu xa xu’ bu yan xu’ xavich’ic ta muc’ a Rioxic jech chac c’u cha’al ta snail atsobunbailique?

11 Xchi’uc xtoc ta jc’an cha jac’boxuc: ¿me yu’un chavalic ti me mu xu’ xa vich’ic ta muc’ a Rioxic jtenuc ta jun xemunae?.

12 Ti vu’une ta xcal ti yu’un ja’ lec ti jech la vich’ic loq’uesel ta snail atsobumbailic, ti c’uxi xu’ xa pas a vaic ta lec xchi’uc ti c’uxi xu’ xa chanic c’usitic leque; yu’un ja’ lec tsc’an ti tsc’an cha chanic spasel abaic ta leque; yu’un ja’ ta sventa ti jech la vich’ic loq’uesele, jech ti a vermanoique sna’ojic ti ame’onalique, ti jech c’otemoxuc xa ta me’one, ja’ yo ja’ jech tsc’an ti yu’nuc c’otanic ta me’one,

13 Yu’un cha vich’ic sujel ti jechuc me’onoxuque, chavich’ic benticion; yu’un ta baq’uintic, ti jun vinic me ta xil ti me jech sujbil ta sme’onale, ta st’un sutesub o’ntonal; ta bats’imelel, ti boch’o ta sutes yo’ntone ta sta slequilal; ti boch’o ta sta slequilal xchi’uc ti me tsq’uel sba lec c’alalto ta slajebale, ta xich’ coltael.

14 Jech chac c’u cha’al caloj xa, ta sventa ti jech la vich’ic xa sujel ti jech me’onoxuque, la vich’ic ts’uiltasel ¿mu xa valic xtoc ti me vo’xuc xa ep ts’uiltasbiloxuc, jech chac c’u cha’al boch’otic ta sbic’tajes sbaic ta bats’imelel ta sventa a’yejetique?.

15 Jech, ti boch’o ta bats’imelel ta sbic’tajes sba xchi’uc ti ta sutes yo’nton ta sventa smultaque, xchi’uc ti me tsq’uel sba lec c’alalto ta slajebal c’ac’ale, ta xich’ ts’uiltasel; jech ech’em to ta xich’ic ts’uiltasel jech chac c’u cha’al boch’otic ta xilic sujbilic yu’un sme’onalic ta sventa sme’onalic.

16 Ja’ jech, ts’uiltasbilic ti boch’otic ta sbic’tajes sbaic ti ma’uc to uts me ta xich’ic sujel ta sventa me’onale, me ja’ lec xcaltic, ta yan c’op, ts’uiltasbil ti boch’o ta xch’unic ya’yej Rioxe, xchi’uc ti me la jyich’ vo’ ta scotol yo’ntonic, jech me muyuc bu sujbiluc ti la jyotquin a’yejetique, ja’ chcaltic ti me mu sujbilicuc ta sna’el ti c’alal tsc’an to’ox xch’une.

17 Jech, oy epic ti jech ta xalique; me cha vac’buncutic sq’uelubil li’ vinijele, ta bats’imelel ti ja’ te ta jna’cutic ta orae, xchi’uc ti ta jch’uncutique.

18 Ti vu’une jech ta jac’: ¿me ja’ xch’unolajel o’ntonal ti va’aye? ja’ jech ti vu’une ta xcal ti ma’uque, yu’un ti ne jun vinic oy jun c’usi sna’e, mu xa persauc ta xch’un, yu’un sna’oj xa.

19 Ja’ jech, ¿ja’ ep to tu jchopol ti boch’o xotquin Riox xchi’uc ti me mu la xch’une, ti boch’o ja’ no’ox ta xch’un, xchi’uc ti me jech yal ta mulile?

20 Lec tana, ti c’usitic va’ay a’yejetique vo’xuc cha q’uelbeic stalel. Ja’ jech, vu’un ta xcal ti yu’un co’ol sba jech chac c’u cha’al yan xchi’uc ta yan xtoque, xchi’uc ta scotol viniquetic ta xc’ot ta pasel jech chac c’u cha’al yabtelic.

21 Ja’ jech tana, jech chac c’u cha’al la jcal ta sventa xch’unolajel o’ntonal: Ti xch’unolajel o’ntonale ma’uc yu’un oy c’usi jna’ojtic ta bats’imelel ta sventa c’usitic; ja’ no’ox ti me oy xch’unolajel a vo’ntonique, apatoj a vo’ntonic yu’un ti c’usi mu xvinaje, xchi’uc ti yu’un ja’ ta bats’imelele.

22 Xchi’uc ja’ jech tana, ta xcal, ta jc’an ti ac’o xa na’ic ti Riox oy xc’uxul yo’nton ta stojolalic scotolic ti boch’otic ta xch’unbeic sbie; ja’ jech, ti stuque tsc’an ta scotol ti ac’ouc xa ch’unique, jech, te ta ya’yejtac.

