1 Ket ita, napasamak nga idi nakasaon ni ari Benjamin dagiti taona, impaibagana kadakuada, a tinarigagayanna a maammuan kadagiti taona no patienda dagiti balikas nga insaona kadakuada.

2 Ket nagpukkawda iti maymaysa a timek, a kinunada: Wen, patienmi dagiti amin nga insaom kadakami; ket kasta met, nga ammomi ti kinatalged ken kinapudnoda, gapu iti Espiritu ti Apo a Mannakabalin amin, a nangaramid iti naindaklan a panagbalbaliw kadakami, wenno kadagiti pusomi, nga awanen ti tarigagaymi nga agaramid iti dakes, ngem ti ketdi agtultuloy nga agaramid iti kinaimbag.

3 Ket dakami, mismo, kasta met, babaen ti agnanayon a kinaimbag ti Dios, ken dagiti panangiparangarang ti Espirituna, addaan iti naisangsangayan a pannakasirmata iti masakbayan; ket no koma rumbeng, maipadtomi ti amin a bambanag.

4 Ket ti pammatimi kadagiti banag a naisao ti arimi ti nangyeg kadakami iti daytoy naindaklan a pannakaammo, gapuna a nagrag-okami iti aglaplapusanan a rag-o.

5 Ket sitatallugodkami a makitulag iti Diosmi nga agaramid iti pagayatanna, ken agtungpal kadagiti bilinna iti amin a banag nga ibilinnanto kadakami, iti amin a nabati nga aldawmi, tapno saan a sumangbay ti awan gibusna a panagtuok kadakami, a kas iti naisao ti anghel, tapno saanmi mainum iti kopa ti pungtot ti Dios.

6 Ket ita, dagitoy ti balikas a tinarigagayan ni ari Benjamin manipud kadakuada; ket kinunana ngarud kadakuada: Insaom dagiti balikas a tarigagayak; ket nalinteg a katulagan ti inaramidyo.

7 Ket ita, gapu iti katulagan nga inaramidyo maawagankayo nga annak ni Cristo, dagiti lallaki nga annakna ken babbai nga annakna; agsipud ta kitaen, impasngaynakayo a naespirituan iti daytoy nga aldaw; ta kinunayo a nabaliwan dagiti pusoyo babaen iti pammatiyo iti naganna; ngarud, naipasngaykayo kenkuana ket nagbalinkayo a dagiti lallaki nga annakna ken babbai nga annakna.

8 Ket babaen daytoy a daulo nawayawayaankayo, ket awan ti sabali nga daulo a makawayawaya kadakayo. Awan ti sabali a naited a nagan a paggapuan ti pannakaisalakan; ngarud, kayatko nga awatenyo ti nagan ni Cristo, dakayo a nakitulag iti Dios, ta masapul a natulnogkayo agingga iti kanibusanan ti biagyo.

9 Ket napasamakto a siasino man a mangaramid iti daytoy masarakanto iti makanawan nga ima ti Dios, agsipud ta ammonanto ti nagan a pakaawaganna; agsipud ta maawaganto iti nagan ni Cristo.

10 Ket ita mapasamakto, ta nasken a maawagan iti sabali a nagan ti siasino man a di umawat iti nagan ni Cristo; ngarud, masarakannanto ti bagina iti makanigid nga ima ti Dios.

11 Ket kayatko a laglagipenyo met, a daytoy ti nagan a kinunak a masapul nga itedko kadakayo a saanto pulos a mapunas, malaksid no babaen iti panagsalungasing; ngarud, agannadkayo tapno saankayo nga agsalungasing, tapno saan a mapunas ti nagan kadagiti pusoyo.

12 Ket kunak kadakayo, kayatko a laglagipenyo a taginayonen a kanayon ti nagan a naisurat iti puspusoyo, tapno saankayo a masarakan iti makanigid nga ima ti Dios, ngem denggen ken lasinenyo ti timek a pakaawagan kadakayo, ken kasta met, ti nagan a pangawagna kadakayonto.

13 Gapu ta kasano ti pannakaammo ti tao iti amo a saanna a nagserbian, ken maysa a ganggannaet kenkuana, ken adayo kadagiti pampanunot ken panggep ti pusona?

14 Ket manen, alaen kadi ti tao ti asno a kukua ti kaarrubana, ket tagikuaenna? Kunak kadakayo: Saan; saanna pay ipalubos a makipanganto kadagiti arbanna, ngem bugawennanto, ken paruarenna ida. Kunak kadakayo, a kasta met ti mapasamak kadakayo no saanyo nga ammo ti nagan a pakaawaganyo.

15 Ngarud, kayatko a nasken a natibkerkayo ken saan a maisin, kanayon nga aduan kadagiti naimbag nga aramid, tapno ni Cristo, ti Apo a Dios a Mannakabalin amin, a manglantip kadakayo, tapno maipankayo idiay langit, tapno maaddaankayo iti agnanayon a pannakaisalakan ken agnanayon a biag, babaen ti sirib, ken bileg, ken kinalinteg, ken asina a namarsua iti amin a bambanag, idiay langit ken iti daga, a Dios ti kangatuan iti amin. Amen.