1 Jnich’on vu’un, oy to cusi ep cha calbot, jech chac c’u cha’al la jcalbe a banquile, yu’un tana, ¿me muyuc aq’ueloj ti c’u x-elan ta spas ti a banquil ti lec tuc’ xchi’uc ti lec ta c’unc’un ta spas ti smantaltac Rioxe? ja’ jech, ¿me muyuc yac’ojbot ta ilel c’usi lec ta pasel?.

2 Yu’un ti vo’ote muyuc bu ep la vich’ ta muc’ ca’yejtac ta sventa steclumal Zoramitaetic jech chac c’u cha’al la spas a banquile. Ti va’aye ja’ chopol chca’ay ta a tojolal; Yu’un vo’ot la pas a tuc’ ta a persa xchi’uc ti c’usi xa na’e.

3 Ti va’aye ma’uc o scotol jnich’on vu’un, Vo’ot la pas ti c’usi q’uexlal sba chca’ay vu’une, yu’un la comtsan ti meltsanubbaile xchi’uc ti la bat ta spat jmulavil ants Isabel te ta sbanamil Siron ta sts’ac xchi’uc Lamanitaetique.

4 Jech ti ja’ ep la slo’laanbe yo’ntonic viniquetique, ti va’aye muc’ chopoluc a va’ay, jnich’on vu’un. Ti jechuque vo’ot la q’uel jechuc ti meltsanubbail ac’bilot ta a tojolale.

5 ¿Me mu xa na’ vo’ot jnich’on vu’un, ti c’usitic va’ay ja’ chopol ta sat Cajvaltique; jech, ti ja’ ech’em chopol ta scotol muliletic jech chac c’u cha’al ta xich’ malbel xch’ich’al boch’o muyuc smul xchi’uc ti me ja’ mu xich’ alel ta jamal Ch’ul Espíritue?

6 Yu’un ti li’e, me mu xa val ta jamal ti Ch’ul Espíritu ti c’alal me te xa oy ta a tojolale, xchi’uc ti me xa na’ a tuc ti yu’un cha muc ta alele, ja’ jech, ja’ jun mulil ti muyuc pertonal yu’une; jech, ti boch’o ta xmilvan ta sventa xojobal xchi’uc ti c’usi sna’oj Rioxe, mu aniluc ta xich’ pasbel perton; jech, jnich’on vu’un, ta xcalbot ti mu c’unuc ta sta pertonale.

7 Jech tana, jnich’on vu’un, ja’ lec ti me mu epuc amul ta sventa muc’tiquil mulile. Mu xcuch cu’un yalel ti amultac ti c’uxi xu’ xat yo’nton a ch’ulele, ti manchuc yu’un ja’ ta sventa a lequilale.

8 Jech tana, ti vo’ote mu stac’ xa nac’ ti amultac ta Rioxe, ti me muyuc cha sutes a vo’ntone, ta xlic jech chac c’u cha’al ta xich’ alel ta jamal ta acontra vo’ot ta slajebal c’ac’al,

9 Jinich’on vu’un, ta jc’an ti ac’o xa sutes avo’nton xchi’uc ti ac’o xa comtsan ti amultaque, xchi’uc ac’o mu xa yic’batel ti c’usi lec chil a sate, ja’ no’ox ac’o xa pajes aba ta scotol ti c’usitic va’aye, ti me la pas ti c’usi va’aye, mu c’uxi xu’ xa tabe ti bu tspas mantal Rioxe, jech na’ome, xchi’uc albo me a vo’nton, xchi’uc mu me xa pas ti c’usitic va’aye!

10 Xchi’uc ta jpasot ta mantal ti ac’o xa jac’be a banquiltac ta sventa ti c’usi mu xa na’e, yu’un ti li’e, queremot to, cha c’anto tsatsubtasel yu’un a banquiltac. Xchi’uc ac’o xa va’ybe ti smantaltaquique.

11 Xchi’uc mu me xa vac’ a ba ta iq’uel batel ta c’usiuc no’ox mu xtun o me ja’uc no’ox c’usi muyuc lequic, mu me xa vac’ ochuc pucuj yan velta ta a vo’nton ta sventa ti jmulavil antsetique. Ja’ jech, jnich’on vu’un, mulil la vich’tal ti ta sventa Zoramitaetique; yu’un ja’ la jyilic ti a talele, ja’yo jech muyuc sc’an la xch’unic ti ca’yejtaque.

12 Ja’yo jech tana, ti S-espíritu Cajvaltique jech ta xalbun: Paso ta mantal a nich’nab ac’o spasic ti c’usi leque, mu me ja’uc soquesbeic yo’ntonic li’ epal yantique, xchi’uc ti me jech soquesatic oe, ja’ jech jnich’on vu’un, ta jpasot ta mantal ta xi’el Riox, xchi’uc ac’o xa pajes aba ti ta a sboliltaque.

13 Ac’o xa sutes aba ta stojolal Cajvaltic ta scotol a jol, avu’el xchi’uc a tsatsal; mu xa vac’ bac’uc yo’ntonic yantic ta spasel c’usi chopol, ja’ no’ox ja’ jech, suteso avo’nton ta stojolalic xchi’uc ac’o xa votquin lec ti c’usitic chopol apasoje xchi’uc ti muliletic a pasoje.

14 Mu xa t’un cuxlejal xchi’uc c’usi mu xtun li’ ta banamil, yu’un ti li’e, mu stac’ xa vich’ batel achi’uc.

15 Ja’ jech tana, jnich’on vu’un, ta jc’an cha calbot ta sventa ti c’u x-elan ta xtal Cristoe, ja’ jech cha calbot ti ja’ stuc ta bats’imelel ta xtal sloq’uesbe ti smultac sbejel banamile; jech, ja’ stuc ta xtal yalbe lec smelolal ta steclumal ti c’u x-elan slequil ti ach’ coltaele,

16 Ti li’e, jnich’on vu’un, ja’ ti meltsanel c’u x-elan laj avich’ ac’bele, ti c’uxi chtal avalbe smelolal ach’ cuxetel o’ntonal ta sventa li’ jteclum, ti c’uxi ac’o smeltsanic lec sjolic; o me ja’ chcaltic ti c’uxi xu’ chtal ta stojolalic ti coltaele, ta sventa ti c’uxi xu’ smeltsanbeic lec sjol xnich’onic ti c’uxi xu’ xa’ybeic ya’yej ti c’alal me sta sc’ac’alil ta xtale.

17 Jech tana un ta jlecubtas jutuc ajol ta sventa ti c’usitic li’e, ja’ jech, cha nop ti c’uyu’un stac’ ta xich’ na’el ba’yuc ti c’usitic va’ay ti jech sc’antoe, ja’ jech cha calbot ¿me mu ja’uc lec alac’ sba ch’ulelal ta sventa Riox ti li’ ta ora, jech chac c’u cha’al chc’ot me sta sc’ac’alil ta xtale?

18 ¿Me mu ja’uc tsots sc’oplal ti ta xich’ aq’uel ta otquinel li’ ta ora ta jteclum ti c’u x-elan coltael albile, xchi’uc jech chac c’u cha’al xnich’nabique?

19 ¿Me mu c’unuc cha’ay Cajvaltic stac talel yabat li’ ta ora ti c’uxi chtal yalbe lec smelolal ti li ach’ xcuxetel o’ntonal, jech chac c’u cha’al ta vu’tic xchi’uc jech chac c’u cha’al ta jnich’nabtic, xchi’uc jech chac c’u cha’al me sta sc’ac’alil chtale.