1. I akakite mai ana te Atu kia Alama, e kua akakite oki ki tona ra au tangata e, ka aere mai te au nuku o Noa ki runga ia ratou ra, e no reira, kua akaputuputu ratou i ta ratou au anana, kua rave iora ratou i ta ratou sitona e aere atura ki te metepara ra na mua atu i te au nuku o te ariki ra ko Noa.

2. E kua akamaroiroi maira te Atu ia ratou kia kore ratou e rokoia e te mate no te au tangata o te ariki ra ko Noa.

3. E varu akera rā i te aereanga ki te metepara.

4. E tae atura ki tetai enua, koia oki tetai enua manea e te maru e e vai meitaki oki tei taua enua ra.

5. Patia iora ratou i to ratou au puakapa, e kua akamata iora oki ratou i te arote i te enua, e i te maani i te au are, kua angaanga ratou, e kua angaanga ma te ririnui.

6. E kua inangaro iora te au tangata kia riro a Alama ei ariki no ratou, no te mea kua akaperepereia aia e tona ra au tangata.

7. Kua tuatua iora ra aia kia ratou, i na, kare ïa i te mea meitaki kia akatika ratou i te ariki, no te mea, te na ko maira te Atu; auraka kotou e manako e, kua tau roa ake tetai tangata i tetai, e auraka oki tetai tangata e manako iaia uaorai e, kua tau roa ake aia i tetai; e no reira i tuatua atu ei au kia kotou e, kare ïa i te mea meitaki te ariki no kotou.

8. Kareka ra, naringa ka rauka ia tatou te tangata tuatua tika, i te au taime katoatoa ei ariki no tatou, e mea meitaki ïa i reira te ariki no tatou.

9. E akamaara ra i te tuatua kino a te ariki ra a Noa e tana au taunga, kua mou katoa au, ko au iora i tetai puereere, e kua rave au i te au mea viivii e manganui ki mua i te aroaro o te Atu ra, e kua tataraara oki au ma te mamae maata ra.

10. E kua tumatetenga maata oki au, kua akarongo mai ra te Atu ki taku kapikianga, kua pau maira aia i taku pure ra, e kua akariro oki aia iaku ei rima rave ki roto i tona ra rima i te aratakianga mai ia kotou e manganui kia kite i te tuatua mou nana.

11. Ina ra, kare au e akakaka i te reira, e kare oki au e tau kia akakaka iaku uaorai nei.

12. E teianei, te tuatua atu nei au kia kotou, kua takinga kinoia kotou e te ariki ra e Noa, e kua tuikaa oki kotou kiaia e ki tana ra au taunga, e kua aratakiia oki kotou ki te kino e ratou ra; e tapekaiaʼi kotou e te au tapekaanga o te kino ra.

13. E teianei, no te mea, kua akaoraia kotou e te mana o te Atua i taua au tapekaanga ra, i na, mei roto mai i te rima o te ariki ra ko Noa e tona ra au tangata, e i te au pirianganao oki o te kino ra, kua inangaro au kia tu meitaki kotou i taua tiāmā tei akarangatira ia kotou ra, kia kore kotou e akatika i tetai tangata ei ariki no kotou.

14. Eiaa oki e irinaki i tetai tangata ei orometua, e ei puapii no kotou, mari ra e tangata aia no te Atua, i te aereanga na tona ra mataara, e i te akono anga i tana ra au akaueanga.

15. Kua na reira a Alama i te apiianga atu i tona ra au tangata, kia aroa te tangata katoatoa i tona tangata tupu mei tana i aroa iaia uaorai, kia kore te pekapeka e tupu ki rotopu ia ratou ra.

16. E teianei, ko Alama to ratou taunga teitei, e nana oki i akatu i to ratou akonoanga ra.

17. E kare rai tetai tangata i rauka mai ake te mana kia rauka iaia i te ako, e te apii, mari ra, ko tei rauka tana no ko mai i te Atua ra. E no reira i akatainu ei aia i to ratou au taunga katoatoa e to ratou au puapii katoatoa. Kare roa tetai tangata e akatainuia, mari ra, e tangata tuatua tika aia.

18. No reira, kua tiaki ratou i to ratou au tangata, e kua tauturu oki ia ratou ki te au mea tuatua tika ra.

19. Kua manuia maata ratou i te enua ra, e kua topa iora ratou i te ingoa o taua iti tangata ra ko Hilama.

20. Kua tupu ratou ki te maata, e kua meitaki oki ratou i taua enua ra i Hilama; patu iora ratou i tetai oire, e topa iora i te ingoa o taua oire ra ko Hilama.

