1 Ja’ o jech c’ot ta pasel ti c’alal laj yo’nton ta lo’il ti rey Benjamin ta sventa ti c’u x elan la jyich’ albel yu’un yaj abat Cajvaltique, la sq’uel xocontac ti te bu tsobol viniquetique, ja’ o jech yalemic xa ox ta lumtic, yu’un talem xa ox xi’elal Cajvaltic ta stojolalic.

2 Jech yilojic xa ox sbec’talic stuquic, ma’uc mati spucucal banamile. Scotolic jech la jyalic ta jmoj: Ac’buncutic avutsilal, xchi’uc ac’buncutic ti xch’ich’al Cristo bu ta tstoj jmulcutic ti c’uxi chquich’cutic pasbel pertonal jmulcutique, xchi’uc ti c’uxi xich’ sacubtasel ti co’ntoncutique; yu’un jch’unojcutic ti Jesucristoe, ti xnich’on Riox ti la spas vinajel xchi’uc banamil xchi’uc ti scotol c’usitic oye, ti boch’o ta xyaltal ta sventa xnich’nab viniquetique.

3 Ja’ o jech ta ts’acal ti c’alal laj yo’ntonic ta yalel ti c’usitic va’ay lo’iletique, ti S espíritu Cajvaltique yaltal ta stojolalic, ja’ jech nojic ta xcuxetel yo’ntonic ti c’alal la jyich’ic loq’uesbel smulique, ja’ xa no’ox lec ta snopic ta sventa ti smuc’ul xch’unolajel yo’ntonic ta sventa Jesucristo ta xtale, jech chac c’u cha’al ya’yej ti rey Benjamin la jyich’ic albele.

4 Ti rey Benjamine la sjam yan velta ti yee, jech la jyich’ic chi’nel ta lo’il xtoc; jech la jyal: Camicotac xchi’uc quermanotac, cu’tscalal xchi’uc jteclumal vu’un, ta jc’an cha jc’opanoxuc yan velta xtoc, ti c’uxi xu’ xa va’yic xchi’uc xa va’ybeic lec smelolal ti c’uyepal cha jchi’noxuc ta lo’ile.

5 Yu’un ti li’e, ti c’usi sna’oj xchi’uc ti slequil yo’nton ti Rioxe, ti li’ ta orae julo xa ta atojolalic ti slo’il a vo’ntonic ta sventa ti mu xa tunic xchi’uc ti muyuc lecoxuque, xchi’uc ti ch’ayemoxuque.

6 Ta xcal ti me c’otem ta atojolalic ti c’usi sna’oj xchi’uc slequil yo’nton ti Riox, ti yu’un tu j-ech’em stsatsale, xchi’uc ti c’usi sna’e, ti mu x ilin ta orae xchi’uc ti mu xac’ castico ta ora ta xnich’nab viniquetique; xchi’uc ti c’u x elan ta xich’ tojel mulil ti yich’ o no’ox meltsanel c’alal yich’ pasel banamile, ti c’uxi chc’ot ta stojolalic ti coltael boch’otic ja’ te chac’ sbaic ta stojolal Cajvaltic xchi’uc ti me chch’unic ti smantaltaque, xchi’uc ti me ja’ te tsq’uel sbaic lec ta xch’unolajel yo’ntonic ja’ to c’alal me chame, ja’ chcal ti c’alal me cham ti sbec’tale.

7 Ta xcal ti va’ay vinique ja’ ta xich’ coltael ta sventa ti c’u x elan ta xich’ tojel mulil ti jech la jyich’ meltsanel o no’ox c’alal meltsaj banamil ta sventa quirisianoetic ti c’uyepalic ch’iemic o no’ox ti c’alal yal ta mulil Adane, xchi’uc ti c’uyepalic ch’iemictoe, xchi’uc ti c’uyepalic te to chch’iic ta slajebal banamile.

8 Ja’ jech x elan ti c’u x elan xu’ ta xtal ti coltaele, muyuc xa yan coltael ta xtal jech cha c’u cha’al la jyich’ alel; xchi’uc muyuc xa yan c’uxi xu’ ta xcol o ti vinique, ja’ no’ox o ti c’u x elan la jcale.

9 Ch’unic ti Rioxe, ch’unic ti oy ti stuque, ti la spas scotol ti c’usitic oye, jech chac c’u cha’al ta vinajel xchi’uc ta banamil; ch’unic ti mu xa’ybe smelolal scotol vinic jech chac c’u cha’al Cajvaltic xa’ybe smelolale.

10 Xchi’uc ch’unic ti xu’ cha sutes avo’ntonic yu’un amulique, xchi’uc xa comtsanic xchi’uc xa bic’tajes a vaic ta stojolal Riox, xchi’uc xa c’anbeic ta scotol a vo’ntonic ti ac’o spasboxuc pertone; ja’ jech, ti me ach’unojic scotol ti c’usitic va’aye, cha vilic ti cha spasboxuque.

