Te Puka a Mosaia

1. Kare rava e manamanata akaou i te au enua katoa ra i Zarahemela i roto i te au tangata i raro ake i te au o te ariki ra ko Beniamina. Noo iora te ariki ra ko Beniamina ma te au, e ope rava akera te toenga o tona puke ra.

2. Anau akera tana nga tamariki tamaroa toko toru, kua topa aia i to ratou au ingoa ko Mosaia, ko Herorama, e ko Hilamana. E kua apii aia ia ratou i te reo o tona ai metua, kia riro ratou ei au tangata marama, e kia kite oki ratou i te au totou i tuatuaia maira e te vaa o to ratou ai tupuna ko tei tukuia mai kia ratou e te rima o te Atua ra.

3. E kua apii katoa atura aia ia ratou no runga i te akapapaanga i tataia ki runga i te au papa veo ra, i te na ko anga atu e, e taku nga tamariki, kua inangaro au kia akamaara kotou e, naringa kare teia au papa nei, tei roto oki i reira, teianei tuatua e teianei au akaueanga, kua mate tikai tatou i te kite kore i teianei, e kare oki tatou e kite i te au tuatua ngaro a te Atua ra.

4. No te mea, kare oki i rauka i to matou metua tane ko Lihai, kia akamaara pu ua i teianei au mea kia apii atu i te reira ki tana au tamariki, mari ra, na roto i te tauturu a teianei au papa; kua apiiia oki aia i te reo o te Aiphiti, e no reira i raukaʼi iaia te tatau i taua au tuatua ra e kia apii atu i te reira ki tana au tamariki, kia rauka katoa oki ia ratou te apii atu i ta ratou au tamariki, e kua pera ratou i te akono anga i te au akaueanga a te Atua e tae rava mai ki teianei tuatau.

5. E e tuatua atu nei au kia kotou e, e aku au tamariki, naringa kare tei ia tatou teianei au mea tei akonoia e te rima o te Atua ra, kia tatau tatou e kia kite i tana au tuatua ngaro, e kia vai ua rai tana au akaueanga ki mua i to tatou mata, kua riro atu to tatou uaorai au metua i te akarongo kore, e kua riro katoa tatou mei to tatou au taeake, mei te ngati Lamana rai te tu, ko tei kore rava i kite i teianei au mea, e kare oki ratou e akarongo i te reira me apiiia atu, no te mea te tamou ra ratou i te au peu tau kore a to ratou ai metua ra.

6. E aku nga tamariki e, kua inangaro au kia akamaara kotou e, e tuatua tika teia e e tika oki te akapapaanga i tataia ra. I na oki e tika te papaanga a Niphai ra tei tataia ki te au tuatua a to tatou ai tupuna, mei te tuatau i akaruke mai ei ratou ia Ierusalema ra e tae rava mai ki teianei, e tuatua tika rava ïa, e e kite papu oki tatou i te reira, no te mea tei mua ïa i to tatou nei mata.

7. E teianei, e aku au tamariki, kia kimi pakari kotou i te reira au tuatua nei, kia puapingaiaʼi kotou e kia akono katoa kotou i te au akaueanga a te Atua ra, kia riro mai te meitaki ia kotou i te enua nei, mei tei tau i te au taputou i taputouia e te Atua ki to tatou ai tupuna.

8. E manganui atu rai te au mea ta te ariki ra, ta Beniamina i apii atu ki tana au tamariki tamaroa, e tei kore oki i tataia ki roto i teianei puka.

9. E akaoti akera te ariki ra ko Beniamina i te apii anga atu i tana au tamariki, kua pakari iora aia, e kua kite oki aia e, ka aere vave aia na te mataara e aereia e to te ao katoa nei, e no reira i manako ei aia e, e mea tau kia oronga atu i te basileia ki tetai o tana au tamariki.

10. No reira kua akaue aia kia tikinaia mai a Mosaia kia aere mai ki mua iaia, e kua tuatua atura aia kiaia i te na ko anga e, E taku tamaiti, ka inangaro au kia akakite atu koe ki te au tangata ravarai e pini ua ake i te enua nei, ki te au tangata no Mosaia tei noo i te tangata no Mosaia te noo nei i te enua nei, kia akaputuputuia mai ratou; apopo au e akakite atu ei na roto i toku uaorai vaa ki toku nei iti tangata e, ko koe te ariki, e te tutara ki runga i teianei iti tangata, ko ta te Atu ta to tatou Atua ra i oronga mai kia tatou.

11. E pera katoa, ka topa oki au i teianei iti tangata i tetai ingoa, kia akatakakeia ratou mei te au tangata katoatoa i aratakiia mai e te Atu e te Atua ra mei te enua maira mei Ierusalema, e pera oki au no to ratou maroiroi i te akono i te au akaueanga a te Atu ra.

12. E topa oki au ia ratou i tetai ingoa, te ka kore rava e akakoreia, mari ra, na roto i te ara.

13. I na, e tuatua atu rai au kia koe e, mei te mea e inga teia nei iti tangata i te ara ko tei akameitakiia e te Atu, e e riro oki ratou ei iti tangata kino e te akaturi, ka akaruke te Atu ia ratou i reira, kia riro ua ratou ei mea paruparu mei to ratou au taeake; e kare rava aia e akaperepere akaou ia ratou i tona mana aite kore e te umere ra, mei tana i aroa i to ratou ai metua ra.

14. Te tuatua atu nei oki au kia koe na, naringa kare aia i akatika ua mai i tona rima i te akaoraanga mai i to tatou ai metua ra, kua riro atu ratou ki te rima o te ngati Lamana e kua mate i to ratou makitakita.

15. E akaoti akera te ariki ra ko Beniamina i teianei au tuatua ki tana tamaiti ra, kua ikuiku atura aia iaia i te au mea katoatoa o te basileia ra.

16. E kua ikuiku katoa atura aia iaia kia akono i te au akapapaanga i tataia ki runga i te au papa veo ra; e te au papaanga katoa a Niphai, e te koke a Labana, e te poro, koia oki te kaveinga, tei arataki i to ratou ai metua na roto i te metepara ra, e tei maaniia oki te reira e te Atu, kia aratakiia atu ratou katoatoa mei tei tau i to ratou akarongo e to ratou akono iaia ra.

17. E tenana, no to ratou akono kore, i kore ei ratou i manuia, kare oki i aere ki mua i to ratou tere, kua akaokiia ra ki muri, i rokoia oki ratou i te riri o te Atua; e no reira i papaia ratou ki te onge e te tumatetenga maata, kia akamaara ratou i tei tau ia ratou kia akono.

18. Kua aere atura Mosaia i reira, e kua akono iora i ta tona metua i akaue mai kiaia ra, e kua akakite atura aia ki te au tangata katoatoa i te enua i Zarahemela kia akaputuputu mai ratou, e kia aere atu ratou ki te iero e akarongo i te au tuatua ta tona metua ka tuatua mai kia ratou ra.