1 Jech lec tana, ti te ta smantal Mosíahe ta xal scotolic ti boch’o chc’otic ta Juez ta sventa mantaletique, xchi’uc ti boch’otic ta xich’ic t’ujel ta Juez, ta o no’ox xich’ic stojolic jech chac c’u x-elan c’ac’al ta x-abtejic, ta sventa tsq’uelbeic stalelic boch’otic ta xich’ic ic’bel batel ta sventa ta sq’uelbeic stalele.

2 Ja’ jech, ti me jun vinic oy to ox yil yu’un yan, ti me muyuc tstoj ti yile, ta sc’anic parteal ta stojolal Juez; jech ta xchan spasel ti yabtele xchi’uc ta stac’ batel yaj abtel ti c’uxi ac’o yiq’uic batel ta stojolal ti boch’o oy yile, ti stuque ta sq’uelbe stalel ti vinic jech chac c’u cha’al mantal xchi’uc ti c’u x-elan chtabat smule, xchi’uc ja’ jech ta xich’ sujel ac’o stoj ti boch’o oy yile, me mo’oje ta xich’ pojbel c’usi oy yu’un, o me ta xich’ jipel batel ta viniquetic xchi’uc ta xich’ cuyel ta epal c’op xchi’uc ta j-elec’.

3 Ti Juece, jech ta xich’ stojol jech chac c’u cha’al abtej: jun senine c’anal taq’uin ta c’ac’al, me mo’oje jun senum saquil taq’uin, ti ja’ co’ol sba xchi’uc jun senine c’anal taq’uine, ti va’aye ja’ jech chac c’u cha’al mantaletic yich’oj ono’ox aq’uele.

4 Li’e ja’ sbitac ti c’u x-elan ta chop sc’anal taq’uinic xchi’uc saquil taq’uinic xchi’uc jech chac c’u cha’al stojole; xchi’uc ti sbitaquique ja’ te talemic ta Nefitaetic, yu’un ma’uc jech x-elanic jech chac c’a cha’al Judioetic ti te ox oyic ta Jerusalene; me ja’uc sbisvanic jech chac c’u cha’al tspasic Judioetic, yu’un jelel ti c’u x-elan ta x-otolajique xchi’uc ti ta sbisvanique, jech chac c’u cha’al ta sc’anic xchi’uc c’u x-elan tsnopic ti jteclum ta jujucoj ch’iique, ja’ to ti c’alal la spasic ajvalilal Jueces ti Rey Mosiah la jyaq’ue.

5 Ja’ jech lec tana, ti c’u x-elan pasbile, ja’ jech x-elan: jun senine c’anal taq’uin, jun seon c’anal taq’uin, jun shum c’anal taq’uin, xchi’uc jun limna c’anal taq’uin;

6 Jun senum saquil taq’uin, jun amnor saquil taq’uin, jun ezrom saquil taq’uin xchi’uc jun onti saquil taq’uin.

7 Jun senum saquil taq’uine ja’ co’ol sba xchi’uc jun senine c’anal taq’uin, yu’un ti yan xchi’uc yane xtoj o jun sbisol trigo, xchi’uc xtoj xtoj o jun sbisol c’usiuc no’ox ts’unubil.

8 Ja’ jech tana, stojol ti jun seon c’anal taq’uine, ja’ chibvelta xtoj o jun Senine;

9 Ti stojol jun shum c’anal taq’uine ja’ chib xa ox velta stojol jun seon;

10 Xchi’uc ti jun limna c’anal taq’uine, co’ol jech yepalic ta scotol.

11 Xchi’uc ti jun amnor saquil taq’uine co’ol stojol chib senume;

12 Xchi’uc ti jun ezrom saquil taq’uine co’ol stojol xchi’uc chanib semunes;

13 Ti jun ontie co’ol jech yepalic scotolic o ta scotol.

14 Jech tana, ti li’e ja’ jech yepal stojolic ti c’u x-elan biq’uitic ta xal stuquic ta x-otolajique.

15 Jun shiblon ja’ o’lol stojol jun senum; ja’ jech, ti jun shiblone xtoj o o’lol sbisol trigo.

16 Ti jun shiblume ja’ o’lol stojol jun shiblon.

17 Ti jun leahque ja’ o’lol stojol jun shiblum.

18 Ti li’e ja’ ti c’u x-elan yepal ti staq’uintaquic jech chac c’u cha’al ta x-otolajic stuquique.

19 Ti jun antion c’anal taq’uine, co’ol stojol xchi’uc oxib shiblon.

20 Ja’ jech tana, ti c’usi xa no’ox la sbalinique, ja’ ti jech la yich’ic tojel jech chac c’u cha’al yabtelique, ti ja’ ta xalbeic ti viniquetic ac’o spasic c’op xchi’uc c’usi chopoliletic ti c’uxi oyuc ep yabtelic ta sventa ti c’uxi xu’ staic o ep taq’uine, jech chac c’u cha’al xu’ spasic c’op yich’ojic albele; ja’ jech la sujic ti jteclum ta scontrainel Alma xchi’uc Amuleke.

