1. E akarongo akera te ariki i taua au tuatua ra, kua karanga atura aia ki tona au taunga, e apai atu i tena tangata e ta. Eaa oki tana ia tatou nei? Kua auouo aia.

2. Tu akera ratou ki runga, e tamata iora ratou i te rave iaia ki to ratou rima, kua patoi ra aia ia ratou, na ko atura.

3. Auraka e akatukia mai kiaku nei, ka ta mai oki te Atua ia kotou me amiri ua mai to kotou rima iaku nei, no te mea, kare oki au i akakite atu i ta kotou i inangaro mai iaku kia akakite atu; no reira, kare te Atua e akatika kia mate au i teianei.

4. Kia akono ra au i te au akaueanga ta te Atua i akaue mai kiaku, e no te mea kua akakite akenei au i te tuatua tika kia kotou, kua riri mai kotou iaku nei. E no te mea oki, kua tuatua atura au i te tuatua a te Atua, kua manako kotou e, e auouo au.

5. E kia tuatua atura Abinadaia i taua au tuatua ra, kua mataku iora te au tangata o te ariki ra ko Noa i te rave mai iaia ki to ratou rima. Tei runga oki iaia te Vaerua o te Atua ra; e kaka iora tona mata ki te kaka maata, mei to Mose, ka noo ei aia ki runga i te maunga ra ko Sinai, ka tuatuaʼi oki ki te Atu ra.

6. Kua tuatua atura aia ma te mana e te ririnui no ko mai i te Atua ra; e kua tuatua ua atu rai aia, na ko atura,

7. Te kite nei kotou e, kare o kotou mana kia ta mai iaku nei, no reira, ka akaoti au i taku tuatua. I na, te kite nei au e, kua puta to kotou ngakau i te reira, no te mea te tuatua nei au i te tuatua tika no ta kotou au ara.

8. I na, no taku au tuatua, kua ki kotou i te umere e te poitirere, e te riri.

9. Te akaoti nei au i taku nei tuatua, kare e manamanata iaku i reira i te ngai taku e aere ra, mei te mea, ka ora au.

10. Ko teia ra taku e akakite atu nei kia kotou, ko ta kotou ïa ka rave kiaku i reira, ka riro anake ïa ei taipe e ei ata no te au mea te ka tupu a muri atu.

11. E teianei, ka tatau atu rai au i te toenga o te au akaueanga a te Atua, kua kite oki au e, kare te reira i tataia ki roto i to kotou ngakau; e kua kite oki au e, kua kimi e kua apii atu i te kino ki te maataanga o to kotou oraanga nei.

12. E teianei, e akamaara kotou e, kua tuatua atu au kia kotou e, Auraka rava koe e anga i te idolo akatikitikiia noou i te tu no tetai mea i runga i te rangi ra, e no tetai mea i raro i te enua nei, e no tetai mea o te moana i raro ake i te enua ra.

13. Auraka rava oki koe e tupou ki raro ia ratou, auraka oki e akono ia ratou, e Atua vareae oki au ko te Atu, ko toou Atua ra, i te akairi anga i te ara a te aronga metua ki runga i te tamariki, e tae ua atu ki te toru e te ā o te uki, kia kore ratou e inangaro mai iaku ra.

14. E i te aroa anga atu i te aronga i inangaro mai iaku e kua akono i taku au akaueanga, e tausani ua atu rai.

15. Auraka rava koe e akaiki puapinga kore ua i te ingoa o to Atu ra ko te Atua; kare oki te Atu e akatika iaia i tei akaiki puapinga kore ua i tona ra ingoa.

16. E akamaara i te rā sabati kia akatapuia ïa.

17. E tika ia koe kia angaanga, e kia rave i taau au angaanga katoatoa i nga rā e ono ra.

18. Kareka te rā itu ra, ko te sabati ia no te Atu ra ko toou Atua; auraka rava koe e rave i te angaanga, ko koe, e taau tamaiti, e taau tamaine, e toou tavini tane, e toou tavini vaine, e taau au puakatoro ra, e te tangata ke katoa ra, tei noo ki roto i toou aua ra.

