Ang Basahon ni Omni

1 Tan-awa, nahitabo nga ako, si Omni, gisugo sa akong amahan, nga si Jarom, nga kinahanglan mosulat ko og gamay dinhi niini nga mga palid, aron matipigan ang among kasaysayan sa kagikanan—

2 Busa, sa akong mga adlaw, gusto ko nga masayod mo nga nakig-away ako og maayo gamit ang espada aron manalipod sa akong katawhan, ang mga Nephita, gikan sa pagkahulog ngadto sa mga kamot sa ilang mga kaaway, ang mga Lamanita. Apan tan-awa, ako mismo sa akong kaugalingon usa ka daotan nga tawo, ug wala nako matuman ang mga balaod ug ang mga sugo sa Ginoo nga angay unta nakong buhaton.

3 Ug nahitabo nga duha ka gatos ug kapitoan ug unom ka tuig ang milabay, ug aduna kami daghang panahon sa kalinaw; ug aduna kami daghang lisod nga panahon sa gubat ug pagpaagas sa dugo. Oo, ug sa laktod nga pagkasulti, duha ka gatos ug kawaloan ug duha ka tuig ang milabay, ug gitipigan ko kini nga mga palid sumala sa mga sugo sa akong mga amahan; ug gitugyan ko kini sa akong anak nga si Amaron. Ug ako nang taposon.

4 Ug karon ako, si Amaron, misulat sa bisan unsa nga mga butang nga akong isulat, nga diyotay ra, sa basahon sa akong amahan.

5 Tan-awa, nahitabo nga tulo ka gatos ug kawhaan ka tuig ang milabay, ug ang mas labing daotan nga dapit sa mga Nephita nalaglag.

6 Kay dili motugot ang Ginoo, human siya midala kanila gikan sa yuta sa Jerusalem ug mibantay ug nanalipod kanila gikan sa pagkahulog ngadto sa mga kamot sa ilang mga kaaway, oo, dili siya motugot nga dili mapamatud-an ang mga pulong, nga iyang gipamulong ngadto sa atong mga amahan, nga nag-ingon nga: Kon dili kamo motuman sa akong mga sugo dili kamo mouswag sa yuta.

7 Busa, giduaw sila sa Ginoo sa mabangis nga paghukom; bisan pa niana, giluwas niya ang mga matarong aron dili sila mamatay, apan giluwas sila gikan sa mga kamot sa ilang mga kaaway.

8 Ug nahitabo nga akong gihatag ang mga palid ngadto sa akong igsoon nga si Chemish.

9 Karon ako, si Chemish, misulat og diyotay nga mga butang, diha sa mao gihapon nga basahon sa akong igsoon; kay tan-awa, nakita nako ang kataposan nga iyang gisulat, nga gisulat niya kini pinaagi sa kaugalingon niyang kamot; ug gisulat niya kini sa adlaw nga kini iyang gihatag kanako. Ug sumala niini nga paagi gihimo namo ang mga talaan, kay nagsubay kini sa mando sa among mga amahan. Ug ako nang taposon.

10 Tan-awa, ako, si Abinadom, anak ni Chemish. Tan-awa, nahitabo nga nakakita ako og daghang gubat ug panagbingkil tali sa akong katawhan, nga mga Nephita, ug mga Lamanita; ug ako, pinaagi sa akong kaugalingong espada, nakahunos og daghang kinabuhi sa mga Lamanita aron sa pagpanalipod sa akong kaigsoonan.

11 Ug tan-awa, ang talaan niini nga katawhan gikulit sa mga palid nga gihuptan sa mga hari, pinasubay sa mga henerasyon; ug ako walay nasayran nga mga pagpadayag gawas niana nga nahisulat, ni mga pagpanagna; busa, ang unsay gikinahanglan gikasulat na. Ug ako nang taposon.

12 Tan-awa, ako si Amaleki, ang anak ni Abinadom. Tan-awa, mamulong ako og diyotay kaninyo mahitungod kang Mosiah, kinsa gihimong hari sa yuta sa Zarahemla; kay tan-awa, gipasidan-an siya sa Ginoo nga kinahanglang molayas siya gikan sa yuta sa Nephi, ug kutob sa mopatalinghog sa tingog sa Ginoo kinahanglan nga mobiya usab sa yuta uban kaniya, ngadto sa kamingawan—

13 Ug nahitabo nga mibuhat siya sumala sa gisugo sa Ginoo kaniya. Ug mibiya sila gikan sa yuta ngadto sa kamingawan, kutob sa mopatalinghog sa tingog sa Ginoo; ug gigiyahan sila pinaagi sa daghang pagsangyaw ug pagpanagna. Ug gipahimangnoan sila sa kanunay pinaagi sa pulong sa Dios; ug gigiyahan sila pinaagi sa gahom sa iyang bukton, lahos sa kamingawan hangtod nga miabot sila didto sa yuta nga gitawag og yuta sa Zarahemla.

14 Ug nakadiskobre sila og katawhan, nga gitawag og katawhan ni Zarahemla. Karon, adunay hilabihan nga paglipay taliwala sa katawhan ni Zarahemla; ug hilabihan usab ang kalipay ni Zarahemla, tungod kay ang Ginoo mipadala sa katawhan ni Mosiah nga may dalang mga palid nga bronse nga naglangkob sa talaan sa mga Judeo.