11 Yan velta cha calboxuc, jech chac c’u cha’al la jcal ta ba’yuque, jech chac c’u cha’al ti a na’oj xa ti c’u x elan xojobal xchi’uc slequilal ti Rioxe, ja’ jech la na’be xa o ti slequil yo’ntone, xchi’uc a va’yojbe xa ti c’u x elan chc’anbane, xchi’uc a vich’ojic xa ch’aybel ti amulic, ti jech ta xac’be xcuxetel yo’nton a ch’ulelique, ja’ jech ta jc’an ti ac’o xa na’ic xchi’uc ti ja’uc jechuc xa na’ic ta a jolic ti smuc’ul Rioxe, xchi’uc ti apalta a tuq’uique, xchi’uc slequil yo’ntone, xchi’uc ti smuc’ul slequilal ta atojolalic ti vo’xuc muyuc lecoxuque, bic’tajeso a baic ta bats’imelel bic’tajesubbail, xchi’uc xa taic ta na’el sbi Riox ta jujun c’ac’al, xchi’uc ti lecuc tuc’ xa pas abaic ta sventa xch’unolajel a vo’ntonic ta sventa ti c’usi jutuc xa sc’an ta xtal, ti jech la jyich’, alel ta ye abate.

12 Jech tana, ta xcal ti me laj a pasic ti c’usitic va’aye, ta xa ta xcuxetel a vo’ntonic, xchi’uc cha nojic ta slequil yo’nton Riox xchi’uc ta xa vich’ic o ch’aybel amulic; xchi’uc cha muq’uibic ta sventa c’usi na’bil o no’ox ta xojobal xchi’uc ta slequilal ti boch’o la spasoxuque, o me ta c’usi na’bil ti ja’ lec xchi’uc ti ja’ ta bats’imelele.

13 Muyuc xa bu cha c’an cha vuts’inta abaic ta jujuntal, yu’un lec xa no’ox cha ch’iic o, xchi’uc cha vac’be a baic ta jujuntal ti c’usi oy avu’nique.

14 Xchi’uc mu me xa bac’ xvi’naj a nich’nabic, xchi’uc me xt’aniic, xchi’uc mu me xa vaq’uic me mu xch’unic smantaltac Riox, xchi’uc me spasic c’op, me smaj sbaic ta jujuntal, xchi’uc ti ja’uc spasic c’usi tsc’an pucuj, ti ja’ jchanubtasvanej ta sventa mulile, ti chopol pucuj bu yalojic o no’ox jtotique, ti yu’un ja’ yaj contra sbaic xchi’uc lequilale.

15 Yu’un ja’ cha chanubtasic ti ja’uc xanoicuc ta be ti bu ja’ ta bats’imelel leque; xchi’uc cha chanubtasic ti ac’o sc’anan sbaique xchi’uc ti ac’o scoltaanan sbaic ta jujuntale.

16 Xchi’uc vo’xuc cha coltaic ti boch’o tsc’an coltael avu’nique, xchi’uc chavac’ananbic c’usi oy avu’nic ti boch’otic chtun yu’nique, xchi’uc mu me jecheuc no’ox sc’anbot li’ jc’an limoxnae, ti jech ac’o xich’ loq’uesel ti c’uxi ac’o bat lajuque.

17 Ta van xavalic: Ti vinique stuc la jyich’tal ti jech abulsbae, ja’ lec muyuc ta xcac’ jc’ob xchi’uc ta xcac’be jve’el, me ja’uc chcac’be c’usi oy cu’un ti c’uxi mu xchame, yu’un ti svocole lec q’uelbil smelolal.

18 Jech ¡vinic! vu’un ta xcalbot, ti boch’o jech ta spase, tsc’an ti ac’o sutes yo’ntone, ti me mu sutes yo’nton ta sventa c’usi spasoje, ta xcham ta sbatel osil, xchi’uc muyuc yavil ta stojolal Riox.

19 Yu’un ti li’e ¿me mu jcotolticuc ti jc’an limoxnautique? ¿me mu junuc Jrioxtic jcotoltic? jech, Riox yac’ojbutic scotol ti c’usitic oy cu’untique, jbec’taltic xchi’uc jc’u’tic, xchi’uc jc’anal taq’uintic, xchi’uc jsaquil taq’uintic xchi’uc scotol ta chop jc’ulejaltic oy cu’untique?

20 Ja’ jech, tana un cha c’opanic ta sbi, cha c’anbeic ti ac’o spasboxuc pertonal amulique, ¿me oy yac’oj jeche’ c’opojemuxuc ti stuque? mo’oj, ti stuque ja’ yac’oj S espíritu ta atojolalic, xchi’uc ja’ yac’oj ti ac’o xnoj ta xcuxetel yo’nton ti avo’ntonique, xchi’uc ja’ la spas ti ch’an chiuc abeic ti c’uxi mu xu’ epuc xa c’opojique, ja’ jech tu j ep bat ti xcuxetel avo’ntonique.