21 Ti sbiinoj Zeezrome la svocolta Amulek, jech la jyalbe: ¿me cha tac’bun ti c’usi ta jac’bote? yu’un ti Zeezrome ja’ jun vinic ti jbijuben ta sventa pucuj ti c’uxi xu’ soques ti c’usi leque, ja’ yo jech la jyalbe ti Amuleke, ¿me cha tac’bun ti c’usi ta jac’bote?

22 Ti Amuleke ja’ jech la jyal: Tana me ja’ co’ol sba xchi’uc S-espíritu Cajvaltic jech chac c’u cha’al oy ta jtojolale; yu’un muyuc c’usi yan xu’ ta xcal me mu ja’uc co’ol sba xchi’uc S-espíritu Cajvaltique, ti Zeezrome ja’ jech la jyal: jech tana, vaquib onties saquil taq’uin cha cac’bot ti me mu xa val ti oy jun jch’ul totique.

23 Ja’o jech la jyal ti Amuleke, ¡vo’ot xnich’onot c’atinvac! ¿c’uyu’un ti cha bac’ jpas mulile? ¿me yu’un mu xa na’ ti boch’otic lequique mu xu’ spasic muliletique?.

24 ¿Me cha c’uy ti muyuc Rioxe? vu’un ta xcalbot; mo’oj, vo’ote a na’oj ti oy jun Rioxe, ti vo’ote ja’ ech’em a c’anoj taq’uin jech chac c’u cha’al Rioxe.

25 Jech tana, epal c’opojemot ta stojolal Riox, yu’un vo’ot la valbun: ta xcac’bot vaquib onties saquil taq’uin ti yu’un ja’ tu j-ep stojole, ac’o me ta avo’nton ti mu xa c’an xa vaq’ue; yu’un ja’ no’ox cha c’an ti ac’o mu xcal ti oy Riox ta bats’imelel xchi’uc ti cuxule, ti c’uxi xu’ xa milune, ja’ jech tana, ta sventa ti c’usi tu j-ech’em chopole cha ta amoton.

26 Ti Zeezrome jech la jyal: ¿avaloj vo’ot ti oy jun Riox ta bats’imelel xchi’uc ti cuxule?.

27 Ti Amuleke jech la jyal: jech oy jun Riox ta bats’imelel xchi’uc ti cuxule.

28 Ti Zeezrome jech la jyal:¿me oy ep jech cha c’u cha’al jun Riox?

29 Ti stuque jech la stac’: Mo’oj (Muyuc)

30 Ti Zeezrome jech la jyalbe yan velta: ¿C’uxi xa na’ ti c’usitic va’aye?

31 Ti stuque jech la jyal: Jun abat yalojbun.

32 Ti Zeezrome jech la jyal yan velta: ¿Boch’o ti ta to xtale? ¿me ja’ xnich’on Riox?

33 Ti stuque jech la stac’be: ja’

34 Ti Zeezrome, jech la jyal yan velta: ¿Me ta scolta steclumal ta smultac? Ti Amuleke la stac’ jech la jyal: Ta xcalbot ti mo’oje, yu’un mu stac’ ti mu xal ta jamal sc’ope.

35 Ti Zeezrome ja’ o jech la jyalbe ti jteclume: Q’uelic xchi’uc vuleso ta ajolic ti c’usitic li’e, yu’un la jyal ti muyuc ep jech chac c’u cha’al jun Rioxe, xchi’uc xtoc la jyal ti ta xtal xnich’on Riox, ti jech muyuc ta scolta steclumale, xco’laj xchi’uc ja’ oy svu’el ta spasel ta mantal ti Rioxe.

36 Ti Amuleke ja’ o jech la jyal yan velta: jech tana, ti vo’ote la epal c’opoj xa; yu’un cha val ti li c’opoj jech chac c’u cha’al ti vu’un oy jvu’el ya’eluc ta spasel ta mantal Riox, ti yu’un jech la jcal ti muyuc ta scolta steclumal ta smultaque.

37 Xchi’uc ta xcalbot yanvelta ti mu stac’ scolta ta sventa smultaquique; yu’un ti vu’une mu stac’ jnac’be ti ya’yeje, yu’un ja’ yaloj stuc ti mu junuc boch’o muyuc lec xu’ x-och ti ta slequilal vinajele, yu’un jech, ¿c’uxi xu’ cha coltaatic ti me mu xu’ xa ochic ti ta slequilal vinajele? ja’ yo jech mu xu’ xa coltaatic ta sventa amultaquic.