15 Tan-awa, nahitabo nga nahibaloan ni Mosiah nga ang katawhan ni Zarahemla nagagikan diay sa Jerusalem sa panahon nga si Sedekias, ang hari sa Juda, gidagit nga bihag ngadto sa Babelon.

16 Ug mibiyahe sila sa kamingawan, ug gidala pinaagi sa kamot sa Ginoo tabok sa lapad nga katubigan, ngadto sa yuta diin didto nadiskobrehan sila ni Mosiah; ug sukad niadtong panahona didto na sila nagpuyo.

17 Ug sa panahon nga nadiskobrehan sila ni Mosiah, hilabihan na nila kadaghan. Bisan pa niana, sila adunay daghang mga gubat ug grabeng panagbingkil, ug napukan sila pinaagi sa espada matag karon ug unya; ug ang ilang pinulongan nausab; ug sila walay gidalang mga talaan; ug gilimod nila nga anaa ang ilang Tiglalang; ug gani si Mosiah, ni ang katawhan ni Mosiah, dili makasabot kanila.

18 Apan nahitabo nga si Mosiah misugo nga tudloan sila sa iyang pinulongan. Ug nahitabo nga human sila matudloi sa pinulongan ni Mosiah, mihatag si Zarahemla og kasaysayan sa kagikanan sa iyang mga amahan, sumala sa iyang panumdoman; ug gisulat kini, apan wala dinhi niini nga mga palid.

19 Ug nahitabo nga ang katawhan ni Zarahemla, ug ni Mosiah, nagkahiusa; ug si Mosiah gitudlo aron mahimo nilang hari.

20 Ug nahitabo sa mga adlaw ni Mosiah, adunay dakong bato nga gidala ngadto kaniya nga may kinulit niini; ug iyang gihubad ang mga kinulit pinaagi sa gasa ug gahom sa Dios.

21 Ug naghatag kini og asoy bahin sa tawo nga si Coriantumr, ug sa pagkamatay sa iyang katawhan. Ug si Coriantumr nakaplagan sa katawhan ni Zarahemla; ug nagpuyo siya uban kanila sulod sa siyam ka bulan.

22 Naghisgot usab kini og pipila ka pulong kabahin sa iyang mga amahan. Ug ang iyang unang mga ginikanan mibiya gikan sa tore, sa panahon nga ang Ginoo milibog sa pinulongan sa katawhan; ug ang kahigpit sa silot sa Ginoo midangat kanila sumala sa iyang mga paghukom, nga makiangayon; ug ang ilang mga bukog nagkatag sa amihanang bahin sa yuta.

23 Tan-awa, ako, si Amaleki, natawo sa kapanahonan ni Mosiah; ug ako nakasaksi hangtod sa iyang kamatayon; ug si Benjamin, nga iyang anak, ang nagmando puli kaniya.

24 Ug tan-awa, akong nakita, sa mga adlaw ni hari Benjamin, ang grabe nga gubat ug daghang pagpaagas sa dugo tali sa mga Nephita ug sa mga Lamanita. Apan tan-awa, nakabintaha og dako ang mga Nephita kay kanila; oo, hangtod nga si hari Benjamin miabog kanila gikan sa yuta sa Zarahemla.

25 Ug nahitabo nga ako nagkatigulang na; ug, tungod kay walay binhi, ug nasayod nga si hari Benjamin makiangayon nga tawo sa atubangan sa Ginoo, busa, ihatag ko kini nga mga palid ngadto kaniya, moawhag sa tanang tawo sa pagduol ngadto sa Dios, ang Balaan sa Israel, ug motuo sa panagna, ug sa mga pagpadayag, ug sa pagpangalagad sa mga anghel, ug sa gasa sa pagpamulong, ug sa gasa sa paghubad sa mga pinulongan, ug sa tanang butang nga maayo; kay walay butang nga maayo gawas kon kini nagagikan sa Ginoo: ug kana nga daotan nagagikan sa yawa.

26 Ug karon, hinigugma kong kaigsoonan, manghinaot ko nga kamo moduol kang Kristo, nga mao ang Balaan sa Israel, ug moambit sa iyang kaluwasan, ug sa gahom sa iyang katubsanan. Oo, duol ngadto kaniya, ug itanyag ang inyong tibuok nga mga kalag isip usa ka halad ngadto kaniya, ug magpadayon sa pagpuasa ug pag-ampo, ug paglahutay hangtod sa kataposan; ug kay ang Ginoo buhi kamo maluwas.

27 Ug karon mamulong ako og diyotay mahitungod sa pipila nga miadto sa kamingawan aron makabalik sa yuta sa Nephi; kay adunay dakong pundok nga nagtinguhang makapanag-iya sa yuta nga ilang kabilin.

28 Busa, nangadto sila sa kamingawan. Ug ang pangulo nila isip usa ka lig-on ug kusgan nga tawo, ug tawo nga tikig og liog, busa nakigbingkil siya kanila; ug silang tanan nangamatay, gawas sa singkwenta, nga didto sa kamingawan, ug namalik na usab sila sa yuta sa Zarahemla.

29 Ug nahitabo nga nakadala na usab sila og daghan pang uban, ug mibiyahe na usab sila paingon sa kamingawan.

30 Ug ako, si Amaleki, adunay igsoong lalaki, nga mikuyog usab kanila; ug sukad niadto ako wala nay nahibaloan mahitungod kanila. Ug hapit na ako mopahulay sa akong lubnganan; ug kini nga mga palid puno na. Ug akong taposon ang akong pagpamulong.