21 Ja’ jech lec tana, ti Rioxe, ti ja’ la spasoxuc xchi’uc ti boch’o yich’oj ta venta a ch’ulelic xchi’uc scotol c’usitic oy avu’nic xchi’uc ti c’uxaelanique, ja’ ta xac’ ep c’usitic lec ti me cha c’an ta xch’unolajel a vo’ntonique, ti me cha ch’un ti cha vich’e ¡jech c’u x elan xu’ cha vac’be abaic ta jujuntal ti c’usi oy avu’nique!

22 Ti me cha q’uelbe stalel ti vinic c’alal me cha sc’anbe c’usi oy a vu’un ti c’uxi mu xchame, xchi’uc ti me la vac’ batel ta ch’ayele, ja’ to lec stac’ q’uelel amulic ta sventa ti jech muyuc la vaq’uic ti c’usi oy avu’nique, yu’un mu avu’nicuc, yu’un ja’ yu’un Riox, ti bu ja’ yich’oj ta venta acuxlejalique, xchi’uc ta scotol, ti me muyuc c’usi cha c’ane, xchi’uc ti me muyuc cha sutes a vo’nton ta sventa ti c’usitic la pase.

23 Ta xcal: ¡Abul sba ti va’ay vinique, yu’un ti c’usitic oy yu’une ta xcham xchi’uc! ta xcal ti c’usitic va’aye ja’ ta sventa ti boch’otic jc’ulejetic, ta sventa c’usitic oy ta banamile.

24 Xchi’uc ta xcal xtoc ta sventa ti boch’otic abul sbaique, vo’xuc ti muyuc c’usi oy avu’nique, ac’o me oy ep avu’nic ti c’uxi xjelo li’ c’ac’al xchi’uc ti yan c’ac’ale, ja’ ta xcalboxuc vo’xuc ti boch’otic mu xa c’anic jc’an limoxna ti yu’un jech muyuc c’usi oy avu’nique; ta jc’an ti ac’o jech xa valic ta avo’ntonique; Muyuc xcac’ yu’un muyuc cu’un, ti oyuc cu’une ta xcac’.

25 Ja’ jech lec tana, ti jech cha valic ta avo’ntonique; muyuc amulic chacomic, ti me mu jechuque, cha vich’ic aq’uel batel ta vocolil, yu’un ti avocolique lec q’uelbil smenlolal, yu’un cha pich’o’nta ti c’usi muyuc a vich’ojique.

26 Ja’ jech lec tana, ja’ ta sventa slequilal c’usitic c’opojemun ti jech muyuc amul ta jujun c’ac’ al ti c’uxi muyuc amul cha xanoic ta sat Rioxe, ta jc’an ti ac’o xa vac’beic c’usitic oy avu’nic ti boch’otic abul sbaique, ja’ jech chac c’u cha’al c’usi oy avu’nique, ja’ jech xa vac’beic sve’el boch’o chvi’naj, xa vac’beic sc’u’ boch’o t’anal, xa q’uelic jchameletic, xchi’uc xa q’uelic c’uxi xu’ ta xcol, jech chac c’u cha’al ta xch’ulel xchi’uc li’ ta sba banamil, ti c’u x elan ta xtun yu’une.

27 Xchi’uc xa q’uelic ti ac’o c’otuc ta pasel scotol ti c’usitic va’aye, lecuc spas sbaic xchi’uc lec q’uelbiluc smelolal tspasic, yu’un mu stac’ sujel jun vinic ac’o anilajuc ep jech chac c’u cha’al bu c’alal stabe yipale, xchi’uc xtoc, ja’ lec ti jch’unej mantaluque, ti c’uxi xu’ sta ti xcuxlejale, ja’ jech scotol ti c’ustic va’aye tsc’an ta xich’ q’uelbel lec smelolal c’uxi ta xich’ pasel.

28 Xchi’uc ta jc’an xtoc ti ac’o xa na’ic ti boch’otic oy c’usi ta xch’amanbe spat xocon ta nacleje, tsc’an ti ac’o sutes ti c’usi la xch’amane, jech chac c’u cha’al la jyal, ti me mu jechuc cha pasique, cha sa’ amulic xchi’uc ta van xa vac’be sa’ smul ti a pat a xocon ta nacleje.

29 Ti ta slajeb xae, mu stac’ xcal scotol ti c’usitic xu’ cha sa’ic o amulique; yu’un oy ep ta chop ti c’uxi xu’ cha sa’ic o amulic ti yu’un jech mu xu’ xa calboxuque.

30 Ti li’e xu’ ta xcal, ti me mu xaq’uel a vaic a tuq’uic, ta sventa c’usi cha nopic, xchi’uc ta ava’yejic, xchi’uc ta c’usi cha pasic, xchi’uc ti memuyuc cha q’uelic ti smantaltac Riox ti me muyuc cha vac’ a vaic ta xch’unolajel a vo’ntonic ta sventa ti c’usi ava’yojic ti jech ta xtal ti Cajvaltique, ac’o me ta slajeb xa acuxlejalic ti jech cha pasique, stac’ cha chamic, jech tana ¡vo’ot vinic! tao me ta na’el mu me xa cham.