23 Xchi’uc ja’ jech, tana, ti stuque ta xaltal ya’yejtac ta viniquetic ta abatetic; jech, ma’uc no’ox ta viniquetic, yu’un c’alal ta antsetic ec xtoc, Ti va’aye mu ja’uc o scotol; yu’un ep ta velta yich’ojic ac’bel a’yejetic ta sventa ololetic ti ta socbeic sjol boch’otic bijic xchi’uc ti boch’otic ep c’usi sna’ique.

24 Jech tana, quermanotac ti vu’un lec jc’anojoxuque, ti jech cha c’an cha na’ic ta jtojolal ti c’usi cha c’an cha pasique, yu’un cha vat a vo’ntonic xchi’uc nutsbiloxuc loq’uel, ta jc’an ti mu xa nopic me yu’un ta jc’an ta jq’uel atalelique, ja’ no’ox ti c’usi ja’ ta bats’imelele.

25 Yu’un mu jc’an cha calboxuc ti me a cotolic vo’xuc ti jech ac’biloxuc persa ta me’onale, yu’un ta bats’imelel jna’oj vu’un ti oy boch’o avu’nic ti jech ta sbic’tajes sbae, te xa tspas o svocolic ti c’u x-elan oyique.

26 ja’ jech chac c’u cha’al la jcal ta sventa xch’unolajel o’ntonal, ti ma’uc ti c’usi otquinbil ta bats’imelele, ja’ jech xtoc ti ta sventa ca’yejtaque. Mu xu’ avu’un xa na’ ta sliqueb c’u x-elan ti lecubtasel ta sventa c’u x-elan ta bats’imelel ta xale, ja’ jech chac c’u cha’al ch’unolajel o’ntonal ti ma’uc c’usi otquinbil ta bats’imelele.

27 Jech tana, ti me la juloic xchi’uc ti me chabijubtas ajolic xchi’uc ja’ to me va’ybeic lec smelolal ti ca’yejtaque, xchi’uc ti me la vac’ ta ilel jutuc xch’unolajel a vo’ntonique, jech, ac’o me mu epuc jech chac c’u cha’al cha c’an cha ch’un, ac’o abtejuc ta atojolalic ti c’u x-elan cha c’ane, jech, ja’ to ti c’u x-elan xu’ cha va’ay ti cha va’ay ti ca’yejtaque.

28 La’ jcuytic lo’il jech chac c’u cha’al jun bec’ ts’unubil, jech tana, ti me cha vac’ ts’unluc jun bec’ ts’unubil ta a vo’ntonique, ja’ jech, ja’ jun bec’ ts’unubil ta bats’imelel o me lequil ts’unubil, jech mu xa jip loq’uel ta sventa a boliltac, xu’ xcuch avu’un ti S-espíritu Cajvaltique, ja’ jech, te ta sjapo ch’iel ta a vo’ntonic; ti c’alal cha va’yic ta avo’ntonic ti c’u x-elan ta xch’ie, ta xa japoic yalel ta a vo’ntonic a tuq’uic: yu’un van ja’ ti lequil bec’ ts’unubile, o me ja’ ti lequil c’ope, yu’un ta xa sjapo muq’uibel ti jch’ulele, jech ta xa sjapo sacubel ti jbijubele, jech ta xa sjapo lecubel ta jtojolal.

29 Ja’ jech; ¿me mu tsmuq’uimtas xch’unolajel co’ntontic ti va’aye? ta xcal ti tanae; ti va’aye, muyuc to lec otquinbil o lec ti va’aye.

30 Ja’ jech, chjelo ti bec’ ts’unubile ta situb xchi’uc ta xjulinaj xchi’uc ta sjapo ch’iel, ja’ o jech xu’ xa bal ti yu’un ja’ lec ti bec’ ts’unubile, ja’ jech, ta situb xchi’uc ta xjulinajtal xchi’uc ti ta xa sjapo ch’iele. Xchi’uc, ja’ jech, ti va’aye me muyuc ta stsatsubtas xch’unolajel avo’ntonic, ti va’aye? Jech, ta stsebtac xch’unolajel avo’ntonic, yu’un jech cha valic, jech jna’oj ti ja’ lequil ts’unubil ti li’e, yu’un, ja’ jech, ta xjulinaj xchi’uc ta sjapo ch’iel.

31 Jech tana, ¿me a na’oj xa lec tana ti ja’ jun lequil ts’unubile? ta xcal ti jeche; yu’un scotol ts’unubil ta xac’ jech chac c’u cha’al sts’unubal.

32 Yu’un jech, ti me jun ts’unubil ta xch’ie, yu’un ja’ lequil ts’unubil, ti me mu xch’ie, yu’un mu ja’uc lec; ja’ jech mu xich’ c’anel.

