1 Ngan yana, ine nahitabo nga an hadi Benjamin in mahuman pagyakan han mga tugon nga iginhatag ha iya han anghel han Ginoo, iginsiplat niya an iya mga mata ha palibot han kadam-an, ngan nahipausa hira in nangatumba ha tuna, kay an kahadlok han Ginoo in umabot ha ira.

2 Ngan nakita nira an ira kalugaringon ha kalibutanon nga kahimtang, labaw kahabubo kontra ha tapo-tapo ha tuna. Ngan hira in ngatanan nagka-urosa panginyupo hin kusog, nga nagsisiring: O tagi hin kaluoy, ngan gamita an nagbayad han sala nga dugo ni Cristo agud kami in makakarawat hin pagpasaylo han amon mga sala, ngan an amon mga kaburut-on in magin malimpiyo; kay kami in natuod kan Jesucristo, an Anak han Diyos, nga amo an naghimo han langit ngan tuna, ngan han ngatanan nga mga butang; ngan hiya in malusad ha butnga han mga anak han katawhan.

3 Ngan ine nahitabo nga kahuman nira masiring ine nga mga tugon an Espiritu han Ginoo in umabot ha ira, ngan hira in napuno hin kalipay, han pakakarawat han pagpasaylo han ira mga sala, ngan han pagkamayada hin kalinaw han konsensiya, tungod han sobra nga pagtuo kan Jesucristo nga angay umabot, subay han mga pulong nga ginyakan ni hadi Benjamin ha ira.

4 Ngan gin-abrehan ngahaw ni hadi Benjamin an iya baba ngan nagtikang pagyakan ha ira, nga nagsisiring: Akon mga kasangkayan ngan akon mga kabugtoan, akon mga urupod ngan akon mga tawohan, tatawagon ko pag-otro an iyo mga pamatian, agud iyo mahibatian ngan mahisabotan an mga nahisasalin han akon mga tugon nga akon isisiring ha iyo.

5 Kay kamatuoran, kun an pagkahibaro han kaupayan han Diyos yana nga oras an nakapukaw ha iyo ha usa nga pag-abat han iyo kawaray, ngan han iyo kawaray kapulsanan ngan makasasala nga kahimtang —

6 Nasiring ako ha iyo, kun kamo in umabot ha paghibaro hin kaupayan han Diyos, ngan an iya dire matutupngan nga gahum, ngan an iya kinaadman, ngan an iya pag-antos, ngan han iya halaba nga pagpakasakit para ha anak han katawhan; ngan sugad man, an pagbayad han sala nga igin-andam ugsa pa man mahimo an kalibutan, nga agud an katalwasan in umabot ha iya nga naangay nga maghatag hin pagtapod han Ginoo, nga angay nga magin madoroto ha pagsunod han iya mga kasugoanan, ngan magpadayon ha pagtuo bisan tubtub ha katapusan han iya kinabuhi, an karuyag ko sidngon an kinabuhi han mortal nga lawas —

7 Nasiring ako, ine an tawo nga makakarawat han katalwasan, pinaagi han pagbayad han sala nga igin-andam ugsa pa man mahimo an kalibutan para han katawhan, kun diin hira nga ha tinikangan pa han pakasala ni Adan, o hin-o man yana, o hin-o man ha maabot, bisan tubtub ha katapusan han kalibutan.

8 Ngan ine an mga paagi kun tipaunan-o nga an katalwasan in maabot. Ngan waray iba nga katalwasan labot la hine nga iya nahipamulong; say pa hin iba nga mga kondisyon kun tipaunan-o an katawhan in matatalwas labot la han mga kondisyon nga akon iginyakan ha iyo.

9 Tuod ha Diyos; tuod nga hiya gud, nga hiya an naghimo han ngatanan nga mga butang, pareho ha langit ngan ha tuna; tuod nga aada ha iya an ngatanan nga kinaadman, ngan ngatanan nga gahum, sugad man ha langit ngan ha tuna; tuod nga it katawhan dire nakakasabot han ngatanan nga mga nahuna-huna nga nahisasabotan han Ginoo.

10 Ngan liwat, tuod nga kamo in angay magbasul han iyo mga sala ngan talikdan ine, nga kamo in magpaubos ha atubangan han Diyos; ngan mangaro hin katangkod ha kaburut-on nga kamo in iya pasayloon; ngan yana, kun kamo in tomuod hine ngatanan nga mga nahunahuna, piho-a nga ine in iyo buhaton.

