1. E oti akera taua au mea i te raveia e te au tamariki tamaroa a Mosaia ra, kua rave atura ratou i tetai papaki tangata iti, oki akaou atura ki to ratou metua ra, ki te ariki, kua inangaro ratou kia akatika atu aia ia ratou kia aere, e te au tangata katoa ra, ta ratou i iki, ki runga ki te enua ra ko Niphai, kia ako atu ratou i te au mea ta ratou i akarongo, kia rauka ia ratou i te akakite atu i te tuatua a te Atua ta to ratou Atua ra i oronga mai ki to ratou au taeake ko te ngati Lamana.

2. E penei ake ka arataki mai ia ratou ki te kite i te Atu to ratou Atua, e kia akakite atu kia ratou i te tuatua tika kore a to ratou ai metua ra. Kia akaora ia ratou i to ratou makitakita ki te ngati Niphai, kia arataki ia ratou ki te mataora o te Atu to ratou Atua, e kia rekareka ratou tetai ki tetai kia kore e pekapeka akaou i te enua ta te Atu to ratou Atua i oronga kia ratou.

3. E kua inangaro oki ratou kia akakiteia te ravenga o te akaoraanga ki te au tangata katoatoa, kare oki i tika ia ratou kia mate tetai tangata; i na, me akamanako ratou i tetai tangata i mamae i te mamae mutu kore, ka ruketekete ratou ma te tumatetenga maata.

4. Kua akapera te angaanga a te Vaerua o te Atu ki runga ia ratou, e au tangata ara viivii roa atu oki ratou. No te aroa mutu kore o te Atu, kua akaora mai aia ia ratou; ina ra, kua mamae to ratou ngakau no ta ratou au ara ko te rokoia aea ratou e te mate, e ka tuaruia aea ratou ki vao e tuatau ua atu.

5. Kua pati akatenga atura ratou ki to ratou metua i te au rā e manganui, kia akatika aia kia aere atu ratou ki te enua ra ko Niphai.

6. E kua aere atura te ariki ra ko Mosaia, kua ui akera ki te Atu, me ka akatika mai aia i tana au tamariki tamaroa kia aere atu ki rotopu i te ngati Lamana, kia ako aere i te tuatua.

7. Kua tuatua maira te Atu kia Mosaia, e tika kia aere atu ratou, e maata oki te tangata ka ariki i ta ratou au tuatua, e ka rauka ia ratou te ora mutu kore; e naku oki e akaora i taau au tamariki i te rima o te ngati Lamana ra.

8. Kua tuku atura oki a Mosaia ia ratou kia aere, e kia rave ua atu i ta ratou e pati.

9. Aere atura ratou na roto i te metepara kia ako aere i te tuatua ki rotopu i te ngati Lamana; e ka tata au i te tuatua no ta ratou au angaanga a muri ake.

10. E kare a te ariki ra a Mosaia tamariki kia rauka iaia i te oronga atu i te basileia kiaia, kare oki tetai o te tamariki ana i inangaro i te basileia.

11. E no reira kua rave aia i te au papaanga tuatua i kotikotiia ki runga i te au papa veo, e te au papa oki a Niphai, e te au mea katoatoa tana i akono e tana i tiaki, mei tei akaueia mai e te Atua ra, kua oti oki i te uriia e i te tataia oki te au papaanga tuatua i kotikotiia ki runga i te au papa auro ra tei kiteaia oki e te au tangata o Limihai ra, e tei orongaia oki kiaia e te rima o Limihai.

12. E kua akapera aia no te inangaro maata o tona ra au tangata, e inangaro tikai oki to ratou i te kite i te tuatua no taua au tangata tei takoreia.

13. E na roto i taua nga toka e rua i tamouia ra ki roto i nga mea punupunu e rua i te ana ra, i uri mai ei aia i taua au papaanga tuatua ra.

14. Kua akapapaia teianei au mea mei muatangana maira, e kua orongaia mai oki ki tera uki ki tera uki, no te urianga i te au reo ke ke.

15. E kua akonoia te reira ra, e kua tiakiia oki e te rima o te Atua, kia akakite atu aia ki te au tangata katoatoa tei noo ki te enua, i te au ara e te angaanga viivii a tona ra au tangata.

16. E ko te tangata oki tei iaia taua au mea ra, kua karangaia aia ei akara, mei te tuatau taito katoa ra.

17. E kia oti akera a Mosaia i te uri i taua papaanga tuatua nei, i na, kua akakite te reira, i te au tangata i takoreia ra, mei te tuatau i takoreiaʼi ratou ra, e tae roa atu ki muri ki te akatuanga o taua are teitei ra, i te tuatau i akatuke ei te Atu i te reo o te au tangata, e i akapueurikirikiiaʼi oki te tangata ki runga i te tua o te enua nei, i na, mei te reira tuatau e tae roa atu ki muri ki te angaia anga o Adamu.

18. E no teianei papaanga tuatua kua tupu te mii maata i te au tangata o Mosaia ra, i na, kua ki ratou i te mii; kua rauka ra ia ratou te kite maata e kua rekareka ratou i te reira.

19. Ka tataia taua papaanga tuatua ra a muri ake; i na oki, e mea meitaki kia kite te au tangata katoatoa i teianei au mea i tataia ki roto i teianei papaanga tuatua ra.

20. E teianei, mei taku i tuatua atu kia kotou, kia oti akera taua au mea nei i te raveia e te ariki ra e Mosaia, kua rave aia i te au papa veo e te au mea katoatoa tana i akono ra, e kua tuku atura kia Alama ko te tamaiti ïa a Alama ra; i na, te au papaanga tuatua, e te uri reo oki, e kua tuku atura kiaia ra, e kua akaue atura iaia kia akono e kia tiaki aia i te reira, e kia papa katoa aia i te tuatua o te iti tangata, e kia tuku atu i te reira ki tera uki, ki tera uki, mei tei tukunaia maira mei te tuatau i akaruke mai ei a Lihai ma ia Ierusalema ra.