1. E teianei, e maata te tangata o teia uki tei kore i rauka kia marama i te tuatua a te ariki ra ko Beniamina, no te mea te meangiti ua ratou e kua puapinga oki ratou i ra ratou i te tuatau i tuatua mai ei aia ki tona iti tangata; e kare ratou i irinaki i te akonoanga a to ratou ai metua.

2. E kare ratou i irinaki i tei tuatuaia no runga i te tuakaouanga o te mate, kare katoa ratou i irinaki i te tuatua no runga i te aereanga mai o te Mesia.

3. E teianei, no to ratou akarongo kore, i kore ei ratou e marama i te tuatua a te Atua; e kua ketaketa to ratou ngakau.

4. E kare ratou i inangaro kia bapetizoia, e kare oki ratou i piri ki te akonoanga. E iti tangata ke ratou i to ratou akarongo, e kua akapera ratou, koia oki, kua noo ua ra ratou ki to ratou tu kino e te ara; no te mea kare oki ratou i pure ki te Atu to ratou Atua.

5. E teianei, i te au o Mosaia ra, kare ratou e maata mei te iti tangata o te Atua; kareka ra, no te pekapeka i rotopu i te au taeake i tupu ei ratou ki te maata.

6. Kua pikikaa iora ratou i te au tangata e manganui i roto i te ekalesia ra, i ta ratou tuatua taparu, e kua arataki ia ratou kia rave i te au ara e manganui, no reira kua tau kia akoia te au tangata i roto i te akonoanga tei rave i te ara, e te akonoanga e tikai.

7. Kua aratakiia mai ratou ki mua i te au taunga, e na te au puapii i arataki ia ratou ki mua i te au taunga. E na te au taunga i tuku atu ia ratou ki mua ia Alama, te taunga teitei.

8. E teianei, kua oronga te ariki ko Mosaia i te mana kia Alama no runga i te ekalesia.

9. E kare a Alama i kite no runga ia ratou; e manganui oki te tangata tei akaapa mai ia ratou. Ae, tu akera te au tangata, e e akakite atura i ta ratou au ara e manganui.

10. E teianei, kare tetai mea mei te reira i tupu ana ki rotopu i te akonoanga; no reira, kua manamanata a Alama i roto i tona vaerua, e kua akaue atura aia kia aratakiia ratou ki mua i te ariki.

11. E kua tuatua atura aia ki te ariki, i na, teia te tangata e manganui ta matou i arataki ki mua ia koe, e tei akaapaia e to ratou au taeake; I na, kua kitea ratou ki roto i te au tu ara e manganui, e kare ratou e tataraara i ta ratou au ara; no reira kua arataki mai matou ia ratou ki mua ia koe, kia akava koe ia ratou mei te tu o ta ratou au ara.

12. Kua tuatua maira te ariki ko Mosaia kia Alama, kare au e akaapa ia ratou; e tenana, ka tuku au ia ratou ki roto i toou rima kia akaapaia.

13. E teianei, kua manamanata akaou te vaerua o Alama, aere atura aia, ui atura ki te Atu i te mea tana ka rave i teianei au mea, kua mataku aia ko te tarevake aea aia ki mua i te aroaro o te Atua.

14. I muri ake i tona kakuanga i te vaerua o te Atua, kua tae mai te reo o te Atu kiaia, i te na ko anga mai e,

15. E ao toou, e Alama, e e ao oki to ratou tei bapetizoia ki te vai o Momoni. E ao toou no toou akarongo maata ki te tuatua a toku ra tavini a Abinadaia.

16. E ao to ratou no to ratou akarongo maata ki te au tuatua taau i tuatua atu kia ratou ra.

17. E ao toou i te mea, kua akatu koe i tetai akonoanga ki rotopu i teianei iti tangata, e ka akatinamouia ratou, e ka riro oki ratou ei iti tangata noku.

18. I na, e ao to teianei iti tangata ko tei inangaro kia rave i toku ingoa ki runga ia ratou; ka kapikiia oki ratou ki toku ingoa, e noku oki ratou.

19. E no te mea, kua ui mai koe kiaku no runga i te tangata ara, e ao toou.

20. E tavini oki koe noku, e te taputou nei au e, ka rauka ia koe i te ora mutu kore; e ka angaanga koe naku, e ka aere atu ma toku nei ingoa, e ka akaputuputu koe i taku mamoe.

