1. Akamata iora a Amona raua ko Limihai te ariki ra, i te tuatua ki te au tangata i te ravenga e akaoraʼi ratou ia ratou uaorai mei te tuikaanga; e kua akaputuputu raua i te au tangata katoatoa ki tetai ngai; e kua pera raua kia akarongo raua ki te manako o te au tangata katoatoa no runga i taua akakoroanga ra.

2. Kare ra i kiteaia e ratou tetai ravenga e raukaʼi ia ratou i te akaora ia ratou uaorai i te tuikaaanga; mari ra, kia rave i ta ratou au vaine, e te au tamariki, e ta ratou au anana mamoe, e ta ratou au anana puakatoro, e ta ratou au puakapa, e oro atura ki te metepara; no te maata o te ngati Lamana kare e rauka i te au tangata o Limihai kia tamaki atu ia ratou, i te manako anga e, ka akaora ratou ia ratou uaorai i te tuikaaanga na roto i te koke.

3. Kua aere tika atura a Kitiona ki mua i te aroaro o te ariki, e kua na ko atura kiaia, e teianei, e te ariki e, i akarongo putuputu ana koe ki taku au tuatua, i to tatou au tamakianga ki to tatou au taeake, ki te ngati Lamana ra.

4. E teianei, e te ariki, mei te mea e, kare koe i kite iaku ei tavini puapinga kore, e mei te mea, kua puapinga taku au tuatua kia koe na, te inangaro nei au kia akarongo katoa mai koe ki taku nei tuatua, e ka riro oki au ei tavini noou, e ka akaora i teianei iti tangata mei te tuikaaanga ra.

5. Kua akatika akera te ariki iaia, kia tuatua atu aia. Kua tuatua atura a Kitiona kiaia na ko atura,

6. E akara na ki te mataara i muri, tei aere na roto i te aua i muri, i te pae muri o te oire. Ko te ngati Lamana, koia oki, te au tangata tiaki, te kona ra ratou i te po; e tenana, kia tuku atu tatou i tetai akaueanga ki rotopu i teianei au tangata katoatoa, kia akaputuputu ratou i ta ratou au anana, e arataki atu ei ki roto i te metepara i te po.

7. Ka aere au, mei taau i akaue, e ka oronga atu i te tuanga openga i te wina na te ngati Lamana, kia kona ratou. Ei reira tatou e aere tika atu ei na roto i te mataara muna na te pae kaui o te au puakapa, ia ratou i kona e i moe ei.

8. Ka na reira tatou e ta tatou au vaine, e ta tatou au tamariki, e ta tatou au anana i te aere atu ki roto i te metepara ra; e na te enua ra ko Siloama tatou i te aere.

9. E kua akarongo maira te ariki ki ta Kitiona au tuatua.

10. E kua akaue atura te ariki ko Limihai kia akaputuputu mai tona ra au tangata i ta ratou au anana; kua tuku atu aia i te tuanga wina na te ngati Lamana; kua oronga akaou mai aia i te wina ei apinga aroa kia ratou; kua inu ua atu ratou i te wina ta te ariki ta Limihai i tuku atu kia ratou.

11. E kua rave atura te au tangata o te ariki ko Limihai e ta ratou au anana i te po ki te metepara, e na te enua ra ko Siloama ratou i te aereanga na roto i te metepara, e aera tika atura ratou ki te enua ra ko Zarahemela, e kua aratakiia e Amona e tona au taeake.

12. E kua apai katoa ratou i ta ratou auro katoatoa, e te ario, e ta ratou au apinga oko maata tei maranga ia ratou, e ta ratou ra kai katoa, ki roto i te metepara; e aere atura ratou.

13. E ope akera te au rā e manganui ia ratou i roto i te metepara, tae atura ratou ki te enua ra ko Zarahemela, e kua piri atu tona ra au tangata ki to Mosaia, e riro iora ratou ki tona au tangata.

14. E kua arikiia ratou e Mosaia ma te rekareka, e kua ariki oki aia i ta ratou au papaanga tuatua e te papaanga tuatua oki tei kitea e te au tangata o Limihai ra.

15. E kite akera te ngati Lamana e, kua aere atu te au tangata o Limihai ki te enua i te po, unga atura ratou i te nuku ki te metepara ra kia arumaki atu ia ratou.

16. E arumaki akera te ngati Lamana ia ratou, e kia pou e rua rā, kare e rauka ia ratou kia aru atu i ta ratou takainga vaevae, no reira kua ngaro ratou i roto i te metepara.