11 Ngan liwat nasiring ako ha iyo sugad han iginyakan ko hadto, nga kun kamo in umabot ha pagkahibaro han kahimayaan han Diyos, o kun nahibaroan niyo an iya kaupayan ngan natilawan an iya paghigugma, ngan nakakarawat han pagpasaylo han iyo mga sala, nga amo an hinungdan han duro kadako nga kalipayan ha iyo mga kalag, sugad man karuyag ko nga iyo hinumduman, nga permi magpabilin ha iyo panhuna-huna, an kadarayawon han Diyos, ngan han iyo kalugaringon nga kawarayan, ngan an iya kaupayan ngan hilaba nga pag-antos ha iyo, mga dire angay nga ginhimo, ngan kamo in magpaubos tubtub ha kahiladman han pagpaubos, nagtatawag ha ngaran han Ginoo kada adlaw, ngan madig-on nga natindog ha pagtuo ha iya nga maabot, nga iginyakan pinaagi han baba han anghel.

12 Ngan kamatuoran, nasiring ako ha iyo nga kun ine in iyo bubuhaton kamo in permi malilipay, ngan mapupuno hin paghigugma han Diyos, ngan permi mapapabilin an kapasayloan han iyo mga sala; ngan kamo in matubo ha kinaadman han kahimayaan niya nga naghimo ha iyo, o ha kinaadman kun ano in makatadungan ngan tinuod.

13 Ngan dire kamo magkamayada hin usa nga panhuna-huna nga pasakitan an kada tagsa, kundi an mabuhi hin kamurayaw, ngan ihatag ngadto ha kada tawo kun ano it naangay para ha iya.

14 Ngan dire niyo tugutan an iyo mga anak nga hira in magutom, o magin lubas; say pa niyo tugutan nga hira in tumalapas han mga balaod han Diyos, ngan makig-ato ngan makig-away ha tagsa-tagsa o ha iba, ngan mag-alagad han yawa, nga amo an agaron han mga sala, o hiya nga maraot nga espiritu nga iginyakan han aton kaapoy-apoyan, nga hiya usa nga kaaway han ngatanan nga kaupayan.

15 Kundi tutdoan niyo hira nga lumakat ha mga dalan han kamatuoran ngan tuhay nga kaburut-on; tutdoan niyo hira nga higugmaon an tagsa-tagsa, ngan magserbi ha tagsa-tagsa.

16 Ngan sugad man, kamo ngahaw ha iyo kalugaringon in mabulig ha ira nga nanginginahanglan han iyo bulig; ipanbahin an iyo katigayonan ha ira nga nagkikinahanglan; ngan dire niyo tugotan nga an hangyo han makililimos in mawaray pulos, ngan talikdan hiya agud mamatay.

17 Bangin kamo makasiring: An tawo nagdara han iya kalugaringon nga kakurian; sanglit pupugngan ko adton akon kamot, ngan dire ko ihahatag ha iya an akon pagkaon, o ibabahin ha iya an akon katigayonan nga dire hiya magkuri, kay an iya mga sirot in kaangayan —

18 Kundi nasiring ako ha iyo, O katawhan, hin-o man nga magbuhat hito hiya liwat in may dako nga hinungdan agud magbasul; ngan labot la nga hiya in magbasul hadton iya ginbuhat hiya in mamamatay ha kadayonan, ngan waray katungod ha ginhadian han Diyos.

19 Kay tinuod, dire ba kita ngatanan makililimos? Dire ba kita naglalaum ha pareho nga Binuhat, bisan an Diyos, ha ngatanan nga katigayonan nga aada ha aton, magin ha pagkaon ngan panapton, ngan ha bulawan, ngan ha salapi, ngan ha ngatanan nga karikohan nga aada ha aton?

20 Ngan kamatuoran, bisan yana, kamo in nagtatawag han iya ngaran, ngan nakikimaluoy para han kapasayloan han iyo mga sala. Ngan gintutugotan ba niya nga an iyo pakimaluoy in mawaray gamit? Dire; kay an iya Espiritu in iginbuhos ha iyo, ngan nagin hinungdan nga an iyo mga kaburut-on in mapuno hin kalipay, nga nagin hinungdan nga an iyo mga baba in angay mapudngan agud kamo in dire makagyakan, kay duro na gud an iyo kalipay.