33 Ja’ jech, ti me la pas xa avil xchi’uc ti me la ts’un xa ti ts’unubile, yu’un ti li’e ta situb, xchi’uc ta xjulinaj xchi’uc ta sjapo ch’iel, jech te cha na’o ta bats’imelel ti ja’ lequil ts’unubil ti ts’unubile.

34 Jech tana, ¿Me lec ta bats’imelel ti c’usi xa na’ique? jech, ti c’usi xa na’ique lec ta bats’imelel ti ta c’usitic va’aye, ti xch’unolajel a vo’ntonique muyuc xa oyuc stu, yu’un ti va’ye a na’ojic xa, xchi’uc xa na’ic xa ti lo’iletic la smuq’uimtas a ch’ulelique, xchi’uc xtoc xa na’ic xa ti yu’un ch’iem xae, yu’un ti abijilique ta xa sjapo sacubel xchi’uc ti c’u x-elan ta xa va’ybeic smelolale ta xa sjapo muq’uibel.

35 Jech ¿me ma’uc lec ti va’aye? ta xcal ti ja’e, yu’un ja’ xojobal; yu’un ti c’usi ja’ xojobale, ja’ lec, yu’un stac’ q’uelbel lec smelolal; ja’ jech xu’ xa na’ o ti yu’un ja’ leque; tana un, ¿me lec scotol c’usi xa na’ic ti jech laj xa ava’ybeic lec ti va’ay xojobale?

36 Jech tana, ta xcal ti mo’oje, yu’un mu stac’ xa comtsan ta jot o ti xch’unolajel a vo’ntonique, yu’un ja’ no’ox la bac’ ta ilel xch’unolajel a vo’ntonic ti jech la ts’unic ts’unubile, ti c’uxi xu’ xa pas avilic me ja’ lec ti ts’unubile.

37 Jech tana, ti c’alal ta sjapo xchi’el ti te’e, ta xa valic: la’ jq’ueltic lec ta c’unc’un ti c’uxi xu’ xac’ lec yisime, xchi’uc ti c’uxi xch’ie xchi’uc ti c’uxi xu’ xi yac’butic lec sate, ja’ jech, ti me lec la q’uelic ta c’unc’une, ta xac’ yisim, xchi’uc ta xch’i, xchi’uc ta xac’ sat.

38 Jech ti me muyuc la tuc’ulanic ti te’e, xchi’uc ti me muyuc la q’uelic leque, ja’ jech, muyuc ta xac’ yisim; xchi’uc ti c’alal chc’ot xq’uixnal c’ac’ale, ta xtaquij, yu’un muyuc yisim, ja’ o jech cha vul xchi’uc cha jip loq’uel.

39 Ti va’aye, muyu’nuc mu ja’uc lec ti ts’unubile, xchi’uc me yu’un mu ja’uc lec ti sate, yu’un ja’ abanamil chopol xchi’uc mu xa c’an xa vac’be lec xyaxal ti te’e, ja’yo ja’ jech mu xu’ xa tabeo sat.

40 Ja’ no’ox jech xtoc, ti me mu xa q’uel lec ti lo’iletique, me cha q’uel ta ba’yuc be xchi’uc sat xch’unolajel o’ntonal ta stuq’uil sate, mu xu’ xa tambe sat ti te’ ta sventa cuxlejale.

41 Ti me cha q’uel lec ti lo’iletique, jech, xchi’uc ti me cha vac’be lec xyaxal ti te’ c’alal nacato tsjapo ch’iele, ta sventa xch’unolajel avo’ntonic xchi’uc ta c’unc’un xchi’uc ta nacastal cha q’uelic ta ba’yuc be ti sate, ta xac’ yisim, xchi’uc ja’ jech, chc’ot ta jpets te’ ti ja’ te chloc’ cuxlejal sventa sbatel osile.

42 Ta sventa ti me cha q’uelic lec ta c’unc’un, ta sventa xch’unolajel a vo’ntonic ta c’unc’un xchi’uc ta nacastal ta sventa lo’iletique, cha q’uelic lec ti c’uxi xac’ yisim ta atojolalique, ja’ jech cha tambe sat ta baq’uin, ti yu’un ja’ cu’pil sba tajmeque, xchi’uc ti yu’un ja’ ech’em xchi’il ta scotol c’usitic chi’ique, xchi’uc ti sac ta scotol c’usitic saque, jech, ti yu’un ja’ lec ta scotol c’usitic lequique, ti c’alal cha lo’ic ti li’ sat te’e ta xa nojic o yu’un, ti c’uxi mu xa xavi’najic xchi’uc mu xa xtaquij avo’ntonique.

43 Ja’ jech, quermanotac vu’un, ta xa ta amotonic ta sventa xch’unolajel a vo’ntonic, xchi’uc ti c’u x-elan cha pasic ta c’unc’un xchi’uc ta nacastal, xchi’uc alequilalic ti jech cha malaic xac’ sat ti te’e.