1. I apii meitakiia oki au, ko Zenipha, i te reo o te ngati Niphai, e i kite ana au i te enua ra ko Niphai, koia oki, te enua ipukarea mua o to matou ai metua ra, i tonokia oki au ei tutaka ki rotopu i te ngati Lamana, kia kitea te ririnui o to ratou nuku, kia aere atu to matou nuku e ta ia ratou; kareka ra, kia kite au i te meitaki i rotopu ia ratou, inangaro iora au kia kore ratou e taiaia.

2. No reira i maro ei au i toku ra au taeake i roto i te metepara, kua anoano oki au kia papau to matou arataki i te koreromotu au kia ratou; e tangata marokiakia ra aia e te inangaro i te ta tangata, no reira kua akaue mai aia kia taiaia au; kua akaoraia ra au na roto i te akamaringianga i te toto maata; kua tamaki atura oki te metua ki te metua e te taeake ki te taeake, e tae ua atu ki te pouanga o te maataanga o to matou nuku i te metepara ra; oki akaou atura matou ko tei akaoraia, ki te enua ra ko Zarahemela, kia akakite i taua tamaki ra ki ta ratou au vaine e ta ratou au tamariki.

3. No te maata o toku inangaro kia noo ki te enua o to matou ai metua ra, kua akaputuputu au i te au tangata tei inangaro i te aere atu e noo i tona enua ra, kua akamata akaou matou i te tere na roto i te metepara kia tae atu ki taua enua ra; kua rokoia ra matou e te onge, e te tumatetenga maata, no te mea kare matou i tamou ua atu rai i te akamaara i te Atu to matou Atua ra.

4. E ope akera te au ra e manganui i te ori aere ua anga i roto i te metepara, kua patia matou i to matou au puakapa ki te ngai i taiaiaʼi to matou ra au taeake, tei vaitata ki te enua o to matou ai metua ra.

5. E kua aere atura au e nga tangata toko ā katoa, o toku ra au tangata ki roto i te oire ki te ariki ra, kia kite au e eaa te manako o te ariki, e kia kite oki au, me ka tika iaia kia aere au e toku au tangata kia noo ki te enua ma te au, me kare.

6. Aere atura au ki mua i te ariki ra, e kua koreromotu mai aia kiaku e, ka noo au ki te enua ra ko Lihai-Niphai e ki te enua ra ko Siloama katoa oki.

7. E kua akaue atura oki aia i tona au tangata kia akaatea ke atu ratou i taua enua ra, e kua aere atura au e toku au tangata katoa ki taua enua ra kia noo matou ki reira.

8. Akamata iora matou i te akatu i te au are, e te maani akaou oki i te aua o te oire, koia oki, i te aua o te oire ko Lihai-Niphai, e te oire oki ko Siloama.

9. E kua akamata iora matou i te tanu i te enua ki te au tu ua katoatoa mei te koni, te sitona, te kerite, te neasi, te siheuma, e te au ua rakau katoatoa; tupu iora matou ki te maata, e kua manuia matou i runga i te enua ra.

10. No te pakari ra e te karape o te ariki ra ko Lamana, i oronga mai ei aia i te enua ra no matou, kia akatuikaa aia i toku ra au tangata.

11. E noo iora matou ki taua enua ra e ope akera nga mataiti e okotai ngauru ma rua, kua taitaia iora te ariki ra ko Lamana, ko te tupu maroiroi aea toku au tangata i te enua e ko te kore aea e rauka ia ratou i te autu ki rungao ia matou, e kia akatuikaa ia matou.

12. E iti tangata kope ratou e te akamori idolo; no reira kua inangaro oki ratou kia akatuikaa ia matou, e kia kai ratou i te puapinga o to matou rima; i na, kia kai ratou i te anana o to matou au kainga.

13. No reira kua akamata te ariki ra ko Lamana i te akaaraara i tona iti tangata kia tamaki mai ratou ki toku iti tangata, no reira kua tupu te tamaki e te māro i roto i te enua.

14. I te tai ngauru ma toru o te mataiti i toku tutaraanga ki te enua ra ko Niphai, te akainu ua ra e te akaangai ua ra toku au tangata i ta ratou au anana, e te tanu ua ra ratou i to ratou enua i te pae apatonga i te enua ko Siloama, kua tae maira te nuku maata o te ngati Lamana ki rungao ia ratou, e akamata iora i te ta ia ratou, e i te rave atu i ta ratou au anana, e te sitona o to ratou au enua ra.

15. I na, kua oro mai ratou, tei kore i rokoia e te enemi, e tae mai ki te oire ko Niphai, e kua pati mai ratou kiaku kia tauturu.

16. Kua oronga atu au kia ratou i te ana, e te kakao, e te koke, e te simetera, e te rakau, e te maka, e te au tu apinga tamaki i rauka ia matou i te maani, e kua aere tika atu au e toku ra iti tangata katoa kia tamaki atu ki te ngati Lamana.

17. I na, i te maroiroi o te Atua i aere atu ei matou kia tamaki i te ngati Lamana; kua kapiki atu oki au e toku iti tangata katoa i te Atu kia akaora aia ia matou i te rima o to matou au enemi, i akaaraaraia oki matou kia akamaara i te akaoraangaia o to matou ai metua ra.

18. Kua akarongo mai te Atu i ta matou kapikianga, e kua oronga mai aia i ta matou i pati ra; kua aere atu matou ma tona ririnui, tamaki atura i te ngati Lamana, e i te ra okotai e i te po okotai kua ta matou e toru tausani e ā ngauru ma toru. Kua ta matou ia ratou e kua tuaru atu matou ia ratou mei to matou enua ra.

19. Ko au uaorai, ma toku uaorai rima, i tauturu i te tanu i to ratou i mate. Kua aue matou ma te otooto, i te mea, kua mate e rua anere e itu ngauru ma iva o to matou au taeake.