21 Ngan yana, kun an Diyos, in nagbuhat ha iyo, nga kan kanay kamot in matapod para han iyo mga kinabuhi ngan para han ngatanan nga aada ha iyo, ngan kamo nga naghahatag ha iyo hin anoman nga iyo gin-aaronga igo, nga may pagtuo, nga natuod nga kamo in makakakarawat, O kun sugad, kamo in kinahanglan nga magpaangbit han iyo mga katigayonan nga aada ha iyo tagsa-tagsa.

22 Ngan kun huhukman niyo an tawo nga nag-aaro han iyo katigayonan agud hiya in dire mamatay, ngan hukman hiya, labi na hin kaangay an imo magigin sintensya tungod han dire mo pagpaangbit han imo katigayonan, nga ha diin dire mo ginpapanag-iya kundi ha Diyos, nga kun hin-o amo liwat an tagiya han imo kinabuhi; ngan ngani dire kamo nangangaro, o nagbabasul han mga buhat nga iyo ginbuhat.

23 Nasiring ako ha iyo, kairo hadto nga tawo, kay an iya katigayonan in mawawara upod ha iya; ngan yana, iginyayakan ko ine nga mga pulong hadton mga rikohanon ha butang nga kahbutanon.

24 Ngan liwat, nasiring ako hadton mga kablas, kamo nga waray ngan sugad in mayada sadang, nga kamo in magpabilin ha adlaw-adlaw; an akon hindadabihan kamo ngatanan nga naghalot hadton mga makililimos, tungod kay kamo in waray; hingyap ko nga igsiring niyo ha iyo mga kasingkasing nga: Waray ako maghatag tungod kay ako in waray, kundi kun ako in mayada ako in mahatag.

25 Ngan yana, kun iyo ine iginsiring ha iyo mga kaburut-on magpapabilin nga kamo in waray sala, ha luyo nga bahin kamo in pagsisintensyahan; ngan an iyo sintensya in makatadongan kay naipa kamo hadton waray niyo makarawat.

26 Ngan yana, mahitungod hine nga mga nahuna-huna nga akon iginyakan ha iyo — ha sugad, mahitungod han pagpabilin pagpasaylo han iyo mga sala ha adlaw-adlaw, nga kamo in maglakat nga waray sala ha atubangan han Diyos — karuyag ko nga iyo bahinan han iyo mga katigayonan adton mga kablas, kada tawo kun ano an mayada hiya, sugad han pagpakaon hadton ginugutom, pagpanapton hadton mga lubas, pagbisita han magsakit ngan pagdumara para han iya kaupayan, ha espirituwal ngan temporal, subay han ira panginahanglan.

27 Ngan kitaa nga ine nga mga hitabo in natuman ha kinaadman ngan ha katuhayan; kay dire kinahanglan nga an tawo in madalagan hin labaw hin kamalaksi kontra han iya kusog. Ngan liwat, ine in mapulsanon ha iya nga hiya in magin madoroto, kay ha sugad hine hiya in makakaangkon hin premyo; sanglit an ngatanan nga hitabo in angay matuman nga may katuhayan.

28 Ngan karuyag ko nga iyo hinumduman, nga hin-o man nga manhuram ha iyo amyaw in angay nga mag-uli han butang nga iya hinuram, subay han ira ginkasabotan, o kun dire kamo in makakasala; ngan bangin niyo mapahitabo nga an iyo amyaw in makasala liwat.

29 Ngan ha katapusan, dire ko maisisiring ha iyo an ngatanan nga hitabo diin kamo in mahihimo nga makasala; kay damo an magkalain-lain nga dalan ngan paagi, nga duro hin kadamo nga dire ko adto maiihap.

30 Kundi ine la it akon maisisiring ha iyo, nga kun dire niyo mababantayan an iyo kalugaringon, ngan an iyo panhunahuna, ngan an iyo mga pulong, ngan an iyo mga buhat, ngan tumanon an kasugoanan han Diyos, ngan magpadayon ha pagtuo kun ano man it iyo nahibatian hiunong han pag-abot han aton Ginoo, bisan tubtub ha katapusan han iyo mga kinabuhi, kamo in angay mamatay. Ngan yana, O katawhan, hinumdumi, nga dire ka mamatay.