1 Jech tana, jnich’on vu’un, oy to c’usi cha calbot ta sventa ti cha’ cuxesel yich’oj alele; yu’un ti li’e, oy boch’otic sjeltaojbeic smelolal ti ts’ibiletique xchi’uc nom yac’oj sbeic ta sventa ti c’usitic va’aye, Ta xquil ti ajole ta xat yo’nton ta sventa ti c’usitic va’ay lo’ile, jech tana un ta xcalbot lec smelolal.

2 Ta xcalbot, jnich’on vu’un, ti c’u x-elan albil ti ta sventa cha’ cuxesele ja’ lec ta sventa slequilal Riox, yu’un ja’ lec ta scotol c’usitic oy ti jech ta xich’ cha’ liquesel jech chac c’u cha’al o no’ox oye, ja’ jech, ja’ jech tsc’an xchi’uc ja’ lec jech chac c’u cha’al stsatsal cha’ cuxi Cristo, ti xch’ulel vinic xu’ ta sut ta sbec’tale, xchi’uc ti bec’talile ac’o xich’ cha’ pasel jech chac c’u cha’al c’usitic ono’ox oy yu’une.

3 Xchi’uc ja’ lec ta sventa Riox ti ta xich’ic q’uelbel stalelic viniquetic jech chac c’u cha’al yabtelique. Ti me lec la spas yabtelic ti c’uxi li’ to cuxulique, xchi’uc ti me lec c’usi la sc’an yo’ntonique ja’ jech ta xich’ic aq’uel batel ta lequilal sbatel osil.

4 Me chopol ti c’usi la spasique ta xich’ic cha’ pasel ta chopol, ja’ jech, scotol ti c’usitic oye ta xich’ cha’ pasel jech chac c’u cha’al o no’ox oyic, ta jujuntal ti c’usitic oyique jech chac c’u cha’al o no’ox pasbilic, ti chamele ta xich’ liquesel ta mu sna’ xcham o ta sbatel osil; ti c’usi sna’ xlaje ta spas ta mu sna’ xlaj, ta xcha’ lic ta sventa xcuxetel o’ntonal muyuc slajeb ti c’uxi xu’ tstabe ti bu smeltsanvan Rioxe. O me ja’ te buoy vocolil muyuc slajeb ti ja’ te tstabeo bu tspas mantal pucuje; yu’un ti c’usi oy ta jote jech yan xa o ta jot.

5 Ti june ta xcha’ cuxi jech chac c’u cha’al tsc’an oy xcuxetel yo’nton, o me ja’ ta c’usi lec, jech chac c’u cha’al tsc’an yo’nton ta sventa lequilale, xchi’uc ti yane ta sventa chopolil jech chac c’u cha’al tsc’an yo’nton ta sventa-chopolil, yu’un jech ti c’uxi la sc’an yo’nton tspas c’usi chopol sbejel c’ac’ale, ja’ me jech ta xich’ stojol ti c’alal me tal ac’ubale.

6 Ja’ jach chc’ot ta pasel ti ta jote, Jech ta sutes yo’ntonic yu’un smulic xchi’uc ta sc’anic lequilal c’alalto ta slajeb sc’ac’alilic, ja’ jech un ta xich’ stojolic ta sventa lequilal.

7 Ti li’ique ja’ic ti boch’otic yich’ic coltael yu’un Cajvaltique, jech, ja’ic ti boch’otic colemic xae, ti boch’otic la jyich’ic loq’uesel ta ic’al ac’ubal muyuc slajebe, ja’ jech oyic ta lequilal o me ta chopolil; jech tana, yu’un ja’ stuc ta st’ujic ti c’usi tsc’an tspasique, me ja’ tspasic c’usi lec o me ja’ tspasic c’usi chopol.

8 Ti c’usi chal Rioxe mu stac’ jeltael, ja’ jech, ac’bilic sbeic scotolic ti boch’otic ta sc’anique, stac’ xano ta stojolal xchi’uc stac’ xcol.

9 Jech tana, jnich’on vu’un, mu xa suj aba ta yutel Riox ta sventa ti c’usitic va’ay mantaletique, jech chac c’u cha’al li’ ta ora a sujoj aba ta spasel muliletique.

10 Mu stac’ xaval, c’uyu’un yich’oj alel ti ta sventa cha’ cuxesel, ti jech cha vich’ cha’ aq’uel ta sventa mulil o me ta sventa xcuxetel o’ntonale. Ja’ jech, ta xcalbot ti c’usi chopole muyuc o no’ox baq’uin oy cuxetel o’ntonal.

11 Ja’ jech, jnich’on vu’un, scotolic viniquetic ti jech oyic jech chac c’u cha’al te oyique, o ja’ lec ta xcal, ti jech oyto sbec’talique, ja’ to te oyic ta vocolil xchi’uc ta xch’ajunal vocoliletic; xchi’uc muyuc Xrioxic ta banamil xchi’uc tspasic ti c’usi mu sc’an Rioxe, ja’ jech, xchi’uc ja’ te oyic ti ta c’usi ma’uc sventa xcuxetel o’ntonale.

12 Ja’ jech, ¿ti smelolal lo’il cha’ cuxesele ja’ ti c’usi ta xich’ tsaquel jech chac c’u cha’al o no’ox oy ti jech ta xich’ aq’uel ta mu sna’ xchame, o me mu xa jechuc ta xich’ aq’uel jech chac c’u cha’al o no’ox oye?

13 Jech jnich’on vu’un, ti va’aye mu jechuc smelolal; yu’un smelolal ti lo’il cha’ cuxesel ta ach’e ja’ ti ta xcha’ sut ta ach’ ti chopol ta chopole, ti bec’talil xchi’uc bec’talile, ti pucuj xchi’uc pucuje; ti lec xchi’uc lequilale ti tuc’ xchi’uc c’usi lec tuq’ue, ti tuc’ o’ntonal xchi’uc tuc’ o’ntonale, ti jech xchi’uc c’usi jeche.

14 Ja’ jech jnich’on vu’un, ac’o lec xa pas aba ta stojolal a chi’iltac, lec xa pas ta lequilal, lec tuc’ xa chapan van, xchi’uc mu x-ech’ a vo’nton ta spasel c’usi lec, ti me la pas scotol ti c’usitic va’aye, cha ta a tojol; jech, ti c’uxubinele ta xa vich’ ac’bel yanvelta ta ach’, xchi’uc ti lequilale ta xa vich’ ac’bel yanvelta; ta xa vich’ q’uelbel lec a talel yan velta, xchi’uc cha vich’ tojel ta ach’ ta sventa lec.

15 Yu’un ti c’usi ta xloc’ ta atojolale, te ta sut yanvelta ta atojolal, te ta xa vich’ ac’bel yanvelta, ja’ jech, ti lo’il liquesel ta ach’e ta xac’ batel ta vocolil scotol ti jmulavil, jech muyuc xa boch’o xu’ ta xich’ pojel.