38 Ja’ o jech ti Zeezrome la sjac’ yan velta: ¿Me ja’ ti xnich’on Riox ta bats’imelel totil ta sbatel osile?

39 Jech la jyal ti Amuleke: Ja’, ja’ stuc ti totil ta sbatel osil ta vinajel xchi’uc ta banamile, xchi’uc ti ta scotol c’usitic oy ta stojolalique, ti ja’ ta sliquebal xchi’uc ta slajebal, ti ta ba’yuc xchi’uc ta ts’acale.

40 Ta xtal ta banamil ti c’uxi chtal scolta steclumale, xchi’uc ta stsac ta jech no’ox ti c’u x-elan mu la xch’unic mantal ti boch’otic ta xch’unic sbie; ti va’yique ja’ic ti boch’otic oy xcuxlejalic ta sbatel osile, jech muyuc xa bu yan xu’ chtal o ti coltaele.

41 Ja’ jech ti boch’otic chopolique, te ta xcomic jech chac c’u cha’al muyuc bu loq’uesbil smulic yileluc, ja’ xa no’ox ti me tuch’ yu’nic ti xch’ajunal chamele; ja’ o ta xtal ti sc’ac’alil c’alal ta xliquic ti c’u x-elan chamenique xchi’uc ti scotolic ta xc’otic ta sat Riox, ti ja’ jech ta xich’ic q’uelbel stalelic jech chac c’u cha’al yabtelic spasojique.

42 Jech tana, oy jun lajel ti ja’ sbi lajel ta bec’talile; ti c’u x-elan ta xcham Cristoe ja’ ta sjitunbe xch’ajunal ti va’ay lajel ta bec’talile, ti c’uxi ac’o xcha’ liquicuc scotolic ti ta va’ay lajele.

43 Ti ch’ulelil xchi’uc ti bec’talile ta stsob sbaic yan velta jech chac c’u cha’al o no’ox oyique, ti bec’talil xchi’uc baquetique ta xich’ pasel jech chac c’u cha’al o no’ox oy, jech chac c’u cha’al oyutic li’ ta orae, jech ta xquich’tic iq’uel batel ta stojolal Riox, ta xcotquintic scotol ti jmultic jech chac c’u cha’al xcotquintic li’ ta orae.

44 Ja’ jech tana, ti va’ay liquesel ta ach’e ta xtal ta jtojolaltic jcotoltic, jech chac c’u cha’al moletic xchi’uc queremutic, mosoiletic xchi’uc boch’otic colemic viniquetic xchi’uc antsetic, jpas muliletic xchi’uc boch’otic lequic, xchi’uc muyuc ta xch’ay jbejuc stsotsil sjol. Yu’un scotol ta xich’ liquesel jech chac c’u cha’al o no’ox oy bec’talil jech chac c’u cha’al li’ ta orae, ta xich’ic iq’uel xchi’uc ta xich’ic aq’uel te ta bu tsmeltsanvan Cristo ti ja’ nich’onile, xchi’uc Riox ti ja’ totile, xchi’uc Ch’ul Espíritu ti ja’ic junic Riox ta sbatel osil, ti c’uxi ta xich’ic q’uelbel stalelic jech chac c’u cha’al yabtelic me lec me chopole.

45 Jech tana, ta jc’opanot ta sventa c’u x-elan chamel sventa bec’talil li’ ta banamil xchi’uc ta sventa liquesel ta ach’ sventa bec’talil ta banamil, Ta xcalbot ti li’ bec’talil sventa banamile ta xlic jech cha c’u cha’al mu sna’ xcham, ja’ chcal, ti ta chamele, jech, ti ba’yuc chamel ta cuxlejale, ti c’uxi mu xa xu’ xcham yan veltae, yu’un ti xch’ulelique chbat sta sbaic xchi’uc sbec’talic ti c’uxi mu xa xich’ voq’uel yan veltae; yu’un ti la stsob sbaique ja’ ta Espíritu xchi’uc mu xa sna’ xcham o, ti c’uxi mu xa xu’ sq’uel chopolile.

46 Jech tana, ti c’alal la jyal jech lo’iletic ti Amuleke, ti jteclume ch’ayel c’ot yo’ntonic yan velta, ti Zeezrome te sjapo t’elquinajel ec xtoc, ja’ jech laj ti ya’yejtac Amuleke, xchi’uc ja’ jech yepal o ti c’usi la jyich’ ts’ibaele.