21. E ko tei akarongo ki toku nei reo ka riro aia ei mamoe naku e ka ariki koe iaia ki roto i te akonoanga, e ka āriki oki au iaia.

22. I na oki, ko taku akonoanga teia. Ko tei bapetizoia, ka bapetizoia aia ki te tataraara. E te tangata taau ka ariki, ka irinaki aia i toku ingoa; e ka akakore rai au i tana au ara.

23. Ko au oki te ka rave ki runga iaku uaorai i te au ara a to te ao nei; ko au ïa tei anga ia ratou; e ko au ïa te ka oronga kiaia ko tei irinaki e tae roa atu ki te openga, i tetai ngai i toku rima katau.

24. I na oki, te tuatuaia ra ratou ki toku ingoa, e me ka kite ratou iaku, ka tu mai ratou, ka rauka ia ratou tetai ngai i toku rima katau e tuatau ua atu.

25. E kia tangi mai te rua o te pu, ei reira e aere mai ei ratou tei kore i kite iaku, ka tu ki mua iaku.

26. E i reira e kite ei ratou e, ko te Atu oki au, to ratou Atua, e to ratou Akaora; kare ra ratou i inangaro kia akaoraia.

27. Ei reira e akakite atu ei au kia ratou e, kare au i kite ia ratou; E ka aere ke atu ratou ki roto i te ai mutu kore, tei akapapaia no te tiaporo e tana ra au angela.

28. E tenana, te tuatau atu nei au kia koe, ko te tangata tei kore e akarongo ki toku reo, kare koe e ariki iaia ki roto i taku akonoanga e kare oki au e ariki iaia i te rā openga ra.

29. E tenana, te tuatua atu nei au kia koe, e aere, e ko tei akakino mai iaku, e akava koe iaia kia tau ki te au ara tana i rave ra, e kia aaki mai aia i tana au ara kia koe e kiaku katoa, e kia tataraara aia na tona ngakau katoa, e akakore koe i tana ra au ara, e ka akapera oki au;

30. E kia tataraara toku au tangata, ka akakore au i te au ara ta ratou i rave kiaku.

31. E ka akakore kotou i ta kotou uaorai au ara tetai ki tetai, ko teia taku e tuatua atu kia koe, ko te tangata tei kore e akakore i te au ara a tona tangata tupu, me tuatua aia e, kua tataraara au, ka akaapaia aia.

32. E teianei, te tuatua atu nei au kia koe, E aere, e te tangata tei kore e tataraara i tana au ara, auraka aia e tareia ki rotopu i toku au tangata; e ka akonoia te reira mei teianei e aere atu ki mua.

33. E akarongo akera a Alama i teianei tuatua, kua tata iora aia, kia kore e ngaropoina iaia te reira, e kia akava aia i te tangata o te akonoanga kia tau ki te au akaueanga a te Atua ra.

34. E kua aere atura a Alama, e kua akava ia ratou tei kitea i te rave anga i te ara ra, mei te tuatua a te Atu ra.

35. E ko te tangata tei tataraara i tana au ara, e kua aaki maira i te reira, kua tarē maira aia ia ratou ki roto i te au tangata o te akonoanga.

36. E ko te tangata tei kore i aaki mai i ta ratou au ara, e i tataraara i ta ratou angaanga kino ra, kare ratou i tarēia ki rotopu i te au tangata o te akonoanga, kua tipuia to ratou ingoa.

37. E kua akaaere a Alama i te au mea katoatoa o te akonoanga; e kua tupu akaou te au kia ratou, e te manuia ki roto i te au mea o te akonoanga; i te aereanga ma te tika ki mua i te Atua; e kua ariki i te au tangata e manganui, e kua bapetizo i te au tangata e manganui.

38. E teianei, kua rave a Alama e tona au taeake, ko te au akaaere o te akonoanga, i teianei au mea katoatoa, ma te maroiroi i te apii anga atu i te tuatua a te Atua i te au mea katoatoa; i te akakoromaki i te au tumatetenga, e te takinga kino a ratou tei kore i roto i te akonoanga a te Atua.

39. E kua ako atu ratou ki to ratou au taeake; e kua ako katoaia ratou, koia oki te au tangata katoatoa, ki te tuatua a te Atua, kia tau ki ta ratou au ara, koia oki te au ara ta ratou i rave ra, kua akaueia mai e te Atua kia pure ma te kore e akamutu, e kia akameitaki atu i te Atua no te au mea katoatoa.