1 Ja’ o jech ti Almae, la jyil ti ya’yejtac Amulek ti jech muyuc xa la stac’ o ti Zeezrome, jech la jyil Amulek ti c’u x-elan ch-epal c’opoj xchi’uc ti jech ta sc’an xch’ayes oxe, la jyil Zeezrom ti yu’un jech ti smultaque, ja’ yo jech sjapo t-elquinajel, Ti Almae la sjam ye la xcha’ albe lec smelolal ti ya’yejtac Amuleke, xchi’uc la jyalbe lec smelolal ti c’usitic va’aye, xchi’uc ech’emto la jyalbe smelolal ts’ibiletic jech chac c’u cha’al spasoj Amuleke.

2 Ti ya’yejtac Alma la jyalbe Zeezrome, la jya’yic ec ti viniquetic boch’otic te oyic ta xocontaque, yu’un epic ti te tsobolique, ja’ jech x-elan sba la yal chac’ li’e.

3 Lec oy Zeezrom, ti jech vinaj xa ti a vepal c’op xchi’uc ti apucujile, jech ma’uc no’ox epal c’opojemot ta viniquetic, yu’un c’alal ta Riox epal c’opojemot, jech tana, ti stuque xotquin scotol ti c’usi cha nope, xchi’uc la vil xa ti c’usitic cha nope, laj xa quich’cutic albel ta sventa Espíritu.

4 Xchi’uc aviloj xa ti jna’ojcutic c’usi cha c’an cha pase, ti lec a nopoj c’u x-elan xu’ cha pas, jech chac c’u cha’al spucujil li’ pucuj, ti c’uxi xa valbe epal c’op xchi’uc xa lo’la ti li’ jteclum ta sventa ti c’uxi x-ilinic ta jtojolalcutic xchi’uc ti c’uxi xi jyutuncutic xchi’uc ti c’uxi snutsuncutic loq’uele.

5 Ti li’e ja’ snopoj tspas ti a vaj contrae, xchi’uc ja’ yac’oj stsatsal ta a tojolal. Tana un, ta jc’an ti ac’o xa na’ ti c’usi cha calbot vo’ote, ta xcal ta a cotolic,

6 Ja’ jech tana, ta xcal ta acotolic ti ja’ jun yoquil (pets’il) yu’un caj contratique, ti ja’ yac’oj ti c’uxi xyal ta yoquil (pets’il) ti li’ jteclum, ti c’uxi ja’uc xi spasutic ta mantal stuque, ti c’uxi xi xchucutic ta scarenataque xchi’uc ti ja’uc chuculuticuc o ta carena sventa ch’ayebal ta scotol c’ac’ale, jech chac c’u cha’al svu’el xchuquinabe.

7 Ja’ jech, ti c’alal c’opoj jech ta lo’iletic ti Almae, ti Zeezrome ech’emto it’elquinaj tajmec, yu’un tsots ta xa’ybe smelolal ti stsatsal Rioxe, xchi’uc laj xa sna’olec ti Alma xchi’uc ti Amulek lec sna’ojic ta sventae, xchi’uc laj sna’olec ti yu’un ch-ilbat ti c’usi ta snop xchi’uc ti c’usi tsc’an tspas ta yo’ntone; yu’un ac’bilic stsatsalic ti c c’uxi xu’ sna’ic ti c’usitic va’ay jech chac c’u cha’al Espíritu ta xale.

8 Ti Zeezrome sjapo sjac’bel lec smelolal ta sventa ti c’uxi xu’ sna’be lec smelolal ti bu tspas mantal Rioxe, ja’ jech la jyal Alma: ¿C’usi tsc’an xal ti c’usitic yaloj Amulek ta sventa ti chcha’ cuxiic animaetique, xchi’uc ti scotolic chliquic ta animaetique, boch’otic lequic xchi’uc boch’otic muyuc lequic, xchi’uc ti ta xich’ic iq’uel batel ta stojolal Riox ti c’uxi chba yich’ic q’uelbel stalelic jech chac c’u cha’al yabtelique?

9 Ti Almae sjapo yalbel lec smelolal ti c’usitic va’aye, jech la jyal: Ep boch’o stac’ sna’ic ti c’usitic sna’oj Rioxe, jech un, ta xich’ic ac’bel jun tsatsal mantal ti muyuc bu ta spuquic jech chac c’u cha’al yepal sbevoj ya’yej ti ja’ ta xac’ stuc ta xnich’nab viniquetique, jech chac c’u cha’al me chc’uxubinic xchi’uc me tsq’uelic c’uxi chbol yu’nique.

