Te Au Tuatua a Momoni

1. E teianei, te vaitata nei au ko Momoni i te tuku atu i te akapapaanga, taku i tata, ki roto i te rima o taku tamaiti ko Moronai; i na, kua kite au i te akapouanga i te maataanga o toku iti tangata, koia oki te ngati Niphai.

2. E maata te anereanga o te mataiti i topa atu mei te tae anga mai o te Mesia, e oronga atu ei au i te au akapapaanga ki roto i te rima o taku tamaiti; e te manako nei au e, ka kite aia i te akapou takiri anga i toku iti tangata. Kia akatika ra te Atua kia ora aia i muri ake i to ratou mateanga, kia tata aia i tetai tuatua no ratou ra; e kia tuatua oki tetai no te Mesia, peneiake ko te riro te reira ei puapinga ia ratou a tetai tuatau.

3. E teianei, te tuatua atu nei au i te au mea taku i tata. I muri ake ka akapoto ei au i te au papa a Niphai e tae ua atu ki te au o te ariki ra ko Beniamina, ta Amuleki i tuatua maira, kua kimi iora au i roto i te au akapapaanga tuatua i tukuia mai ki roto i toku rima, e kua kite au i teia au papa nei, tei runga i reira te kotikoti angaia o teia akapapaanga meangiti no te au peroveta mei te tuatau mai o Iakoba e tae ua atu ki te au o taua ariki ra ko Beniamina, e te au tuatua e manganui oki a Niphai.

4. E kua mataora au i te au mea i tataia ki runga i teianei au papa, no te au totou i te tae anga mai o te Mesia; e i kite oki toku ai metua e, kua akaputuia taua au totou e manganui, i na, e kua kite oki au e, i akatupuia te au mea katoa i totouia no matou ra, e tae rava mai ki teianei ra, e ka akatupuia rai oki te au totou no te au rā a muri atu.

5. No reira, kua rave au i teia au mea no te akaotianga i toku akapapaanga mei runga i te reira, ka rave ra au i te toenga o toku akapapaanga mei runga mai i te au papa a Niphai; e kare e tika iaku kia tata i te anere o te au tuatua no toku ra iti tangata.

6. I na, e rave au i teianei au papa i kotikotiia i teianei au totou e teianei au eeuanga, e e tuku atu au i te reira ki te toenga o toku akapapaanga, e mea meitaki rava oki te reira iaku; e kua kite oki au e, ka riro te reira ei mea meitaki rava ki toku au taeake.

7. E te pera nei au no tetai akakoroanga pakari; e kia tau i te angaanga a te Vaerua o te Atua tei roto iaku, e tei koumuumu mai kiaku. E teianei, kare rava au i kite i te au mea katoatoa, kua kite ra te Atu i te au mea katoatoa te ka tupu a muri atu, no reira te angaanga nei aia na roto iaku kia rave au mei tei tau i tona inangaro.

8. E kua pure au ki te Atua no toku au taeake; kia oki akaou ratou ki te kite i te Atua; i na, ki te tarangaara a te Mesia ra; kia riro akaou ratou ei iti tangata manea.

9. E teianei te akaoti nei au ko Momoni, i toku akapapaanga, taku i rave mei runga mai i te au papa a Niphai; e tata rai au i te reira mei tei tau ki te kite e te marama ta te Atua i oronga mai kiaku nei.

10. E tuku akera Amuleki i teianei au papa ki roto i te rima o te ariki ra ko Beniamina, kua rave aia i te reira, e kua tuku atu i te reira ki te au papa ke ra tei tataia e tei akonoia e te ui ariki ra, i tera uki i tera uki, e tae ua atu ki te au rā o te ariki ra o Beniamina.

11. E kua tukuia maira te reira i tera uki i tera uki, mei te ariki mai ra ko Beniamina e tae rava mai ki roto i toku rima. E te pure nei au, ko Momoni, ki te Atua, kia akonoia te reira e tuatau ua atu. E te kite nei au e, ka akonoia ïa, no te mea, kua tataia te au mea maata ki runga, e ka akavaia toku iti tangata e to ratou au taeake katoa i taua rā maata e te openga ra, mei tei tau i te tuatua a te Atu i tataia ra.

12. E teianei, ko te tuatua teia no taua ariki ra ko Beniamina; e māro anga tetai tei tupu ki rotopu i tona uaorai iti tangata.

13. E i aere mai te au nuku o te ngati Lamana mei te enua o Niphai, e tamaki mai i tona iti tangata. Ina ra, kua akaputuputu maira te ariki ra ko Beniamina i tona ra au nuku e kua tamaki atura aia kia ratou, e kua tamaki aia ma te maroiroi o tona uaorai rima e ma te koke oki a Labana ra.

14. E kua tamaki atu ratou i te maroiroi o te Atu i to ratou au enemi, e kua ta ratou i te ngati Lamana e tausani ua atu. E kua tamaki atura ratou ki te ngati Lamana, e tuaru atu oki ia ratou ki vao i to ratou au enua ipukarea.

15. I tu akera te au Mesia pikikaa, e kua topiriia to ratou vaa, e kua akautungaia ratou mei tei tau i ta ratou au ara.

16. I tu mai te au peroveta pikikaa, e te au puapii pikikaa, e te au orometua pikikaa i rotopu i te iti tangata, e i akautungaia ratou katoatoa mei tei tau i ta ratou au ara; e i tupu akera te au māroanga e manganui i roto i te ngati Lamana, e te au pekapeka anga oki, i na, kua akaau te ariki ra ko Beniamina i to te enua ra, na roto i te tauturu a te au peroveta tapu i rotopu i te iti tangata.

17. I na oki, e tangata tapu te ariki ra ko Beniamina, e kua tutara aia i runga i tona iti tangata ma te tuatua tika. E manganui oki te au tangata tapu i te enua, e kua ako ratou i te tuatua a te Atua ma te ririnui e te mana; e no te paketaketa o te ngakau tangata kua ako pakari ratou i te tangata.

18. E tenana, na roto te reira tauturu e te tauturu oki a te au peroveta kua akatinamou akaou te ariki ra ko Beniamina i te āu ki runga i te tua o te enua ra na roto i te ririnui o tona uaorai kopapa, e te kite oki o tona ngakau.