19. I nga rā e ono, kua anga te Atu i te rangi e te enua, e te tai, e te au mea katoa i roto ra; no reira, kua akameitaki te Atu i te rā Sabati; e kua akatapu oki aia i te reira.

20. E akangateitei atu i toou metua tane, e toou metua vaine; kia akaroaia toou puke ra i te enua ta toou Atu ta te Atua i oronga mai noou ra.

21. Auraka rava koe e ta ua.

22. Auraka rava koe e akaturi. Auraka rava koe e keia.

23. Auraka rava koe kia riro ei kite pikikaa ki toou tangata tupu ra.

24. Auraka rava koe e morimori i te are o toou tangata tupu, auraka katoa koe e morimori i te vaine a to tangata tupu, e tona tavini tane, e tona tavini vaine, e tana puakatoro e tana asini, auraka katoa i te au mea ravarai a toou tangata tupu ra.

25. E akaoti akera Abinadaia i teianei tuatua, kua tuatua atura aia kia ratou, kua apii ainei kotou i teianei iti tangata kia rave i teianei au mea katoatoa, e kia akono oki i teianei au akaueanga?

26. E karanga atu au kia kotou, kare, naringa kotou i pera, kare te Atu e tono mai iaku nei e totou atu i te kino o teianei iti tangata.

27. E teianei, kua tuatua mai kotou e, na roto i te ture a Mose e tae mai ei te ora. Te karanga atu nei au kia kotou na, e mea tau rai kia akono kotou i te ture a Mose i teianei, te karanga atu nei ra au kia kotou, ka tae mai te tuatau e kore ei e tau kia akono i te ture a Mose ra.

28. E te karanga katoa atu nei au kia kotou, kare te ora e tae mai na roto i te ture anake ra; me kore te tarangaara ta te Atua uaorai ka rave no te au ara e te kino a tona ra iti tangata, no atu rai te ture a Mose, ka mate ua atu ratou e tikai.

29. E teianei, e karanga atu au kia kotou, e mea tau kia orongaia mai tetai ture ki te tamariki a Iseraela, i na, e ture pakari oki; no te mea e iti tangata marokiakia ratou, viviki i te rave i te ara, kare ra i viviki i te akamaara i te Atu ra i to ratou Atua.

30. No reira kua orongaia tetai ture kia ratou, koia oki te ture, no te akono i te au angaanga o te oroa, e ture no ratou kia akono meitaki i tera rā i tera rā, kia akamaara ua atu rai ratou i te Atua, e ta ratou akonoanga e tau iaia.

31. Ina ra, te karanga atu nei au kia kotou, e akaraanga anake teianei au mea no te au mea te ka tae mai a muri atu.

32. E teianei, kua marama ainei kotou i te ture? Te karanga atu nei au kia kotou, kare, kare ratou katoatoa i kite i te ture, e no te ketaketa oki o to ratou ngakau; kare oki ratou i kite e, kare rava tetai tangata e akaoraia, mari ra na roto i te tarangaara a te Atua ra.

33. I na oki, kare ainei a Mose i totou kia ratou i te taeanga mai o te Mesia, e ka akaora te Atua i tona ra iti tangata? I na, te au peroveta katoatoa i totou mei muatangana maira o teianei ao, kare ainei ratou i tuatua mai ana i teianei au mea?

34. Kare ainei ratou i tuatua mai ana e, ka aere mai te Atua uaorai ki raro nei e ka noo ki rotopu i te tamariki a te tangata nei, e ka riro aia mei te tangata te tu, e ka aere oki aia na runga i te tua o te enua nei ma te mana maata?

35. I na, e kare ainei ratou i tuatua katoa mai e, ka akatupu aia i te tuakaouanga o tei mate ra; e ka takinga kinoia aia, e e rokoia aia e te tumatetenga?