10 Ja’ jech, ti boch’o stsatsubtas yo’ntone ja’ jutuc ta xich’be ya’yej, ti boch’o muyuc stsatsubtas yo’ntone ja’ ep ta xich’be ya’yej; ja’ to ti c’uxi xich’ ac’bel yil ti c’usitic tsc’an Rioxe, xchi’uc ja’ to me la jyotquin o scotole.

11 Ti boch’otic tstsatsubtas yo’ntonique ja’ jutuc ta xich’ic ac’bel ya’yej xchi’uc muyuc ta sna’ic c’usi tsc’an Riox, ja’ ta xich’ic iq’uel batel ta chuquel yu’un pucuj xchi’uc ja’ ta xich’ic ac’bel tspasic jech chac c’u cha’al tsc’an stuc c’alal to ta lajebal, ti va’aye ja’ tsc’an xal ti scarenail c’atinvaque.

12 Ti Amuleke lec stac’ a’ybel smelolal ti c’usi la jyal ta sventa lajel xchi’uc ti ta xich’ liquesel jbec’taltic ti jech sna’ to xcham ti ta spas ta mu xa sna’ xchame, xchi’uc ti ta xquich’tic iq’uel batel ta stojolal Riox ta xba yich’ q’uelel jtaleltic jech chac c’u cha’al cabteltique.

13 Ja’ jech, ti me tsots spasoj sba ti co’ntontique, jech, jech ti tu jtsots co’ntontic ta scontrainel ya’yejtac ti c’uxi mu xu’ x-och ta jtojolaltique ti vu’tique lec tsots chc’ot o ti jvocoltique, yu’un ta xquich’tic aq’uel batel ta ch’ayel.

14 Yu’un ca’yej jtuctic ta xac’utic batel ta ch’ayel, jech, scotol cabteltic ta xac’utic batel ta ch’ayel, muyuc bu muyuc quic’ubaltic, xchi’uc xtoc ta xac’utic batel ta ch’ayel ti c’usi jnopojtique, ti va’ay c’u x-elan vocolile muyuc xa bu ta jc’an ta jq’ueltic Riox, ja’ xa no’ox ta jc’an ta jpastic ta mantal tonetic xchi’uc amaltic ti ac’o yaluctal ta jbatic ti c’uxi ac’o snac’utic ta stojolale.

15 Ti va’aye mu stac’ xc’ot ta pasel; yu’un ta o no’ox xi jbat chbat cac’ jbatic ta stojolal stuc ti te bu oy xojobal xchi’uc slequilale, ta svu’el, ta stsatsal, ta scotol c’usitic ja’ yu’un, xchi’uc xotquin ti jq’uexlaltic ta sbatel osile, yu’un ja’ bats’ilec ti c’u x-elan ta smeltsanvane, yu’un ti stuque bats’ilec scotol ti yabteltaque, xchi’uc c’ux ta yo’nton ti xnich’nab viniquetique, xchi’uc oy stsatsal scotol ta scoltael scotol viniquetic ti boch’o chch’unic sbi xchi’uc ti me lec chac’ ta ilel yabtelic ta sventa sutesub o’ntonale.

16 Jech tana, ta xcal ti ta xtal jun lajele, jech, ti ja’ xchibal velta lajel ti ja’ lajel ta sventa ch’ulelale. ja’ o ti boch’o laj xchi’uc smule, ti lajel ta sventa bec’talile, jech ta xcham ta sventa ch’ulelal xtoc; jech, ja’ ta chcham o ta sventa ti c’u x-elan ta xal sventa lequilale.

17 Ja’ to te o ti c’alal ta xich’ic bocoliletic ta snabil c’oc’ xchi’uc yac’alile, ti tsanal o ta sbatel osil ti stilemal xchi’uc ja’ to te o ti ta xchuquiic ta sbatel osil vocolil jech chac c’u cha’al stsatsal xchi’uc xchuquinab pucuje, ti yu’un ja’ xa ta spas o mantal jech chac c’u cha’al tsc’ane.

18 Ja’ jech ta xcal, ti ja’ jech chc’otic jech chac c’u cha’al muyuc yich’ojic coltael yileluque, yu’un muyuc ta xich’ic coltael jech chac c’u cha’al lequilal yu’un Riox, xchi’uc mu xu’ xchamic, yu’un muyuc ta xich’ aq’uel ti oyuc lajebale.