21. E tika ra i te Atua ra kia ako mai ki tona ra au tangata, i na, te timata maira aia i to ratou akakoromaki e to ratou akarongo oki.

22. Ko tei irinaki kiaia ra, e akateiteiia ia i te rā openga ra Kua akapera oki teianei iti tangata.

23. I na oki, e akakite atu au kia kotou e, kua aratakiia ratou ki roto i te tuikaaanga ra, e kare e rauka i tetai kia akaora ia ratou mari ra, ko te Atua anake ra; koia oki te Atua o Aberahama, e no Isaaka, e no Iakoba.

24. E kua akaora aia ia ratou, e kua akakite katoa atura aia i tona ra mana maata kia ratou, e kua rekareka maata ratou.

25. I na oki, te noo ra ratou i te enua ra o Hilama, koia oki te oire ra ko Hilama, te arote ua ra i te enua e pini ua ake; i na, tei roto i te au kotinga o te enua ra tetai nuku o te ngati Lamana.

26. Oro maira te au taeake o Alama mei to ratou au kainga maira, e kua akaputuputu maira ratou ia ratou uaorai ki roto i te oire ra i Hilama; mataku tikai ratou i te kite anga i te ngati Lamana ra.

27. Kua aere mai ra a Alama, e kua tu akera aia ki rotopu ia ratou ra, e kua ako atura aia kia ratou e, eiaa ratou e mataku, ka akamaara ra i te Atu ra i to tatou Atua, e nana oki ratou e akaora.

28. Kua akakore akera ratou i to ratou mataku, e kua akamata iora ratou i te kapiki atu ki te Atu ra kia akamaru aia i te ngakau o te ngati Lamana ra, kia akaoraiaʼi ratou, e ta ratou au vaine, e ta ratou au tamariki.

29. Kua akamaru iora te Atu i te ngakau o te ngati Lamana, e kua aere atura a Alama e tona au taeake, kua tuku ia ratou uaorai ki to ratou rima; riro atura te enua ra o Hilama ki te ngati Lamana ra.

30. E teianei, ko te au nuku o te ngati Lamana tei arumaki mai i te au tangata o te ariki ra ia Limihai ra, kua ngaro oki ratou ki roto i te metepara i te au rā e manganui.

31. E i na, kite akera ratou i te au taunga o te ariki ra o Noa i tetai ngai ta ratou i topa i te ingoa ko Amurona; i akamata oki ratou i te noo ki te enua ra ko Amurona, e kua tanu oki ratou i te enua.

32. Ko Amurona te ingoa o te arataki o taua au taunga ra.

33. Kua pati akatenga atu a Amurona ki te ngati Lamana, e kua tono akera i ta ratou au vaine, koia oki te au tamaine a te ngati Lamana, e pati ki to ratou au taeake kia kore ratou e tamate i ta ratou au tane.

34. Tangi atura te ngati Lamana ia Amurona e tona au taeake, e kare atura oki ratou i tamate ia ratou no ta ratou au vaine.

35. Kua piri iora a Amurona e tona au taeake ki te ngati Lamana, kua aere ratou ki te metepara i te kimi anga i te enua ra ia Niphai, kite akera ratou i te enua ra ia Hilama, tei nooia e Alama e tona au taeake.

36. E kua tuatua maira te ngati Lamana kia Alama e tona ra au taeake, kia akakite atu ratou i te mataara e tae atu ei ki te enua ra ko Niphai kia akaoraia, e ka akarangatiraiaʼi oki ratou.

37. E kia akakite ra a Alama kia ratou i te mataara e tae ua atu ki te enua ra ko Niphai, kare atura te ngati Lamana i akono i ta ratou tuatua; kua tuku ra ratou i te au tiaki e pini ua ake te enua ra o Hilama, e ki runga ake ia Alama e tona ra au tangata.

38. Aere atura te toeanga o ratou ki te enua ra ko Niphai, oki mai ra tetai papaki o ratou ki te enua ra ki Hilama ma te arataki mai i te au vaine e te au tamariki a te au tiaki i vaioia ki taua enua ra.

39. E kua akatika maira te ariki o te ngati Lamana kia akariroia a Amurona ei ariki e ei tutara ki runga ake i tona au tangata tei noo ki te enua ra i Hilama; kare ra ona mana kia rave i tetai mea tei kore e tau i te manako o te ariki o te ngati Lamana ra.