19 Ja’ o jech ti c’alal laj yo’nton ta yalel ti va’ay lo’iletic Almae, ti viniquetique ech’emto ixi’ic.

20 Jech ja’o te oy jun Antiona sbi, ti ja’ banquilal ajvalil yu’nique, te va’i ta ba’yuc be xchi’uc jech la jyal: ¿C’usi ti va’ay la bal ti vinic ta xcha’ cux ta animaetic xchi’uc ti ta xich’ jelel jech chac c’u cha’al oy li’ ta ora ti sna’ to xcham ti jech ta spas ta mu xa sna’ xchame, xchi’uc ti ch’ulelal jech mu sna’ xcham ta sbatel osile?

21 ¿C’usi tsc’an xal ti ts’ibiletic ti ta xal Riox la jyac’ abatetic xchi’uc jun machita tsanal ti te ta stuq’uil sloq’uem c’ac’al ta nichimaltic Edene. Manchuc ti ba’yuc jtotic jme’tic ochic xchi’uc la slo’ic ti sat te’ sventa cuxlejale me cuxulic o ta sbatel osil ti jechuque?

22 Ja’ jech la jyal Alma; ti va’aye ja’ ti ta xa ox chcalbe smelolale, ta xquiltic ti Adán yal ta mulil ti jech la slo’ ti sat te’ bu mu xu’ slo’ jech chac c’u cha’al ya’yejtac Rioxe; yu’un ja’ jech xu’ ta xquiltic ti yu’un ja’ ta sventa yaltal mulil, ti jech scotol quirisianoetic c’otic ta ch’ayemal xchi’uc ta bajemal jteclume.

23 Ja’ jech, ta xcalbot ti yu’nuc muyucuc o no’ox slo’ Adán ti va’ay sat te’ sventa cuxlejale, muyuc jech chi jcham, xchi’uc ti a’yejetique jeche’ no’ox o ti jechuque, xchi’uc yu’un j-epal c’op jechuc ti Rioxe, yu’un ti stuque jech o no’ox yaloj: Ti me la lo’e, ta bats’imelel cha cham.

24 Jech chquiltic ti lajel te ta xtal ta sbaic ta jujucoj quirisianoetique; jech, ti lajel la jyal Amuleke, ja’ ti lajel li’ ta sba banamile, ja’ jech la jyich’ ac’bel c’uyepal c’ac’al ti vinic c’uxi xu’ sutes yo’ntone, ja’ yo jech ti li’ cuxlejale ja’ jech c’ot ti ta xich’ q’uelbel stalele, ja’ c’uyepal c’ac’al tal smeltsan sba ti c’uxi xu’ ta xc’ot ta stojolal Rioxe, ja’ c’uyepal c’ac’al tal smeltsan sba ta sventa ti va’ay cuxlejal muyuc slajeb calojcutique, ti ta xtal ta ts’acal c’alal me cha’ cuxi animaetique.

25 Ja’ jech, ti manchuc o no’ox jech la snop coltael ti Riox ti jech yich’oj ono’ox pasel ta sliquebal banamile, ti jechuque muyuc stac’ oyuc cha’ cuxesel yu’un animaetic ti jechuque, ja’ jech la jyac’ jun coltael ti ta xc’ot ta pasel ta sventa cha’ cuxesel sventa animaetic ti c’ux x-elan yich’oj ono’ox alele.

26 Ja’ jech, ti manchuc o no’ox la slo’ic ba’yuc jtotic jme’tic ti te’ sventa cuxlejale, ti jechuque t’u’tutic ta sbatel osil ti jechuque, xchi’uc muyuc c’uxi xu’ ta jmeltsan o jbatic, ja’ yo jech ti c’u x-elan coltaele, jeche’ ech’, xchi’uc ti sc’op Rioxe muyuc stu c’ot xchi’uc muyuc c’usi chtun o ti jechuque.

27 Ja’ yo jech, mujechuc c’ot ta pasel; ba’yuc la jyich’ pasel ti jech ta xcham vinique; ta tsacal ti c’alal jech chamenoxuc xae stac’ xa c’otic ti c’uxi xu’ xa vich’ic q’uelbel atalelique, jech ja’ ti meltsanel c’u x-elan calojcutic ti ja’ xa slajebe.

28 Ta ts’acal ti c’alal Riox la jyal ti c’usitic va’ay ac’o taluc ta sbaic viniquetique, ja’ o jech, la jyil ti yu’un tsots sc’oplal ti ac’o sna’ic ta sventa ti c’usitic stuc yac’oj ta ilele.

29 Ja’ o jech, la stactal abatetic ti c’uxi ac’o lo’ilajicuc xchi’uquique, ja’ jech c’ot ta pasel, ti viniquetique la jyilic ti xojobal xchi’uc slequilal Rioxe.

30 Jech un, ti viniquetique sjapoic sc’opanel ta sbi, ja’ o jech, ti Rioxe lo’ilaj ta stojolalic xchi’uc la jyich’ic ac’bel sna’ic ti coltael yich’ meltsanel o no’ox c’alal meltsaj banamile, ti va’aye ja’ stuc la jyich’ic o albel jech cha c’u cha’al xch’unolajel yo’ntonic c’u x-elan sutesoj yo’ntonic xchi’uc xch’ul abtelic.

31 Ja’ jech, la jyac’ mantaletic ta viniquetic, ja’ jech ti c’u x-elan la xpaych’unic ti va’ay ba’yuc mantaletic ti ja’ ta sventa sba banamile, jech c’otic jech chac c’u cha’al Riox, ti xotquinic c’usi lec xchi’uc c’usi chopole, ac’bilic, o me la jyich’ic aq’uel ta sventa ac’o spasic jech chac c’u cha’al tsc’an stuquic xchi’uc ti c’usi lec cha’yique, me ja’ ta spasic ta sventa c’usi chopol, me ja’ ta spasic c’usi lec,

32 Ja’ o jech, ta ts’acal ti c’alal laj xa ox yich’ic ac’bel sna’ic ti c’u x-elan coltaele, Riox la jyac’ mantal ti ac’ouc mu spasic bolililetique, yu’un ti vocolil ta xich’ique ja’ ti lajel xch’ibal veltae, ti ja’ jun lajel ta sbatel osil jech chac c’u cha’al ta sventa bu lec tuq’ue; yu’un ti li’ c’u x-elan coltaele mu xu’ oyuc stsatsal, ja’ jech chac c’u cha’al smuc’ul slequil yo’nton Rioxe, yu’un ti abtelal ta sventa lequilale mu stac’ xich’ soquesel.

33 Ti Rioxe la jyic’ viniquetic ta sbi xnich’on (ti va’aye ja’ ti coltael la jyich’ aq’uele,) jech la jyal: Ti me cha sutes avo’ntonic xchi’uc ti me muyuc cha tsatsubtas avo’ntonique, ja’ jech oy xc’uxul co’nton ta atojolalic ta sventa sbi sba jnich’on.

34 Ja’ jech, ti boch’o ta sutes yo’nton xchi’uc ti me muyuc ta stsatsubtas yo’ntone, xu’ c’usi sc’an ta sventa xc’uxul co’nton ta sventa sba jnich’on; ti c’uxi xch’aybat smulique, ti va’yique xu’ ta x-ochic te bu ta jcux co’nton.

35 Ti boch’o ta stsatsubtas yo’nton ti me ja’ tspas muliletique, ja’ jech, ta xcal ta jamal ti mu xu’ ch-ochic te bu ta jcux co’ntone.

36 Ja’ jech tana quermanotac vu’un, ti li’e ta xcal ti me cha tsatsubtas avo’ntonique, muyuc cha ochic ti bu ta xcux yo’nton Cajvaltique, yu’un ti a bolilique chopol ta xa’ay ti c’alal ja’ stuc ta xac’ sc’ac’al yo’nton ta atojolalic jech chac c’u cha’al ta ba’yuc chopol la jya’aye, jech, jech chac c’u cha’al ta ya’yej ta slajeb chopol la jya’ay xchi’uc jech chac c’u cha’al ta ba’yuc, ta sventa sbatel osil milel ta a ch’ulelique; ja’ jech, jech chac c’u cha’al ya’yej ta slajeb milel, jech chac c’u cha’al ta ba’yuque.

37 Ja’ jech cha’e, quermanotac vu’un, jna’ojtic xa ti c’usitic va’aye, xchi’uc ti yu’un ja’ ta bats’imelele, ac’o jsutestic li’ co’ntontique xchi’uc mu jtsatsubtastic ti co’ntontic ti c’uxi mu chopoluc xa’ay ti Cajvaltic ti ja’ Jrioxtic c’uxi mu xac’tal sc’ac’al yo’nton ta jtojolaltic ta sventa va’aye, ti xchibal smantaltac yac’ojbutique; ja’ lec ochcutic ti ta xcuxubil o’n tonal li’ yac’oj Rioxe, ti jech meltsanbil jech chac c’u cha’al ya’yeje.